سلسلة عمي بوشتى وحادة 09.

حميد: السلامو عليكم ألخوت.
عبسلام فنفسو: بسم الله الرحمان الرحيم، مناين صلط هذ المصيبة عاوث؟ وعليكم السلام. أهلا سي حميد، شخبارك؟ لاباس عليك؟ على السلامة.
حميد: نحمدو الله ونشكروه. كا كنتو فالفيلاج؟.
سليمان: (ولد خاين حميد) لا أعمي راه عبسلام حتى هو جا هذ النهار مطانجة.
حميد: وفاين هوما حوايجك؟ أو عاد جايبم الكار.
عبسلام فنفسو: الله يجيك الكدور.
لا راني غي ما بغيتشاي نتقل راسي بالحوايج. وزايدون الوالد مريط وجيث مزروب باش نعبيه للطبيب.
حمو لخاه عبسلام غي بشويش: زعما زعما، نتينا جبرت القدرة. أصاحبي أدنزلم مقشرين.
عبسلام: يتقشرو حناكك لما سكتنا راك ماشي دفضحنا الله يفضحك.
حميد: أنا كنت خدام فواحد الشركة فكازا، بخير وعلى خير، أيخلصونا مزيان وعندنا حتى راصورانص. إلى بغيث نهدر مع مول الشركة وأجي دخدم معانا.
عبسلام: الله يرحم الوالدين، ولايني راني خدام بخير حتى أنا. مصاب غي الصحة والسلامة.
حمو لخاه: أصاحبي وشحال أدكدب.
عبسلام: يكدبو ركابك.
وبدا أيدلقم فالبغلة باش دمشي دغيا.
أرررا أرررا الله يعطي لمولاك لقرط.
حمو: ولاش أدزرب على هذ الحنسورة، كازعما جايب معك الهدية!!! غي باك دابا تشوفو ودشبع منو.
عبسلام: أودي راني غي أنتلف حححي بويلي، ها نتينا عاقل غي ماشي يشوفني باك ماشي ينوض سابg.
حمو: علاش؟ كازعما نتي هو سيدنا يوسف؟. ياك عام ونتينا غايب، وماجي ربي كريم. راهم الناس أيقول: شحال جاب ماشي شحال غاب.
عبسلام: زيدني زيد، شتني مطفرو.
المهم بقا عبسلام شاد فخاه غي باش يتلف الهدرة لحميد وما يزيدشاي يفقصو. غي وصلو للعين دالدوار وهوما يشوفو يامنة أدعمر الطوانا دلما على الحمارة. وغي شافثم وهي دطحك ودحدر عيناها. زعما حشمانة. مد عبسلام يدو لجيبو وجبد حد القابسة دلمسكة وحد البكية دالشكلاط ونزلم على السور دالعين وكمل الطريق. شافث فيه يامنة وتبسمث بالطحكة زعما لهلا يخطيك علي يا لحبيب ديالي.
غي وصلوا لحدا الدار وهو يسمع بوشتى الحس ديالم.
بوشتى: الصافية آلصافية، أنسمع شي تريص برا واقيلا داك خرارك دخوثك وصلوا، خرج الله يغطيك بالرضا نزل معهم لا جابو شي حوايج.
الصافية: أهلا خيي عبسلام، على سلاااامثك، تعطلتو بزاااف، ياك لاباس.
حمو ضاحكا: رانتي عارفة مع التقل والباكاج بزاااف، عاد وصلنا.
عبسلام: يطحكو على فاك ينشعالله.
الصافية: واييه هذ الشي دي بان لي، ما شفت عندكم لا باليزاث لا صيكان! ياكما شفروك فالكار؟
عبسلام: أودي ماشي وقت الهدرة دابا، شخبار با؟
حادة: أهلا بوليدي لحبيب توحشتك أوليدي. على سلاااامثك. باك راه ناعس فالصطيحة.
عبسلام لحمو: عبي البغلة لمولاها، أنا ماشي ندخل نشوف باك، ودعي مع خوك.
حمو: يكون فعوانك معاه.
عبسلام: أهلا الوالد، شخبارك؟ أدبان لي لاباس دابا!!
بوشتى: الحمدوالله هد الساعة، على سلامثك، كا عاد وصلت؟
عبسلام: وصلت بحينة، غي تعطلنا فالطريق واها، وراك عارف داك البغلة دعمي عياد، ميثة فالحدورة.
بوشتى: قالتلي يماك دابا، بلي را حتى حميد دعامر جا مالدار البيضا، وجاب البغلة هازة على وذناها. هذيك هي الضنايا المرضية.
عبسلام فنفسو: (عاود بدينا فالنكير من دابا، الله يكوز هذ اليوماين على خير وصافي) أييه راه لحقنا فالطريق وسبقنا عندم البغل مجهد.
بوشتى: ماشي البغل دي مجهد، راه هو دي كان أيزرب عليه باش يوصل دغيا، حيت ماجي بوجاه حمر. وعارف شني جايب. وبنادم مناين أيكون معورلا عينا أيبغي يتعطل باش ما يوصلشاي دغيا.
المهم نخليو عمي بوشتى وعبسلام يسخنو الطرح. ونرجعو بعد قليل.

توقيع أحمد لزعر التسولي.

تصنيف : الثقافة التسولية,طرائف عمي بوشتة