مسلسل عمي بوشتى ودادة حادة

مسلسل عمي بوشتى ودادة حادة.

النهار مشمش وسخون، وعمي بوشتى قنبا بالزيث بلدية والكرون، حتى طحاث الرزة فوق راسو بgرون، وخرج لبرا أينوس، ولاقي حد الكرفيط تحت يباطو ومgعد جناحو بحال بيبط، أيصغب فيها قرقور الدكر، gلس مور الدار، وجبد حد الgارو وشعلو وبقا أينتر فيه،
وهو يشوف حد خينا طالع مع الطريق رافد حد الشكارة بحال هذيك دي عند الموظفين، ولابس حد الكوسطيم رقيق، وكيف دعرفو عمي بوشتى فضولي، بقا شاد الهم دالgارو ونسا راسو حتى وصلثلو العافية لشنايفو وحرقاثو، وهو يرمي داك البونت وبقا أيخطي ويبزق ويحك فشنايفو، الحاصول وما فالدين السيد ما جا يوصل للجامع حتى كان عمي بوشتى سبقو ليلا.
السيد: السلام عليكم.
عمي بوشتى والفقيه: وعليكم السلام.
السيد: أنا جيث من مندوبية الشؤون الإسلامية فإطار برنامج محو الأمية باش نقري هنا فالدوار عندكم.
عمي بوشتى: ومناين نتينا فالخوث؟
السيد: أنا حمزة ولد بوجمعة دقدور.
عمي بوشتى: كانتينا هو ولد بوجمعة دي خدام مع وزارة الأوقات؟
الفقيه: مرحبا بك أسيدي حتى حنا هنا خاص دي يقري هذ الناس، أنا عييث معهم وما بغاوشاي.
عمي بوشتى: شني هو برنانج نحو الأمية عاوث؟
الفقيه: قالك أسيدي باغيين يقريوكم، باش دعرفو دكتبو ودقراو.
عمي بوشتى: عليها داك المهيبط دحمو قالي راه باغي يقرا، وهو سايق لخبر لهذ الشي دالبرنانج.
حمزة: راه اسمو البرنامج ماشي البرنانج.
عمي بوشتى: بحال بحال، وفاين ماشي دقري؟
حمزة: فجامع.
عمي بوشتى: واااء وحنا فاين ماشي نصليو؟
الفقيه: دي سمعك يقول هذا قاثل راسو بالصلا.
عمي بوشتى: سترنا الله يفظحك يا هذ المبهدل.
حمزة: ماشي نقريو بين العاصر والمغرب.
الفقيه: وشكون دي ماشي يجي عندك فهذ الوقت؟ الناس كل هاو فاين ملهي مع شغلو.
حمزة: إذن نقريو بين المغرب والعشا؟
عمي بوشتى: أنا كادلقي ريي يا الله نشربو حد البراد داتاي عندي فالدار، ورجع فحالك أوليدي، هد الناس أيجيو للجامع غي فسبعة وعشرين، وغي باش يعرgوها طعام. الفقيه أيقرا هنا وهوما شي أيرونض فالمسيد، وشي أيكمي مور الجامع، وحتى هادوك دي أيكونو أيصليو أدصيبم ناعسين وما عارفين الفقيه شني أيقول.
حمزة: أنا جيث عوال نقريكم وماشي نلقي جهدي حتى تتعلموا دقراو ودكتبو.
عمي بوشتى: زعما أوليدي نتينا دي قريث طفرتو؟
حمزة صرطا سخونة وبقى أيبرقق فعيناه وقال فنفسو: والله يا عندك الحق.
الفقيه: لا أبوشتى ما دقولشي هايثاك القراية مزيانة، وعلى الأقل تعلمو غي باش دقراو القرآن بعدا.
عمي بوشتى: فهذي عندك الصح، أنا حد الموصحاف جابولي حمد دعبقادر دلزعر ملحج وغي منزلو فالغرفة شبع غبرة.
صافي أسيدي يا الله نمشيو نشربو حد البراد داتاي وعاد نكملو الهدرة فهذ الشي.

نخليو الناس دشرب أتاي، ونرجعو عندم من بعد باش نشوفو الإثارة دالبصح.

وعلى المودة نلتقي.
طبتم وطابت أوقاتكم بكل خير.

للاستاد احمد لزعر التسولي

تصنيف : طرائف عمي بوشتة