عمي بوشتى ودادا حادة ودعو الصافية وقبطوها بالكرع عمي بوشتى فاللول وحادة موراه هازا حا الصاك كلو مقطع ومعاوداه بالخياطة لاقيا فيه حا الgاميلة دالحمص وشواي دالعدس وحا شويش دزيتون مشرط معبياهم للسعدية ختا وحا المطلوعة و حا اللحسة دالسمن وشي بيضات مسلوقين دبيبي ما ياكلو فالطريق الحال بعيد ولاقيا على راسا حا الكموسة جامعا فيها الشراوط ديالا دي مشي دلبس فالخطابة دغزلان بنت ختا وعمي بوشتى سابقا ب200 ميط وشواي شواي يدور موراه و ينgر : ألاهلاه أداك مو كرافط كا الكار مشي يبقى ايعاينك ؟ ودادا حادة مسكينة لاقيا غي الصباط دالصافية صغير عليها بجوج نمرات ضبرا ما خلاشاي فيها وهي ادجاوب عمي بوشتى : أعاين ألراجل راني غي أنعواج بهاد الهركاس .
وصلو لحد اولاد ازباير صابو الكار باقي خاصو جوج بلايص ، واحد الكار يا سيادي شني ماشي نقلكوم سابق المسيرة بعشرين عام
لكريسون : فاس فاس فاس . فين غادي اعمي
بوشتى : ماشيين لفاس يلا كتاب
الكريسون : طلعو . أرا ألميمة داك الصاك نديرو فالصندوق
حادة : ألا قالا . صاكي نلقيه حدايا
بوشتى : هايتاك . لا تيقشاي بيهم راهم هنايا غي البانضي لخاه
الحاصول أسيادي طلعو فالكار صابوه عامر وجوج بلايص خاويين فالتالي دالكار gلسو فيهم . حادة جيهت السرجم وعمي بوشتى مع جنبا حقاش أيغير عليها . جا عندم الكريسون
بوشتى : بشحال ادقطعو لفاس
الكريسون : 500 للبلاصة
بوشتى : أربي السلامة كا خمسمية كاملا ماحشمتشاي . حنا موالفين ديما نمشيو غي بربعمية
الكريسون : خلص ولانزل أعمي هادي هي الطريفة
حادة : وحتى نتينا لاش هاد الكار كا بقينا انعاينو السريع خير
بوشتى : نحوطوك نتينا غي للفهاماث . قلك السريع . كاين شي سريع من الحد لفاس ؟
المهم عمي بوشتى قطاع جوج ورقات . حا الشويش والكار قلع .
دادا حادة بقات ادشوف ليهن ولاون صابت الشباب كلشي gالس ولاقيين الكيت فودناهم وهي دصقصي عمي بوشتى
حادة : دابا هادو شني داك الشي دي خارج من ودناهم
بوشتى : هادو الدراري دليوم هيتا لاقيين ايتشارجاو من ودناهم بحا دي أيشارجي التيريفو
حادة : إيوا العجب هدا
حا الشويش ودادا حادة تفكرت الصاك فتحاتو وجبدت داك المطلوعة دهناتا بشويش دالسمن وقسماتا وعطات النص لبوشتى والنص ليلا وقشرت البيض وبداو يفطرو
بوشتى : والله يا قتلني بوهيوف
حادة : ولياه لا . معضورم ايقولو السفر ايجوع
وصل الكار لواد امليل . الشيفور عطاهم ربع ساعة اللي بغى يفطر
بوشتى : بليهودي لاخور حتى وهناها مطلوع عاد بانلو يوقف
واحد الشواي طلع مول بيمو وكلينيكس والمسكة ودادا حادة نخصت عمي بوشتى
بوشتى : شني خاصك عاوث
حادة : شرينا حا القطيب دالمسكة ما نمضغو
بوشتى : وشحال فيك دالسقاطا دقول نتينا طفيلة صغيورة . أجي لهنا أداك الحيبور . عطيها شي قطيب دالمسكة كما دسكت ودهنينا وهاك تخلص . هاد الجوج دريال دي جيبنا معانا مشي نقاضيوها وحنايا باقيين غي فواد امليل
حا الشواي و هو يطلع مول الشرابل . حادة ادمضغ فالمسكة ودشوف فداك الشرابل
حادة : والله ايلا غزيولين عندو هاد الشرابل ما دشريليشاي حا الشربيل أبوشتى ؟
بوشتى : شني هو ؟ الشربيل ؟ ياك عاد شريتولك فالسبوع دحمو . كا قطعتو عاوث ؟
حادة : ايوا حمو راحنا قرابين نزوجوه
بوشتى : نقيلو غي نضيعو فالفلوس الضيعة ما بغاها ربي وزايدون راهم تجمعو العولاما وقلك الشربيل فالكار حرام هههههههه
الرحلة مازالا طويلة وراني عييت بالكتابة . نلتقي في الجزء الثالث
دامت لكم البسمة
توقيع: عزيز البورقادي.
0 commentaires:
Enregistrer un commentaire