حكايات ناس زمان الغولة و حديدان : الحلقة الأولى

كان يا ما كان في قديم الزمان واحد الراجل سمو حديدان ديما فاقص و مشيب القبيلة وحتى الجيران ، ومخليهوم حايرين فيه باش عايش و شني اياكل وشني كيصير وهو معندو لا كسب ولا ورث ولا والوا ، من غير واحد الفدان دالبلاد على طرف الواد ومعمر غير بالحجار وحتى هو عامرو ما حرثو ولا زرع فيه شي حاجة ، ميخدم ميردم ولايني قافز ومطور ولد الهم ، ميجبد صداع ولا بالعيب مع ناس القبيلة يتكلم ، بوحيول هاذ حديدان ديما ساهي وكيخمم وكيهضر غير بوحدو بحال شي حول وهو بالبلا محزم ، تاحراميات وفعايل الجنون فيهم هو معلم ، والناس دالقبيلة كل واحد وشني ايقول عليه واحد ايقول عليه شفار والآخر ايقول عليه لا واقيلا إلا قطاطعي دالطرقان والآخر ايقول عليه لا واقيلا هاذ حديدان إلا جابر شي كنز كبير وتاكي كيصرف فيه غير بالطريف وياكل ، المهم حتى شي واحد منم ما قال فيه المزيانة . وهاذ حديدان كان حدودي ما يخالط حد ميجمع مع حد وشاذ تقارو بيدو وما يشرك لا اللغا ولا حتى الطعام مع ناس القبيلة كاملين ، وما كانو كيشوفوه غير من السوق للسوق غير كيشري لي خاصو وكيرجع بالزربة لدارو ، وهاذ شي عاد ما زادم يشكوا فيه كثر ومبقاوش كيحملوه كول علا حقاش ما جبروش كيفاش يلقيو باش يدخلوه ويجرولو لسانو ويعرفو سرارو ، و حتى أنا دخلني الشك فهاذ حديدان قبل منعرف الخرافة كاملا وقلت مع راسي واقيلا إلا طاح على شي قلوشة عامرة باللويز ، ولاكن فاش عودثلي حنا الله يذكرا بخير ويطولا فبوحبل الخرافة كاملا جبرت هاذ حديدان طولانطي ومكاينش شي بلا مسليط بحالوا ، اوا يا سيادي واحد النهار تجمعو ناس القبيلة وتافقوا باش يدبرو على شي حيلة ويشوفو هاذ حديدان ويجمعوا معاه ويشركوا معاه اللغا باش يعرفوه علاش طاوي ويجرولو لسانو ويعرفو سرارو ، وبدا كل واحد ايقول الحيلة دعندو سعا والو جبرو راسم غير كيلعبو فالخشيش وحتى شي وحدة ما خدامة لهاذ حديدان ، وهو ينطق حد بو شلاقم فاه يدخل زحش مكتف وما يداه مفزرين ومقربعين دقول ايفصل بيهم الحجار ، اسمعوا الرباعة ماشي نطيح عليكوم حاد الحيلة وبيها هاذ سيدهوم حديدان ماشي نلقيواه فكرشنا ونعرفوه على طاوي .
سيادنا حلقتنا اليوم سالات وإلى أن ألقاكم في الحلقة القادمة إن شاء الله.

توقيع: عبد المالك الرياني

تصنيف : التراث الشفهي,الثقافة التسولية