قبل مل يكمل عبسلام هدرثو على الخدمة عترث بهم البغلة فحد الحجرة ودجي على فاها، عبسلام راكب القدام جا قداما على وجاه فالأرض حتى تونزر وبقاو الدماياث أيطوشو مخنافرو. حمو مع باقي صغير ولصقة ما طاحش شد فالعنق دالبغلة حتى وقفث. ولايني باش دكمل على عبسلام زطمث لو على رجلو عاد وقفث.
عبسلام: أيما لحبيبة رجلي، الله يعطيك لقرط يا هذ المضغارة.
حمو: ياك لاباس.
عبسلام: هذ الحنسورة زطمث لي على رجلي، واقيلا هرسثني.
حمو: أويلي، كا ماجي دعبي باك للطبيب ماشي تصدق نتي دي ماشي ليلو؟
عبسلام: نزل نزل جر لي رجلي نشوف.
نزل حمو وبدا أيجبد فالرجل دخاه.
حمو: مالك أصاحبي شحال فيك دلبهوث، راه ما كاين تا حاجة، غي تقصحث رجلك حد الشويش واها، كا نتينا رجلك قد الرجل دتاور وماشي تهرس.
عبسلام: الله ينطحك هذ التاور قل آمين. والله يا فرعثني غي سخر الله زطمثلي على الجهة الدخلانية دي فيها اللحم، أما هي والله كاراها هرسثني.
حمو: إيوا نوض تكعد، واقيلا عجباثك النعسة؟
عبسلام: دنعس ما دنوض ها نا ماشي نوقف، أودي والله يا راني لاقي وجاي موراي، ما عرفت كيف ماشي لقي باش نقابل باك؟
حمو: قلو الحقيقة.
عبسلام: إلى قلتلو الحقيقة ماشي ينوض ليلي بشي معكاف، ونتينا راك عارفو أيدور غي على السبة، ياك داك المرة دي هربث خديجة ختي مالدار دراجلا مناين غردا، وبا فبلاصث ما يدافع عليها بقا أيدبغ فيها بالسمطة، ياك طربا بالبزيم على عينا كان قريب يعورا.
حمو: (ضاحكا) والله يا راني أنشوف فيه دابا خدام أيحاوز فيك فالسطيحة وهاز فيدو داك المعكاف دالبري دي فيه الشناقب.
عبسلام: سكث الله يعطيك اللقوة، ركبت فيا القفقافة دابا. كا داك المعكاف باقيا عندو؟.
حمو: باقيا وراها أدعاين فيك. أجي بعدا، راك باقي ما عاوتليشاي كيف وقع لك.
عبسلام: ولاش أدسقسي؟ دابا دي عطى الله عطااااااه، صافي.
حمو: باينة لاقيها قد راسك ألمدعوي، يا كما تقبطث بك شي وحدة؟
عبسلام: تراك دحيح! أنا ما كايناش دي دعمرلي عيني قد يامنة.
حمو: إيوا راها ما ماشيشاي دعمرا واها، هذيك راها ماشي طرطقالك كككل.
عبسلام: كنت ماشي نسقسيك على يوسف دعلي كا جا مطانجة كا باقي؟.
حمو: راه جا نهار الخميس دي كاز، يجيه الكدور يهمكم على وجاه.
عبسلام: علاش؟
حمو: راه هو دي جاب المرط لباك.
عبسلام: كيفاش؟
حمو: مناين جا، تلاقى باك حدا الجامع وبقا جالس هو وياه شي سعثاين دلمكانة، وغي دخل باك بوشتى قبطاثو الرفجة وبدا أيدخل ويخرج فالهدرة.
عبسلام: الله أكبر، صافي قالا لو بالمزحول لاخر، والله يا قالا لو. أيما لحبيبة وشني ماشي نلقي دابا وفاين ماشي نخبع وجاي؟
حمو: شني قالو؟ ياك لاباس؟ راك خلعتني أصاحبي!.
عبسلام: أودي غي خليها على الله، شتي باك راه ما مريط ما والو وغي لاقي السبة باش يجيبني.
حمو: واقيلا خليثا ألمسخوط؟
عبسلام: ماشي غي خليثا، خوك راه طفسلا عينا مزياااان.
حمو: إيوا عاود لي أصاحبي كما على الله نصيبو شي فتوح لهذ القضية ديالك.
عبسلام: أودي العقدة دالقضية ديالي ميثا، ولايني ماشي نعاودلك غي باش نخوي قلبي وصافي.
كنت خدام بخير وعلى خير وجمعت شي مليون ونص و......
يالله قال عبسلام هد جوج كلماث وهو يخلط عليهم حميد دعامر حتى هو جا مالدار البيضا ولاقاه ولد خاه بالبغل، وأيبان ماجي متقل، الشواري عامر بميكاث والصيكان.
حميد: السلامو عليكم ألخوت.
عبسلام فنفسو: بسم الله الرحمان الرحيم، مناين صلط هذ المصيبة عاوث؟ وعليكم السلام.
نخليو الدراري دالدوار يتعارفو بيناثم ونرجعو نكملو هذ الأزلية.
وعلى المودة نلتقي.
توقيع أحمد لزعر التسولي.
0 commentaires:
Enregistrer un commentaire