سي الطاهر التسولي 05

 

كان سي الطاهر معتزا بقرأنه وبنفسه. ذات يوم أراد أن يختبر نفسه وغيره في حفظ وكتابة القرآن .
فكتب لوحه يقول الراوي بحزب كامل إلى أن وصل إلى. الآية إنا خلقنا الإنسان من نطفة امشاج. فلم يجعل نقط على ‘‘ش‘‘امشاج فكتبها..امساج.. 
وذهب بلوحه وعلقه بباب السوق ليقرأه الجميع كل من يجيد الحفظ والكتابة فمر على قراءته ‘‘الطلبه القشاقشيه ‘‘فلم يعثروا على أي خطء أو ‘‘خساره ‘‘كما يسمونها اهل هذا الفن. حتى جاءت بنت الفقيه إمام المسجد. فلاحظت هذا الخطأ ‘‘الخساره‘‘وأخذت اللوح ومن معها =من الذين يغتاضون لسي الطاهر الذي يتميز عليهم=الى الحداد ليجعل لها ثلاث ثقب فوق السين بالمشهب.
فلما علم سي الطاهر بذلك جاءهم مسرعا فأخبروه بالخطء الذي وجدوه في اللوح. فالقى بيده في ‘‘‘قب جلبابه‘‘وأخرج لهم ثلاث حجيرات فقال لهم هذه نقط الشين احتفظت بها في ‘‘قبي‘‘وانبهر الجميع..
وفي واحدة أخرى. رمت به الأقدار إلى المسجد يوم عيد الفطر متأخرا....قبل أن يقترب من المسجد. رأى سكان.‘‘الجماعه
يخرجون وجبات الإفطار إلى المسجد وهذه =كانت من عادتنا يومي عيد الفطر والاضحى كنا نتناول وجبة الافطار جماعة في المساجد ‘خيرات الله.** المفروق. المسمن. خرينگو. بركوكس. سفنج. ** إلا أن هذه العادة انقرضت إلا القليل =
قلت رأى المسافة بينه وبين المسجد لا زالت طويلة وفيها‘العقبه ‘فإذا أتم سيره على حاله سيجدوهم افطروا عنه.
ففكر ودبر. فبدأ يصيح ويصرخ بصوت لا يفهم. ويشير بيديه إلى من يراه ذاهبا اوبقرب المسجد..
فهرع إليه جمع من الناس وهم يسألونه‘‘. ما بيك ياسي الطاهر من تعرض لك ‘‘
فقال لهم وهو يشير إلى الارض.. هذه ‘‘جرة‘‘أثر الذئب أو الارنب ((نتبعوها بسم الله... نمشو نفطرو بسم الله ))
هنا تنتهي هذه الحلقة وإلى حلقة أخرى. استودعكم الله الذي لاتضيع ودائعه وتحية للجميع.

توقيع: جمال لشخم 

اقرء المزيد

أعراف تسولية

أريد في هذا المنشور أن أطلعكم على حل اللغز الذي نشرته يوم أمس حول مفهوم عبارة "فلان لقا العراطة" والذي لم يستطع الإجابة عليه إلا شخصين اثنين هما السيد عبد الحق كريط والسيد محمد يسف، أما الأغلبية فقد ذهبت إلى تعريف العراطة وعملية التعراط، في حين أعطى اثنان من الأعضاء تفسيرا مغايرا للمقصود. وقد سبق لي أن قلت في أحد التعليقات أن هاته العبارة تحمل مدلولا اجتماعيا يحيلنا على عرف كان شائعا في القبيلة قبل حقبة الأربعينات من القرن الماضي حيث كانت بعض الأسر الفقيرة تلجأ في عز برد شهر أبريل "غالبا" وبعد نفاد المؤونة لديها إلى وضع عراطة وراء الباب الرئيسي للمنزل وذلك بعدما تعمد إلى ملء الجرار (بكسر الجيم جمع جرة) وكل الأواني المتوفرة بالماء ثم تحبس نفسها في غرفة معينة وتنتظر رحمة ربها، وقالت لي جدتي رحمها الله أن أهل الدوار كانوا ينتظرون مثل هذا الفعل وكانوا إذا رأوا أن بيت أحدهم مغلق ليومين ينتظرون إلى ما بعد صلاة العشاء ثم يهبون إليه جميعهم كل واحد يحمل في يده ما يقدر عليه من زاد (غالبا ما يكون عبارة عن طحين الشعير أو تين مجفف أو زبيب ونحوه) ويأتون بسلم ويصعدون فوق سطح البيت ثم يلقون بلطف ما حملوه معهم في البهو، دون أن يراهم أصحابه تفاديا لإحراجهم ورغبة في ستر الصدقة.

قد يقول بعضكم ولماذا يلجأ الناس إلى مثل هذا الفعل، ولا يحاولون اقتراض ما يحتاجونه من غيرهم؟ أقول له بأن الاقتراض يضل في رقبة المقترض وقد يشكل عليه عبئا إضافيا ولا يستطيع رده، ثم إنهم كانوا يغلقون عليهم الباب متيقنين بأن سكان الدوار سيغيثونهم في أقرب وقت وهذا ما كان يحصل فعلا.

وقد يقول البعض الآخر لماذا لا يتدخل سكان الدوار قبل هذا الفعل ويمدون الأسرة بما تحتاجه من زاد؟ أقول في الجواب إنك لا تعرف عقلية التسولي وعزة نفسه، وكيف أيقولو حبابنا التسول "جوعي فكرشي وعنايتي فراسي".

وعلى المودة نلتقي.

توقيع: أحمد لزعر التسولي

اقرء المزيد

سي الطاهر التسولي 04

**الحلقة الرابعة **
يقول الراوي :في إحدى رحلات سي الطاهر التولي إلى المسجد الذي يقيم فيه وجد الوادي ‘‘واد ورغى حامل ‘‘فلم يستطيع اجتيازه؛وكان ثمة رجل يحمل من لا يقدر على قطع الواد بأجر ؛فطلب منه سي الطاهر أن يقطعه الواد. ولكن سيعلمه حكمة أفضل له من الاجر.؛وافقه الحمال وحمله على كتفه قطعه إلى الشط المقابل. 
حمل سي الطاهر مزوده على كتفه وبدأ في السير غير مكترث بما قاله ؛فاستوقفه صاحبه طالبا منه الحكمة التي وعده فقال له سي الطاهر يا صاحبي عندما تريد أكل ((الزميثه اعگف أصبعك)) فضحك الرجل وخلى سبيله.
تابع سي الطاهر سيره متجها صوب المسجد الذي يقيم فيه مع إمامه ؛وهو‘‘يكر القرآن ‘‘تارةجهرا وأخرى سرا والمسافة طويلة ؛والجو بدأ يضطرب والليل يرخي سدوله ؛
وما أن قرب سي الطاهر من المسجد حتى أعطى ربي ‘خيره دالشثاوبدث اكب بالقرب‘‘
ازدادت معانة سي الطاهر!! ‘‘المطر.. الظلام.. الجوع.. الغيس ‘‘
ولولا معرفته للطريف لتاه فقيهنا. وما أن وصل إلى باب المسجد حتى ‘‘ما بقى فيه خيط ناشف ‘‘
وصل متأخرا بعد صلاة العشاء. إمام المسجد. صلى العشاء. وتعشي ونعس‘‘
بدأ سي الطاهر يطرق الباب بقوة والمطر لا زال ينهمر على راسه وعاود قرع الباب عدة مرات ولما عرفه الإمام من صوته تأخر في فتح الباب عمدا.
وأخيرا فتح الفقيه الباب. لا ضوء لا اناره إلا ضوء فتاشة زيت.وما أن توسط سي الطاهر قاعة المسجد حتى بدأ يصيح ويصرخ‘‘الأفعى..... الأفعى. الحيه... الحيه!!! ويخرج الإمام من المسجد مسرعا بدون حذاء ؛فيهرول سي الطاهر إلى الباب ويغلقه ‘‘‘ويعرط الباب بالعراطه ‘‘وهو يقول للفقيه ‘‘وقاف في الشثا قد ما وقفتني أنا وردلو خيرو بالوافي.
ذهب سي الطاهر إلى ‘‘السفيره‘‘‘يفتش عن قطع خبز يابسة ليسد رمقه..
هذه قصة تلقيتها من الرواة.. وكما قلت سابقا قرأتها في بداية السبعينات للمؤلف أحمد الصفروي باللغة الغربية الفرنسية....
وإلى هنا استودعكم الله والى الفرصة القادمة إن بقي في العمر بقية.

توقيع: جمال لشخم

اقرء المزيد

سي الطاهر التسولي 03

سي الطاهر التولي الحلقة الثالثة 
عاد سي الطاهر إلى قبائل جباله ليعيش جوالا بين مساجدها وجوامعها معتزا وواثقا بنفسه مرفوع الرأس بما يحمله في صدره .من قرآنه وعلمه. 
‘‘الطلبه القشاقشيه يحترمونه والتمينيه يخشونه. 
ذات يوم رمته سهام الأقدار إلى أحد المساجد ليلا ليبات فيه فلم يجد ما يتغطى به من البرد. فتغطي بالواح ‘‘المحاضره‘‘الكبار الواحهم كبيرةالحجم. ما بين 60علي50سنتم.وفي الصباح جاء فقيه المسجد ووجده على تلك الحالة فقال ‘له ألم تستحيي مغطي بالاواح. فأجابه سي الطاهر; اسي مغطي ب سي. فاستخف به الفقيه ومن حالته فقال له. قل لي آية من القرآن... فقال له سي الطاهر.. ‘‘‘وإن عليك اللعنة إلى يوم الدين ‘‘فبهث الفقيه وانصرف. *****!!!!/مع تحياتي والى الحلقة المواليةدمتم في حفظ الله.

توقيع: جمال لشخم 

اقرء المزيد

قالوا زمان

قالو زمان :- اللي ما عندو فلوس كلامو مسوس.
-اللي ما عندوش الدرهم يموت بالهم
-قداش كتملك قداش كتسوى
-اللي ما عندو ريالو يمشي فحالو
يعني الفلوس هي اللي كتعطي القيمة للانسان . ما رايكم ؟ 
وباش نجمعو الفلوس كنقولو :
-جمع لدواير الزمان
-الدرهم الابيض لليوم الاسود
-فلوسي كيغسلو كفوسي
وانواع البنوك متعددة :
-بنك الاسرة : الجدة ،الام او الاخت الكبرى حسب ثقتك فالبنك.
-مخدة : اختصاصية فالاوراق النقدية يعني هي البنك الدولي وحتا واحد مكيعرف المقر ديالها من غير مولاها اللي معلما بشي خيط ولا شي زواقة وكاينين بلايص اخرين....
-قلة او جرة او قلوشة : لجميع انواع الصرف .
وحاليا خلاص كاينين الابناك بجميع الاسماء والتصنيف .
الله يرزقنا ويرزقكم الصحة والسلامة وستر الدنيا والآخرة .
وعلى المودة نلتقي.

توقيع: رقية البورقادي

اقرء المزيد

التوائل 05

ناض عمي بوشتى بكري صبوح العيد . توضى ولبس جلابتو البيطا ومشى للجامع صلى هو وناس الدوار كاملين ورجع هو والفقيه . غي وصل للدار خرج داك الحولي الصردي من الروا . دبحلم الفقيه ومشى وخلاه كيسلخ هو وحمو وعبسلام من بعد ما علقوه فحاد الزيتونة . المهم gوزو النهار دالعيد مزيان كيما موالفين . غي سالاو الشوى حمو لبس الدجين ديالو والقميجة والسبردينة الدجديدة ومشى للعين يتلاقى مع صحابو . عبسلام تفركس حتى هو وهود للحد يتقهوى ، كيف وصل لقى 20 درهم تعبئة فالتيليفون و عيط ليامنة قالا وجدو راسكوم غدا مشي نجيو نخطبو . قالتلو غدا حنا معروضين عند خالي نتعشاو خلي حتى لبوث غدا . هو هيثاك وميلود خلط عليه .
عبسلام : اهلا المدعوي . مبروك العيد
ميلود : الله يبارك فيك اصاحبي 
عبسلام : كيف عيدتو ؟ مزيان ؟
ميلود : والله أصاحبي يا أول مرة كنحس بالنغمة دالعيد من هادي شحال . حنايا هاد فاكانص غي معديين على راسنا فبلاد النصارى والله يا العيد فالتسول ومع الحباب ما كاين بحالو 
عبسلام : عندك الصح اصاحبي . واقيلا قريب دقبط الطيارة 
ميلود : باقي شواي . أودي شني مشي نقلك انا راني عوال نجي عندكوم فهاد السيمانة انشاع الله . ناوي نخطب الصافية اختك .
ميلود : مرحبا والف مرحبا ما نجبروشاي ما خير منك . وليني هاد السيمانة ماجيين عندنا شي ضياف من فاس عوالين يعيدو معانا و يgوزو معانا العطلة خلي حتى يمشيو وعاد أجي ويكون خير .
عمي بوشتى ودادا حادة والصافية مشاو دارو على الجيران عيدو عليهم وgازو على الدار دعمي امحمد ودخلو يشربو أتاي .
بوشتى : أكيف خرجلك الحولي أ امحمد ؟
امحمد : ألخير دمولانا ابوشتى كلو شحوماث . انا شريثو قبل العيد بتمنيام بربعين ألف ونهار عرفة بحالو صيبتم ايلقيو خمسين . ولايني مناين ما حضروشاي الدراري يعيدو معاي جاني الشغل اها اه موشي هو هاداك . ناقص . 
حادة : لياه كا عبقادر والتهامي ما جاوشاي ؟
فاطنة : التهامي فالصحرا ما عطاوهشاي برمسيون و عبقادر غدا عاد مشي يخلط .
حادة : حتى يانا ماجيا عندي ختي وراجلا ونسابم من فاس . 
بوشتى : يالاه نوض أ المرا الحال مشى بحرا نمشيو نقطعو داك الحولي . يالاه عيدكوم مبروك
المهم gوزو نهار العيد مزيان ونهار تاني عيد ما جات دوصل الطناش حتى كانو جوج دالكاطكاطات حدا الدار دعمي بوشتى .
حدهوم حاطية كلشي بعيناها غي من الطاقة دالبيث وهي دقول لعياد :
حدهوم : أجي أعياد دشوف آجي . سبك سبك سبك
عياد : شني كاين ؟
حدهوم : كا هادو بصاح نساب بوشتى كا شني ؟
عياد : ايا خيي هاد الشي مجهد . واقيلا هوما هادو . راه فايناهو داك الراس دالمحسيب دي جاب بوشتى داك النهار فالطونوبيل 
حدهوم : آ وما جابو معاهم دالباليزاث دقول انتينا مشي يgلسو عندم شهراين 
عياد : ما عاث شني جايبين لبوشتى فداك الشوانط كاملين . ايوا سعداثو هو دي يقول عندي النساب 
حدهوم : ومال نسابك انتينا كيف جاواك . الهضرة الخطرة كيف لاقية
عياد : نوض ايوا نوض صغبنا حاد جوج قطبان دالشوى وسخن داك الدوارة دي شاطت البارح وارانا نعتقو بوحبل باش نمشيو دغيا نشربو معاهم القهوة ونتهاوذو حا الشواي
عمي بوشتى دخل الضياف ديالو للغرفة ورحب بيهم مزيان وتغداو وسالاو . من بعد ما ارتاحو شويش الصافية شطبت الدكانة وفرشاتا مزيان وعيطتلم يخرجو ومشات دوجد القهوة
بوجمعة : والله يا راك مبرع مع راسك ابوشتى فهاد التسول . غير هاد الgليسة فهاد الدكانة تحت هاد الدالية رخيصة بالملاين
بوشتى : ارا بعدا حاد السيgار عاد نجاوبك 
عمي بوشتى شعل السيgار و بغى يجاوب بوجمعة و عبد الحق ماجي رافد حا الموزيط على طهرو غي وصل عيد عليهم ومد داك الموزيط لدادة حادة وgلس 
الصافية ماجية بالقهوة وعياد ماجي حتى هو . عياد gلس و الصافية خلطت . غي شافت عبد الحق نبهطت وبقاو يداها ايرتعدو ومشات باش دنزل داك الصينية ادفلتلا من يداها ودجي على الركبة دعياد
الصافية حشمت ودقلب بالرجعة ما ادشوفشي موراها ككككل وعبد الحق ما عجبوشاي المنضر وبقى غي كالس وايفرك فصبابعو 
بوشتى شعل السيgار و ما قدشاي يصبر وبدا ايطحك وعياد ما عجبوشاي الحال وغطب وناض تم ماشي فحالو 
بوشتى : ألاين قابط اولد عمي شكون يخلي هاد الجواد كاملين ويمشي . كا غطبت ؟
عياد : ايوا قولا للصافية بنتك دي ما صابت فاين دهرق القهوة غي على جحلالي . واقيلا ادلقيوها بلعاني باش ما نعاودشاي نجي عندكوم . ايوا حتى يانا حول دي مخلي الترفزة ديالي فيها السهرة دالعيد شاخذة وماجي عندك 
بوشتى : عليا بليمين لا مشيثا . شني مشي يقولو عليك هاد الناس أ الحول
وئام : هاد عمي بوشتى وعمي عياد بحال قشبال وزروال تيقتلوني بالضحك 
السعدية : سكتي يا هاد الزرمومية واش ما كتحشميش ؟
عبد الحق شاف القضية حامطة شواي وهو يحشم و ينوض فحالو . عيى عمي بوشتى ما يحصر فيه ما بغاشاي يgلس مشات دادا حادة عمرات بريق خور دالقهوة وبراد داتاي وجابتم والصافية قبطت التيليفون وعيطت لعبد الحق وهضرت معاه خيربي وهو ماشي قابط الطريق . والله ما عرفتم شني قالو
بوجمعة : والله يا هاد الgليسة يا معتبرة خاصنا غي الكارطة ونديرو شي طريح مع عمي بوشتى وعياد
بوشتى : هاداك ما طلبت غي الكيرطة ؟ موجودة . نوض نوض أ حمو جيب داك الكيرطة راها فوق المرفع حدا الزلايف الجدادين 
ناض حمو جابلم الكارطة و تقسمو ، بوشتى وعياد قبالت بوجمعة وفوزي . حمو مشى قرط شي عواد دالزيتون و جاب شي حبات دالفول باش لقاو الرشيم 
حادة وحدهوم والسعدية كانو يشجعو بوجمعة و فوزي و أشرف و حمو والحاجة منانة والصافية ووئام ايشجعو عمي بوشتى وعياد 
بوشتى : مشي نلعبو على داك القابسة دالسيgار أ بوجمعة ياك ؟
بوجمعة : مشاث 
عياد : انا ما أنكميشاي غي أنفح . ايلا غلبنا حنايا دشريولي طابا ما نفح سيمانة
فوزي : مشات . يالاه ضمص داك الكارطة 
نخليو الطرح بدا يشخد والى اللقاء في الحلقة المقبلة بحول الله

توقيع: عزيز البورقادي

اقرء المزيد

حديث البغل

واحد التسولي بغى يتزوج و حشم ما قدشي يقولها لوالديه ، مشى قالا لشي صاحبو قلو بدا دتعكسلم ولا دخدمشي حتى شغل مسgد . هي هديك السيد عطاها غي للعكوسات وما بقاشاي ايبغي يخدم حتى حاجة . واحد النهار جا على غفلة صاب باه ويماه ايهدرو بيناتم و تخبع وبدا يتصنت . سمع يماه ادقول لباه : الدري ما بقاشاي ايسعف واقيلا خاصنا نزوجوه قالا وباش مشي نزوجوه قالتلو نبيعو البغل ونزوجوه قالا ايوا دابا مشي نبداو الحرث عاين على ما نكملو الحرث ديانا ونجمعو الصيف وندرسو وداك الساعة ألالة نبيعو هاد البغل ونزوجوه على سعدنا ووعدنا .

الدري سمع هاد الهضرة وهو يفرح وبدا يخدم كثر من جهدو ، حرث مع باه و جمع معاه الصيف كاملة ودرس معاه ووقفو التبن وبقى ايعاين باه يبيع البغل ، دازت الصيف كاملة وشي بغل ما تباع واحد النهار جا عند باه ويماه وقلم : شفتكوم ما كملتوشاي داك الحديث دالبغل هههههههه
دامت لكم البسمة.

توقيع: عزيز البورقادي

اقرء المزيد

العيد وطابا

ألو الواليد
راني فالسوق شني خصك نجيبلك
جيبلي أولدي طابا الله يرضي عليك
واخا أ الواليد نكمل التقضية ونكون عندك فالعشية
هاك أ الواليد هاد الخروف للضحية
وهادي العطرية
وراس الحانوت للمروزية
خضيرة بلدية وفواكه عاد مجنية
جيبتلي طابا ؟
جيبتلك بلغة وجلابة
وللواليدة شربيل وقرقابة
درة وسبنية
وقفطان ومنصورية
جيبتلي التنفيحة ؟
جيبتلك التمر والشريحة
ومن الحلوى والفانيد قابسة صحيحة
السكر واتاي والقهوة ماركة مليحة
ايوا بالهنا والراحة والصحيحة
جيبتلي طابا ؟
جيبتلك العطر
وفليو والزعتر
وللواليدة الحنة والسواك والعكر
ولختي صباغة الضفر
والروايح اللي تختار
رشو وردو عليا لخبار
فين هي طابا ؟
الدنيا فعيني ضبابة
نوض من قدامي دابا
ولا نغرول عليك بهاد الشطابة
أش من عيد على باباك بلا طابا

توقيع الاستاذ : سعيد بقلول.

اقرء المزيد

التوائل 04

خرج عمي بوشتى من البيرو دالقايد ما رافداهشاي الدنيا بالمعرفة دالقايد وعمل يدو فجيبو وخبع داك لاكارط فيزيت ، هو هواذ مع الدروج وهو يتلاقى مع الفقير الحوسين داخل للقيادة .
عمي بوشتى : شني ادلقي هنا أ الحوسين ؟
الفقير الحوسين : اودي غي راني انسبك على داك الكارني د الرامين شضفوني عليه
بوشتى : أ حاي كا باقي ما صغبتو ؟
الفقير الحوسين : قالولي جيب جوج دعروق لزدياد وجوج تصاور و فوكوطوبي دلاكارط وشهادة السكنى وشهادة الحياة وراني انضور على المقدم دابا كما يعطيهالي 
بوشتى : ولاش مشي دحتاج انتينا هاد الراميد ياك انتي عمر الطبيب ما مشيتلو . نهار ايقدر عليك الله ودمرط ادمشي دكوي أو دبخ أو ادمشي عند العوادة 
الفقير الحوسين : ايوا قول دي بغيث . قلو ما حاس بالمزود غي دي مطروب بيه
بوشتى : ارا نشوف كيف خرجولك هاد التصاور 
الفقير الحوسين مدلو داك التصاور شافم عمي بوشتى وبقى ايطحك 
بوشتى : غي رجع فحالك بلا ما دعدب فراسك . غي هاد التصويرة هادي براسا راها دقضي الغراض خير من داك لاكارط د الراميد ههههههه 
تفارق معاه وgاز للسوق . حيت نهار عرفة ايعمر السوق عندنا فالتسول . وتقضى شني خاصو وطلع فحالو للدار .
غي وصل تلاقاتو دادا حادة : ياك لاباس بعدا ؟
بوشتى : شني مشي نقلك ، القايد كبر بيا ولاغالي باش يلقي معايا الصحبة 
حادة : سكث سكث . الديكتور بوشتى . ما صاب معامن يلقي الصحبة غي مع بوشتى دالحاج حمو 
بوشتى : ايوا شوف ايوا . كا حسابك يانا ساهل . خاصك دعرف بلي التسول كاملة ادقرا عليا وعليك فداك العجب دلاطيرنيط 
حادة : ايوا هادي راني انعرفا . قالتالي الصافية . قالتلي راه داك ولد لزعر و شي أساسيد خرين ما خلاو ما كتبو علينا فداك الهم دالحيسبوك
بوشتى : ايوا الحمد لله هاد الشي جابنا غي المزية . ها هو دابا القايد طحى صاحبي وعطاني النمرة ديالو وقلي فيواخ ما بغيتني عيطلي . 
هوما هيتاك وحمو خلط
حمو : واه أ با سماعتم فالقهوة ايهضرو عليك القايد والخليفة قلو والله ايلا راجل النيمير الواحيد داك بوشتى معضورم ايكتبو عليه .
بوشتى : وفاين كث نتينا أ بن المهيبط لاخور ؟ هاد النهار دعرفة حتاجتك درفد معايا السخرة ضورت عليك حياط مياط ما جبرتكشي ككل . فاي كث ؟
حمو : كث خدام بالبرويط اننقل الحوالة لعباد الله
بوشتى : ودمن هاد البرويط
حمو : كريتا و خدمت بيها هاد النهار وصورت شي خمسالاف ريال .
حمو مد يدو لجيبو وعطى الف ريال لباه و الف ريال ليماه و الف ريال لختو وخلى ليلو ألفاين ريال
بوشتى : ايوا الله يرضي عليك اولدي هايثا نبغيك . 
هاك ايوا رفذ هاد السخرة دخلا معاك للدار ونتينا أ الصافية فرشلي فالدكانة وجيبلي نتغدى راني فريت ببوهيوف .
تغدى عمي بوشتى وورك و عيط على القهوة . غي وجدت وجابتا حادة ونزلاتا فوق الطبلة وعياد وحدهوم خلطو
بوشتى : ألاطيف ألاطيف و شاد بوخنافر هدا دقول نتينا أيحسبلا الوقت ديالا
عياد : مسا الخير أبوشتى . كا سوقت لعرفة هاد النهار ؟
بوشتى : انا هودت عند القايد كان غراضو بيا وشفتو شني خاصو عاد gوزت للسوق قضيت حاجة وطلعت
حدهوم : ايوا هاد بوشتى طحالك خور . قلك شاف القايد شني خصو . ايوا باز
الصافية : ايه أ خالتي حدهوم . بابا طحا شخصية
والناس الكبار طحاو ايصاحبو معاه ويسقصيو فيه والناس كاملا ادعرفو .
بوشتى : ايوا قولالا كما دسكث حا الشواي
عياد : كيف قيال السوق ؟ انا ما سوقتشاي هاد النهار
بوشتى : أسيدي قيال الغلا . والله يا الحولي يا عامل الgرون . بحال هداك ديالي ساومتم انا قالولي ربعة وخمسين .
عياد : اودي gوزوهم فالتيريفيزيو قالك هاد العام الحولي موجود . قلك العرض والطلب هاد العام كاين . نقلك خمسطاش منيول نقلك خمسين منيول دالغلم دي ادور فالسوق
بوشتى : خمسين منيول ؟ المغريب كامل ما فيهشي ربعين منيول دالخلق . كا الكسيبة كثر من البشر أ الحول ؟
عياد : ايوا قول خمسطاش . و باش عجبني الحال الوزارة gازت على الحوالا كاملين لقاتلم الحلاقات فودناهم . قلك علموهم باش ما يوقع الغيلاط و الطرافيك
حدهوم : وشني أ حادة كا مشي دوجد شي سفنج لغدا دالعيد كا لا ؟ 
حادة : وقيلا انقول نوجد شي ميدونة دالسفنج حقاش ماجيا عندي ختي وراجلا ونسابم فهاد العيد
حدهوم : ايوا نجي عندك مع الفجر ونتعاونو بجوج .
هوما هايثاك وعبسلام خلط
حادة : على سلامتك اوليدي فاين قيال غايب ؟ قيال بالي كامل معاك هاد النهار 
عبسلام : ايوا غي الشغل واها أيما . 
حادة : وشني فهاد الخناشي ؟
عبسلام : ما هنا ما نخبع عليكوم . انا راني باغيكوم دمشيو معايا دخطبولي يامنة دعمي حميدة و التقضية دي مشي دحتاجو كاملة هاني جيبتا معايا من تازة
حادة : ايوا الله يرضي عليك اوليدي هداك النهار دي انتمنى حتى يانا
حدهوم : ياك يامنة دحميدة هي دي قالتنا فاطنة مشي يخطبوها لعبقادر ابنا 
الصافية : يامنة انشاع الله ما يعبيها غي عبسلام خاي
بوشتى : وجامع شي فلوس بعدا باش دتزوج ولا معول عليا ؟
عبسلام : الخير موجود أ با . وضروري ما دزيد دعاوني بشي بركة . هانتينا هاك هاد الميا وستين الف زيد عليها شويش وانا فلوس الصداق راهم موجودين .
عبسلام طرب يدو لجيبو باش يجبد الفلوس وهو يصيب غي خبش بقى ايدور فالجياب كاملين . ما صابشاي البزطام وهو يgبس فموطعو وما بقاتشي النقطة دالدم ادور فوجاه
بوشتى : مالك ، شني كاين ؟
عبسلام : اويلي وقيلا عباولي البزطام 
عياد : كا نتينا ديما ايقيوها بيك البانضية ؟ هاد الشي غي ادخدم فالمدينة يا حسرة 
هوما هايثاك والسي خالد جمال عيط لعمي بوشتى قالو قول لعبسلام يلاقيني للقهوة دالخياط راه حاد البزطام ديالو طيحو عندي وص السلعة وما فطنشاي بيه .
عبسلام سمع هاد الهضرة وهي عاد درجع فيه الروح ويقبطا بسبكة وحدة حتى للحد تلاقى خالد جمال وعطاه الامانة ديالو ورجع 
عمي بوشتى : ايوا على سلامتك أ خراg . فاي كان عقلك ؟
الصافية : أرالي أخاي داك الفلوس انا نخبعالك على ما تشوف شني مشي دلقي
حادة : دابا غدا ينشاع الله العيد . ونهار الخميس تاني عيد ختي وراجلا ونسابم مشي يجيو باش يgوزو العيد معانا . هي هادي المناسبة نعبيوهم معانا فالعشية ونمشيو نخطبو .
حدهوم هداك ما سمعت وناضت مشات فحالا وgازت دقت على دادا فاطنة وقالتلا هاد الخبار .
عمي بوشتى بقى مورك فالدكانة حتى غربت المغرب . ناض مشى للجامع صلى غي هو والفقيه وعقد عليه باش غدا يجي يسبق منو يدبحلو هو اللول . 
غي رجع للدار والتيريفو سرسر 
بوشتى : ألو شكون معاي ؟
بوجمعة : هدا بوجمعة معاك أبوشتى . اش خباركوم ؟ عواشركوم مبروكة 
بوشتى : الله يبارك فيك ابوجمعة . ايوا ها حنا انعديو 
بوجمعة : ايوا غي وجد شي حولي صردي يكون متكتك راحنا بعد غدا مشي نجيو نهجمو عليك كاملين تما فالتسول 
بوشتى : مرحبا بيكوم كاملين راني موجدلكوم حتى يانا حاد الحولي gايزو الكلام . غي لادزهزاوشي 
نخليو عمي بوشتى مع الاستعدادات ديالو للعيد وللضياف دي ماجيين عندو والى اللقاء في الجزء المقبل ان شاء الله.

توقيع: عزيز البورقادي

اقرء المزيد

التوائل 03

عمي بوشتى بقى مسمر فموطعو . ما عرف باش تبلا . بقى غي ايبني ويريب حتى عباثو سهايثة . حاد الشويش وحادة خلطت .

حادة : معامن كث ادهضر ؟

بوشتى : غي المقدم 

حادة : مالو ياك لاباس ؟

بوشتى : قلك القايد ايدور عليا حاجتو بيا 

حادة : اويلي ياك ما لاقي شي زبلة عاوث أ بويشتى وساكث وانا ما جايبة خبار ؟

بوشتى : اللقوة ينشاع الله أ الفا دالمجرة . gوز من قدامي وغبر عليا خنشوشك القميقم دموكا ولا راني نقرط عليك هاد بوصالح . اخزيت الله ينعلا مركة 

الصافية سمعاتم شعلوها وجات ادسبك

الصافية : مالك أ بابا شني كاين ؟ مقربلينها عل القيطي

بوشتى : هانتينا ادشوف هاد بونيابر د يماك . القايد لاغالي وهي ادنويها ديما عوجة 

الصافية : ايوا يقد يكون حتاجك فشي حاجة مزيانة ونتوما مخلوعين . قلك نوي الخير دجبر الخير . المهم سير عندو وشوفو شني خاصو

بوشتى : ايه ابنتي داك الشي اللي كاين ، جيبلي معاك جلابتي البيطة وشوفلي داك السباط فاين هو ومسحو من الغبرة وجيبلي الكارني ديالي راني لاقيه وص الحالة المدنية مور المرايا فاغارب دالسطيحة 

حادة : ولا دنساشي السخرة دي وصيتك عليها راهم ماجيين عندنا الضياف برانيين .

عمي بوشتى فطر ولبس جلابتو وهود نيشان عند القايد صابو ايعاينو فالمكتب ديالو

القايد : زيد أ عمي بوشتى . تفضل مرحبا

بوشتى : ترحب بيك الجنة أ سعادة القايد ولايني موشي نتينا القايد دي أنعرف 

القايد : هههههه هداك القايد اللي قبل مني ما بقاش هنايا راه فوجدة وانا اللي جيت فبلاصتو دابا

بوشتى : ايوا مرحبا بيك اولدي والله يعاونك على سربيسك

القايد : ترحب بيك الجنة أعمي . أنا عجبتني الدنيا هنايا عندكوم وعلى ما عاودولي التسول كاملين ناس مزيانين وحتى انا جيت نتعاون معاكوم باش نخدمو هاد البلاد ان شاء الله 

بوشتى : ايوا اسيدي هاحنا معاك وفاش ما حتاجيتنا هاحنا موجودين

القايد : قالولي دوزتو واحد المهرجان زوين هنايا قبل رمضان ، عاودلي كيف داز داك الشي وشكون اللي نضمو وشنو قالو الناس عليه

بوشتى : ايوا شني مشي نقلك أ سعادة القايد ، المهراجا حقا لقيناه . وgاز داك الشي النيمير الواحيد . شني منك يا خزاين وشني منك يا خيل ، سبعة دالسربات كل سربة دنسيك فسربة والبارود بقى غي أيصرياح فالسما يوماين صباح وعشية ، و زادو زينوها المعلمين بالطبل والغيطة و التبوريدة على حقا وطريقا داك الشي دالجدود القدام والرباعة دالغنايا حتى هوما لقاو الباروك والناس نشطت و كلشي كان فرحان و ايقول الله يعطيهم الصحة هاد الدراري دالجمعية والناس اللي عاونوهم كانو فالمستوى الرفيع وحمرونا الوجا وردونا الموسم القديم دسيدي معروف دهادي شحال الله يعطيهم الصحة 

القايد : ايه انا عندي التقرير داك الشي داز زوين بشهادة رجال السلطة والمسؤولين غي بغيت نسمع منك الخبر حيت انت قريت عليك بزاف فواحد المجموعة ديال التراث ديال قبيلة التسول وعجبتني الشخصية ديالك انت ومراتك دادا حادة وقلت خاصني ضروري نتعرف عليك

بوشتى : كا هاد المساخط ايعاودو عليا كلشي وحتى على مراتي ؟ ايوا مصيبة هادي دهاد راطيرنيط فضحت كلشي ما بقاشي حتى شي حد مستور

القايد : ههههههه . بلا ما تخلع أ عمي راهم ايعاودو عليك غي الخير . ودابا حتى انا حصلي الشرف تعرفت عليك وهاك ها النمرة ديالي ايلا خصاتكوم شي حاجة او كان حاجتك بيا غي عيطلي انا موجود انا جيت لهنا غي باش نخدم الناس ديال الجماعة ونتمنى نكون عند حسن الظن 

بوشتى : الله يكرمك أ ولدي هدا المضنون فيك ايوا الله يعاونك على سربيسك و نهارك مبروك

عبسلام تفارق مع ميلود ولقى الشيك فالبزطام و قبط السريع لواد امليل . غي وصل بدا ايسقصي على التيجاني وفا بنك هو هيثاك وهو يتلاقى الشريف محمد البورقادي بومعكاف سلم عليه ومشى معاه للبانكا وقف معاه حتى تيرا داك الفلوس ولقاها فجيبو وخرجو هو وياه ومشاو للقهوة .

الشريف : ايوا هانتي سهل عليك الله فمليون دالفرنك وتيريتي فلوسك ولقيتا فالجيب . ما دنوضشاي دلقينا شي عراسية فاعلة تاركة ما حد الصيف ما زالا ما خرجت 

عبسلام : داك الشي وقيلا اللي مشي نلقي أ الشريف ايلا سهل الله . وغدا مشي نمشي نخطب . ولايني عندي حاد الشغل خصني نقضيه ضروري هو اللول فتازة 

الشريف : شنيهو هاد الشغل ؟

عبسلام : اودي شني مشي نقلك . داك الشركة اللي كنت خدام معاهم خرجوني وما خلصونيشاي فشهراين دالخدمة وكلاوني فالكونجي ديالي وفالديكلاراسيو ودابا خاصني ندعيهم

الشريف : اودي شحال منم هادوك هوما فعايلم . بنادم ما بقاشاي ايخاف من الله واياكل العرق دخاه وما ايحشمشاي ويزيد يكملا بلاكيس ما يديكلاريش بالخداما حشومة . ايوا الله ينعل اللي ما يحشم . شوف دابا خاصك دطلع لتازة ودسبق بمفتش الشغل هو اللول وشوفو شني مشي يقلك وخلي عليك المحكمة حتى للتالي 

عبسلام : ايوا نلقي بكلامك الشريف . ونشوفو هاد المفتش شني مشي يلقي . ايوا الحاصول الله يهنيك .

ناض عبسلام قبط الكار لتازة ، ركب حدا حاد الطفلة حتى هي ماشية لتازة وجبد معاها الهضرة .

سهام التازي : شفتك مع داك الشريف بومعكاف قبل ما تركب واش كتعرفو ؟

عبسلام : ايه انعرفو ونتينا ادعرفو ؟

سهام : زعما راني خدامة معاه . هاداك الشاف ديالي

عبسلام : الله يعمرا دار داك الراجل 

سهام : ايه ولايني هادي شهراين وانا خدامة معاه مازال ما شفت موراه الريال يندكر والعيد هدا . وحتى الديكلاراسيون مازال ما ديكلارانيش 

عبسلام : ياك هو ماكسيان ؟ كا خدامة معاه فالgاراج ؟

سهام : هو ميكانيسيان وداير شركة ديال السيكيريتي داك الشي علاش تيقولولو بومعكاف 

عبسلام : وفاين ماشية دابا ؟

سهام : ماشية لتازة عند مفتش الشغل نشكي بواحد الطريطور كنت خدامة معاه من قبل 

عبسلام : شني كنتي ادخدم معاه ؟

سهام : كنت اندير طيابة وجرا عليا وما خلصنيش 

عبسلام : باينة حرقتيليه الطواجن . هاد الصبابع عندك موحال واش يطيبو حتى البيض وماطيشة . ايوا شوف على صدفة سبحان الله . حتى انا طالع لتازة نشكي عند مفتش الشغل

سهام : ايوا نمشيو انا وياك . قلي بعدا شكون انت ؟

عبسلام : انا عبسلام دبوشتى دالحاج حمو 

سهام : وااااااو . اول مرة كنتلاقى بشي شخصية مشهورة 

انت هو اللي كتب عليك داك عزيز البورقادي فالفيسبوك . باغي تخطب يامنة وطيحت من فوق النادر وعطاك ميلود واحد الشيك فيه مليون ومشيتي تيريتيه من التجاري وفا بنك فواد امليل ياك ؟

عبسلام : بسم الله الرحمان الرحيم كا انتي بنادم كا الدجن . 

عبسلام وقع معاه الزايد وبدا ايفافي على الفلوس صابا باقية فموطعا . سهام حسات بيه وهي طحك 

سهام : ههههههه . شوف اعبسلام . الخبار ديالكوم راه تيعاودوها فالفيسبوك الاعضاء ديال واحد المجموعة حتى وليتو مشهورين . يالاه نوض باش نزلو ها حنا وصلنا للمحطة .

عبسلام وسهام مشاو بجوج عند مفتش الشغل وشكاو عليه وحتى هو خدم معاهم مزيان ولقى الاتصالات ديالو وواعدم باش يحل المشكل ديالم فيوماين . من بعد خرجو وقالا خاصك دمشي معايا للسوق باش نشري شني خاصني للخطوبة حيت انتيا بنت المدينة و ادعرف دختار . الحاصول

لقاتلو خاطرو و مشات معاه للسوق دتازة وشراتلو شني خاصو وgازو عند خالد جمال باش يشريو شي سباط مزيون ليامنة . هي هاديك عزلتليه السباط ومناين خلصو طاحلو البزطام وسط السبابط وما فطنشاي بيه حتى رجع للدار هههههههه .

نخليو عبسلام مع الفقصة ديالو و الى اللقاء في الجزء القادم إن شاء الله.

توقيع: عزيز البورقادي

اقرء المزيد

التوائل 02

مشى عمي بوشتى ايسبك هو وعياد يشوفو عبسلام شني وقعلو ، قبطولو فيداه ونوضوه، ناض ايزحول ، والدماياث هوادا من حناكو ، وهو لاقي يدو على عينو ، حمو مشى ايطير قالا ليماه ، جات دادا حادة ادسبك وتبعاتا حدهوم والصافية موراهم .

حادة : اميمتي على وليدي و طاح طيحة زغبية ، كيف وقعلك المدعوي ؟

بوشتى : ما عرفناشي كيف وقعلو حتى صيبنا الراجل هواد اينكور ويجي منفوط فالحالة دالنادر ، هانتي ادشوف وجاه دقول خربشوه القطوط

حادة جبدت حاد الزيف كانت لاقياه فالحزام باش محزما ومسحتلو داك الدم وهو غي لاقي يدو على عينو 

الصافية : مالك من عينك كا دخلتلك شي حسكة كا قاصتك شي برومية ؟

عبسلام : عيني ما انشوفشاي بيها واقيلا عواريت

حدهوم : نفخلو فيها الصافية او جيبلو حاد السطل دالما يغطس راسو فيه

حادة : شني غا دنفخلو فيها وهي حمرة بحا الجمر ، هادي خاصا العوادة هي دي دقلنا شني كاين

الصافية : ايوا حتى للصباح ويعبيه بابا لفاس عند راجل بنت خالتي الطبيب دالعيناين يgوزلو فابور

بوشتى : لواه نعبيه للشينوا ، حنا هاد فاس ما نطلقوشاي منو ، نخدمو غي على المركوب ؟

عياد : عبيه غي للسوق عند الهاشمي د عمار يبخلو

حادة : ولايني هادي ما دكو غي عوينة قاصتو . ايوا بالسيف ، حتى داك فاطنة مناين جات وهي دشوف فيه ودقلي اخيتي ولدك طحا غزال جات معاه هاد وجدة وزادو زينوه داك النضاضر دي لاقي على عيناه .

حدهوم : خلاص احادة ، ايوا موشاي شي زين ، حتى عبقادر ولدا طحا النيمير الوحيد من نهار gاجا طحى فيه مود دالزين ياك قالتنا نهار الخميس مشي يجي باش يمشيو يخطبولو يامنة دحميدة

عبسلام غي سمع هاد الهضرة ويسمح فيهم ويزيد خلفة ما ايشوفشي موراه .

طلع عياد كمل داك النادر بالتسقاف وحدهوم مشات فحالا و الصافية جرت يماها حتى وصلو للدار وقالتلا :

الصافية : ايما عبسلام خاي ايبغي يامنة دحميدة ومناين سمع عبقادر دعزيزي امحمد مشي يجي يخطبا ما بقاشي ايشوف قدامو مضو

حادة : ايوا شني مشي نقلك ، نقولوها لباباك ونمشيو نسبقو فاطنة ونخطبوهالو 

بوشتى تم داخل و سمعم شني قالو وهو يواجبم :

بوشتى : ايوا لا جامع شي فلوس نمشيو نخطبوهالو ، داك الطفلة دحميدة ادعجبني حتى يانا مسرارة وادحشم بزاف

حادة : والله ما كرهت نلقي العرس ليلو و للصافية فنهار وحيد 

الصافية حشمت و سمحت فيهم ومشات درgب على الحمارة 

بوشتى : ايوا حتى يبان بعدا داك المزغوب دي فطنجة ، وحتى ولد لزعر بغيناه يحضر معانا فالعرس قالولي مشى للحج راه دابا ثم 

حادة : كا ولد لزعر عاوث مشى للحج ، ياك عاد العام دي gاز كان ثما

بوشتى : هو عندو الحج بحا دي ماشي لواد امليل ، كل عام ايمشي ليلو حقاش هو محسوب مع الوزارة دالاوقات

حادة : ايوا سعداتو والله يلحقنا حتى حنا بداك المقام ونقبطو فشباك النبي 

بوشتى : مناين ؟ كا مداك المطاير دي خلالك باباك ؟

حادة : ايوا انتي غي ضور ضور ودرجاع لبابا دقول انتي شني لقالك

هوما هايثاك والتيليفون دعمي بوشتى سرسر 

مشى يواجب صابو خاوي وهو يلاغي على الصافية 

بوشتى : الصافية أ الصافية جيب معاك ابنتي داك الشارجون واجي الله يرضي عليك 

الصافية جابت الشارجور ولقات التيليفون يتشارجا ، حاد الشواي وهو يعاود يسرسر 

بوشتى : ألو شكون معاي ؟

فوزي : انا الحاج فوزي من فاس أ عمي بوشتى ، شخباغك ، كي دايغين مع هاد الصهودات ؟

بوشتى : كا الحاج فوزي عم الطبيب راجل غزلان ؟ 

فوزي : هو هداك ما عندي ما يتسالك ، كي دايغ مع تماغة أ السي بوشتى ؟

بوشتى : ايوا ها حنا انعديو ، شخبار الحاج سلام وشخبار داك المفلس دبوجمعة كا جاب المرا الدجديدة كا باقي ؟

فوزي : ايوا الله يهديه وصافي راه واقيلا رجع للطغيء وداغ مناءص 

بوشتى : ايوا يانا عاد كث مشي نجي عاوث لفاس و نشوف شني هاد البلان دي طاح عليه 

فوزي : بلاش ما تجي دابا غي تسنانا تما راحنا غادي نجيو كاملين ونهجمو عليك تما فالعروبية انا والمدام و بوجمعة والسعدية والدغاغي كاملين

بوشتى : هداك النهار المبروك مارحبا بيكوم كاملين

فوزي : تغحب بيك الجنة أ السي بوشتى ، ايوا تسنانا نهاغ الحد ان شاء الله

بوشتى : نشاع الله الحاج

حادة : شكون دي ماجي ؟

بوشتى : ماجيا ختك وراجلا ونسابو ، نهار الحد مشي يكونو هنا 

حادة : هايثاك قلي . ايوا خصك غدا دهود للسوق دجيبلي شني خاصني هادو راهم الضياف د المدينة وبرانيين 

بوشتى : ايوا قلك اللي كلا دجاج الناس يسمن ديالو . شني خاصك من السوق ؟

حادة : خاصني بعدا العطور وخاصني الزيث وخاصني ...............

نخليو دادا حادة ادشوف شني خاصا ونرجعو لعبسلام .

عبسلام مشى ساخط ما ايشوفشي قدامو وطلع للغرفة وزول السباط وكرفطو حيت الباب و ترمى على السداري و طاح دودة

فالصباح ناض ، اول حاجة لقاها عيط ليامنة وهضر معاها فالتريفو وقلا واش بصاح هاد الخبار دي سمعت ؟ قالولي مشي يجي عبقادر دعزيزي امحمد يخطبك . قالتلو واه . قلا وانتينا شني ادقول ؟ قالتلو ما عندي ما نقول راك ادعرف با صعيب شواي ، ايلا بغيت دعبيني ايوا خصك دزرب واجي خطبني نتينا اللول قبل منو . 

دغيا تسالاتلو خمسة الدراهم دالهضرة وناض لبس حوايجو وقبط الطريق وهود للحد .

هو داخل للقهوة وهو يبانلو ميلود ولد المختار دعلي . صاحبو كان قرا هو وياه فالتحضيري ، غي عبسلام سالا القراية بكري وميلود كمل قرايتو تبارك الله حتى للخامس و حرg لفرنسا وطحى فاكانصي لاباس عليه .

عبسلام : اهلا أهلا أهلا الصحبة القديمة . كا راك هنا ا المسخوط ؟

ميلود : أهلا الكارثة ، أفاين راك المصيبة عييت ما نضور عليك ولا جبرتك 

عبسلام : راني فالدار ، غي من تمارة دالبني فوجدة لتمارة دالفلاحة مع عمك بوشتى . ونتينا فاين غابر أ بومليلس ؟

ميلود : هادي عشر سنين باش حرgت لفرانسا .

عبسلام : و وين راك دابا مستقر ؟

ميلود : فبوردو

عبسلام : باقيا الملاغة ديالك هي الملاغة ، انا انقلك فاين راك مستقر ونتينا ادقلي نتبوردو . كا باقي مبلي بالتبوريدة ؟

ميلود : وا بوردو أ المهيبط موشي نتبوردو ، عليها جراو عليك من التحضيري ساعة ما ضلموكشاي .

عبسلام : زعما نتينا كملت القراية وطحيت دكتور ، ياك كنتي ادنقل مني كلشي 

ميلود : ايه بصاح ، كان ايقرا معايا اينشطاين وما كنتش راد البال . أمالك المصيبة مخربش كامل من وجاك ياك ما باقي ادشابك نتينا والصافية ؟

عبسلام : ايوا غي سكث واها . الحريرة ديالي حريرة . شعل بعدا حاد الماربورو وتصنت لصاحبك يعاودلك 

هي هاديك كلس معاه ، تقهواو وعاودلو القصة كاملة على يامنة

ميلود : ايوا نوض توكل على الله اصاحبي وديرنا شي عرس فاعل تارك كما نحضرو فيه ونشبعو تبوريدا راني موحش لعراس دالبلاد و شحال هادي ما تبوردت

عبسلام : وفايناهي الفلوس ، الشغل صعاب دابا ا ميلود وانا يالاه جامع سبعميات الف فلوس الصداق

ميلود : ما تضرب حساب اصاحبي . انا مليون غادي نعطيهليك كاضو من عندي ويلا بغيتي شي حاجة اخرى نزيدك . 

ميلود جبد الكارني دالشيك و سنالو على مليون وقلو :

ميلود : هاك نوض دابا سير للتيجاري وفا بنك و تيري فلوسك انا مشغول دابا وما يانا نمشي معاك حتى للبانكا .

عبسلام : وفين جا هاد التيجاني وفا بنك

ميلود : التجاري ماشي التيجاني يا الكارثة . سير لواد امليل وحضي راسك من الشفارا يتبعوك .

هي هاديك تفارق معاه وركب فالسريع لواد امليل ومشى للبانكا باش يتيري الفلوس .

عمي بوشتى نعس وفالصباح مع النبوري سمع الدقان فالباب ناض حل الباب وهو يصيب المقدم واقف قدامو .

بوشتى : صباح الخير أ المقدم . ياك لاباس ؟

المقدم : صباح الخير أ بوشتى . خاصك دتكلم دابا للقايد راه ايدور عليك .

بوشتى : أيدور عليا ؟ وما قالكش لاش بغاني ؟

المقدم : ما نعرف . حتى دمشي عندو ودابا دعرف . يالاه الله 

يهنيك .

نخليو عمي بوشتى حال فاه ايفكر لاش عيطلو القايد وإلى اللقاء في الحلقة القادمة إن شاء الله.

توقيع: عزيز البورقادي

اقرء المزيد

قالوا زمان 06

يعود برنامج قالوا زمان بمجموعة أخرى في جزءه السادس من أقوال ‘‘الحكيميه..والنظيميه.. ناس الحكمة والمعنى 
قالو شمتك=====قالوعرفتك 
القردالشارف ====مايتعلم الشطيح 
ايشطحو القرد=====ويضحكو عليه 
داز مگوازي======وتهرس عكازي
كل سفيط =======بدخانو
يلا غاب الزين======بقيين حروفو
أضرب في الدومه ====ينضو عشره
سبع صنايع======,والرزق ضايع
اللحيه ماتحمل اللحيه ===إلا للقبر
الخاوه=====حدها الدنيا
الفار المقلق ====من حظ المش
العين حق ====والطيره باطل
إتبع الكذاب =====حتى الباب الدار
مادير يداك في غيران===ما يعضوك فيران
القرعه ولدث =====والرمانه تبلاث
خليها بالعين ====وتبعا بالجره
ورني منن طارو ==≠=نوريك فين نزلو
ألله يلعن لي عطى كلمثو ====وماوفاها
وكبرث بنتو ====وما عطاها
شمس الصمايم ====في النسا او البهايم
ايكملو البحاير ====ويبقاو المعاير
لي عقدهابيدو ====يحلها بسنو
كبير الكرش =====ايخدم على الجماعه
أربط دصيب ======مادطلق ‘‘اعقلها واتكل ‘‘
بني علوهم ايسببو====ومطازه ايحسبولهم
يلا ماشوفنا الزين====خمسنا عليه
الزين في الدفله ====وعروقها حارين
العظم الشارف ====منك نسباق
امخض الما ======دصيب الرغوا
الموس =======أتبع الزغب
انقص من اللحيه =====وزد في الشارب
هاك فرنك وزع وكسي أمك ==ورد الصرف
عشاك لول =====عليه دعول
سبع ايام دلباكور ====دب. دوز
الرابح في الدعوى ====خاسر
بارد سكه ====أو حامي ايسلق
حتى قط ما ايهرب ===من دار العرس
ماهو لا دخبزه===ولادبزه
تعلمو الحجامه ====في روس اليتامى
ما يحمو الكدور==≠غير الجدور
ماعمر داود ===ما يعاود
عطني خومثي ===نوريك نيثي
صيامو بعام ====وفطرو بجراده
لا حمار ====لا سبع فرنك
يلا شبعث الكرش ====غنى الراس
جلط لي ====او نمشي لبني مقوره
والله وما ===قفلت لا فورت
شكون أنت احمو ===في سلا
فاس خريبه ====أجي ودخلو
طلاع دكول الباكور ===أنزل املي قالها لك
بحال لي ايحلب ====في الكسكاس
واحد ايحلب ====واحد ايقبط من القرون
بن عم السارح ===دلقايد
جوعي في كرشي =====وعنايثي في راسي..
والى هنا ينتهي هذا الجزء والى الجزء الموالي. دمتم في رعاية الله وإلى اللقاء إن شاء الله. 

توقيع: جمال لشخم

اقرء المزيد

سي الطاهر 02

الحلقةالثانية

يقول الراوي:عندما سمع‘‘سي الطاهر‘‘كلام والده وتصحيحه للاية القرآنية أسرها في نفسه ولم يعقب ‘وتركها تمزق احشاءه. وبالرغم من الترحيب من أمه واخوته. والطعام الذي قدمته له أمه لم يكن ليفرج من كربته ,طالت ليلته وجفل النوم من عيناه. 
وما أن بدأت الديكة. تصيح وتصرخ معلنة بزوغ الفجر. انسل سي الطاهر من فراشه دون علم أحد من أهله وحمل‘ مزوده‘على كتفه وعاد من حيث أتى ولام نفسه لوما شديدا وأصر أن يحفظ القرآن ولا يفلت منه لا ‘‘نصبة.. ولا نقطة ‘‘
وبعد التحاقه بالمسجد الذي كان فيه ‘‘مخنش‘' يقول الراوي أنه شمر على سواعده بالجد والاجتهاد ولم يقتصر على فقيه واحد. بل أينما ذكر له فقيه وشهد له بالكفاءة والشهرة التجا إليه وأقام عنده ‘‘وخرج تخريجة على يده ‘‘التخريجةاو السلكه هي عند أهل الاختصاص. ( كتابة القرآن وحفظه من سورة الفاتحة. البقرة إلى سورة الناس ‘‘ثمن.. ثمن.. أو ربع حزب أو ربما اكثر على حسب حفظ الطالب..
يقول الراوي أن الرحلة طالت بي سي الطاهر بضع سنين. وفعلا تمكن من حفظ القرآن ‘وكتابته ‘‘نقطه نقطه ونصبه نصبه كما شهد له شيوخه آنذاك عن جدارة واجتهاد.
راودته نفسه أحد الأيام الرجوع إلى الأهل وغلب عليه الشوق وشده الحنين إلى رأيت والديه واخوته وبالاخص والدته الحنونة وعزم على ذلك ‘‘وليكن.. ما يكون ‘‘
خرج سي الطاهر من المسجد الذي يقيم فيه بقباءل الشمال إلى قبيلة التسول. والمسافة مسيرة يوم ليلا ونهارا على الأقدام ‘‘جر.. يما دجر‘‘تصورو معي هذا الحذاء وهذه ‘السحنه‘‘
وما أن اقترب سي الطاهر من داره وعرفته أخته عن بعد صاحت على أمها بصوت عالي ‘‘آ يمه.. آ يمه وايمه ‘‘الطاهر خاي جا‘‘..
ولما سمع أخته تناديه‘بالطاهر ‘دون سي. ولي مدبرا متذمرا من اخته. ‘
لانه بعد هذه المدة الطويلة ‘‘للتخنيشه ‘‘لحفظ القرآن لم يستحق.. سي الطاهر عاد إلى قبائل جباله وهو يقسم أنه لن يعود إلى داره مرة أخرى ولن ‘‘‘‘‘‘تنبح عليه كلاب التسول‘‘‘‘‘
وإلى الحلقة الثالثة إن شاء الله. 

توقيع: جمال لشخم

اقرء المزيد

سي الطاهر التسولي 01

تبقى هذه الشخصية مبهمةبالرغم من انتسابهاالي قبيلةالتسول .الا ما تواترت عنه وعن احداثه.من الاقوال والاحاديث الشفوية.
تصفه هذه الروايات من الاشخاص ‘المبسطة الفكاهية ذات المجال السخري وجريءا في تصرفاته الانتقامية اللطيفة التي تعرض لها في حياته منذ طفولته كما رويت عنه عدةطراءف ونكث سانشرهافي حلقات ان شاء الله.,!
*****ترجمته===مسقط راسه==
ينسبونه بعض الرواة الي جماعة الربع الفوقي.واخرون ينسبونه الي جماعة بني افراسن وبالضبط الي اولاد يعقوب ب.اقراوي فاي ما كان اصله فهو ينسب الي قببلة التسول عموما..!
بدا تعليمه الاولي في مسقط راسه في المسيد انذاك علي *فقيه* امام المسجد علي ‘‘لوح .خشبي.قلم من قصب.دواةصمغ‘‘كما هو حال باقي ساكنة البدو المغربي الذين مروا من هذه المرحلة والتجربة ..
ولما اشتد عوده التحق بقباءل الشمال.لتتمة حفض القران وكتابته وشيء من الفقه.وكانه يلتحق بالجامعة او المعهد الحالي .حيث له المسكن والماكل مجانا طيلة تعلمه .‘‘السكن في ‘‘المساييد التابعة للمساجيد‘‘والاكل.علي كل واحدمن سكان الدوار او ما يسمي‘‘الجماعه‘‘ التكفل ب‘‘محاضري‘‘تلميذ قران طيلة سنوات دراسته ويسمي عندهم‘‘‘بالمعروف‘‘‘
ولا ننسي فضل وخير هذه القباءل الشمالية لانهم يحبون القران ويحبون من يحب القران.ولهم الجميل والفضل علي عدد كبير من حفضة القران‘‘‘الطلبه‘‘الذين درسوا وتخرجوا من هناك .!
وبعدهذه الرحلة والفراق عاد‘‘‘سي الطاهر‘‘‘‘الي ذويه واهله بكل شوق بعدما حفظ من القران ما حفظ.
وصادف تلك الليلة‘‘انه تاه لوالده حماروبعد البحث والتفتيش لم يجدوا له اثر ..وارد سي الطاهر ان يصبر والده وينفس عليه باية من القران‘فقال له‘‘‘هذا ما وعد الرحمن وصدق المرسلين‘‘‘===فاجابه والده===الله.الله===ياولدي ..لاحمار..لا واو.......
فاسرها الطاهر في نفسه الي ان يصبح.ويفتح......
والي الحلقة الثانية ان شاء الله!!!!!
دمتم في رعاية الله..والله ولي التوفيق.

توقيع: جمال لشخم

اقرء المزيد

قالوا زمان 05

يعودبرنامج قالوا زمان في جزءه الخامس بهذه المجموعة من الأمثلة التي جادت بها قريحتي كما اني أعمل كل ما في جهدي واحترز ألا يكون هناك تكرار..

كل طير =========ايعيشو منقابو. منقاره
كل شاة ===≠=====اتعلق من كرعا
حتى تور=========ما ايعيابقرونو
يدك منك ==≠======ولو كانت مجدامه
جا على عشره=======وعاش
سير بالمهل ========مول المهل ايوصل
أش داك للقرع =====دمشطلو راسه
قلو لقرع كلا الشوا======قالو حرز عليه فلوسو
ما كيعرفشي ======الواو من الزروطه
يلا خناز اللحم======ايهزوه مواليه
بحال ولاد الكلبه =====هز جرو حط جرو
فريقشاث دلعجل =====باااااينين
واش هنا ======حياينه
الفلالس======اينقبو الذره
الخاطره =====مادلسق في الكابسه
جاث العافيه =====في الحجر
طاحث من الفم ====جاث في الحجر
علا خيرك ارمضان ====نصوملك الشوال
ما دير خير =====ما يطر باس
الخير =======قنطره للهم
وما شطحت ======غير في عرسك
يلا حمرث مع العشي =====علف حمارك يمشي
ويلا حمارث مع الصباح ====نزل على حمارك يرتاح
يلاصاط الشرقي على الطين ====الشثا في الحين
يلا طلعث الثريا مع العشا ====ازرع الفول بالكمشه
البقره ضربت =====والفحال داه مولاه
يلا عاش الباز ======عاشو ولادو
لاتيق بالليالي يلا صحاث ==≠ولا تيق بالعكوز يلا صلاث
يبريل ========مرعاد الخنزير
مايو ======كل يتيم بريو.برأيو
لرنب ======ادنوض الحلوف
ما. نعطو خيرنا ====لغرنا
لي في راس الجمل =====في راس الجماله
ما يدخل ما بن الضفر واللحم ====غير الوسخ
راحثي ======مع نخالثي
التبن والراحه ======ولا العلف والفضيحه
الغابه صالحه لسباع =====والسباع صالح للغابه
الخواض ====من سهم الفكرون
باش عاش بلارج ====حتى جاث الجراد
شاي كلاث المعزه في الجبل =====ادوديه في الوطا
طعام سته =====ايكلوه ستين
لي قال العصيده بارده=====يدير يدو_
سيييييرالجاجه======لتازه
ولد النعجه =======ياكلو الديب
الغابه ==== ===مابيحرقهاغيرعوادها
كل ما زال من نياب الكلب===راحه للساعي
ما اشبه في بابه =====غير الديب
العود لي دحقرو =====يعورك.. اويعميك
ما يحكلك غير طفرك =====وما يبكيلك غير شفرك
وانت ارقية:مادشطح=====ما دقبط دراري

وبهذا المثل. الذي أرجو أن لا يحرج الاخت رقية اتممت هذا الجزء. وفي انتظار الجزء الموالي لكم مني ألف تحية وسلام من عمكم جمال.

توقيع: جمال لشخم 

اقرء المزيد