سيرة حياة تسولي حر 03.

بسم الله والصلاة على النبي هي اللولة، خوتي التول السلام عليكم جملة، الحاصول خلينها فنهار السرة ، فاش تجمعوا النسا دالدوار ما بقاث حتى مرا، أما الرجال ممنوع عليهم يمشيو بالمرة، ما عدا شي حبيب قريب أو شي ضيف جابثو القدرة، وفهاد الستيام قبل ما نسبع بابا كان أيقيل قدامي مربع ، مرة أيرفذني فيدو بحال درافذ الفرخ دالقوباع، ومرة أيبقى فيا بعينو أيتبع، وأنا مرة ناعس مرة انزgي ونواعواع، مأنسكث حتى أيلقيولي البزول فاي نرطع، حلمرة عطيثا للزgا ما بغيث نسكتشاي، يما فيا حارث ونانا فبابا دارث قاثلو نوض دشوف شغلك ونتينا حدايا قارث، ومور حنا سرذث ، حيث هي المداوية ددالدوار كانث، أداوي على البرد وبومزوي والتقصيرة والتغراف، أدلك الباب وأدكوي على بونيف وعلقرينة بين الكتاف، أدقلب الحمل ودولد النسا حتى رجعث الله يرحما هي حناين مكلسة، شحال من واحد زادلو ربي فبوحبل على يدا، كانث فالقبيلة طبيب بلا خلصة لا كونجي لا صناثة لا ستيلو عندا، جاث الله يرحما أدجري وقاثلم زولو بالاكم خليوني نشوف مال هاد الدري، زولثلي السماط والgذاور، وعراثلي صابث طهري وكرشي كلشي حمر ، قاثلم الدم أينخصو شوفو طهرو كيف عامل بحا دشاعلين فيه المجامر، هذا خصو بأفرور يتمغر، ناضث نانا أدجري ، جابث حشقف دgروج، وتعاونو عليه أيدقوه بجوج، بشطاطو غربلو أفرور ، وبالزيث خلطو ومغرولي كرشي وطهري لور، الحاصول هذي gوزناها وgازث، والستيام نgهزث ، جاو جدي وحنا ديما وخوالي وحد عما، وجابو ملقمح خنشة وخنشة دالطحين، وحولي gرونو ملوزين، والشوارياث عامرين. حنا ديما مندجاث ما ناضث محدا بنتا، جابثلا جاجا طايبة مالدار ومن البيض كركار، وغي سخنث وبداث أدعطيها ويما أدقولا قلبي طالع معندي فاين نلقيها، وهي أدلقم ودعطيها وخا أدهدر ما أدعبيها فيها، وأدقولا كول أبنت الحولا، باش دلقي لحليب لابنك ودنوض صحيحة لشغلك، جدي ديما كان مقدم دالخيالة فولاد الشريف، عمل معاهم يوصلو قبل المغرب باش الخيل دكول ودشرب والخيالة يروحوا مشي يصبحوا على البارود غي درب ، جدي دبابا علم الرباعة دنgوشت ومكلسة، وملمعلمين علم الشيخ الهادي، وقالو جيبلي الطبالة القشاقشية دأيهردو البواردي، جاو الحباب من الدار البيضا ومن فاس وناض السبg والجرا بلا قياس، السارح سرذاثو حنا يعلم الناس دعندم الحليب يجمعوهلم فالصباح، عماماثي شطبو وفرشو الغرفاث والبيوث والمراح، شعلوا الفرنة والعواد موجودين من الغابة حطبم بابا والناس دالجماعة كاملين، وطيبو مخرينgو ميدونة والمفروق وحرشة قد رويضة دالكار سخونة، والخبز شحال من gصعة معجونة، الحاصول تعوفو وناض جدي ذبح الحولي دجابو أولاد الشريف وعملوا العشا للخيالة ودجا داك الليلة ضيف، حيث داك الحولي كان غي هدية والحولي دالعادة جابوه فسبوع ختي البكرية.
نخليو يتلاحقوا المعروضين ويgوز الليل ويصبح الصباح ومرحبا بكم لسبوعي نشبعوا تبوريدا فداك المراح.
وعلى المودة نتقاشعوا.

توقيع أنوار زياد.

تصنيف : المنتديات الثقافية