سلطان القبيلة 05.

الصلاة والسلام على خير الانام
مجموعتنا مجموعة ولا في الاحلام
تنشر قيم الود والمحبة والسلام
نتكلموا ونعبروا ونخاويو الكلام
نجمعو شمل القبيلة ونرفدو العلام
نزرعو الامل فالشباب يزيدو للامام
السربة فالمحرك لازم يسوكها علام
راد البال للفرسان ومعاهم شاد اللجام

فين خلينا الحكاية عندك نتلفو راس الخيط ونتبعو الهدرة الخاوية ونخافو من النهيط، شحال منم عاطيينها للماكلة والسريط وقت المعقول يتخباو مور الحيط.كنس مكفس، والرعاوين ما عندم لا ملة ولا دين، تايهين وفالظلمة غاديين، لا ناهي لا منتهي وتضياع الوقت فالتباهي

خليناها يا الحباب منين سيد السلطان هز عينو وشاف فالبنت الغريبة فديك المكان، عينيهاكبار قد الكيسان.يلا شفتوها تقولو غي لوحة راسمها فنان باينة فيها حشمانة ولا معندها كانة حروف الزين على وجاها مرسومة وخا هي من العطف والحنان محرومة.وفالوقت لي امر سيد السلطان الخدام ديالو ودارو بيه قلم شلا كلام وشحال من تنبيه.هي بقات فامرها حيرانا وقالت مع بالا شنو زعمة يكون كيهدر عليا انا،إو نمشي نتحرك قبل ما يتفضح امري ونولي مع مرات با فشدلي نقطعليك.تمنيت نكون حداها ونقولا كلسي يا الهبيلة راك غتولي لالات بنات القبيلة.ولايني خلاها مولاها حتى قط ما ايهرب من دار العرس...
على المودة نلتقي

توقيع عبد الجق كريط

تصنيف : الثقافة التسولية,المنتديات الثقافية