يوميات عمي بوشتى 12

كملث حادة الشغل وعشاث الخطاب رجال ونسا وخسلث لمواعن جاث دgلس مع لعيالاث وادطرح السر وغي ساكثة ما ادهضر ما ادتكلم غي ادطلع عوينة ودطيح عوينة باش النسا ميقولوشي لعروسة مطيارة (للأمانة العلمية فهاته الجملة هي مقتطف من تعليق الأستاذ محمد يسف على الحلقة السابقة) ودادة صفية غي أدشوف ودمgن هي وحد مراث خاها ولايني بينا وبين نفسا عاجبا الحال وفرحث بزاااف حيث بوشتى عرف يختار المرا وقالث فنفسا هذي هي دي ماشي درفعلي راسي بين النسا فالدوار.

الحاصول الخطاب ما رجعو فحالم حتى تفاهمو على وقت الذبيحة دي ماشي يكون مورا التوقاف دالتبن.

الحاج حمو ودادة صفية وصلوا لدارم وصابو بوشتى بوشتى أيعاين الخبار غي شاف يماه وهو يطير عليها.

بوشتى: شني أيما مدرا كا عطاوها لكم؟

دادة صفية: ولياه فاين ماشي يصيبو الناس بحالنا؟ راهم عطاوهانا وتافقنا على خمسين ألف ريال دالصداق.

بوشتى: أربي السلامة خمسين ألف ريال كاملة؟ بزاااف أيما، مناين ماشي نجيبوها؟

دادة صفية: قالك باباك ماشي يبيع داك العجمي.

بوشتى: وعلاش نحرثو؟

دادة صفية: نربطوك نتينا مع البغل هههههه المهم نتينا غي تهنا ونوض gفض على ذراعك راسك راه الزراع قريب يطيب فحياينة، سير دشول واخا دقور غي شي خمسطاش رألف ريال.

بوشتى: غدا نهود للواد نجيب شي قصباث نصغب بهم الصبابع ونعبي المنجل للسوق نطرصو.

غي خرج بوشتى جا الحاج حمو عند دادة صفية.

الحاج حمو: لاش جا عندك هذ بوسرابط؟ ياكما أيسقسيك على المرا.

دادة صفية: ولاش يسقسيني عليها؟ زعما هو ما أيعرفاشاي؟ راه شافا قبل مني لا ما عندك خبار.

الحاج حمو: وشني كان أيقلك؟

دادة صفية: قالك أسيدي خمسين ألف ريال جاثو بزاااف.

الحاج حمو: أويلي على خراg، ياك عاد داك النهار عطا باين عياد ستين ألف ريال فحدهوم كا كانث بعدا غا شي همزة هههه.

دادة صفية: ههه أودي نحمدو الله العرايساث ما أيتعطاوشاي بالكيلو وبالطول أما حنا كا ما قدثناشاي فيها حتى منيول.

الحاج حمو: أحححي، منيول كامل؟ لياه قداش هذ العروسة؟

دادة صفية: دلقي مني جوج هههه

الحاج حمو: إيوا والله يا مخيرة، هذي هي دي ماشي دقطع فيك النيخ.

دادة صفية: دقطع فيا النيخ لياه شني بيني وبينا؟ ولياه يحسابك حيرة فالطول والعرض، راه الصحة هي صحث العطام.

الحاج حمو: لاواه الريح، إيلا نتي شابكت معها دابا دهرسلك هذ المقايق ودخليك مgعة فالركطنة.

دادة صفية: وعلاش نشابك معها؟ أنا مصاب غي دجي عندي، والله يا حتى نتهلا فيها ونعملا بحال بنتي أو كتر.  

هنا كملث الهدرة وخرج الحاج حمو للجامع وهو يصيب باين عياد مقرد فاغارب.

الحاج حمو: السلام عليكم.

باين عياد: وعليكم السلام ألحاج حمو، إيوا أسيدي مبروك للخطابة، ولياه ما قلتاناشاي نمشيو معك؟ أو خافت نحشمو بك؟

الحاج حمو: زعما نتينا كبرتو لنا مناين مشيث دخطب لعياد داك مو فراكح دحدهوم؟ دخلت عليك بسيدي بي كا الطفلاث كملو؟ ما صيبت ما دجيبلو غي داك موحلاسة؟

باين عياد: كاين شي حلاسة قدك هههه دابا نشوفو هذ السلعة دي ماشي دجيب نتينا كي لاقيا.

الحاج حمو: أنا مشيث لراس العين أسسي.

باين عياد: آآآآه راه باين الشغل، إيوا لا كانث غي داك العين دي جيبت منا صفية راني أنعرفا ههههه.

الحاج حمو: صفية ما جيبتاشاي أنا، جابوها لي الوالدين الله يرحمم، وزايدون علاش أدجبد النسا أهذ العرة دالرجال.

خرج الفقيه وهوما يسكثو حيث كان راجل موقر وما أيبغيشاي بحال هذ الهدرة، وكانو أيحتارموه بزاااف وأيخافو منو، وإيلا قال الهدرة ما أيزيدوشي معه gرام واحد.

 فالعشية دنهار الحد هود بوشتى للواد وجاب شي قصيباث وgلس أيصغب الصبابع وقبل ما دودن المغرب عقد على شي ولاد عمو باش يصبحو لاغدا فالموقف.

المهم بلا ما ندخلو فالطرائف دي وقعو لبوشتى فالشوالة، أو لا؟ شني ضهرلكم؟

وعلى المودة نلتقي.

مع خالص الود ويانع الورد ورمضان كريم.   

توقيع: أحمد لزعر التسولي

اقرء المزيد

يوميات عمي بوشتى 11

رجع السي عزوز للدار فرحان وناشط وغي دخل للدار وتغدا عيط على دادة رقية دجي دgلس حداه وبدا أيهدر.

السي عزوز: إيوا شني نقلك أرقية واقيلا راحنا قرابين نزولو هذ الطربوشة دليهودي دي باقيا فوق راسنا (التسول كانوا أيسميو دي عندو الطفلاث بحال دلابس الطربوشة دليهودي وما كانوا أيرتاحو حتى أيزوجوهم كاملين).

دادة رقية: ياكما هدر معك شي واحد فداك مو دغادغ دحادة ههههه.

السي عزوز: أييه ألالة راه هدر فيها حد السيد أيقولولو الحاج حمو ساكن فالدوار دفاطنة.

دادة رقية فنفسا: هاااايثاك، إذن هذاك علاش جاث موراها داك شايبث النواضر وعباثا، وقاتلك باغياها دعاوني الساعة هي دخلاثا للرحية دبيعا.

السي عزوز: مالك سكت؟ كا ما عجبك حال؟

دادة رقية: لا لا، علاش أودي؟ وفيواخ ماجيين يخطبو؟

السي عزوز: قالك الخميس الماجي.

دادة رقية: إيوا وداك موفراكح باقيا عند فاطنة، شني ماشي نلقيو دابا؟

السي عزوز: مخطاني نمشي موراها نهار الجمعة وصافي.

دادة فاطنة دقول كانث معهم صبوح الجمعة صبحث حادة عند باباها، وغي وصلث لسقث فيها دادة رقية.

دادة رقية: أجي أحاgوزة نتي عارفا بلي شي ناس باغيين يخطبو حادة وماجة موراها دعاونك؟ زعما ما تخلاشاي على هذ الفعايل ديالك؟

دادة فاطنة: هههههه وزعما نتي ما عارفانيشاي أنبغي نلقي الخير، وياك دي هرب للزواج هرب للشراع.

دادة رقية: الله دهرب عليك رحمث الله، الطفلة معاوناني وهازة علي تمارة ونتي باغيا دزوجا ودخليني؟

دادة فاطنة: وشحال ماشي دبقى معك هد حادة؟ قراناثا راه عندم ربعة الولداث.

المهم داك السيمانة gازث على بوشتى بحال شي شهر.

نهار اللثناين مشى الحاج حمو عند نسابو يعرضلم باش يمشيو معه فالخطابة وقالا حتى لخوثو، وتسوق نهار لارباع وشرا حد الخمسة كيلو داللحم وشي بركة دالخضرة وحد الربعة لقوالب دالسكر وعطاهم لسي عزوز، والعشية دلخميس زدرو ومشاو يخطبو وخلاو بوشتى غي بوحدو فالدار أيبني ويريب.

الناس وصلو على خير وبخير ودخلو للدار الرجال gلسو فالغرفة والنسا gلسو فالسطيحة.

الرجال تهاودو وهدرو ومناين كملو العشا تكلم الحاج العربي باباين دادة صفية حيث هو الكبير دالعائلة وقال لسي عزوز.

الحاج العربي: السي عزوز ضيف الله.

السي عزوز: مرحبا بضيف الله أعمي الحاج.

الحاج العربي: بك أولى أسي عزوز، راحنا جينا خاطبين بنتك لولد بنتي.

السي عزوز: أسيدي إلى عطاهالكم الله، حتى أنا راني عاطيهالكم ما عطاث السما للأرض، ولحمدو الله منيان صيبنا النقلة دلجواد بحالكم.

الحاج العربي: أودي شني ماشي نقلك دي على الرجال لحرار هو هذا، إيوا شني قلت أسي عزوز كانتفاصلو دابا كا حتى نرجعو؟ (بعض التسوليين كانوا أيتفاصلو فالخطابة وبعض منهم كانوا أيرجعو نهار آخور يتفاصلو فيه وكانو أيسميواه الفصال).

السي عزوز: شوف أسي الحاج دي لقيثوها نتوما هي هذيك، هذي بنتكم وهذاك ولدكم، والله ما دسمعو مني غي الخير.

الحاج العربي: إيوا مناين قلت هذ الكلام والله يا ما يكون غي خاطرك، نتفاصلو دابا أسيدي علاش ماشي نبقاو ماشيين ماجيين، وآش دانا لهذ القرع نمشطولو راسو ههههه ماشي نعطيوكم خمسين ألف ريال فالصاداق، والذبيحة كيف العادة، وحولي وخمسة يطرو دالزيث وخنشة دالطحين فالدفوع. وما دزيد تا هدرة هههه.

السي عزوز: أسيدي والله لا هدرتا حتى أنا، ها عنقي حرفو منو كي بغيثو.

الحاج العربي للحاج حمو: مناين طيحت على هذ الجواد؟ إيوا هذو هوما النساب وايلا فلا.
إيوا سير خبر مولاث الدار أسي عزوز.

سي عزوز: ولاش ماشي نخبرا؟ والله إيلا طفرث؟ أنا عاطي ربعة طفلاث عمري شورت معها، ونجي على تالي دعمري نتشاور! صافي أسيدي والله لا عاودنا الهدرة.

الحاج العربي: إيوا أجي نقراو الفاتحة باش ربي يسخر فهذ البيعة وشرية.

هذ الشي كامل دجاري فالغرفة النسا عارفيناه حيث صيفطو دادة فاطنة تصنث عليهم مالسرجم، أما حادة فما كانث هازاها حتى بلاصة والليل كامل وهي دجري ودحرك ودسخر باش دبين شغل يداها، وحتى دادة رقية ما خلاتشاي بالهدرة المزيانة والشكير فيها والرضا عليها قدام النسا.

دادة رقية: شتي ألالة صفية والله يا عندكم الزهر، حادة طفلة موقادة وبدراعا غي وريها الشغل وسير دنعس، الله يغطيها بالرضا الشغل والسكاث والتيقار وعاد كان بغا يخطبا حد المخازني دبوغابة والسي عزوز ما بغاشاي، حنا غي دراوش لاعنداك، وما قادينشاي نتناسبو مع المخزن.

دادة فاطنة: ما عطيثوهاشاي للمخازني وماشيين دعطيوها لداك بوفراكح دبوشتى، شهاتي بيها الله إيلا عرفتو دختارو هههههههه.

وإلى حلقة قادمة بحول الله.

وعلى المودة نلتقي.
مع خالص الود ويانع الورد ورمضان مبارك.

توقيع: أحمد لزعر التسولي

اقرء المزيد

يوميات عمي بوشتى 10

الحاصول وما فالدين تفارق الحاج حمو مع سي عزوز ومشا يقضي حاجة (زعما يتقضى هايثا كنا أنسميوها شحال هذي) شرا شي لحيماث وخضيرة وشي بركة دالمشماش عاد 

كيف دوق... وgاز عند مول الحانوث شرا سكيكرة وحد الباكية داتاي حسان وحد الباكية دالتيد وقرعة دشونبوان pالموليف الصفرا وما نساشاي العطرية: الحبة والكعبة والمنيورة والزعفران دالسلسلة...
رفد كلشي على البغل وشد الطريق راجع للدار وبوشتى مشول موراه، غي وصلو للدار لاقاثم دادة صفية للباب وهزث السلة والشاكوش ودخلث أدقاد داك الشي فبيث الما (بيث الما هو حد البيث صغير مضلل وبارد كنا أنلقيو فيه الخوابي دالما باش أيباقو باردين وفيه كنا أنخبعو الفواكه والخضر وحتى اللحم بحال شي ثلاجة طبيعية). وهي أدستف داك الشي شافث حد ميكة كحلة محشية مع الصوالح فتحاثا وهي دصيب فيها حد جوج قابساث دالمسكا وحد الباكية دالشكلاط دكاوكاو وحد القرعة دلمونادا جيدور، جاثا غريبة وهي دقبط داك ميكة ودخلث عندم للبيث.

دادة صفية: كا هذ الحوايج ديانا ألحاج؟

الحاج حمو: شني تما؟

دادة صفية عرفاثا وهي دشوف فبوشتى وصابثو أيتلون بحال التاثة دالعاشور: أودي غي شي تخربيق ديالي عاد تفكرت دابا.

ناض بوشتى من فوق الطبلة ولحق يماه لبيث الما وباسلا راسا ويداها.

بوشتى: سير أيما كي سترتني الله يحفظك ويخليك لنا بركة.

دادة صفية: لياه أبن النايبة لاخر هذ الشي أيتخبع مع قضيان حاجة؟

بوشتى: والله أيما لحبيبة يا غي حشيثم فالشواري ونسيث، كا شافم بابا كا شبع في معيار.

دادة صفية: بالسيف يعايرك، أنا يماك وعمرك جيبتلي حتى قطيطب دالمسكا نمضغو وندرق الريحة به. ودابا هذي عاد عرفتا ماشي جايبلا هذ الشي كامل؟

بوشتى: إيوا حنا زعما قلنا غي نلقيو الصواب الساعة تفضحنا، الله يقاضيه وعد معكم هههه.

قبط بوشتى داك ميكة كحلة وخرج لاقيها تحت القاميجة باش ما يشوفو تا واحد، حادة طالقة عليه العين ومرة مرة أدرgب مالسرجم كا جا مالسوق كا باقي، وغي شافثو وهي دلقي السبة وفتحث السرجم غي حد الشويش وبقاث أدمسح فيه، بوشتى قرب للدار وشافا وهو يجبد داك ميكة من تحت يبطو ونزلا فالعرق دحد الزيتونة وقلب بالرجعة. حاة شافثو وخلاصو حتى بعد وعاد نزلث ومشاث جابث داك الشي وبقاث أدفرح دقول جابلا شي شرتلا دالذهب.

كمل الحاج حمو غداه وطلع يورك فالصطيحة ودادة صفية لقاص حلاسا على كتافا وطلعث لادار عند دادة فاطنة، دقث فالباب ودخلث.

دادة صفية: خير آفاطنة.

دادة فاطنة: مسالخير آصفية شخبارك؟

دادة صفية: نحمدو الله. فاين هي حادة؟

دادة فاطنة: كانث متكية فالغرفة لفوق.

دادة صفية: إيوا خليها دروح راها عياث مسكينة مدي جاث وهي أدهاطش.

دادة فاطنة: كا عزث عليك؟ ههه ألالة ها هي ماجة عندك ورتا عليها. مضرا حقا شني لقا الحاج حمو مع السي عزوز.

دادة صفية: راهم تلاقاو وتفاهمو باش نمشيو نخطبوها الخميس دماجي.

دادة فاطنة: إيوا هي نرد الطفلة لدار باها بحرا يوجدو راسم.

دادة صفية: غي ردا عوريطك راها مدي جاث وبوشتى غي تالف وما أيلقي تا شغل، مقابل غي الgلاس مور الدار وحاطيها فيواخ دخرج.ههههههه

وعلى المودة نلتقي.
مع خالص الود ويانع الورد، ورمضان مبارك.

توقيع: أحمد لزعر التسولي

اقرء المزيد

يوميات عمي بوشتى 09

الفايدة يا لخوان رجع بوشتى فالعشية للدار ودخل عند باباه الحاج حمو وباسلو يداه (هذ العادة كانث عندنا فلبلاد، أنبوسو ليدلين لواليدينا فكل دخلة وخرجة، ماشي بحال ولاد اليوم أيسلمو غي ببوجور) وgلس بحال زعما إلى ما عارف والو، المهم الحاج حمو كان نشايطي وزعيم ودغيا بغا يجبد ولدو.

الحاج حمو: أهلا مولاي السلطان، شفتك داخل راشقالك، راه خاصك دبوس ليداين لداداك فاطنة هههههه يماك غي أدشكر فالعروسة، قالك أسيدي موقادة والشغل ديالا غزاال ونقي.

دادة صفية: سكث أهذ المبهدل خلي الدري عليك طرانكيل حشم شويش.

الحاج حمو: مالي كاشتني أنعري حوايجي ونرميهم يا هذ مونيابر؟ ياك غي أنهدرو مع الدري أو الهدرة حرام.

دادة صفية: الله يحرم عيشثك أللحية دالرهيب، صافي الدري راه باغي يتجوج والمرا شفناها وعجبثنا ودابا نوض شمر على ذراعك ويا الله نمشيو نخطبو لو قبل لا طارو بها صحاب الحال.

الحاج حمو: صافي غدا دابا نعبي داك الخروف للارباع ونتلاقي باباين الطفلة والخميس لاخر نمشيو نخطبوها ولي ليها ليها، والله يا غيلا زوجنا هذ بوفراكح وغيلا لقيتلو شي عرس فاعل تارك ولهلا يخلي فالشواري برقوقة هههههه

دادة صفية لبوشتى: يا الله نوض بوس لباباه راسو وسر دنعس باش دمشي معه غدا للسوق.

ناض بوشتى وباس الراس دباباه وخرج حشماااان أيزطم فجحلالو، غي وصل للغرفة ديالو وتسرد فوق شي لحيفاث وبقا أيخايل راسو لابس الجلابة والحمالة ومحني الكف ديدو وراكب على العودة البرgية دعلال ومعه علي الدريس وزير وداير أيعرض على الدواور والنسا أيتلاقاواه بالحليب والزغارث، المهم السيد حس براسو شي حاجة داك الساعة وبقا أيتقلب ويتشقلب على الفراش حتى عباه النعاس.
غي علم الفجر ناض الحاج حمو ودخل للزريبة وقبط حد بوبطان مزيااان ولقالو القنبة فgرونو وخرجو ربطو فالزيتونة برا ودخل ينوض بووشتى.

الحاج حمو: بوشتى آبوشتى نوض أولدي نوض.

بوشتى: هاني ماجي أبا.

الحاصول غي فطرو وشدو الطريق، الحاج حمو راكب على البغل، وبوشتى مgود الخروف موراه، غي وصلو للسوق دخلو لرحبث الكسيبة وهوما يدورو بيهم السبايبية، بشحال الخروف ألحاج؟ شحال عطاواك فيه؟ وووو

الحاج حمو: مازال ما عطاونا فيه والو، الله يجيب الفتوح على يداك.

السبايبي: ها واحد الطناش رآلف ريال (هذا ثمن دأوائل الثمانينات باش ما دفهموشاي غلط عاوث هههه).
من عندي لعندك باعو بخمسطاش رآلف ومشاو يفطرو، يا الله دخلو للقيطون وهوما يشوفو باباين حادة gالس فحد الطبلة ومنزل حداه حد البراد داتاي، غمز الحاج حمو لولدو زعما بدل الساعة بختا، ومشى gلس حداه.

الحاج حمو: أهلال سي عزوز، شخبارك آنقلة دلجواد؟

عزوز: أهلال الحاج حمو، الله يسقسي فيك الخير، gلس معي ونسني راني غي بوحثي.

الحاج حمو: أسيدي المعروضة دربح، هي اللولا.

عزوز: شفتك مبكر هذ النهار ألحاج.

الحاج حمو: إيوا شني ماشي نقلك أسي عزوز، ما نخبعا ما ندرقا راك نتينا هو السبب فهذ التبكيرة هههههه.

عزوز: الله يسمعنا خبار الخير.

الحاج حمو: بغيث نزوج حد الدري ولدي وقالولي عندك حد الطفلة ما تخيرشي عليها ودابا ضيف الله.

عزوز: مرحبا بضيف الله، ما نصيبوشي على ما حسن منكم ألحاج حمو.

الحاج حمو: الله يبارك فيك أنقلة دلجواد، إيوا إلى كتب الله نهار الخميس الماجي ينشاعالله نتعشاو عندك.

عزوز: مرحبا بكم ألحاج حمو إلى ما هزثكم الأرض يهزوكم كتافي.

الحاج حمو: نتوما صحاب الجود والكرم أسي عزوز، الله يكثر مثالكم.

وإلى اللقاء في الحلقة القادمة.

وعلى المودة نلتقي.
مع خالص الود ويانع الورد ورمضان مبارك.

توقيع: أحمد لزعر التسولي

اقرء المزيد

يوميات عمي بوشتى 08

نرجعو نكملو القصة ديالنا وقبلوا علي أنا مزاوك راه القبول كرامة.

كيف قال سيدي عزيز لحبيب (شوفو آخر تعليق فالجزء 06) داك الليلة بايثا دادة صفية أدبني ودريب ودقول غي بينا وبين نفسا لياه زعما هد بوفراكح دبوشتى ما عجباثو حتى وحدة مبناث خواثاثي، مالم ياك حتى هوما موقاداث وأيطيرو فالشغل، سمعا الحاج حمو (باين عمي بوشتى) أدبرgم غي باحثا وهو يسقسيها:

الحاج حمو: أمالك أدهدر غي بوحثك يا هد المرا؟ كاحوالت كا شني؟

دادة صفية: أودي غي راني أنبانصي ونمgن فهذ بوسنادر دولدك، قالك أسيدي باغي يتجوج.

الحاج حمو: صافي رطاااب؟ ياك شحال هذي وحنا أنحاوزو فيه! كا قالا لك هو؟

دادة صفية: أودي راه قالا لفاطنة، قالك أسيدي شاف حد الطفلة فالعرس وعجباثو.

الحاج حمو: وبنت من هي هذ الطفلة.

دادة صفية: بنت خال راجل فاطنة، وراها قالتلي بلي طفلة مزيانة وموقادة.

الحاج حمو: إيوا ألالة الله يكمل بالخير دابا خاصك دمشي دشوف هد الطفلة باش نمشيو نخطبوها.

دادة صفية: راها ماشي دجيبا فاطنة دعاونا فالتحناك ومن تما نشوفوها.

الحاصول وما فالدين دادة فاطنة خدمث شغل العgايزاث وجابث عندا حادة وحتى هي كانث فرحانة وأدقزقز بالفرحة. وغي جاث بداث باللطيم والتحناك من برا، غي طلعث فوق السلوم وهي دشوف بوشتى gايز من تحت الدار لابس حد القميجة الكول ديالا فيه 15-سنتيم وحد السروال دكوبو واااسع من التحت وطالق الهيبي ولي pاط واصلين للنص دحناكو .... المهم قمة الفخامة وخلاص، غي شافثو حادة وهي دبقا غي أتفتف وطلقث الفتيلة من يدا، أما بوشتى بقا حال فاه وهو يعتر فحد الجدر دالزيتونة ويجي على قفاه ممحوط، ناض وبقا أينفط فحوايجو ويطحك وحادة حتى هي شبعث عليه طكك. المهم حد الشويش ودادة صفية جاث، غي شافثا حادة وهي دعرفا حيث هدرتلا عليها دادة فاطنة، الحاصول حادة ناضو فيها الدجنون وبقاث أطير من بيث لبيث ودوجد ودنزل وعاطياها للصواب والتبسيمة، دادة صفية بقاث غي أدشوف ودسعجب ودقول فبالا: والله يا هذ المهيبط دبوشتى يا أيعرف يختار مدجاب هذي لبناث خواثاثي؟ منكطاث ومنتوفاث دقول فرسوهم الدياب.

رجعث دادة فاطنة للدار فرحانة وهي دصيب الحاج حمو مورك فالدكانة.

دادة فاطنة: ولايني هذ بوفراقش دولدك أيعرف يختار، شهاتي بيها لله يا طفلة من داك الشي الرفيع.

الحاج حمو: إيوا الحمدو لله مني خرج ولدي حسن مني وما طاحشاي على فاه بحالي.

دادة صفية: سكث يا هذ حgة، ما عرفت شكون طاح على فاه كا يانا كا نتي.

وإلى اللقاء في الحلقة القادمة.

وعلى المودة نلتقي.
مع خالص الود ويانع الورد ورمضان مبارك.

توقيع أحمد لزعر التسولي.

اقرء المزيد

يوميات عمي بوشتى 07.

نرجعو لعمي بوشتى والذكريات ديالو، وخلينا القصة فاش بغات دادة فاكنة تخبر دادة صفية يماين عمي بوشتى.
الحاصول وما فالدين غي وصلث دادة فاطنة داك النقلة دالما للدار وهي دلقي الحلاس على طهرة ودهود عند دادة صفية وصابثا معلقة فحد الغرفة خدامة أدلطم ودحنك فيها.

دادة فاطنة: خير أصفية كا نتينا عاد باقيا دطلع فوق السلوم ودحنك، الله يهديك، راه ماشي يسحث بك ودجي على عين قفاك وتهرس من gحصوصك وديك الساعة gلس مg رعة فالدار.

دادة صفية: ولياه أنا لخاطري أفاطنة؟ يدي بوحدي وأنا عييث ما بقا فيا تيسير غي راني أندادي وخلاص، وشفت هذ الحيط دالغرفة توسخ وتسرم بالشثا وقلت زعما نغطيه بحد اللهوة دالتراب.

دادة فاطنة: إيوا نوض جوج داك بوفراكح دبوشتى؟ لاش مخلياه؟ كا ماشي دلقيه قديد هههه

دادة صفية: إيوا ألالة ها هي على يدك عاد قلتالو داك النهار وما بغاشاي.

دادة فاطنة: إيوا دابا راه ميث بالبغو وراه هو دي قالي نجي نقولالك.

دادة صفية: شوف إيوا على بلحول لاخر لياه كاحشم مني زعما هههه؟ وشكون هي هذ قليلث السعد دي ماشي دقبل عليه هههه.

دادة فاطنة: أودي مناين مشى معنا فالهدية دالعرس دولد خالة راجلي شاف حد الطفلة تما وعجباثو.

دادة صفية: وكيف سميثا هذ العروسة المنحوسة هههه

دادة فاطنة: سميثا حادة وراها طفلة غزالة مgدرة وحمرانية وفيها مود دالزين، وموقادة، الشغل غي وريهلا وتخبع.

دادة صفية: إيوا ألالة إلى كان هو باغيها الله يكمل بالخير ولايني راه خاصني نشوفا أنا اللولا.

دادة فاطنة: هذي طربيها ليلي، أنا داداك فيها، ماشي نرجعو فسبعيام ونقل لباباها يخليها دجي عندي حد السيمانة دعاوني فالتحناك، وديك الساعة أرى ما دشوف ودحقق.

دادة صفية: إيوا إلى لقيث فيا هذ الفابور الله يرحم الوالدين.

دادة فاطنة: الله يا ودي، حتى داك بوشعكاكة دولدك راه عندي عزيز وظريف ومعمرنا سمعنا منو شي كلمة دالعيب، وفاين ما نتلاقاه أيغنس راسو فالأرض وعاد يهدر معي، وحتى النسا دالدوار أيقولو فيه الخير.

دادة صفية: إيوا الله يرضي عليه ويغطيه بالرضا حتى حنا ناس غي على قد حالنا وبغينالو شي بنت الناس دي دسترو ويسترا.

وإلى لقاء آخر بحول الله.

وعلى المودة نلتقي.
مع خالص الود ويانع الورد ورمضان كريم.

توقيع أحمد لزعر التسولي.

اقرء المزيد

يوميات عمي بوشتى 06

هذ النهار gاز مخير على عمي بوشتى صبح البرد وتسحر مزيااان وصبحث فيه حد البلعة دالحركة، ناض على النبوري وخرج البقرة دضحي فالربيع وطول الحمارة حتى هي، وتكى حداهم ولقى رجل على رجل وبقى أيتفكر ليام وكيف كانث وكي رجعث. تفكر نهار دشاف فيه مع حادة فالعرس دولد عما وغي شافا بقا حال فاه فيها وحتى هي كانث مرة مرة أدخرج راسا مالسرجم دالبيث دالنسا ودسرق شي ترgيبة وهو عاجبو الحال ومنفوخ وخدام على بيست (بيست نوع من أنواع السجائر كان معروفا في السبعينات والثمانينات) gارو أيشعل خاه (التدخين كان موضة خلال تلك الأعوام أما الآن فأصبح كارثة الله يعفو) ومرة مرة يطلب من مول الموناضا يعطيه شي جيدور أو لاسيgون أو سيم... المهم السيد ما صاب فراسو ما يشد راه خسر شي 600 دريال داك النهار (30 درهم كان لها شأن في تلك الأيام) وواخا عمرو تبورض أو دار فشي مراح، داك النهار خرج منو طبغيلان ناض حتى هو وغطا حد الجلاب ودخل فالسطر وكان عندو الزهر حيث السطر أيغطي على القبان بحال عمي بوشتى المهم حيح مزيااان فداك العرس وباش دكمل الفرحة ديالو قبل ما يتفرقو الناس للطواجن شافث فيه حادة وتبسمث بالطحكة (أن تظفر بضحكة في تلك الأيام من فتاة فهذا يعتبر إنجازا كبيرا، سقسيوني أنا هههه) السيد ترفع وبدا أيحس براسو وصل للقمر، مشى يتعشى فالطاجين وهو فيه غي الهيدورة مسيكين، غي رجع للدار وهو يهود للعين يسقي وما بيهشاي الما، بيه غي يتلاقى مراث عمو باش يسقسيها على داك الطفلة بنت من هي.

بوشتى: خير آمراث عمي.

دادة فاطنة: خير أوليدي، لاباس عليك؟.

بوشتى: لاباس أدادة فاطنة ونتينا شخبارك وبالصحة للزردة.

دادة فاطنة: الله يعطيك الصحة أوليدي، ياك حتى نتينا مشيث معنا فالهدية.

بوشتى : أييه إيوا غي بغيث نسقسيك على حد الطفلة كانث فالعرس وصافي.

دادة فاطنة: هاي هاي على بو فراكح، ياكما ناوي دجيب ليماك شي عروسة هذ العام؟

بوشتى : أودي غي أنسقسي وخلاص.

دادة فاطنة: شني كانث لابسة؟ وكيف لاقيا فوجاها؟

بوشتى : راها حمرانية ومgدرة وخنافرا منgادين وحواجبا مgرونين، وكانث لابسة حد المنصورية وجدية زرقا وفيها حد البلعة دالموزون.

دادة فاطنة: هههه هاي هاي على بوسنادر لاخر، مشيث لراس العين ما عندي ما يسالك راك عشاق مع راسك أسيدي ولايني نتينا ما ساهلشاي.

بوشتى: ولياه يحسابك أنا ماشي نجي ونطيح على فاي بحال شي ناس.

دادة فاطنة: أسيدي هذيك راها حادة بنت موحند عبدالله هي الصغيرة فخواثاثا وسماوها حادة حيث يماها كانث أدولد غي الطفلاث وناضث عgوزثا سماثا حادة باش دحد هد الشي.

بوشتى: وزعما هذ الشي صحيح؟

دادة فاطنة: أوليدي العالم الله ولايني راها صدقث معهم حيث كانث هي الطفلة التالية وجاو موراها شي ربعة دالذكورة.

بوشتى: سبحالله داك الناس كانث فيهم النية.

دادة فاطنة: إيوا شني أدقول؟ نمشي غدا عند يماك نقلا راه بوشعكاكة دولدك باغي يتزوج.

بوشتى حشم وغنس راسو فالأرض ودادة فاطنة فهمث القضية.

نخليكم توجدو السحور ونرجعو غدا نكمل هذ النوستالجيا.

وعلى المودة نلتقي.
مع خالص الود ويانع الورد ورمضان كريم.

توقيع أحمد لزعر التسولي.

اقرء المزيد

أعلام تسولية 10

إبراهيم بن أبي يحيى التسولي.

هو الشيخ الفقيه أبو إسحاق إبراهيم بن أبي يحيى التسولي التازي، تولى خطة القضاء، واستعمل في السفارة فحمدت حالته، وشكرت سيرته، وكان صدر الفقهاء في وقته مشاركة في الفنون، وقياما في الفقه. شرح كتاب "الرسالة" لأبي محمد بن أبي زيد شرحا ممتعا حسنا، وقيد على "المدونة" مجلس الشيخ أبي الحسن الصغير قاضي الجماعة بفاس، وضم أجوبته في نوازله في سفر. وكان مع ذلك فارسا شجاعا، جميل الصورة، نبيه المشاورة، فاره المركب، وجيها عند الملوك، صحبهم وحضر مجالسهم، وفلج بآخر عمره فالتزم منزله بفاس، يزوره السلطان فمن دونه، وتعرفت أنه نقل إلى داره بتازة بلده، فتوفي بها في حدود سنة 749 هجرية، نفعنا الله به وغفر لنا وله.

تاريخ قضاة الأندلس للنباهي وانظر جذوة المقتبس الجزء 1/86

وعلى المودة نلتقي.

تسولي وافتخر.

توقيع: أحمد لزعر التسولي

اقرء المزيد