طرائف تسولية: التسولي ومرض الزوجة

السلام عليكم الحبايب
جيت نعودلكم وحد طرفة دواحد البالا تسولي عبد الله كيضحك ويقشب بزاف خصوصا مع خوتو وخواتاتو والعاىلة .. 
مرت خوه محمد دارت العملية قبل ايام الله اشافيها واشافي جميع المسلمين المهم مرت خوه كبيرة فسن شوية وراجلها مزال مصحصح داوها لصبيطار وقالولهم مع جوج دنهار غيدخلوها لبلوك دير العملية المهم قالوها بسلامة غنخرجو نتغذاو ونرجعوخلاوها في طبيب وخرج عبد الله هما وخوه محمد وشي حباب معهم تغذاو في الريسطورا رجعوا لقاوها دخلت لبلوك بقاو كيعاينوها حتا خرجت. مع البنج طالت شوية عاد فتحت عيناها زاد عندها خو راجلها سلام وش عرفتني قالتلو: اه .قال شكون انا ؟ انت عبد الله قالها على سلامتك . الله اسلمك قالها عرفتي شني؟؟ قالتلو شنو ؟ قالها غنتي حليت عيناك ومحمد خاي كحل فوجاه وقبح ...
وقالها و نزيدك منين خرجنا نتغذاو حنا ضومنضينا الحوت ومحمد خاي ضومانضا كسكسو هههه 
قليل لي غيفهم المعنى.

توقيع: خالد جمال

اقرء المزيد

كرم الضيافة بين الماضي والحاضر

السلام عليكم ورحمة الله وبركاته

حوار بين الحاضر والماضي

الحاضر : تجي عندي ونجي عندك ولات صعيبة 
الماضي : ما يجي عندك غي كل حبيب او حبيبة
الحاضر : اكرام الضيف ولا فيه الزواق ورجع مصيبة
الماضي : اكرام الضيف واجب ومن اخلاقنا الحميدة
الحاضر : الضيف مناين يخرج نقلبوها تعياب فيه وغيبة
ومولات الدار تقول : انا عييت ايما الحبيبة
الماضي : المرا زمان تفرح بالضياف وتطلب غي شي ترgيبة
يجيو شي ضياف او غي جارتي الحبيبة
ونgلسو على الصينية والمجمر واتاي منعنع او بالشيبة
الحاضر : الزيارات ولات مكلفة وخاصها هدية تجيبا
ومن قلة الشي تقول نبقى فداري الحبيبة
الماضي : قال سيدنا عمر رضي الله عنه وارضاه : الكرم شيء هين
وجه طلق وكلام لين
ومن هاد المنبر نقولكم تزاوروا كل ما جابتا الوجيبة
الحاضر : ايييه فاش فرطنا ؟ التزاور وصلة الرحم على حساب دنيا غريبة
تعطيك نهار وتضحك عليك كي الديبة

اللهم gلسة ديال اتاي مع الاحباب ولا قطع صلة الرحم .
وعلى المودة نلتقي.

توقيع: رقية البورقادي

اقرء المزيد

سي الطاهر التسولي

بعدما فعل فعلته التي فعل سي الطاهر. وإن كانت ردت فعل للاحتقار الذي طاله من سكان تلك القرية. لكن تبقى إهانته أشد وأقوى. ولاغروةولاعجب فنحن في زماننا هذا نأكل لحوم الكلاب والحمير من عند الجزار وبالاداء ‘حبينا أم كرهنا
خرج سي الطاهر من القرية خائفا وهو يترقب لحاقهم والقبض عليه. إلا أنه نجا وبأعجوبةالى حين. 
صارسي الطاهر يتنقل من قبيلة إلى أخرى. بعدما ارخى لحيته وتخفى في ‘مرقعة ‘وأصبح يعيش بين‘طالب فقه ‘وهداوي‘
يقول الراوي :أن سي الطاهر كان طويل القامة عريض المنكبين. ذات يوم رمت به الأقدار ليجتاز واديا‘حامل ‘ووجد على شط النهر أحد تلامذةالمسجد ‘محاضري‘لم يستطع عبر النهر. فلما رأى سي الطاهر يتأهب لقطع النهر استنجد به واستعطفه. ليقطعه الواد. 
لم يعلم ‘‘المحضري ‘‘أن من سيطعه الواد هرم من أهرام القرآن. 
رق قلب سي الطاهر وتذكرذات الموقف الذي حصل له. 
حمله على كتفه ودخل الواد حتى توسطه ووصل إلى العمق. فإذا به يسمع فوق رأسه ‘‘المحضري‘‘يتلو الآية الكريمة ((سبحان الذي سخر لنا هذا وما كنا له مقرنين)) فاشتد غضب سي الطاهر وفاض غيضه.وما بيده إلا أن يرمي به وسط الوادي وهو يتمم الآية الكريمة ((وإنا إلى ربنا لمنقلبون)) وتركه يموج ويصرخ.. !!!!!!/
اقول قولي هذا واستغفر الله لي ولكم ولجميع المسلمين والمسلمات.

توقيع: ذ جمال لشخم

اقرء المزيد

بوشتى وذكريات الطفولة 09

السلام عليكم جميعا .
كنت نحرث اخوثي الحبايب فشي ديور مسيخين هما لي بقاولي بلا حرث كاو نعلق المحراث على حاد جوج قيابر مفضيين واحد ايطيح والآخر اينوض وشربوهالي بالمغرف نص نهار وما ندهتشي حتى مطيرثاين صحيحة وجابولي الغذا وتغذيث وروحت حاد ساعة دالمgانة وقلت زعما نخلي حتى هاذ الحناسر يروحو شواي اوا ملي نوضت شديث ذاك المحراث وبغيث نكمل الحرث وبقيث انقول أرا ما أرا وشكون داها فيك وفهذرثك البهايم غا مصنgرين حرام واش بغاو يزيدو حتى خط كاو نشبر معاهم بحاد جوج شعطاث لبين كتافم وهما ينعسو للأرض وقالولي إلا نتا الراجل نوضنا وعييث منغرذ فيهم والو واش بغاو ينوضو طلعولي السكر وأنا نفتخلم وطلقتم هزيث عليهم ذاك المحراث والحوايج وشذيث ذاك بو صلاح من تما وأنا نغرذ فيهم حتى للدار وسمحت فيهم برا ودخلت باش نطس يالاه أنا حيدت البوط وخسلت فراقشي وطرفت عليا وهو تيليفون صونا جبذتو باش نشوف شكون ايصوني عليا جبرتو نبيل يسف اوا صافي هاذشي لي بقا نقصني ومبغيتش نجاوبو المهم صدعني بالصونيط شي 10 دالمراث وجاوبتو فالتالي .
أنا : مالك انبيل قالبلي مخي بالصونيط ياك لاباس شني واقع
نبيل : اوا غير جاوبني أصحابي بالعقل وبالشويش مالك هاز علينا شوكثك
أنا : كا كنت حدايا كا هزيث ذاك بو صالح دكلاو بيه البهايم وداكل بيه حتى نتينا اسي نبيل
نبيل : برد برد أصحابي وتلاقاني للقهوة راني بغيث نهضر معاك ضروري
المهم بدلت عليا ذاك الشطايط دكونت انحرث بيهم وخرجت ومشيث لعندو للقهوة gلست معاه وبقينا مهاودين وهو يقلي واش مصوناش عليك AhMed DaiNan قلتلو لا ومناين مشي يجيب نمرا ديالي باش يصوني عليا قالي راني تلاقيثو هاذ النهار فالحد ولاد زباير وطلبلي نمرا ديالك وعطيثالو حنا هايثاك مزالين انهضرو عليه وهو يصوني عليا وجاوبتو
أنا : أهلا أهلا سي الدعنين زارتنا البركة شخبارك لاباس عليك اخاي كلشي مزيان
الدعنين : لاباس الحمد لله اخاي عبد المالك الله يبارك فيك كلشي بخير فهاذ الساعة واش عرفتني لاش صونيث عليك
أنا : لا معرفتش اخاي وباش مشي نعرف كا قالولك عليا انكزن وااااء
الدعنين : اخاي عيطت عليك على حساب عمي بوشتى كنت عندو أنا هاذ النهار وقالي قول لعبد المالك يجي لعندي ضروري راني محتاج بيه
أنا : واخا اسيدي مرحبا ولاكن أنا مكنعرفشاي الدار ديالو فاين جاث باش مشي نعرفا
الدعنين : غير دنزل فالحد اخاي عبد المالك سول الناس من طرف غير قلم الدار دبوشتى دالحاج حمو ينعثوها لك
اوا هي هاذيك لغذا فالصباح نوضت بكري خرجت بلا فطور وتلاقيث ذاك المشقوف ذاك الكار ذايمشي لفاس وركبت فيه باش نمشي للحد سعا واقيلا كا مشيث على رجلاي كوصلت بكري الكار حتى هو فيه النهشا ايزيذ ويوقف اوا غير بلغنا للقليعة وهو يسكث وكوماصا الدخان يطلع منو وعييث منعاين كما يصغبوه ويمشي والو وأنا تكا على الرجل من تما وأنا نسوط يا حتى لولاد زباير وصلت مسرسط بالعرق وسولت واحد مول لكروسة على الدار دعمي بوشتى وقالي ياودي دابا.

توقيع: عبد المالك الرياني

اقرء المزيد

جناسات تسولية

نجد في لغتنا التسولية الكثير من الجمل ذات الطابع الجناسي والتي صيغت بطريقة فيها بعض الموسيقى الهدف منها هو إثارة الانتباه لا غير بحيث إن أغلبنا لا يعرف معنى الكثير من الكلمات التي تكمل هاته الجمل، ومن هاته المسكوكات نجد:
فلان غي باباه محطوط منطوط من منكم يعرف معنى منطوط؟.
فلان عندو حد الدري ما أيخبش ما أينبش.
فلان طرب فلان على الرفيفة دقلبو خلاه أيخبط ويزخبط.
فلان بقا واقف ناقف من الخوف.
فلان أيلقي غي الكحلة فالمهرية أو فلان لقاها كحلة زحلة.
فلان ما أيصبح ما أيربح.
واخا عليك، حتى يصبح ويفتح.
فلان عاطيها غي للسريط والمريط.
فلان جا فالليل والطلام وسلملام.
هذ الليلة بايث الزفزافي والنفنافي........

توقيع: أحمد لزعر التسولي

اقرء المزيد

عمي بوشتى وذكريات الطفولة 08

كنا gالسين ما بينا ما علينا انراجعو داك الوريقات والامتحان قرب "شي دعيوة دالخير "ومع كنت لاقي سيلونص للتيلفون فواحد اللحظة جيت نشوف شحال فالساعة وانا نصيب الشريفة مصونيا عليا شي 5 دالمراث ومخليالي شي ميساجات قالك اسيدي بوشتى بغاني ضروري وزاد كملاتا قالا يجيب معاه البنذير .بقيت انخمم مع راسي الحال برد والعراس تسالاو والناس ملهيا فشغلا دي ايحرث ايحرث ودي اينفط زيتونو اينفط .ولكن وخا هيتاك بقيت شااك ما شاك قلت ماربما دكون شي همزة نيشان ودكون شي قصارة فاعلة تاركة وخا غا سبووع او طهارة... هي هاديك نوضت ومشيت يا سيادي وصلت لواد امليل مع شي لعشرة دصباح والقاضية خاااوية ادسفط مكاين لا سوق الناس قلالين عيث نشوف كما يبانلي شي واحد من الناس دالقبيلة ودقووول .وصلت لحد اولاد ازباير انا نزلت وايبانلي نبيل يسف ماشي ايبهنس وانا نعيطلو اهلا اهلا البلاا كيف لاقي مزيان بخير اشني ادلقي واش جابك لهنا.
نبيل بعد تبادل السلام: ايوة اخاي عاد سالينا داك لحبات وقشرنا داك لمطاير وقلنا نgوزو لبيرمي من حد الغفلة دراري كولشي لقاواه وانا مزال وخا نشريو غا شي c15 نخطفو بيها لبلايص. ههههه دخلنا لقهوة بقينا انهضروا..شي ساعة هيتاك .ايوة قلتلو مشي نخليك دابا غنgوز عند بوشتى نشوفو لاش بغاني بحرا نشد الطريق ونرجع.
نبيل : وليني بوشتى مااغدصيبوشاي فالدار .صباح كنث هوااد شفتو اينقل الزيتون لرحى على حا لحمارة ماشي يطحنو.
انا : 🤔🤔 (تفكرت الهضرة د عبد المالك الرياني)صافي بوشتى عول عليا هاد النهار وليني مافيها باس وخا نعبيو معانا غا شي جوج يطرو د الزيت ولا والو.
هي هدك نعتلي نبيل للرحى ومشيت ديريكت وصلت وانا نجبر كلب ناعس قدام لباب كان ماشي ياكلني خرج بوشتى ايطيير اطغس ليهن ابليهودي لخر الله ينعل ليهودي باباك ودرع معاه بحد القلابة هود ايزgي . اهلا وليدي الدعينن اهلا اهلا سلمت عليه دخلنا صيبتو وااحل غي بوحدو عرفت القاضية ماشي تا لتم قالي gلس روح بعدا. البغل ايدور بوحدو وهو ايحرك الزيتون والبغل ايوقف هو يزرع معاه ويجي يحرك والبغل يوقف....حتا قالي نوض اوليدي دور هاد المسخوط ايغش بليهودي لاخر بقيت اندور ندور ندور مور داك لبغل حتا جاتني الدوخة. هي هاديك عمرنا داك شوامي وبقينا انزيرو فيهم داك لحدايد تقالو ومع فيهم الزيت جيت نزيير وفلت يدي ونتشقلب 3 تشقليبات. وخا هيتاك نوضت بالزربة وكانت الفرحة كثر من داك الطيحة حيت بوشتى ما شافنيش كان ايعمر الما من الكانون بقيت انشوف فداك النقير وانتفلق بالطحك دخل بوشتى شافني وتاهو بدا ايطحك وخا ما عرفش علاش "ونتوما يا البلاوات راك عارفين قصة النقير " قالي مالك اوليدي ياك لابس. قلتلو اودي غي انتفكر داك الناس دgوزو داك الطفولة وايعاودو انبقا انموت بالطحك غي بوحدي ودابا راني تفكرت احمد لكروني مناين كان طاح فالنقير فاش كان باقي حيبور.
بوشى: اييه اييه هههههههه فخباري كانو ايعاودها الناس عدنا وطحا مشهور باحمد النقير. قتلو هي مشي دعاودنا شي قصة ديالك من الصغر.
بوشتى :يا وليدي شاي gوزنا فالصغر ما gوزوشي شي واحد ما خلينا دمالقيناهشاي . gلسنا انشربو اتاي وبدا ايعااود.
بوشتى : اييه اوليدي مناين نبدالك. مهم نعاودلك على الحرث. واحد النهار كنت باقي صغر منك شويش وكيما ها الوقيتة تقريبا الواليد كان ايحرث وانا عاد خرجت من المسيد وعطاتني يما كليت وقالتلي نوض عبي الماكلة لبوااك راه ايحرث نوضت هزيت داك الخير ومشيت وصلت حطيت الماكلة حصر الواليد الله يرحمو داك لبهايم وgلس ياكل وانا قلت نوض باش نتعلم نحرث زعما ومشيت انتسنطح ومع البهايم ايعرفو الصوت دالواليد قلت حتا انا نغلط الصوت باش يخافو ويزيدو قبطت داك السكة خويتاا من التراب وعليت المحرات بالدجهد زعما وخا بحرا حركتو بجوج يداي قبطت داك الردجاع (بتشديد الجيم) حشيتو فعنقي وقلت اراا علم والبغل علا راسو ودار شاف فيها وسقط ودناه ويعلي رجلاه بجوج خطاني على بونت ويلغط فالحدور وانا شاد فالمحرات وهو ايطلع فسما ويهود والقنبة فعنقي وتبهطت بقيت غي انرمي رجلاي موراهم والواليد تامك مورانا وخدام ايصهل وااااحيد الردجااااع حييد الردجااااع من عنقك آابليهودي لاخور وخا هيتاك بالبهطة بقيت شاد غي فالمحراث وخدام عليهم غي هوووو هووو هووو يا حتا وصلو للجرف دالواد عاد وقفو حيدت داك الردجاع من عنقي وخدام انهش وقلبي ماشي يسكث وصل الواليد تاهو ويطلع معاي بحاد اللطسي ويعاودلي باليد الاخرى. ابليهودي باغي دموت انا انقولك سرس الردجاع من عنقك و نتي تابعم. بقيت مبهوط ما حسيتش بداك اللطسات كلل وبالواليد خدام ايعرق ويسب شويش ولبهايم يترسو مع الواد عاااوث ونتمكو موراهم حتا وصلو جيهت باباين عياد كان ايحرث على حاد لحمارة جايفة وحاد البقرة قبح منا ادهز رجل وطرح ررجل. شافنا وطلق من داك الزوج ديالو وعاد جا ايجري وعرط للبهايم من دجيه لاخور وعاد شديناهم بكشايف وكان مشي يعاودلي حا لقتلا تما غا باباين عياد ما خلاهشاي ايوة ربطنا داك الزوج ورجعت جيبت داك لغدا وتغدينا مجموعين وهذا مكان وشلاا ما وقع اوليدي يلا جينا نعاودو على بحال هاذ القصص ما ماشيشاي نساليو كلللل. حنا هيتاك ونصيبو الصافية دخلت جابتنا الماكلا. شي كرون تبارك الله عاد خرجت من الفرنة والبيصارة مزالة ادغلي بكامون والحار وجبدت ليطرو دزيت من ساك.
بوشتى : كا هنا غارقين فزيت تبارك الله ونتي ماجينا بيه. نوض أوليدي الدعينن عمر داك زلافة من النقير نقيسو الزيت الجديدة انا مشي نغسل يداي ونجي. بوشتى خرج والصافية اخي نسولك .
أنا :ايييه مرحبا شني بغيت.
الصافية : عبد الحق نقطعلو الحس .طاري يهضر معاي ويصيفطلي الميساجات حتا من التصونيا ما باقش ايصوني كللل.
أنا : حتا حنا ما بقاش ايرgب علينا واقيلا مع الخدمة مزيراا واها.
الصافية : الله يعطيك الستر يلا شفتو او هضر معاك قولو راه الصافية سولت فيك .
بوشتى دخل وسمع غي داك سولت فيك .افيمن ادسول .!! وشكون هذا.
الصافية : ألا ابا غي يما سولتني على الدعينن قالتلي جيبو يقصر معانا هاد الليلة. 

بوشتى اييه مشي يقصر معانا إن شاء الله وليه لاين ماشي. 

أنا : لاا والو اعمي بوشتى والله يلا راني مشغول هاد اليام والامتحانات قربو وخصني نمشي ضروري 

هي هاديك تغدينا وخليت عمي يوشتى بخير عمر حاد 5 يترو دالزيت وحلف عليها اييه "الخير والكرم " وقلي سلم على موالين الدار والناس دالمجموعة كاملين وراه غير بغا يشوفني وبغا يشوفكم واحد بواحد. وتميت خارج والصافية بقات ادور فراسا عرفتا القصد ديالا وشفت فيها وقلتلا كون هاني اعمي بوشتى سلامك يوصل إن شاء الله.

وأعتذر عن الإطالة الgلسة مع بوشتى والقصص ما دشبعش منم...

وأخيرا امرر الكرة لحديدان المجموعة سي عبد المالك الرياني هو دي ايعرف للتحرميات دعمي بوشتى وراني عاودتلو عليك وقالك بغا يشوفك ضروري 

ونتا تكلم ابومناول د "كريط" للمرا ادعيطلك وزور نسيبك وتهاود معاه شواي دنيا والزمان هذا.

توقيع: أحمد الدعينن

اقرء المزيد

قصيدة الباسبور لخضر

السلام عليكم
بعدما راج مؤخرا لدى الشباب من حب ركوب الأهوال و الارتماء بين أحضان الأمواج العاتية و مقارعة الموت عبر قوارب الموت مأمولا وصول حلم الفردوس الموعود بالضفة الأخرى أوروبا.
فكان فكرة ان أشارككم قصيدة بدوية قديمة من شعر قبائل بني يزناسن للشيخ *علي التينيساني* وبعد قراءتها و تحليل مضامينها وجدت انها تنقسم إلى مراحل اجتماعية من حياة شيخنا رحمه الله و هي:
1/ مداعبة حلم. 2/ حلم يتحقق. 3/ سفر حلم. 4/ واقع حلم.

.....سأعرض لكم المرحلة أولى من حلمنا ......
1/ مداعبة حلم

لو كان الباسْبورْ عَنْدي - نَمْشي لَ فْرانْسا نْولّي لاباس

مْنين الباسْبورْ والو - ما عَنْدي ما نْدير يا بَنْت الناس

لو كان الباسْبورْ عَنْدي - نرْكبْ فَ الطّايْرة ونڭْطعْ لبْحور

نخْدمْ ونْدير المْلايَنْ - نَشْري لوطو نْجيبْها فَ البابور

لو كان الباسْبورْ عَنْدي - نڭْطعْ لَ فْرانْسا و نخْدَم فَ النّور

نتْرفّهْ ونْجي لْ وجْدة - نبْني لَكْ حمّامْ ونْزيدْ السّور

لو كان الباسْبورْ عَنْدي - نڭْطعْ لَ فْرانْسا نْزيد لْ بلْجيك

نْصيفطْ لَكْ الدّْراهَمْ - وانْتِ حرية شْكون يعنى بيك

لو كان الباسْبورْ عَنْدي - نَدّيك مْعايَ عْلاش نْخلّيك

نخْدَمْ وانْتِيَ حْذايَ - ننْسى هْمومي ونتْونّسْ بِك

ڭالتْ لي يا الرجَلْ - اتصّنَت لِيَ بْغيت نْسقْسيك

الضفْدعة واش ڭالتْ - نْهار اللي لمّْهُم الملِك

سقْساها سيدْنا سُليْمانْ - وُڭالْ يا امْرة واش بِك

عْلاش ڭْعدْتِ انْتِيَ - والوُحوشْ كُلّْ هرْبت عْليك

ڭالتْ له حْروڭْ بطْني - وعَزّ وْطاني خِيرْ م بْلاد الناس

الدنيا مْنَ ڭْبيل تغْدَرْ - هذا زاهي وْذاكْ ڭاطَعْ لِياس

لو كان الباسْبورْ عَنْدي - نڭْطعْ الَّى لْمان نْولي ريِش

نْصيفطْ لَكْ البْلايَزْ - حاَيّكْ النّيلو آ امْرة لا تبْكييْش

لو كان الباسْبورْ عَنْدي - نْدير المانْدة ونرْسَلْ دَبّيش

نشْري لَكْ ڨيلاّ جْديدة - و رَّڭْدَكْ يا مْرة غي فَ الرّيش

لو كان الباسْبورْ عَنْدي - ندّيكْ مْعايَ وْما تڭّعْديش

ارّدّكْ كي بْناتْ باري - تمْشيْ فَ الزنقة وْما تنْعرْفيش

لو كان الباسْبورْ عَنْدي - نكْري ڭرْسونة وْما تخّدْميش

مْنين الباسْبورْ والو - واسّمْحي لِيَ آ اخْتي ما عَنْديش

طْلبْت الباسْبورْ لخْضرْ - ڭالو لي واشْتا تعْملْ بِه

ڭُلْت لْهُمْ بِهْ نخْطَرْ - نمْشي لَ الخارِجْ ونْولّي بِه 

سهّلْ ربي وافْقوني - وْڭالو لا دّيرْشي كي لخْرين

احْرزْ الباسْبورْ لخْضرْ - ويلا بيَعْتُو راكْ تنْدم فَ الحين

يا دّيتو و دْخلْت نجْري - عْلى لوْلادْ كامْلة فرْحوا بِه

ڭالوا هذا سْبابْ رْزقْنا - بويا لا تْفرّطْشي فيه

ڭُلْت لْهُمْ سامحوني - وا نا خصّوني فْلوس الفَياج

يا دّيتْ الرّادْيو نْبيعُو - والصينية زدْت حتى المُقْراج

وڭالتْ لي روُحْ تخْدَمْ - نڭْعُدْ أنايا ارَّبّي لوْلاد
لا تنْساشي لوْصاية - و احْرَزْ روحكْ راهْ يَصَّرْطَكْ واد

لا تَبْطاشي اطْهَلّى - خَطْرَة خَطْرَة تْفَكّرْ الوالِدين

البَڭْرَة يْلا بْغيتْها تَحْلَبْ لَكْ - حَشّ لْها المرْتع الزّين

خَلّيتْ البَنْت فَ لْڭْماطة - وانا خَلّيتْني نّوّحْ فَ العين

اسْمَعْ يِلا بْغيتْ تَرْبَحْ - لا تَهْدا شايْ فينا بالدّين

مول الفرّانْ يَلْغى - ومول الحانوت خَصُّو نَصيب

مول الكتّانْ واعَرْ - ومَصْروفَوْ كِ لَخْروفْ مْعَ الذّيب

رْفدتْ الباسْبورْ لَخْضَرْ - وَدّعْت حْبابي مْشيت ال لَّڭار
فْراقْ غْزالي يْشَيّبْ - ما نحْسبْش الليل يرْجَع نْهار

وَدَّعْت امَّا وزَدْت بويا - وبدّات الدَّمْعَة عَ الخَد تْسيل
النَّعْمة حارْمَة عْلِيَ - نْخمَّم النّْهار وَنْزيد الليل

قيس العشْرة رْكبْنا - فَ الماشينة رَيْش و لَعْلامات
رْفَدت كْفوفي الْ رَبّي - عالي القُدْرَة نْوَصْلو سَلامات

طْلَبْت انا رْجالْ وَجْدَة - سيدي مْعافَة وجَمْع السادات
مول النَّخْلات سيدي يحيى - وانْتَ قُطْبي مَ الحوريات

الديوانة فَتّْشونا - في مَغْنِية لْڭاوْنا لاسيرانس
تْغَذّينا في تْلَمْسان - وَقْت الرّبْعة فْرَقْنا بَلْعبّاس

سيدي بَلْعبّاسْ شاهَرْ - الوالي سيدي اعْمَرْ ودَعْناه

فرقنا قتالين الكرمة - برج تليلات ها القُطْب وْصلْناه

فرقنا السينية لوهران - الماشينة نزّْلتْنا ومْشات

وفي مارِيا صْبَحْنا - ونْصيبوها مْشهّْرة بَالرّايات

جْبدْت الباسْبورْ لخْضرْ - طْبَعْتُه وسْكُنْت جوف البابور

يا رْواح تْشوفْ مينْ قَلَّعْ - بدّاْت المُوجة تْڭرْبعْ كَرْكور

البحْر يِبانْ غِيرْ ظلْمة - تْوسْوسْ عقْلي وڭُلْت تْبرْديت

تْفكَرْت امّا وْبويا - فْراق اوْلادي زَدْت تْنوّيت

بدّاتْ الدَمْعة تْذرّي - والرومية ڭالتْ لي واشْ بْغيت

ڭُلْت لْها سامْحيني - يا مَدامْ انا اليوم تْعدّيت

شُفْ النملة مين تَطْغى - دّيرْ الجَّنْحانْ وتْفَرْفَرْ بِه

تبْقى رتْعة لَ الزّْواوَشْ - وجْميع اللي طارْ يَتْغَذّى بِه

هذي معْنى عْلِيَ - في وطْني يا اصْحابْنا كُنْت بْخير

الرّزْق يِلا بْغاكْ ربي - يَعْطيك ولوْ كُنْت في ڭاع البير

مْنين وْصلْنا الْ ﭘاري - ڭُلْت لْهُمْ كاينْشي وين نْبات

عْييت انا ما نْدوّرْ - حتى القهْوة عمّْروها لَبْنات

مْشيتْ لَ الحمّاسْ نفْطَرْ - ڭُلْت لْهُمْ واشْ هذا مذْبوح

ڭالوا غيرْ لَمْسَكَرْ - هاذ الشي اللي ڭْبالكْ مطْروح

دْخَلْت لْباري نْحوّسْ - شَفْت الدنيا و لاخْرة فَ الحَياة

يحْسَنْ عوْنكْ يا المبْلي - وانا رَزْقي دّاوَهْ الرّوميات

الخدْمة جاتْني بْعيدة - كُل عْشِية نْقارعْ الطوبيسات

نجْبرْ عْشايَ مْودّرْ - وكَسّوْتي مْوسّْخة فاش نْبات

نَمْشي لَ الحانوت نصْرَف - نْدير السّرْبيس كيمّا لُخْرين

كي توْصلْني النوبة – نجْبَرْ الكارْني مْعمّرْ بَالدّين

الخَدْمة جاتْني صْعيبة - وڭُلْت انايا نْولّي ڭزّار
الشْهَرْ اللي نْڭول نرْبحْ - يبْقى لي فَ الحيطْ غير المَسْمار

ڭُلْت انا نْدير قهْوة – نْجرَبْ زَهْري وبالاكْ انّال
الرّْبَحْ يمْشي لي كْريدي - ونْزيدْ انا نْطَبّْ في راس المال

خمْسة وتْلاتينْ ألَفْ - فَ السّيمانة نْجيبْها كُل اثْنِين

اللي كذّبْني يْجرَبْ – يحْسَنْ عوْنكْ يا تبّاع الزّين .
والسلام عليكم يا مجمع الاحباب

توقيع: محمد عز الدين الأوربي

اقرء المزيد

طرائف تسولية: التسولي والبيصار

السلام عليكم خوتي وخواتاتي . شخباركم مع الزفزافي والنفنافي .
شي على الرزق ايفافي وشي ففراشو دافي
انا بعدا طربني البرد لبين كتافي وخلاني انفافي.
اخوتي هاد البرد غي دالبيصار مع الزيت جديدة والخبز دالشعير . وليني بنات اليوم عندم هادالشي ضفانضي . ما ايعرفو مناين يجيواه .
ماشي نعاودلكم قصة الحاج حمو ( باباه دعمي بوشتى) مع البيصار .
الحاج حمو عندو واحد صاحبو ايجي عندو ديما على الاقل مرة فالسيمانة وايتهلا فيه . دارت الايام جابت الظروف الحاج حمو لعند صاحبو . خلط عليه حدا الدار جبر حد الحراg دالدجاج وبيبي ايرعى حداه .
الحاج حمو : السلام عليكم ورحمة الله وبركاته .
صاحبو : وعليكم السلام . اهلا ، اهلا مرحبا ، مرحبا .
فرشلو فالدكانة وعيط على موالين الدار جابولم اتاي . اوا وصل وقت الغدا جابولم حالزردة دالبيصار . كلاو عرgوها . وتجمعوا حتى شبعو وبغى الحاج حمو يمشي حلف عليه صاحبو بقى عندو .عاود فالليل جابولو البيصار . ماحملش راسو كلا بالسيف شي شديقين باش يرد الجوع وصافي . ونعس . فالصباح ناض بكري قبل ما يفيقو وجمع الوقفة ولبس سلهامو باش يمشي بحالو كوصاحبو فاق قالو : لاين ماشي اصاحبي حتى دفطر . الحاج حمو : باقي شي بيصار ؟
صاحبو مشى فيق مراتو وسقساها قالتلو باقيين . مشى جبر الحاج حمو دردب فالحدورة .عيط عليه قالو : غا رجع راهم باقيين .
الحاج حمو : اوا سير لطم بهم السطح والله عندك لا رجعت .
من تما حلف الحاج حمو حتى يتهلا فالضيف واخا يكون عندو غا عشا ليلا ووصى بها عمي بوشتى .
وهذا هو الكرم التولي والله يكرمنا ويكرمكم
وعلى المودة ناكلو عفوا نلتقي.

توقيع: محمد البورقادي

اقرء المزيد

عمي بوشتى وذكريات الطفولة 07

عيط عليا السي أحمد لزعر التسولي وقالي راه عمي بوشتى ايعرض عليك وايأكد باش دجي عندو . راه ايعاينك نهار الحد .

انا كنت فتازة عند خاي ، جاني الحال قريب وقلت هادي فرصة نمشي للتول نزور الحباب والبلاد اللي ما وصلتلاش هادي سنين . نهار الحد فالصباح مشينا انا وخاي وحالطفلة من العاءلة لحد اولاد زباير ، تلاقينا عمي بوشتى خارج السوق بواحد البغلة هاز عليها شي صويلحات ومفرش عليها حالطليقة مصوفة كنا لاقيين معاه يعاينا . سلمنا عليه .
عمي بوشتى : مرحبا ، مرحبا ، نهار كبييير هذا االشرفا .
انا وخاي : الله يكبر بك اعمي بوشتى .
هدرو هو وخاي شواي وقالو اسمحلي عندي شي شغل ماشي نخلي الشريفة دمشي معاك تشوف دادة حادة والصافية ونتلاقاكم فالعشية لهنايا باش نشدو الطريق للرباط .
عمي بوشتى : يلاه االشريفة ركب على البغلة الى ما كنتش ادخاف وانا نgودا حتى نسرحا للطريق ومن بعد راها ادعرف. ياك ادعرف دركب بعدا ؟
انا : الله يا ودي يا عمي بوشتى .
دار فالطفلة اللي معايا قالا : شول ، شول . هي ما عجبا حال رخات شلاقما ومشات معانا غطبانة. حنا ماشيين وعمي بوشتى ايقشب عليا .
عمي بوشتى: شد فالعرف دالبغلة االشريفة . لا دشوفشي لتحت غي دوخ . ياك ما دوخت االشريفة نوقفو نروحو ؟ انا عرفتو ايقشب شبعت طحك . وصلنا للدار خرجت عندنا دادة حادة والصافيا وحمو . واخا نوصفلكم الاستقبال داستقبلوني منوفيهمش حقهم .نلخصو ف القلب الكبييير داهل التول. دخلنا للدار وكعادة عمي بوشتى مع الضياف ما ايقصرشاي والصافيا مسكينة طايرين حوافرا بالسبg جيب هادي ارا هادي . تجمعنا مع دادة حادة وعمي بوشتى وشبعنا طحك وقرنابي شويا قلت لعمي بوشتى لابد ما دعاودلي شي حاجة من الطرائف ديالك دالصغر.
عمي بوشتى : وشني هاد الطراف ديالك عاونيث .انا انعرف غا الطراف دايصغب الصبايط او الطراف دالخبز زعما كسرة .
انا : لا اعمي بوشتى ، الطرائف زعما شي حاجة اطحك .
عمي بوشتى : انت سميتا الطراف ولد لزعر النوادر . وخا الالة جاتك ولايني ماشي نطول عليك وانت ماشي دكتبا لداك الناس ديالكم.
انا : غير عاود اعمي بوشتى ، الناس ديالنا ايبغيوك وادعجبم الهدرا ديالك.
طحك عمي بوشتى وقال : اولايلاه االشريفة وفكرتني فغرايبي ، ماشي نعاود لك على هاد المسخوط دgارو . كنت يلاه بديت نكمي وبالتخبيعة زعما طلانطي ، ومايحصلني غبوسرابط دعياد وبقى ايهدنني ماشي نقولا عليك وانا كل ساعة باش انسكثو .مرة انرغبو مرة اندور معاه حتى طلعلي الgاز .حدالنهار خليت حتى نعس كلشي وخرجت لبرا وجبدت حالgارو كنت مخبعو فجدر دالزيتونة وملويه فالكاغط دالسكر باش ما يبردش .نترت حجوج نترات كورميتو شاعل فالزرب دحدا الدار دباباين عياد والزرب داير بالدار كاملة .دخلت بحالي خسلت فاي ولقيت حالحلوة دفليو بين سناني وتمgطت ، لقيت راسي ميت . اوا العوافي شخدت وزندت فالزرب .فاق باباين عياد وبدا ايزgي : ايا الجيران عتقونا عوريطكم حنا اننحرقوا . العافيا دارث بنا . فاق بابا ويما وسمعوهم شي جيران بعادين جاو ايجريو بشي سطولا دالما وواخا هايثاك غلباتم العافيا .نوضت لقيت راسي مخلوع وبقيت عليهم اراو الما اراو الما ، اراو البالا نردمو عليها التراب . الفايدة والحاصول طفينا العافيا خرجنا عياد وباباه ويماه من الدار . باباين عياد بقي اشوش بحا شي سبكطور كفاش شخدت هاد العافية وانا نقولو هذا ما يكو غعياد رمى شي بونت فالزرب راني داك النهار حصلتو ايكمي . دارو لعياد بقى ايحلف ويسلف وشكو ديتيق به. خلصولو خلاص الدنيا والدين سيمانة ما خرج من الدار وهو مغط فالحالة زرق بالغراد ما ايقدشي حتى ينقلب.حلف فيا حلفة دالعدا وقطع عليا الهدرا . مشات ايام وجات ايام ونسيت الحلفة دعياد .حالنهار انا درقت مور الدار وجبدت حالgارو وشعلتو كويما وبابا وعياد خالطين عليا .حصلوني انتنشوى. قبطني بابا الله يرحمو وعرالي حوايجي الفقانيين وربطني من يداي ورجلاي فشي وتاد كان ايربط فيهم البهايم وجرى على يما لبرا باش ما درغبوش وما دفرقش عليا وقبط داك البونت وشعلو وبدا ايكويني فكرشي وانا انزgي لربي دخلقني وعياد واقف فباب الدار ايتفرج فيا . يما مسكينة مصبرتش دفعت عياد بالجنون والفقصة وجابتو على فاه جا ملتوخ على شي حجر ، نجرح من فاه ونجرد كامل من وجاه . جات مسكينة وبدات ادبوس لبابا رجلاه يطلقني . وعاد فكني وقطع عليا الهدرا .
انا : اوا اعمي بوشتى هاد الشي كامل gاز عليك وباقي ادكمي؟
عمي بوشتى : اوا االشريفة غا دعي معايا وصافي راني قررت نقطعو .كتشوف شني لقالي ولد لزعر عليه داك النهار . راني رجعت انحشم بهاد المصيبة .
الله يعفو على كل مبلي ومبلية .
كملت الزيارة ديالي لعمي بوشتى وردني انا والطفلة دمعايا للحد وما قصرشاي فكرم الضيافة راكم عارفين اهل التول والكرم ديالم .ومناين تلاقينا خاي وخليناه بخير قالي :
ها انت االشريفة الله يرضي عليك قولي لداك الحيبور دالدعينن AhMed DaiNan يجيب البندير ويجي عندي راني مدبرلو على حالهمزة gايزة الكلام . . .
سمحولي طولت عليكم.

وعلى المودة نلتقي .

توقيع: رقية البورقادي

اقرء المزيد

الغولة وحديدان 04

اسيادنا السلام عليكم واش باقيين فايقين أو صهطتو اوا لي باقي فايق يفيق معاه لي رامخ وكيشخر . هاذ حديدان ولد اللذين معمرو كيسالي من التحراميات وفعايل دالجنون المهم ما علينا نكملو الخرافة ذيالنا فين خليناها ، حديدان كيف قلتلكوم معندو بلاد من غير واحد الفدان على طرف الواد ومعمر غير بالحجار وجات الحرث اسيادي الناس ادحرث وهو غير مجبد فالركنة مكيحرث مكيبغي يتكارا مع ناس القبيلة غير الصريط والمريط مع عيالاثو بجوج وبالليل يباث تالاع وايفافي على الهموز والرباجي لي لقاها على برا من شي دار يgوز معاها ويشطبا وميرجعش خاوي للدار واخا هيثاك ذاك عيالاثو مبغاوش يحمدو الله واكلين وشاربين ومكيضربو تمارة مكيشطبو غبار غير المالكة والزعارط والنعاس وايصبحو حالين فاهم بالنعاس حتى لاين ولاين بحال شي نسا دهاذ الوقت قياس الخير الله يحفظنا منم واخا معلينا نكمل على الخرافة قبل منصدق تالف على الطريق ودشير عليا شي وحدة فهاذ النسا بشي حراك دالفرنة ودعورني هههه ، عيالاث حديدان قالك حتى هوما بغاو راجلم يحرث باش ياكلو حتى هوما الفول المذروز والمنgوب وزيد وزيد وقالوهالو وبقا غير ايبلط فيهم ويشنك فعيناه معرفا باش روات وبقاو ايراودو فيه ويقولولو عوريطك ازمانا إلا ما لقينا واخا غير حد العزيلة دالفول منكلو وحديدان بوحيول هوما ايراودو فيه وهو ايبلاني البلان ديالو باش يلقيلم خاطرم ويتهنا منم بجوج فمرة علا حقاش مبغاوش يحمدو الله ويخليواه فالتيقار اوا قالم واخا نلقيلكوم العزلة ولاكن الفول دماشي نزرعم خاصكوم دقليوهم بعدا علا حقاش الأرض دماشي نزرعم فيها جات على طرف الواد وباردة والفول خاصم يتقلاو باش يسخنو ويطلقو النباثة ذغيا وميتعطلوش وقالولو واخا حنا خاصنا العزلة وربي كبير والفول إلا بغيت حتى نسلقوهم مكاين بو مشكيل ، اوا المهم قلاولو حد تلتمدود دالفول وبقا حديدان كل نهار ايعبي معاه تمان 5 دgاملات ويهز الفاس على كتفوا ويمشي لذاك الفذان يقيل مجبد تما ايدgدg فالفول وملي يعطش الواد حداه ايهوذ يgنطح على فاه ويورد وفالعشية ايغيس العفاس والفاس بالتراب والما ويرجع للدار ايجبر عيالاثو محميلو الما ايكمدولو رجلاه ويداه وهو ايقلم الحلال واعر أيا ياياياي يما عطامي المهم بقا هيثاك حتى سلا ذاك تلتمدود دالفول بالعلف وقالم الله ودالراحة صافي بقيثو على خاطركم اقماقم دالويل باغيين دساليو معايا الله يغرقلكوم الشقف بحل إلا زعما تقضات فيه ، اوا فاش جا الربيع الفول دعباد الله وجذو وكلها فاين ايجني ديالو ويعبي لدارو وعيالاث حديدان قالوا لراجلم اوا احديدان كا حنا منكلوشاي الفول سير جيبنا باش نفورو شي كسكاس وهو يقلم هانا ماشي نرgب عليهم ونشوف كا وجذو كا لا وقالولو اوا هاك عبي فاش دلقي الفول وهو يقلم بلاش موحال واش يكونو وجذو علا حقاش الأرض تما باردة ومشا حديدان ورفذ معاه العكاز ومشا ايفافي وجبر الفول دالناس واجذين والفذان ديالو نايضة فيه التاورا والشلياط وبوعgادا رجع غابة ذاك الفذان وبقا ايبحصص فالفلاحة دماليها وهو يبانولو شي فول فحاد الفذان الخير تبارك الله وبقا كيعبر فذاك الفول جبر القصبة دالفول قاذ العكاز والخروبة قاذ ذاك العفاس لي كان لابس وهو يبقا يطحك ويقول هذا هو البلان ، رجع حديدان لدارو وكيطحك من وذناه وراشقالو دخل على عيالاثو ناشط وهوما يقولولو فاين هاذ الفول دجبتنا احديدان ياك ما باقيين موجدوش وهو يقلم شني ماشي نقولكم الخير تبارك الله عمرني يحزابلي ذاك الفذان يلقي ذاك الخير كامل تبارك الله ياربي اللهم صلي عليك يا رسول الله وبالحق حتى الفول ملي تقلاو وعاذ تزرعو زادو هاجو ، المهم نتوما غذا سيرو جنيو الفول أنا راه عندي شي شغل غذا وهوما يقولولو وفاين ماشي نعرفو حنايا هاذ الفذان ذيالك ، لا مدرفذو هم لهاذ شي حتى للصباح ونوريكم كلشي اوا ملي صباح وفتح ناض حديدان وحطولو فطر وقالم قربو لعندي نقولكم هاكو هاذ العكاز والعفاس عبيوهوم معاكم وقالولو ولاش هاذو شني ماشي نلقيو بيهم احديدان وهو يقلم هاذو باش ماشي دعرفو الفذان ذيالنا دالفول وقالولو كيفاش احديدان قالم الفولة لي جبرتوها طويلة قاذ هاذ العكاز والخروبة قاذ هاذ العفاس هذاك هو الفذان ذيالنا وراه جا على طرف الواد واش فهمتو دابا اوا هوما مشاو وهو يقلم سيرو لهلا يردكوم لعندي وبلع الباب ورجع يرمخ ، اوا وصلو عيالاثو الواد وبقاو ايعبرو فالفذاذن دعباد الله فاين ما شافوا شي فذان دالفول مشاو ليلو عبروه حتى وصلوا الفذان المعلوم عبرو القصبة دالفول جبروها قاذ العكاز بالطول وعبرو الخروبة جبروها قاذ العفاس وكوماصاو ايجنيو ويعملو فشاميثم وهي ماجية الغولة ادبهنس مدجبرم غير فالفذان ديالا وقالتلم شني ادعملو فالفذان ذيالي كا خلاه لكم باكوم وقالولا هذا الفذان دراجلنا وشكون هو هاذ راجلكوم قالولا حديدان اوا غير سمعت الغولة حديدان وهي درز ليلم بحاد المنجل كانت هزاه فيدا وهوما يلغطو بالعداو ويهربو سعا وحدا هملت حتى للدار مرجعتش واللخرا حصلت كانت متقلا وحاملا وذلغاطلا يا فرث من كرشا وصابث فيها 2 دراري هزاثم عباثم معاها وخلاثا مشيترا تما فذاك الواد كلاوها الذياب والتعالب .سيادنا حلقتنا اليوم سالات وإلى أن ألقاكم في الحلقة القادمة إن شاء الله . دمتم في حفظ الله ورعايته وإلى اللقاء.

توقيع: عبد المالك الرياني

اقرء المزيد

الغولة وحديدان 03

حديدان يا حديدان بو حيول وفعايل دالجنون ومنين رزات الغولة وبنتا بو شلاقم فالعشا دالعرس وعباولو داك شي لي كيكساب وكيعلام شداتو العرة وطاح ومرط مرطة زغبية مسكين بقا فيا وازداد عليه الحال بزاف وبقاو الناس كيجيو يرgبو عليه ويواسيواه على المحنة لي g از منا ويعاونوه باش كتب الله وما حميدة مسكين حتى هو بلع عليه فواحد البيت مبغا لا يخرج ولا ياكل وحلف لا عتب الباب حتى يجيبولو المرا ديالو ومعرفوها واش هربت وتلعت ولا عباوها الغولة وبنتا معاهم ، المهم الحاصول وما فيه جمعو ناس القبيلة شلا حوايج من الزرع والطحين والسكر والزيت وداك شي لي كيحتاج فالمونة مقصروشاي من جهدم معاه وبو شلاقم كيقلم الله يخلف عليكم الجواذ ويأخذ الحق فحديدان والغولة وبنتا ، اييه الله يخلف عليهم اوا عاين يجي حديدان ويجمع كلشي ويمشي ياك نتا لي ضبرتي عليها راسك امول الحيلة هههههههه ، خرج حديدان يتشمش على برا من الدار وهو يشوف الغاشي غير خارج وداخل فدار بو شلاقم وبقا كيتعجب اواااه يكما هاذ خينا كيعاود العرس لولدو وأنا مفراسيش وقال أرا نمشي نقرب للدار ونشوف آش طاري وصاري تما ، بدا كيتسلل بالشوية حتى وصل للدار وتخباع مور واحد الكركرة دالحجر ويتصنت وهو يسمع الناس ايقولو لا حول ولا قوة إلا بالله العلي العظيم والله إلا بقا فينا هاذ السيد مسكين مرطة زغبية هاذي طاحت عليه ولاش اسيدي علينا هاذ الفضول حتى نوصلو لهاذ المواصل بسباب هاذ حديدان شني بينا وبينو ياك هو فدارو وحنا كل واحد فدارو آش دخلنا حنا فهاذ الشبوقات يعيش ولا يموت ولا يبقا بالجوع ولا يضبر لراسو ، هذاك مسماع حديدان ويجمع الوقفة ورجع للدار قال لعيالاتو يالاه جمعو شي بركة شويش شويش من الحاجة باش نمشي نرgب على الراجل راه طايح مريط ومهلوك ونتسامح معاه قبل ميموت وعيالاتو قالولو شكون هذا لي مريط احديدان واش هذاك لي كان عندو العرس ومشينا لعندو وهجمات علينا الغولة وبنتا ، وايييه الغولات أنا هو لي مزوج بجوج غولات غير ايبلعو بلا فايدة بلا ضناية حتى الولدة مكتولدوش الله يحضر السلامة باش نافعيني دابا نتوما الصريط والمريط ، المهم جمعولو دكتب الله وقالولو عيالاتو واش نمشيو معاك احديدان وهو يطلعلو الgاز ولاش اوجوه الويل دمشيو معايا كا عارض علينا للسبوع gلسو الله يتبعكم بالبلا بقاو حاطيين الدار لا يجيو يدخلو ويكشطو كلشي وما دحلو لحتى واحد حتى نجي ، خرج حديدان وهاز معاه دكتب الله فواحد الكموس وقصد دار بو شلاقم وصل ودق فالباب حلتلو المرا الباب ودخل وغير شاف بو شلاقم حديدان وكحل بالعما وبقا ايزورز .
حديدان : السلام عليكم اجاري
بو شلاقم :وعليكم السلام ورحمة الله وبركاته اسي حديدان
حديدان :ياك ما كاين باس اسيدي شني طرالك حتى وصلت لهاذ الحالة
بو شلاقم : هانتا كتشوف السي حديدان خلاثا عليا الغولة وبنتا كشطوني ومخلاولي والو
حديدان : هاك هاذ البركة اسيدي والله يجعلها مغفرة للذنوب إن شاء الله
بو شلاقم : الله يخلف عليك السي حديدان منطمعوشاي فيك اسيدي حتى نتا بحرا مكافي مع الزمان
هوما هيثاك ايهضرو وحديدان سمع حميدة ايلغط بالعداو والعداو يا عباد الله جيبولي مراتي وقال لبوشلاقم شكون هذا ايلغط بالعداو عندك فالدار وهو يقولو هذا غير وليدي حميدة مسكين خاصو مراتو معرفناها كهملت ذاك الليلة كا عباوها الغولة وبنتا معاهم
حديدان : يا لطيف يا لطيف يا لطيف اوا مصيبة هاذي ومدورتو عليها ما والو
بو شلاقم : دورو عليها اسيدي وطبخو بالتدوار ومجبروهاش وهانتا ادشوف هاذ الحيبور مشي يخرجلو العقل ويحوال مكيخرج من ذاك البيت وما كياكل خبز عاطيها غير للزgا والتمرمير ايزيدني حتى هو على ما بيا
حديدان : اوا شني المعمول دابا اسيدي ماشي يبقا هايثا على هاذ الحال
بو شلاقم : لا اسي حديدان ماشي نكلف البراح ويبرح بلي جبر مرات ولدي نعطيه المونة دشهر كامل ونشوف مع ناس القبيلة حتى هوما يعاونوني باش كتب الله .
حديدان بقا كيدور فذاك العيناين ويبلاني ويخمم شني ماشي يعمل . وقالوا يالاه اسيدي خليتلك الراحة وميكون عندك باس والله يسمعكوم خبار الخير على عروستك وخرج وصل لدارو بدل حوايجو المزيانين ولبس الحوايج المزرفين وخرج ايفافي ويدور على المرا دحميدة ، عيا ميدور ومخلا حتى قنت مدورشي فيه وملي كان راجع بحالوا لدارو والظلام بدا يطيح وهو يتفكر المرقد دالغولة وبنتا مشا كيتنمس وبدا ايرgب ومرقت عينو مرا وحدة أخرى مع الغولة وبنتا فالمرقد وبعاد على المرقد وبقا حاطي الغولة وبنتا حتى خرجوا يصادو وسدو عليها تما ومشاو هوما مشاو وهو حل عليها وعباها لدارو باتت وفالصباح مشا لعند بو شلاقم لدارو وقالو راني جبرت عروستك اسيدي البارح بالليل وراها عنذي فالدار ، وحميدة هذاك مسمع وينوض مزعرط لعند حديدان فاين هيا مراتي اسيدي جيبلي مراتي وحديدان ايقولو بسم الله عليك اوليدي مراتك راها فالامان مع عيالاتي ، حميدة اوا علاش مجبتاشي معاك اسيدي ، حديدان يالاه اوليدي جيبا نتا لي مراتك ، حميدة يالاه اسيدي هيا دابا يالاه ، حديدان اوا اوليدي جيب المونة لي كنتو عوالين دعطيوها لي جبر مراتك ونمشيو ، هي اللولا اسيدي ومتعودش بابا عندو الكلمة gابسة اوا هزو المونة ومشا معاه عطاه مراتو وحميدة فرحان وناشط برجوع مراتو وحديدان كتر منو ما قداه فرحة جابلو الله مايكل شهر كامل ميخمم فالعولة وبو شلاقم عاد مزداد عليه الحال كتر وايتفقص على حديدان رزاه فالمونة لي جمعولو الناس دالقبيلة .
اوا سيادنا الحلقة داليوم سالات وإلى أن ألقاكم في الحلقة القادمة إن شاء الله. دمتم في حفظ الله ورعايته وإلى اللقاء .

توقيع: عبد المالك الرياني

اقرء المزيد

عمي بوشتى وذكريات الطفولة 06

قال عمي بوشتى دي بغا طيحنو يرطاب يصغر اللهوة، ودي بغا يبكر ما يشرب قهوة، ودي بغا ياكل غلال يعاين الفهوة، ودي بغا يشوف لحباب ما دشغلو عليهم دهوة.

نهار السبت دي gاز كنت فالحد، كان عندنا اجتماع دالجمعية ناقشنا شي حوايج وأجلنا حوايج خرين حيث داك بوسرابط دمدير دار الشباب** زير علينا وقالنا خاصكم دخويو المقر مع التمنية ونص دقول ماشي يبيث فيه الدجاج ههه المهم كملنا الهدرة برا ومشيث عند ختي نباث، هو صراحة ما نعست حتى علم الفجر، بايث أنبني ونريب حتى أنجي نرمي الضالة وأيطيحلي كلشي لهلا يدهي شي حبيب، الحاصول وما فالدين صبح الحال وقلت نهود للسوق نطرب شي دورة، يا الله وصلت للرونبوان وأنا نشوف عمي بوشتى (الله يسمح لي، أنا نعاود ونتوما قولو الله أعلم، وإلى كذبت أنا، دمسخ سهام هههه) ماجي أيهمسس قارط قبو بحال قيبو ورافد حد المعكافة فيدو وملوي حد الشاش على عنقو سادلو فاه، درزت عليه بغيث نبوسلو  يدو وراسو، هو أيجر وأنا أنجر. حلفت عليه حتى نشربو قهيوة أنا وياه، مشينا وقبطنا حد الطبلة وعيطنا على القهوايجي جاب لنا حد البراد داتاي بالشيبة جاااري أيشبه لتاي غي بالحمورية وشواي دالسخانة، كب عمي بوشتى حككاس وبقا أيجرجف فيه ويسخن يداه وأنا ننتابه بلي لابس البوط، جاتني غريبة شواي حيث الشمش والطحاطح، والبوط فهذ الوقت غي أيخنز الرجلاين ولايني قلت نسقسيه يمكن عندو شي حاجة فرجلاه أو شني.

أنا: عمي بوشتى شفتك لابس البوط فهذ الشمش ياك لاباس؟

عمي بوشتى: أودي شني ماشي نقلك ألحاج نوت بكري وشفت شي غبلش دالغيام وقلت مع راسي ماشي طيح الشثا هذ النهار، الساعة هانتي أدشوف غي تقلت به باطل.

أنا: ولياه ما أدتفرجشاي على الطقس؟

عمي بوشتى: أودي ما يقول الله وخلاص، هذي مدي بدينا أنشوفو الشثا فداك الوعد دالترفازة ربي رفد خيرو، الغايبة يعلم بها الله أوليدي.

أنا: كاينة أعمي بوشتى ولايني راهم مرة مرة أيقولو الصح، وهذ البوط واقيلا عاد شريثو؟

عمي بوشتى: أودي هذ البوط عندي معه فالصغر شلا أزلياث ألحاج إلى جيث نعاودا لك ماشي يخرج قلبك بالطحك.

أنا: غي عاود أعمي بوشتى حتى أنا هذي مدة ما سمعت للنوادر للتسول.

عمي بوشتى: شني ماشي دسمع فالنوادر كالفيران وهوما أياكلو التبن؟ هههه

أنا: ههه النوادر ماشي النوادر أعمي بوشتى، الحاصول ما عليناشاي عاودلي شني وقع لك مع البوط الله يعطيك صحيحثك.

عمي بوشتى: كا دابا أتفلى علي أو شنى؟ ولا زعما نتوما صحاب المدينة حاسبين راسكم معلمين؟ داك النهار جاث عندي داك مسيسي دالحرت دسهام التازي رزاثني فجوج ديوكة ومشاث، ومن موراها جا داك بومناول دبومعكاف ضيعني فجوج كيلو دخرينgو، الله يحفظ دقول عندو الماشينة دالبال ماشي الفا، غي أيلهوط ويصيفط بلا مديغ، ودابا نتينا جايبلي هذ البريرد داتاي غي لما والزغارث وباغي دعبي الإفادة؟ طك يا مالي وطك، والله علي لا طحكت، نوض يا الله نمشيو لعند نسيبك يعطينا شي كيلو دالكفتة نعبيواه نطحنوه ونفطرو وديك الساعة نعاودلك كلشي.

غي سمعت هذ الهدرة وبقيث أنفرا بالطحك، عمي بوشتى هو عمي بوشتى ما يتبدل ما يتغير عليه شي نقايم دالجنون، خلصت مول القهوة ونوضنا مشينا أنا وياه عند عبد اللطيف بومعاز عبرنا شي بركة داللحم وعبيناها لمول القيطون باش يطحنا، دوماندينا حد البراد داتاي وgلس عمي بوشتى أيعاود على البوط وما gاز عليه معه.

عمي بوشتى: حد النهار فلوقيتة دالنفاطة دالزيتون بحال دابا  الله يعطينا الخير كنت باقي صغير دكون عندي داك تلطاش أو ربعطاش رعام وكانت بايثة الموشاثي تبارك الله بحال دي أيخوي بالسطل، غي صبح الحال بانث حد الشويش دالفهوة جا عندي بوفراكح دعياد وقلي يا الله نمشيو نسرقو الزيتون دالبشير وهذ البشير كان عندو شي زيتون أودي ألحاج حمد قد هيثا (طنش gمزو وقبطو من التحت) تبارك الله كان جاب النقلا ديالو من الغرب، الحاصول ما كذبت فعيطة مشيث للبيث وجبت حد ميكة كحلة وحشيثا فالجيب دالكيطما وندرزو أنا وياه فالحدورة، وصلنا لحد الزيتونة والدا مالقوق والعروق تبارك الله، جا المسخوط دعياد قالي طلع نتينا سرم وأنا نلقط من التحت، قلتلو وعلاش ما طلعشاي نتينا وأنا نبقى؟ قلي نتينا خفيف علي وأنا أدجيني الدوخة. المهم طلعت وبقيث أنسرم وشاد راسي مزيان حيث الزيتونة فازgة وكيف ما لقيث أدزلق، حد الشويش وأنا نشوف عياد تيس فالحدورة، ما عرفت باش تبليث وأنا نتابه لتحت وانا نصيب عمي البشير أيشوف فيا بداك العيناين والموسطاش بحال السبع وهاز فيدو حد الكرفيط دالبري بالشناقب.

عمي البشير: شني أدلقي تما أولد الحاج حمو؟  

بوشتى: أودي أعمي البشير سمحلي عوريطك أنا كنت ما علي ما بيا غي داك المسخوط دعياد هو دي جابني.

عمي البشير: هود أوليدي هود نعاونك فاللقطة.

مع الخلعة ما عرفت راسي كيف لقيث ويسحث بي البوط ونجي ملتوخ على حد العطش، وما عرفت كيف وقعلي حتى صيبت راسي فالأرض والسروال مقطع وكلشي فيا عريان، شدني عمي البشير من الgنداية دقفاي وبدا أيغرد فيا وأنا ما بيدي نطاكي ما بيدي نستر راسي. المهم ما عرفت كيف لقيث حتى تفكيث منو وبغيث نهرب، ومع الأرض كانث يالله محروثة عمرلي البوط بالغيس وما قديتشاي نهزو، طيحت على فاي وأنا نصيب عمي البشير شدني من طهري بحال شي ديب مناين أيقبط شي خروف واغل فالدخلة (خليج) الحاصول شاي كليثو داك النهار ما كلاهشي الطبل نهار العرس.

بقا عمي بوشتى أيعاود ويطحك سمعوه شي شباب حدانا وجاو عندنا وبقينا أنفراو عليه بالطحك حيث عندو حد الطريقة فالمعاودة أدقثل بالطحك.

عمي بوشتى: إيوا دابا مناين طحكتو علي ماشي نعاودلكم حد القصة طراث للوالد الله يرحمو ولايني كنت أنا هو سبابو، حد الليلة يا الله تعشينا وهو يقلي: شوف أداك المسربط نعس بكري باش دفيق بكري، ماشي نعبيو أنا وياك شي بركة دالزيث نبيعوها فأكنول. مشينا نعسنا وغي علم الفجر وأنا نصيب الوالد أيدق علي الباب، نوت بالزربة ولبست حوايجي وهوت للبيث صيبت يما الله يرحما موجدا حد الحماي دالبيصار باللفت، كليناه أنا والحاج ورفدنا الزيث على البغلة ومشينا للفيلاج، وصلنا مع داك السبعة دالصباح خلينا البغلة عند صاحب الوالد وركبنا فالطاكسي وطلعنا لتازة، الوالد الله يرحمو كانث فيه شي سعلة غريقة، عطاني حد الربعميا دريال وقلي سير للفارماصيان جيبلي السيرو دالسعلة، ومع أنا كنت منونخ وخنافري مسدودين قلتلو عطيني السيرو دالسهلة، جا الكار وركبنا فيه با الله يرحمو قبط القرعة وشرب منا على فاه شي جوج معالق كبارين، غي وصلنا لجيهث تارماست ومع الفيراجاث والكار أيتهزز بزاف شوفت فالوالد صيبتو عاط على سلطان اللحية وعيناه حومر وشاد فكرشو.

الحاج حمو: شنى هذ الشي جبتلي أبالمسخوط لاخر؟

بوشتى: السيرو دالسعلة.

قبط الوالد داك القرعة ووراها لحد الشاب كان gالس قدامو.

الحاج حمو: شوفلي أوليدي هد الحرام لاش أيصلح.

قبط الراجل داك القرعة وبقا أيقرا فيها.

الشاب: أعمي هذي أدصلح للقبط، أطلق الكرش.

الحاج حمو: عليها حسيث بمصارني أيغرغرو وكرشي قوا فيها التريص.

شاف فيا الله يواليه برحمة الله وجبد معايا بحد اللطسة حتى شوفت النجوم، وبقا أيعيط.

الحاج حمو: آشيفور آشيفور وقف وقف.

الشيفور: ما عنديش كيف نوقف، الفيراجاث بزاف وهنا ممنوع الوقوف.

بقا عمك الحاج حمو أيزورز ليهن لاون وأنا نصيبو قفز من بلاصثو وقاد الوقفة، حد الشويش وربي يعطي خيرو بالريحة فالكار، وأجي أودي الحاج حمد دشوف الناس، شي أيخطي بالشلحة شي بالعربية، شي أيgل، شي ساد خنافرو، شي أيسعل... وبقاو على الشيفور وقاف وقاف وقاف ماشي دقثلنا الريحة. زير الشيفور ليمن ووقف الكار ونزلو منو الناس أيجريو، نزل الوالد غي بالشويش وأنا نسمع التبرتشين فالبوط وبقيث أنفرا بالطحك. جا الgريسون ونزل البوطاث دالزيث من الكار وبقا أيخطي بالشلحة ويشاير بيداه ما عرفناه شني أيقول. الحاصول خلاونا تما وزادو، الوالد كحز القراعي لطرف الطريق وهود للواد تخبع بحد السدرة وزول السروال والبوط وبدا أيخسل عليه ما عرفت كيف وقعلو ويسحث ويجي فوسط الواد بقا أيزخبط مسكين وما نتابهشاي بلي سروالو وحد الفردة دالبوط عباهم الما، غي سخر الله الحاج كان ديما أيغطي جوج جلالب وكيف أيوقلو سيدنا التسول: الجلاب سترة، للراجل والمرا. بقا أيزلي فجحلالو دار موراه ما صاب لا سروال لا بوط هاو بقا أيخطي ويحلف فيا: علي بليمين يا ولد التالفة مناين نرجعو يا غيلا علقتك ولقيتلك كتر مداك الشي دي لقالك البشير. المهم واخا نعيا نعاود لكم مانعرفشاي. كان فحد الحالة ما دبغيها لعدوك. طلع بالحفا مالواد وجا حدا القراعي وقرنص وأنا غي شفتو بعدت منو ليهن وبقيث واقف أنشوف فيه غي بنص عين، أنعيـى نشد الطحكة وهايثاك والو. حد الشويش وهي دبدا الشثا أدنشنش شاف الوالد فالسما وهو يقول.

الحاج حمو: دابا عاد كملث ما قدو فيل زادوه فيلة.    

بقينا شي سعثاين تما وربي عطا خيرو بالموشاثي وحتى شي طونوبيل ما بغاث دوقف لنا، قربث الضهور والوالد يشوف حد المازدا ماجا من بعيد عرفا ووقف فالطريق أيشير لمولاها. وقف مع الجنب وخرج راسو من السرجم.

مول المازدا: أهلا عمي حمو ياك لاباس؟

الحاج حمو: أودي غي سكث، هذ الشي دي عطا الله دابا.

بلا ما نطول عليكم ركب هو حداه وأنا خلاني ركبت اللور مع القراعي دالزيث، عيا مول المازدا فبابا باش يخليني نركب لداخل ولايني الحاج حلف بالحرام حداه لا ركبت. من تما والشثا أطيح علي حتى للفيلاج، وصلت بحال الفلوس، غي نزلت ونشدا بسبgة وحدة للدار وصلت صيبت يما فالنوالة أطيب حد الخبزة دالشعير، غي شافثني وهي تتخلع.

يما: ياك لاباس أوليدي لاش رجعتو دغيا؟

جيث نعاودلا والطحكة سبقثني، ما قديتشاي نهدر كككل، جابث لي حد المجمر حامي لبست حد الحنديرة وجحللت فوق منو، حد الشويش والحاج وصل وبقا أيعيط من الباب، وفاينك ألمرا أداك مو سربوب فاين نتي. خرجث يما أدجري: مالك ألراجل قالب الدنيا غي كنت فالنوالة.

الحاج حمو: عنداك دكون أطيب البيصار، قسما بالله وصيبتك أطيبم يا غيلا هرقتم لك على نواضرك.

الحاصول وما فالدين داك القصة بقاث أتعاود فالدوار وباقي لدابا أنتفكرا ونبقا نطحك غي بوحدي.

المهم ما جا يكمل عمي بوشتى بالمعاودة حتى كنا شي أيتكور بالطحك شي أيسعل، وحد الغول بغم لنا فالغطر حتى خرجتلو الكفتة على خنافرو ....

ناض حد بومناول خلص مول القيطون وسلمت على عمي بوشتى وخليثو يمشي يقضي حاجة للدار. ومشيث لقيث التعبقة وعيطت على الشريفة رقية البورقادي نبلغها سلام عمي بوشتى ونقلها راه عرض عليك تجي عندو هذ السمانة راه مخلي لك حقك دالزيتون ودمسلالة.          

وعلى المودة نلتقي.

طبتم وطابت أوقاتكم بكل خير.

توقيع: أحمد لزعر التسولي

اقرء المزيد

عمي بوشتى وذكريات الطفولة 05

السلام عليكم

شني مشي نقلكم وباش مشي نبدالكم حيرت وحيرني هد الراس واش نقلكم او منقلكومش وليني لخبيت عليكم ش حاجة مشي نعبي الدنوب والصراحة مكاين ميتخبع.

وصلت للتول وبالضبط للحد ويانا نتلاقا داك موسرابط د سهام Siham Tazi قالبا الرجعة لفاس ومحرفة على حد جوج ديوكا وجوج دجاجات وحد صاك د نسا ولابسا حد جلابة وحد لبخنوق دقول بحال نسا د جبل هي ادهدر معايا وادقلي والله لعبيتلي شي دك هد ديوكة مشي نهود دابا لدارنا لفاس ونلقي التريد لنسا دلمجموعة راني عارضا عليهم. 

يانا معندي غرض لفدك لا ففلوسة بقيت غي مبهوط انشوف فيها مفنك على داك اللباس دي لابسا وجاني غريب وهي هديك خليثا ركبات مع حد لخطاف لواد اميل ومشيت نقضي غرضي باش نروح لعند عمي بوشتى مشي نقصر معاه هد الليلة ونجيب من عندو شي خبيراث د الطفولة ديالو. 

قضيث غرضي ومن بعد لعصر شديث الطريق لعند عمي بوشتى

طلعت شي عقابي منقولكمش ما وصلت حتى نشتني العرق وبقيت انهش تمان شي نص ساعة عاد رgبت على الدار دعمي بوشتى . ماعرفت داك موجحالل دسهام كلقات حتى وصلت وهي بنت المدينة . شافني حمو خرج ايسبg عندي درعني وباسلي راسي ورحب بيا كاوعمي بوشتى خارج معاه دادة حادة والصافيا رحبو بيا وما قصروشاي من جهدم . دخلنا للغرفة . روحت شواي وجابولنا حاد الخير دخرينgو واتاي وبقى عمي بوشتى ايرحب بيا ويقولي انا دقولت لحادة دلقينا خرينgو عرفتك ما عندكشاي السنان للحرشة او المفروق وليني خلي البلاصة للعشا راها الصافيا لاقيا حالشواي دالتريد دايعجبك.

انا غي سمعت التريد كمشت يداي بحرا نقد نتعشا . بقينا مجمعين وانا نقول لعمي بوشتى راني تلاقيت سهام التازي فالحد قالتلي كانت عندكم وهزا خيرات الله معاها.

طحك عمي بوشتى : قالي داك الطفلة مسكينة كمالقينالا دبات ما بغات قالت عندا الخدمة ومناين هزت داك الديوكة قبطاتم من جناحم وكانت لابسا حاللبسة عصرية زعما بنت المدينة حالسروال بيط وحالقمجة . هي هازا داك الديوكة وهما يقولا يا وسخ تكرفسو عليها مسكينة . حادة بقات فيها ، قبطاتا حادة ومسحتلا وعطاتا دجلاب ديالا اللتشينية وبخنقتلا بالفورانا الخضرا دالصافيا . جات اخيي غزالة .

بقيت انطحك مع راسي وعمي بوشتى عرفني زعما راني شوفتا جات غزالا .

وهو يقولي عمي بوشتى تفكرت داك الطفلة دكان ابابا ايقولي ماشي نعبيهالك راها غزالا . وانا مناين انبغي نجننا انبدا نغنيلا :" شنكوك فوق النكوط هاز الفوقاني والشفة قد القفة تعشي التيران والسندور قد الهندور يهرس لعيدان

وبقى عمي بوشتى ايطحك . قالي الله يسمحلي منامسكينا كنت مgوزا عليها ، حالنهار مشات مع خواتاتي دسقي من العين وانا مع كان جني فيها كانت هي ادعمر السطل دالما وانا انبزقلا قيه ونخليها ادنقلا . وليني داك الناس شحال كانو تقال على القلب منعرف بابا شني كان عاجبو فيهم ايبقى يرحب بهم ويحلف عليهم لا مشاو وحنا كانو ايقتلولنا بتمارة دالسخرة وعندم شي حيابر مطهونين بحا دقول ما عايشينش مع العباد . طحك عمي بوشتى وقالي تفكرت حالمطحكة لقيناه لحالدري خاها ما دطيحشي على الجنون : كنا انا وعياد و صاحبي لحاج احمد كان جنو فيهم حتي هو وتفقنا نحفرو حالحفرة ونطمرو فيها لحاج احمد ونغطيولو راسو بحالقفة ونعيطو لداك الدري يقربنا القفة . تقنا الشغل مزيان وجا هو يجيبنا القفة ، لحاج احمد كان قابطا بيداه هو حس به ايجرا وهو بقا كارز حتى حس بيه عطى الجهد ديالو كولو كويطلقلك القفة ويجي الحيبور ملتوخ . نزوا ومناين شاف الراس دبنادم يعزابو جن تلوا . حنا دكنا انتفرجو ما عرفناشي باش تبلينا . شواي وانا نقول لعياد هز معايا هاد السلاطة للفقيه يعزم عليه . عبيناه للفقيه ونسينا لحاج احمد فالحفرة دي ايبان منا غي راسو . وصلنا للجامع كوحنا نتفكرو خاي لتخنا السلاطة وقلبناها بسبg للبلاصة دكونا انلعبو فيها ومنجبرو غي بابا قابط خاي وايغرد بحالقطيب دالزيتون وهو ايزgي لربي دخلقو . هربنا لعند الفقيه .جبرناه فيق داك السلاطة وعطاه ياكل شي كريمسات .

حنا هايثاك وبابا خلط علينا قلبو ماشي يفلت . قبطنا كوبدا يشعط فينا من تما وهو ايزغد فينا حتى للدار قرط حدالبلعا دالقطبان دالزيتون وحلف حتى يعلقنا . ومناين مشاو الناس قال ليما والله وقربتلي ياغلا جمعتك معاهم وطربنا حد التعليقا بحال دالحولي نهار العيد وخلانا الدبان اياكل فينا وما كاينشي دي يفكنا .

الحاصول الجموع مع عمي بوشتى مدشبعشي منو تعشينا داك الخير دوجدت الصافيا ومناين سالينا وبغينا نعسو قالي عمي بوشتى دابا االشريف انا بغيت نشوف السي احمد ولد لزعر ما شوفتوشي من رمطان ماشي يخرج فيا وانت صاحبو مناين يجي للتول قولالي نتلقاه .قلتلو صافي اعمي بوشتى الضيف ديالك هاد المرة ماشي يكون السي أحمد لزعر التسولي . وراه حتى هو الgلسة معاه ما دشبعشي منا .

(تحية خاصة اختي Siham Tazi الله يخرج معاك الطرح بسلام)

وعلى المودة نلتقي

توقيع: محمد البورقادي

اقرء المزيد