اكلة البطاطس

السلام عليكم

كانت واحد لمرا عندها واحد لولد مكيبغيش ياكل الا اذا كان اللحم وحد نهار طيبات طاجين دلباطاطاو عيطاتلو
الام وليدي اجي اجي الحبيب ديالي تاكول باش تكبر مزيان...
الولد ايلا مكينش اللحيمة ماناكول
الام تنادي عى العصا فنيك اديك العصا اجي عندي بغيتك ضربي هد لود راه مبغاش ياكل
العصا لا منضربوش هو زوين و مخصناش نضربو لوليدات
الام (تغير الصوت مع كل شخصية)حتى انت مكتسمعيش الهضرة بلاتي عليك عندي دواك اجي اداك لعويفية حرقي هدلعصا
النار علاش اش درتلي انا منحرقهاش
الام هد النهار كلشي مكيسمعش لهضرة اجي اداك لقريعة دلما تكبي على هد العافيا و اطفيها
الماء علاش تضيعيني و تضيعي هد العافيا خليها تسخنك
الام لا لا هدشي مشي معقول كلامي مبقاش يتسمع اجي اداك لبگيرة اشربي هد الما
البقرة لا مفياش لعطش منشربش
الام مشكيلا هذي اش غدي اندير....اجي اداك الگزار ذبح هد البگرة
الجزار لللا الالة هذ البگرة مشي ديالي ميمكنش نذبحها
الام عندك الحق ولايني بلاتي اجي اداك لقنبا جيفي هد لگزار وهنينا منو
الحبل لا لجيفتو ربي يغذبني
الام حتى انت طواليك لسان و كترد لهضرة اجي اداك لفار غزز هد القنبا ومضي فيها سنناتك
الفار سنناتي ماضيين و ما فيا ما يغزز
الام واخا غدي نجيبليك لي كعرفليك اجي اداك لمشيش عندي ليك واحد الزردة
القط ياك ما شي فار فين هو جيبيه ليا واخا مفياش لجوع
الفار سمع القط كيهضر وبدا كيغوت
الفار فين داك لحبل لي بغيتي نغزز راني موجود
الحبل اش بيني و بينك انا غادي نجيف الگزار
الجزار علاش اسي لحبل باغي تجيفني راني عندي وليدات غدي تحرمهم مني انا ماشي نذبح البگرة
البقرة علاش بغيتو دبحوني و انا كنعطيكم لحليبا و زبيدا وانا راه فيا لعطش عطيوني نشرب
الماء بعدي مني الالة البگرة انا ماشي نطفي العافيا
النار علاش تطفيوني وانا باقي بيا الصالحا زيدوني داك لعصا باش تزيدني قوة
العصا ايوا لحرقتوني شكون لي غدي يضرب ليكوم لوليدات لي مكيبغاوش ياكلو البطاطا وخا مفيهاش اللحم
الولد ماما انا فيا لجوع عطيني ناكل
الام انا مطيبش اللحم معنديش باش نشريه
الولد عطيني البطاطا حتى الخضر فيها فوائد
وهكذا اكل الولد البطاطا و تعلم درسا في القناعة
ايوا اشنو عجبكوم كتابتي او كتابة احمد بوكماخ (في الحقيقة لا مجال للمقارنة).

توقيع: مليكة الأطرش

اقرء المزيد

التوائل 29

عمي بوشتى ناض بكري وبغى يشعل الضو صاب البولة محروقة وبدا النكير مع الفجر

بوشتى : شكون دي حرق هاد البولة أداك مو جحالل ؟
حادة واجباتو من تحت الفراش : انتينا قابلني غي يانا ما عندك حتى شغل ، الصباح لله ، غي اللي ضاعت كريطا مولاتا
بوشتى : يكرطوك القطوط والكلاب أ القمقوم دموكة ، اخزيت الله ينعلا سلعة
الصافية سمعات اللغالغ دعمي بوشتى مع الفجر ناضت وجات أدسبك
الصافية : أبابا راه الضو مقطوع من البارح ، مناين كازت داك الرعدة مور الوحدة دالليل وقطعوه ، ونتينا غي أدتعدا على يما ما لقاتلك والو
بوشتى : يلقيلا ربي شي قنبة فعنقا ونتهنى منا ، ونتينا لاش بقيت فايقة حتى للوحدة دالليل شني بقيت أدلقيلي ، كا أدعاونوني فالخلاص ، فايناهي داك الورقة نهود نخلصا لاباري يكونو قطعوه مناين ما خلصناشاي .
الصافية مشات جابتلو الورقة ولبس جلابتو وصباطو ومشى للفيلاج يخلص صابا غي سطاش لميا خلصا ورجع
غي وصل للدار تلاقا مع عبد الحق فالباب هو والرباعة دي جاو معاه
بوشتى : أهلل أهلل أهلل بالنسيب وهاد الجواد ، نهار كبير هدا شا المجية ؟
عبد الحق : أودي شني مشي نقلك أعمي بوشتى غي جينا نزوروك واها
بوشتى : يزوركوم الخير والربح زيدو دخلو دخلو .
عمي بوشتى دخل الضياف ديالو وطلعم للغرفة ، حادة أدرgب غي بنص عين بانولا ليشاشرة خيربي ومعاهم عبد الحق ما فهمت والو ، عيطت على الصافية جات أدسبك بانلا عبد الحق وعمي جمال فالتالي كان أيمد حا السلة دالكرموس لعمي بوشتى ، ما فهمت والو حتى هي .
المهم الرباعة فرح بيهم عمي بوشتى وتهلا فيهم ، تغداو وتهاودو وجبدو الهضرة دالعرس دعبد الحق والصافية ، قالم عمي بوشتى راحنا باقيين على الكلمة وانعاينو غي فوقاش يجمع راسو ويفضي معانا الوقت دالعرس ، عبد الحق جاوبو قلو أنا موجود أعمي بوشتى أنعاينو غي عبسلام يلقي العرس ونتبعو يانا ، راني واجد . من بعد هضرو على الشباك دي شابك خاين يامنة مع علي دالقرع و ناضو مشاو عيطو لباباه وعيطو لحميدة نسيب عمي بوشتى وصالحوهم و دخلو بيناتم بخيط بيط وودعو عمي بوشتى ومشاو فحالم وخلاو عبد الحق فالدار .
فالعشية عمي بوشتى خرج للدكانة كيف العادة وقلم يوجدو العوف على حساب عبد الحق ، والصافية كانت مشي طير بالفرحة ، أدوجد القهوة وادغني "دابا يجي آ خويا ودابا يجي " وحادة فالنوالة أدوجد المفروق وأدواجبا " حدو طنجة"
الصافية طيبت القهوة وماجية بيها وعياد وحدهوم وصلو ، كانو فالعرس دبنت خاها فبني لنت ، حدهوم محرفة بالصاك الجديد دي عطاتا الصافية ، الصاك دي شرالا عبد الحق فالتفكيرة دالعيد الصغير ، قبطاتو وعطاتولا كلو مقطع ومشردل وقالتلا سمحلي أبنت نوطتي خرجنا نلاقيو الهدية وكانت الغيطة والطبل وتلهينا بالشطيح والزغارت ونسيت الصاك فالحالة دالبيت وكنت لاقية فيه حاد الفخد دالدجاج شاط مورانا فالغدا ، شمولو القطوط الريحة وجاو للصاك هربجوه ، غي سمحلي دابا نبيع الدك ونغرمولك .
الصافية غنزرت و ما عجباش الحال ، جا عبد الحق قلا ما عليش صافي دابا نشريلك خور . المهم تعوفو وبقاو كالسين فالدكانة و عياد بدا أيعاودلم على العرس .
عياد : شاتنا بيها لله يا عرس مبرع gوزنا
بوشتى : قول شبعت تبوريدة أ المهيبط ، أنعرفك غي أدشوف الطبل أدنقز انتي اللول و أدجي فالمرح
عياد : إيوا بالصراحة شبعنا فراجة ، لقاو الطبل والغيطة بالنهار وبالليل لقاو الدجوق
حادة : حتى حنا داك الشي دي عوالين نلقيو فالعرس دعبسلام و دالصافية
عبد الحق حشم وحدر راسو
حدهوم : أ لا قالا ما دلحقوشاي العرس دخاي ، الغازي خاي ولادو كاملين فالوضيف وعاونوه ولقى الشغل دالمدينة ، لقى الطبل والغيطة والدجوق والعروسة رفدوها وبقاو أيدورو بيها هي والعريس وجابو الطريطوار هو دي تكلف بكلشي
بوشتى : قول الطريطور أ الهم موشاي الطريطوار
حادة : داك الشي دي طحاو أيلقيو دابا الناس دالمدينة ، حتى ختي ففاس هايثا عملو فالعرس دبنتا
الصافية شافت فعبد الحق صابتو مسكين حدبان راخي هيسوستو و ايفكر شني تابعو ، وهزت الصينية ودخلت
حدهوم : و ما داك بهيجة بنت خاي جات غزيولة تبارك الله ، لبسولا حا الكسوة بيطة ما لقاولا لا سبنية لا قبة ، والعريس جابوه كلسوه حداها بالكوستين ديالو وكلشي أيصور ويانا وعياد زيدنا تصورنا معاها وقبطتلي راسي وحباتو الله يرضي عليها
حادة : إيوا بصحتكوم
عياد : الله يعطيك الصحة ولايني على بونت يانا كث مشي نخسرلم العرس
بوشتى : شني لقيت أ المدعوي ؟
عياد : داك مول الكانيرا جا حتى لحدا الوجا دحدهوم وبدا أيصور فيها ونوضت ليلو كث مشي نفطو
حادة : وما فيكوم د الغيرة و التعنتيت دقول فولة وحدة ونقصمت على جوج سبحا الله
عياد : والله ايلا يا قبطني غي نسيبي و داك السي حمزة حتى هو صيبتو ثماكينا كان معروض
بوشتى : كا داك السي حمزة دي أيقري فنحو لومية ؟
عياد : هاداك ، وحقا راه سلم عليك وقلي غدا مشي يجي باش يقيد دي بغى يقرا هاد العام .
حادة : مزيان بحرا ندخل حتى يانا نقرا
عياد : لا ، هاد العام هو مشي يقري الرجال أما العيال عاد قالو مشي يجيبولم الأوسادة دي مشي دقريهم . وراه قلي غدا الرجال دالدشر دي عندو الغاراض يقرا يجي فالعشية للمدرسة ويجيب معاه لاكارط باش يزممو
بوشتى : وشني قلت نتينا كا مشي دقرا عندو ؟
عياد : ولياه شني فيها ، ما فيها حتى عيب ياك أولدي ؟
عبد الحق : إييه أ عمي عياد ، العلم نور والجهل عار ، الواحد مزيان يقرا واخا يعرف يقبط غي الستيلو ويكتب سميتو ويقلع النوامر ويتعلم الحساب .
بوشتى : ايه أولدي بنية ، كالسين كالسين الوحيد يمشي يتفقه شواي واخا نتعلمو نقراو غي القرقان
هي هاديك سالاو التهاويدة ديالم وتفارقو ، ولاغدا غي تغداو جا عياد عند عمي بوشتى وبقى أيعاينو علاما طيب القهوة وعباها معاه هي وشواي دالمفروق ومشاو بجوج للمدرسة صابو السي حمزة فالقسم أيعاينم هو وحميدة و الفقير الحوسين و الجيران لخرين .
نخليو عمي بوشتى وعياد فالمدرسة وإلى اللقاء في الجزء المقبل بحول الله
دامت لكم البسمة.

توقيع: عزيز البورقادي

اقرء المزيد

بنية البيت التسولي. التركيبة الهندسية 01

منذ أكثر من سنة وأنا أنوي الحديث عن بنية البيت التسولي وفي كل مرة يطرأ طارئ يشغلني عنه، ونحن حين نتحدث عن بنية البيت نتحدث عن بنية مجتمع كامل، إذ يعتبر البيت كيانا اجتماعيا يلخص في أجزائه حياة مجتمع وعاداته وأسلوب عيشه. ونود أن نتطرق في هذا الجزء الأول للبنية الهندسية حيث يعمد التسولي إلى اختيار مكان مناسب لإقامة بيته ويختلف المكان بين الجبال والسفوح، ففي الجبال غالبا ما يعمد التسولي إلى إقامة بيته في بقعة بعيدة شيئا ما عن الناس (لا تزيد عن 300 متر في الغالب) ومحاطة بالأشجار التي تشكل حاجزا طبيعيا وسياجا حول البيت، وذلك حتى يتسنى لحريمه الخروج منه والدخول إليه في راحة تامة دون إزعاج أو تلصص من الذكور، أما في السفوح فيختلف الأمر ونجد مجموعة من البيوت محتشدة في بقعة واحدة كنوع من الحماية الجماعية.

ويتكون البيت التسولي في مجمله من مجموعة من القطع التي يكمل بعضها بعضا ونذكر منها:

01- الغرفة وهي بناء مكون من طابقين أرضي وعلوي، يطلق على الجزء الأرضي "الروا" (1) وهو بناء مستطيل لا يتجاوز علوه المترين وعرضه المترين ونصف تقريبا، غالبا ما يخصص للجلوس العائلي، وأحيانا يتخذ مربطا للدواب فيسمى "المتحم" أو "المسحم" (2) حسب النطق، أما إذا اختير مربطا للبقر فيسمى "الداموس" (3) وقليل من الناس من يعرف هاته الفروق ويطلق اسم "الروا والداموس والمسحم" على المسمى نفسه وهذا خطأ بين. أما الجزء العلوي والمسمى الغرفة فيخصص غالبا للضيوف ويكون ارتفاع حيطانه بقدر ارتفاع الجزء السفلي إلا أن الغرفة تتميز بطريقة فريدة في السقف حيث يعمد البناؤون إلى رفع عرضيها على شكل مثلث متساوي الساقين يسمى "الغارب" (4) يتم رفعهما عن مستوى الطول بحولي متر ونصف على شكل حرف V بالمقلوب ويربط بين أعلى الغاربين عمود غليظ يسمى "السهم" (5) (بتسكين السين وفتح الهاء) يتجاوز قطره 30 سنتيمتر ويتكون غالبا من شجر الصفصاف وهو شجر معروف بطوله حيث ينمو في الأماكن الرطبة ليتجاوز العشرين مترا، ويتم إسناده في الوسط بواسطة خشبة على شكل حرف V المقلوب توضع طرفاها على سور الغرفة وتسمى "السماش" (6) وتتخذ غالبا من شجرة الخروب المعروفة بمتانة عيدانها ومقاومتها للزمن ولحشرة السوس، بعد هاته العملية يتم وضع أخشاب من مترين تقريبا تسمى "الحنية" (7) طرفها الأول على حافة السور والثاني على "السهم" يفصل بين كل واحدة منها ستون سنتيمتر تقريبا ثم توضع فوقها أغصان الشجر الرقيقة نوعا ما من صفصاف وخوخ الماء وخروب وزيتون أحيانا، وتشد إلى الحنية بخيوط "الصبايلو"، قبل أن يعمد "المعلم" (8) إلى وضع طبقة من الطين المبلل الممزوج بالتبن وتسمى هاته العملية ب"التغرية" (9) ثم يشرع في وضع طبقات من الأحجار الرقيقة السمك تسمى "المحايف" (10) كما يوضع القرميد تماما (لايتجاوز سمكها 3 سنتيمرات في الغالب) حيث يبدأ بوضع "محايف" كبيرة تسمى "شوارب" (11) يجعل نصفها على السور والنصف الثاني خارجه ثم يتدرج إلى المحايف المتوسطة فيضع نصفها فوق الشوارب ونصفها فوق الطين ثم تكرر العملية حتى يصل "المعلم" إلى "السهم" وينتقل بعدها إلى الجهة المقابلة ليضع كمية المحايف نفسها حتى لا ينقلب السهم وتسمى هاته العملية "الجلبة" (12) ثم يعود للجهة الأخرى وهكذا دواليك، وقد تستمر عملية التسقاف التي تنجز عبر "التوازة أو التويزة" ليومين حسب شطارة كل "معلم" وحجم الغرفة المراد تسقيفها وبعد أن ينتهي "المعلم" من وضع المحايف ولتغطية السهم وربط المحايف ببعضها ببعض يتم عجن الطين الأبيض مع التبن وتوضع منه طبقة سميكة يتجاوز قطرها 30 سنتيمتر تسمى "السلم" (13) (بتسكين جميع الحروف).

ـــــــــــــــــــــــــــــــــــــــــــــــــــــــــــــــــــــــــــــ

(1) الروا: لعل أصل الكلمة مأخوذ من الرواء (بفتح الراء) وهو السقيا والشراب حيث غالبا ما كان يتخذ هذا البيت بحكم برودته مكانا لوضع قلل الماء خصوصا في الأوقات المخصصة للأكل.

(2) المسحم: بحثت عن أصل هاته الكلمة فوجدتها تعني في اللغة العربية المكان الأسود المظلم.

(3) الداموس: مأخوذ من الدمس (بجر الدال وتسكين الميم) والدمس هو خليط من التبن وروث البهائم يستعمل في الطبخ ويطلق عليها في لغتنا التسولية "الوgيد).

(4) الغارب: أعلى كل شيء، والغارب مقدم سنام الجمل.

(5) السهم: لعله مأخوذ من السهم المخصص للرماية بسبب شكله حيث يكون غليظا من الأسفل ورقيقا من الأعلى.

(6) السماش: صراحة لم أجد لهاته الكلمة تفسيرا مناسبا، وتجدر الإشارة إلى أنهم في الأماكن التي لا يوجد فيها شجر الخروب يتم تعويض السماش بخشبتين غليظتين يتم ربطهما من الأعلى بمسامير متينة يطلق عليه اسم المقص.

(7) الحنية: لعلها مأخوذة من الانحناء لأنها توضع بشكل مائل.

(8) المعلم: يطلق هذا اللقب في القبيلة على كل من يتقن حرفة بعينها: البناء، السقاف، الخياط، الحجام ......

(9) التغرية: أقرب معنى يفهم منها هو إلصاق شيئين بالغراء، والغراء هو مادة لزجة تستعمل في إلصاق شيئين ببعضهما، ويقوم الطين المبلل بالعملية نفسها تقريبا حيث يشكل رابطا بين المحايف وأغصان الأشجار.

(10) المحايف: الحيف الميل والجنب، وسميت بهذا الاسم لأهنا توضع بشكل مائل على حافة السور وعلى بعضها البعض.

(11) الشوارب: سميت بهذا الاسم تشبيها لها بشوارب الرجال حيث توضع بطريقة تشبه وضع الشوارب تماما، كما قد تعني الشراب إذ تكون هاته المحايف آخر مكان ينزل منه الماء البيت فكأنها تقوم بإشراب الأرض من الماء.

(12) الجلبة: هي عملية مناوبة بين جهتي الغرفة في التسقيف حفاظا على وضعية السهم، أما أصل الكلمة فلم أجد له تفسيرا مقبولا.

(13) السلم: أقرب معنى يحيل عليه هو السلامة حيث يشكل هذا الجزء اللحمة التي تجمع أعلى المحايف من الجهتين كما يعتبر غطاء واقيا للسهم من أن يصاب بالماء فيفسد عوده.

وإلى اللقاء في جزء قادم بحول الله.

وعلى المودة نلتقي.

توقيع : أحمد لزعر التسولي

اقرء المزيد

قصيدة تسولية

التسول يا مجمع الكرام
عليكم جيت نقرا السلام
سمحولي طولت الغيبة وقطعت الكلام
ولكن كيقولو الدوام كيتقب الرخام
البركة فلي احضر وحارص على النظام
مشمر على غمامرو ومكفض الكمام
باش تطول العشرة والشمل يتلام
العدد فالاول كان قليل معدود بالاقلام
وبدا كيتضاعف مع مرور الايام
دابا راه وصل 6705 بالتمام
وغيزيد يكبر بمرور السنوات والعوام
المنشورات غير ماجيين بالعرام
فالتعاليق كتدخل تلقى الزحام
الضحك والتقشاب والتآلف والوئام
فكرة المهرجان كانت غير بالايام( الايام الثقافية)
وناقشوها الاخوان فسيدي قاسم داك العام
فدار السي يسف الله يعلي ليه المقام
وفحد اولاد ازباير تنصبت الخيام
مناسبة جميلة احضر فيها الاعلام
صوت البارود والفارس بجلاب والسلهام
القبايل تما فديك المكان تشاركو الطعام
واخا كثرت شحال دالهضرة والكلام
وبداو كيصدرو فالتأويلات والاحكام
عذروه مسكين ما عندو علاش يتلام
عقلو عامر بالافكار السلبية والاوهام
عدد منهم لي كلاو اللحم ورماو العظام
هذا حالهم كيف العادة وهذا هو بني ادام
قبيلة التسول تشهرت وتعلا ليها المقام
من بعد ما كانت عايشا فالتمني والاحلام
مزال الرجال عندهم غيرة يزيدو للامام
لي نقولكم راه مزال الخير القدام
وغادي تشرق الشمس ويزول الغيام
لكم مني كل التقدير والاحترام
دام لكم الحب والود والسلم والسلام.

توقيع: عبد الحق كريط

اقرء المزيد

بوحيول والسبايبي الوجدي : 1

بسم الله بها يبداو موالين النية، هي زينة الأقوال هي مفتاح القفال بها سار الفلك والمواج جبال عاتية، بها بدا كتاب سيدنا سليمان لصاحبة الملك وجاتو طايعة مهدية ،والصلاة والسلام على عالي المقام زين السمية سيدنا محمد خير ما خلق الله فالبرية.
المجنون ما عليه حكام،
والسفيه ما يصلح لمقام،
الغدار ما يعقل على ملح ولاطعام
والشفار ما يعرف حرام،
دعطاك التيقار عطيه السلام
ولا دشرك هدرة مع شكام ،
دعطاك النخال عطيه الصيام
وديخليك فوسط الطريق رفاكثو حرام.
سيادي بوحيول الراجل الغندور، گزار فالأسواق مشهور، أيعرفو الصغير والكبير ونقايمو عاملين الدهير، حالعام طلعلو الگاز مالاسواق كانث القضية كاسذة وغي تمارة والجري بلا فايذة، هز بوحيول صاكو وجابو لوجدة، خدم فحالحانوث كان غي أيفصل ويقصص، حتى رجع هو دأيگابل لاكيس ويتخلص، جربو مول الشي صابو تيقة عطاه الحانوث بالنص، حالنهار سوق يشري شي خرفان، خارg حالدربالة وحالطربوش بالكبالة كي شي شفار أيبان، دار السوق مزيان ووقف عند واحد شاد حالgطعة دالخرفان، بقا أيسمن ويشوف ويدور فيه داك خينا حسابو شي شفار مشي يطيرلو شي خروف: روح طرواح ولا رانا نمطgg مطرg.
بوحيول : أنعل الشيطان راني أنشري مماشي ناكلكشاي هالخرفان، شحال ساوي هاد الخير
مول الخرفان بناذم مبgر ما يعرف لا يتصرف لا يهدر: أنا نgولاه روح طروح، أروووح طروح، وشير على بوحيول بالمعgف غي ربي ستر.
تشانقو وبقاو ضرب فيا نضرب فيك وعباد الله أدفرق، جاو البوليس عباواه حسابلم سراق، طاح غي فشي بوليس أيعرفوه ويعرفو خدمثو طلقوه.
بوحيول خرج بحال طبال الهوتة لا فراجة لا طبل ماهو بسلعة شراها ما هو بسوق سوقو وحلف فصاحب دعوثو مني دجيبو السمطة ما يطلقو. وحتى يدبر بوحيول عالحيلة باش يفدي دقثو، دامت لكم السعادة ودمتم في رعاية الرحمان.
وعلى المودة نتقاشعوا.

توقيع: أنوار زياد

اقرء المزيد

التوائل (25)

عمي بوشتى فيه النوبة دالفقيه هاد النهار ، هود للسوق بكري وتقضى خضيرة وشواي دالتمر و حاد الكيلو دالحلوة الشباكية من عند صاحبو مول البانيو الكبير ودرالو عليها شواي دالجلجلان وشرى حاد الدلاحة و كيلو دالسردين وشواي دالقصبور والكرافس ولقى كلشي فالشواري وطلع فحالو بكري قبل الضهور .

دادا حادة وجدات حاد الكصعة د خرينكو و المفروق كل مفروقة قد البخنوق دحدهوم ، وشي مطلوعات تبارك الله قد الرويضة دالبوكشليط ، ومن بعد قبطت حا البروgة وجابتا لعمي بوشتى gوز عليها بحا الخدمي باش يلقيو عليها المرقة للصحور و حمو صرداتو للبحيرة دموحند دعلي يجيبلم شي عروش دليقامة باش يلقيو اتاي . الصافية درزت لداك السردين شرملاتو وصغباتو و طلعت للغرفة شطباتا وفرشاتا ومشات دوجد الفطور .
عمي بوشتى لبس العباية ديالو اللي رقعتلو الصافية البارح و فرش فالدكانة على برا قبالة الغربي وتسرد حتى قربت المغرب وناض فافا على حا الغلاي مكفس رفدو وخرج للعرصة يتوضى . هو يالاه قال بسم الله وحدهوم gايزة على فوق الدار ادزحول وراخية هيسوستا سالا معاها رمضان ، شمات الريحة دالحوت وتمت ماجية بحا شي سلوكية تابعة الجرة . عمي بوشتى شافا ماجيا حيتو ناض بالزربة هز الغلاي ديالو ودار مور الهندية وكمل الوضو على خاطرو .
حدهوم : أخير أحادة ، مالك هاد النهار شفتك قيالة غابرة ما ضهرتشاي كككل
حادة : ايوا غي سكث ، زعما فينا النوبة دالفقيه هاد النهار أو نسيث ؟
حدهوم : اييه بصاح قالالي عياد ، كان أ الحبيبة ، ما دعطينيشاي البوطة الصغيرة ديالك نكمل عليها الفطور ؟ بنت ليهوذية لخرا ما صابث فيواخ دخوالي غي قبل المغرب
حادة : ما عندي ما نعطيك ، بوطة وحدة راني اندعمش بيها ، سير عيط على راجلك واجيو دفطرو معانا هاد النهار .
عمي بوشتى توضى وجاب داك الغلاي نزلو حدا الباب ومشى نيشان للجامع .
عمي امحمد : كا هداك بوشتى دي ماجي بداك العبايا مبخنسة ولاقي يداه موراه
حميدة : هو هداك ، وقيلا النوبة فيه هاد النهار ياك الفقيه
الفقيه : اييه ، وغدا راها عندك أ حميدة هاني فاي علمتك
بوشتى : السلام وعليكوم أ ليشاشرة ، كا باقي ما ودنت أ الفقيه شني أدعاين ؟
الفقيه : باقيلا حا الشواي ، أنا من نهار لقيت التيريفو الكبير ما بقيت انشوف فداك اليومية دبوعياد ، غي هو ايودن فجيبي ويانا انتبعو
بوشتى : خيار ، قلي حتى نتينا تبجدعت
الفقيه بقى ايعاين التيليفون يودن ساعة ما ودنشاي حقاش كان سيلونصيو ، شاف فالماكانة صاب الوقت خرج بخمسة الدقايق عاد ناض يودن ، المهم صلاو ومشاو هو وياه وعمي امحمد وحميدة للدار باش يفطرو ، صابو عياد فالباب واقف ايعاينم وقابط فيدو التسبيح
الفقيه : كا الصلاة ما ادصليشاي أ عياد والتسبيح ادسبح ؟
بوشتى : لاش يصلي هو باقي صغير لياه قد هدا أيصليو
عياد : زعما نتينا قطعت الحصير بالركوع ، ياك حتى نتينا ادصلي غي فوقاش ما رشقتلك ، على حساب الكانة واها
بوشتى : زيد ايوا زيد دخل و باراكا ما دليط فالهضرة .
دخلو للدار وطلعو للغرفة ، صابو الفطور منزل ، الطبلة عامرة والخير موجود ، المهم عمي بوشتى تهلا مزيان فالضياف ديالو . سالاو الفطور وتكاو وعطاوها للتهاويدة .
بوشتى : فايناهو الجيلي الاصفر دي كنت مغطي داك ليامات دالمهرجان أ عياد ؟
عياد : ايوا نتوما اللي تمتعتو فداك المهرجان أما يانا بقيت واحل غي مع الطونوبيلات كنت مشي نحماق ، شحال قدك ما دحطي ، ولايني الحمد لله صورنا فليسات الله يخلف على الجواد
الفقيه : ولايني gاز داك الشي غزال تبارك الله عليهم داك المنضمين كاملين و داك الدراري دالجمعية دالأوقاف
حمو : الجمعية دالآفاق أ السي موشاي الأوقاف ، غي نتينا خدام مع الاوقاف يحسابك كلشي أوقاف
امحمد : أنا شبعت فراجة بعدا فالخيالة وحتى داك الفرايجية وداك احيدوس دبني وراين عندم ما يقولو . فرجونا الله يرضي عليهم مهرجان gاز النيمير الوحيد ، شحال هادي ما شبعنا فراجة ، ولايني حتى نتينا أبوشتى قالولي لقيت ما عليك بالتبوريدة ما خليتشاي
بوشتى : ايوا غي خلاص واها ، وكثير مناين جاو داك الفرايجية ديانا دالتسول والحياينة ، و مناين جا داك البالا دالخياطي كان ايقولي عقلي غي طير واجي فالوص غي داك عزيز البورقادي كان كالس حدايا فالخزانة هو دي قبطني وما خلانيش قلي خليك نتينا كالس مع الشخشيات راها حاطة عليك العين
عياد : بشاخ يا مالي بشاخ كا حتى انتينا طحيت ادحسب راسك مع الشخشيات
بوشتى : ولياه لا ، ما عندك ما دعاود كانو حدايا شي نصارى مرة مرة يضورو حيتي ويقولولي صابا أونكل بوشتى صابا ، وكانو حدايا شي أساسيدا خرين جبدنا الهضرة يانا وياهم قالولي الشغل زيان فالتسول دابا مناين بدا يتحرك داك بوجمعة المداني
حمو : وا المجتمع المدني أبا موشاي بوجمعة المدني
حميدة : وحتى داك المعريض كان متول عطاهم الله الصحة داك الطفلات وداك المنظمين زعما عجبنا الحال بزاف وحمرونا الوجا
الفقيه : وداك الحفلة دالافتتاح gازت مخيرة شني منك يا برارد داتاي وشني منك يا طباسي دالحلوة
بوشتى : نتوما الطلبة بلا أتاي وحلوة أيجيكوم واقيلا الشغل ناقص ياك الفقيه
عياد : ايوا لهيتونا بالهضرة على هاد المهرجان وما شعلتوناشاي الترفازة نتفرجو فداك الكانيرا المخفية دي ادgوز مور الفطور
بوشتى : شعل أولدي داك الترفازة حداك شعل
حمو : أضايع البارابول أ بابا .
بوشتى : كيف صرالو حتى ضاع ؟
حمو : بحينا الصافية نزلت شي حبات دالبيتزا فالطاقة شاطو من الفطور دالبارح ونسات ما حجراتمشاي وبقات ادهضر فالتيليفون ، ومشى ليلم القط دعمي عياد ، شافتو يما وشيرات عليه باليد دالمهراز وخطاتو ودجيبا فالطبسي دالبارابول وعوجاتو ما بقاشاي قابط
بوشتى : شوفلك إيوا بنت العوجة لخرا
الفقيه : ايوا الله يهنيكم أليشاشرة أنا ننوض بحرا نوصل للجامع راها قريبة العشا
عياد : وقيلا ننوضو كاملين حتى يانا نمشي معاكوم بحرا نلحقو نصليو شي ركيعات دالتراويح
بوشتى : والمغرب صليتا بعدا بقالك غي التراويح
ناضو خرجو ومشاو للجامع ، وحمو جمع الطبلة و ومشى بالزربة لبس التحزيمة ديالو ، السوفيطمة دالبارصا فيها النمرة عشرة كان شراها من الخوردة من يامات رونالدينو والشورط اخضر د الراجا والتقاشر صوفر طوالين دعمي بوشتى ولبس داك باطا خنيز ديالو وخرج مشى أيسبك للحد حقاش عندم التورنوا درمضان .
حمو مقيد مع الفرقة دالحد ( أولمبيك أمل الفيلاج ) ومشي يلعبو ضد الفرقة د بني فراسن ( نهضة شباب سوق السبت )
السي محمد البوعلايي هو لاربيط جابوه من البرانس باش يكون محايد ، تعطات الانطلاقة ، الكرة عند الغازي دالطليح ، عطاها لموحند دصفية ايزولالو الطاهر دبوهيوف مشى بيها أيراوغ وأيعطيها لحمو ، حمو أيتيري فاااااط ، الكورة ادخرج من الملعب ليهن وادجي فحاد المرجة حدا الواد حتى نقزو شي قراقر كانو تما ، مشاو ليلا شي حيابر جابوها ، تيراها الحارس دسوق السبت عند علي د الزنفيل ايزولالو بوجمعة التكنزيز ، مشى ليلو حمو ايسبك لوالو عكيلة وجابو منفوط وزولالو وتم ماشي بيها وهو يغردا عونيث بداك باطا خنيز فاااااط حتى دخلت مور الخط وردا الحارس ، ناضو باللغالغ أيشعونو ، شي أيقول بيت وشي أيقول موشاي بيت ، والحكم السي البوعلايي وقف ولقى بيداه داك الاشارة دالمربع وقالم نشوفو ال VAR
السي Noureddin tazi والسي Mohamed Sbaai والسي Mohammed Jlibane كانو مع المفرجين ايتفرجو وقابطين التيليفونات فيداهم وايصورو ، جا عندم لاربيط وشاف داك اللقطة فالتيليفونات بثلاثة وعاودا شلا دالخطرات من جميع الزوايا حتى خوالم الباطري ورجع للملعب ايسبك وقلم موشاي بيت . المهم رماو عليه التقليد ، تلعبت الكورة ، اللعب بدا يقصاح شواي ، ولد مليكة عطاواه الكورة زولالو حمو وتم طالع بيها كا ويجي ليلو حميدة العنكرة ايسبك كان عاد كمى حاد الجوان ، بغى يطرب الكورة بانولو جوج كورات ويخطيها ويقول للرجل دحمو يا شلخ كا ودصيب الدماياث هوادا ادشرشر .حمو طاح وبقى ايزgي بالعاداو ، دارو بيه كاملين ، بغاو ينوضوه صابوه مقروط من رجلو ، عيط لاربيط على الاسعاف ، دخلو حاد الحمارة ولقاواه فوق البرداع وطلعو بيه للدار .
نخليو حمو فاش عطاه الله وإلى اللقاء في الحلقة القادمة بحول الله .
تحية مودة وتقدير للأخ محمد البوعلايي ضيف شرف هذه الحلقة ، وأستسمح على الإطالة .

توقيع: عزيز البورقادي

اقرء المزيد

طرائف عمي بوشتى

عمي بوشتى تسوق شرى شي صويلحات ودار من هنا لهنا وجاب خبيرات
وفرح ملي سمع المهرجان ايامو قربت
قال ارى نمشي نفرح حادة والوليدات 
جبد العقبة على قلبو بالفرحات
هو رgب على الراس دالسيخة وتلوالو رجلاه وضربا بحالطيحة 
قال ايما الحبيبة الزربة ماشي مليحة
جمع الوقفة وهو ايتفتف وايتحسر على الصحيحة . شحال هادي كانت هاد السيخة ادجيه بحا دماشي فالوطية ودبا طحاث ادجيه قبيحة.
يلاه هو جمع راسو وتصحصح وحمو شافو من الدار وجا ايفرح .
حبلو راسو ويدو وقالو فاين كنت ابابا من الصباح؟
قالو غاسكوث وانت كي عبو الفضاح
ما دستر خبر ما دجيب خبار الصح
هز هاد القفة وعبي ليماك هاد الصوالح
حمو هز القفة ومشى للدار مسرح
عرف راسو الى زاد هدر ماشي ياكل بالسطاح
عمي بوشتى : السلام عليكم . افاينكم ؟ اجيو دسمعو خبر يفرح.
الصافيا حبتلو راسو ويدو وقالت : ابابا يما واقيلا فيها لرياح . طلعالا السخانة وادهترف من الصباح.
عمي بوشتى : هذا غي جن شطاح .ساق الخبار للمهرجان وسكن حادة باش يمشي معاها يفرح .
دخل عمي بوشتى للبيت وقال : افاينك اموجحالل ؟ كفيك لرياح ؟
دادة حادة ملمدة وادزهر يسمعوها من المراح.
عمي بوشتى: نوض نوض اموجحالل راني جبتلك خبار دفرح .راه المهرجان قرب نطلبو من ربي الشغل يتسرح.
ونعبيك معايا امو سربوب نشوفو السربات والفرايجية والمسرح. والفنان محمد التسولي ولد البلاد مصحصح.
عيط عليه ولد لزعر وعرض عليه يكون ضيف الدورة . قالو التسول حنا مواليها نتهلاو فيها ومع ولاد بلادي نفرح.
دادة حادة هزت راسا وقالت : كهاد الشي بصح؟ اوا نقول للصافيا دخمل الغرفة ودوجدا للضياف فالصبح . لباري يجيو ناس المدينة يشاركو معانا هاد الفرح.
عمي بوشتى : ما بقيتشاي مريطة وفيك لرياح؟ واخا اللالة حتى حنا نعاونو هاد الناس اللي ايجريو ويجاريو باش تمعش التول وتصحصح. البلاد راها منسية وليني حنا مواليها نفكرو شي شويا ونتعاونو
ندفعوها للتنمية . انا شويا ولاخور شويا حتى دولي التول معروفة دوليا . وهادي غي خطوة اولية . وحتى واحيد ما يطحك عليا راني فيا الغيرة على هاد الارض التولية .

توقيع: رقية البورقادي

اقرء المزيد

الخبز

الخبز شيء مقدس عند المغاربة عامة وعند اهل التسول والمناطق المجاورة خاصة .فالخبز لا يمكن ان يلقى في القمامة ولا يمكن رميه او العبث بفتاته او بابته . ولا يمكن ان تتخطاه ( تمر فوقه) عندنا هادالشي ماشي مليح .واذا ما صادفت قطعة خبز في طريقك تحملها ، تقبلها وتضعها جانبا في منأى عن أرجل المارة . هذا ما علمتنا اياه امهاتنا ونحن بدورنا لقناه لأبناءنا .(انا مزالا لدابا الى جبرت شي كسرة دالخبز فالطريق انهزا ونبوسا ونحيدا للجنب ) . تقول لنا الوالدة : الخبز نعمة واللي تعنفق على شي نعمة يشتاقا .
الخبز هو قرص الذهب الذي لا يعادله ذهب . بسببه يهاجر المرء ويفعل الأعاجيب ويأتي بالغرائب ليحصل عليه .
نجد في التعبيرات اليومية الكثير من المعاني تخص هذه المادة الحيوية .
-- فلان ايضارب مع طرف دالخبز .
-- مشى يخدم باش يصور طرف دالخبز .
-- نحلل هاد الطرف الخبز .
وحتى السعيان ايقولو : خبيزة على الله .او عطيني ثمن خيبزة الله يرحم الوالدين.
يقول سيدي عبد الرحمان المجدوب :
الخبز يا الخبز والخبز هو الإفادة
كون ما كان الخبز ما تكون لا صلاة ولا عبادة .
يؤكل الخبز حرفي او بالدواز : البطاطا او غيرها . بأتاي او باللبن ولما لا العنب او الدلاح في فصل الصيف او البتيخ ... لا يعرف مذاقه هذا إلا من تذوقه.كما يؤكل الخبز بالخبز كذلك هههه. مثلا دفتح طرف دالخبز ودلقي فوسطو سفنجة باش الزيت ديالا يسهل عملية المرور في الحلق هنيئا مريئا.
انواع الخبز كثيرة وتفننت المرأة التازية عموما والتسولية خصوصا في طهيه.
ها المفروق .ها خرينgو. ها المطلوع .ها الخبز فطيرة . ها الكرون . ها الخبز دالشعير وكاين خبز الذرة ووو...
عطا الله الصحة للحادgات.
هذا علاش قديت . كملو من عندكم .
وعلى المودة نلتقي.

توقيع: رقية البورقادي.

اقرء المزيد

سيدي علي الكامل

السلام عليكم ورحمة الله وبركاته.
تحية لكل اعضاء المجموعة.
ألحبايب انا هاد النهار ماشي نهضرلكم على واحد السيد سميتو "سيدي علي كامل" كاين فدوار الدياب هاد السيد معروف فجميع الدواور كان أيعرفو الصغير والكبير وكانوا أيجيو ليلوا من كل بلاصة كان مشهور بزااف ألحبايب.
كان كيداوي على بزاف ديال الأمراض وكان أيحيد حتى العين الله ينجينة ونجيكم منها، هذا هو السبب لخلاه يتشهر، فين ماكان ايخلاق شي ولد كانوا أيجيو يعبيولوا التراب ديال " سيدي علي كامل" باش مايعينوه ، وحتى منين كيكون شي واحد مريط كانوا أيجيبوا الشماع او لفلوس أيحطهم فالسيد كاو ايهزوا شواي دالتراب من الرحبة ديالو كاو أيمشي يكمسوه فوحد الشرويطا ويعلقوه فالعنق ديال المريظ ومن بعد كان أيجيب الله الشفى، هاد السيد ألحبايب كان فين ما أيشريو الناس شي بغل أو خروف أو عجل من السوق كانوا أيجيو يحطوا الشماع أو لفلوس كاو أيهزوا التراب ويعبوه ويلويواه فالشرويطا ويعلقوه فالعنق داك لخروف أو لعجل أو لبغل باش ما يعينوهشاي.هاد السيد كان أيداوي حتى البهايم والبقار والعلم منين أدمرض. فين ما أدمرط شي نعجة أو بغلة أو بقرة كان أيجي مولها ويعبلها التراب ديال "سيدي علي كامل ويكمسوا فشي دريرة ويعلقولها فالعنق ديالها، ما أدكملشي جوج دالسوايع كاو دجبرة ناظث أدرودي.

هاد السيد ألحبايب كانث فيه واحد الحجرة أداوي على ظهر فاين ما أيكون شي واحد أيحرقوا طهروا كان أيجي ليلا، كان منين كيجي داك الرجل أو لمراة لي مريطة بضهر كان أيخصها ظروري دتكا على داك الحجة، ولكن كانث واحد االمشكلة شحال من وحدة مسكينة كانث أدتقلب ودجي مكرفطا. واحد النهار ألحبايب انا گالس فالقهوة ديالنا راني مزال عقل داك النهار كانث لاربع، جاو وحد التلاثة ديال النسا وحدة مسكينة كانث كبيرة و صحيحة كان الضهر ديالة أيحرقة وجاث باش دتكا على الحجرة ديال " سيدي علي كامل" منين تكاث مسكينة طلعوا رجلاها فالسما ودهود على راسا خباط كاو نوضث العدااااو أعباد الله عتقوا الروح، خرجوا داك الجوج دنسا لي كانوا معها من السيد ماعرفو مساكن اشنوا واقع، منين دارو باش يشوفوا لمرة لكانث معاهم جبروها أدبكي، أيمة راسي أيمة راسي، هودث أنا أنجري نوضنها مسكينة نهشث واحد الشويش كاو قلث لي سير أوليدي القهوة جيب لي نشرب راني ماشي نموث بلعطش، جبتلها شربث وبقاث مسكينة متكية أو منين جاث دنوض ما قدتشاي، وهي عاد أدمشي وحدة مندوك لعيلاث جايث واحد الجحيشة إوا وقفنها وركبنها وشاث بحالة.
هاذ السيد ألحبايب كانوا طفلاث ديال الدوار كل العام أي حنكولوا لحيوط وسقاف ويجروهم، وحتي الرحبة ديالوا كانوا ايزرقوها مرة مرة بزاريق.
اما دابا ألحبايب مابقاث حتى حجة من هاد الشي وكما أدشوفوا السيد ما بقى فيه ما يتشاف، السقاف ديالوا طاح والحيوط حتى هما قول رابوا، وداك الناس لكانوا أيجيو ليلوا شحال هذي نقصوا ، دابا قليل لي بقى أيجي يعبي تراب ديال " سيدي علي كامل. ولكن الحمد لله مزالين الناس ايعرفوه.
تحاتي أحبائي وعلى المودة نلتقي.

توقيع: مراد الشايب

اقرء المزيد

قصيدة حادة

مسا الخير عليكم
يا لمجمعين كلكم
خبار الأمسية جبتالكم
من دار عمي بوشتى نعاودالكم
راهم محتافلين بالنسا خواتاتكم
وقالنا عمي بوشتى نعرض على الرجال خوتكم
المجمع كبير والخير كثير 
كلاو وشربو الما دالبير
وخرجو يشوف الطبيعة الخضرا وازير.
النسا فالغرفة ناشطات ، قالتلم دادة حادة شوفو ابنات اليوم قبل مادعملو هاد الشين وسيدي خليونا نلقيو شي طرح دالغنا ديالنا ونمشيو نوجدو العشا وانتم عملو دبغيتو . قبطت حد البندير وقالت لحدهوم والباتول هاكو بنادركم والصافيا دعاونا بالعراجة اوا وكماصات : 
جيبو السينية والكيسان جدادين 
وتهلاو فهاد الناس جاو بعادين 
جيبو اتاي وعاودو بالقهوة 
هادي دار بوشتى عمرا ما دخوا

دارت شافت فيا جبرتني انطحك . عاجبني الغنا والشطيح ديالا وقالت:
مرحبا بكم يا الشريفات ايا قمر الليل وجيتونا
يجيكم الخير جيتو لعندنا زينتو الملعب علينا
الصافيا وندى وفوزية وام زياد ومروى وسهامات 1 و2 والحاضرات طلقو شي زغارث بفا واحد بحا دكان موصيهم .دادة حادة عجبا الحال التشجيع كاين علاش ما دبينش البراعة ديالا . وكملت :
خليوني نغني ونفرح بهاد النسا
عاد نوض لداك النوالة مكفسا
هذا عيدكم يا لالياتي
فرحو ونشطو وزغرتو بلاتي
ومرحبا بكم يا خواتاتي
نطقت حدهوم قالتلا : الى سمعك عبد السلام والله لهنا ما يعاود يعتب .
جاوباتا دادة حادة وهي قابطة البدير :
عبد السلام يا الفنيدة تستاهل طنوبيل جديدة
بوشتى يا الدرهم دما بغاكش يموت بالهم
اوا بردت دادة حادة على قلبا بالشطيح والرديح وعاد خلات الضيفات ينشطو مع لاشين ومشات هي وجاراتا يطيبو العشا . دابا يعاودنا اخي زياد أنوار التتمة مناين يرجع من المساريا .
-----------------------------------------------
تحية عالية لكل نساء المجموعة كل عام وانتن بصحة وسلامة . وتحية لرجال المجموعة اخواننا الذين يحترموننا .
-----------------------------------------------
دمتم سالمين
وعلى المودة نلتقي.

توقيع: رقية البورقادي

اقرء المزيد

طرائف عمي بوشتى

عمي بوشتى gالس مع عياد فباب الدار مشمشق راسو ولابس الكوسطيم دجاب من فاس، حدهوم مگابلة الفرنة وطاطا حادة محشية فالنوالة أطيب حالميدونة دخرينg، الصافية فالبيث هي وفوزية و أم زياد أيبدلوا حوايجم، الباتول دعلي مرا صبارة ودوقف عليها أدلقي موجاه طلباثا طاطة حادة دجي دعاونا وصلث بحالكموس تحت يبطا وحالسطيل دلحليب فيدا.
الباتول : حادة أحادة،
حادة: أزيد الباتول زيد الحبيبة، سلمث عليها وشدث منا السطل دلحليب : يجيك الخير ألحبيبة ويعطيك صحيحثك أخيتي ، شخبارك وشخبار عروسثك
الباتول :جمع كلشي وقل لاباس واها ألحبيبة ما بقاو عرايساث دربح غي الشخير والنخير وقلث الفايذة وقوث النگير
حادة : إوا لاواه أخيتي بنات اليوم هما هاذوك ماشي بحالنا كنا غي تمارة والدمير والسكاث أنحمدوا الله على جغيمة دالما وكسيرة دالشعير ، ودابا الوقت تبداال أخيتي، نسيثني شخبار داك الدريروين
الباتول :إوا راهم أيخرجوا الجنون ألحبيبة.إوا مبروك للبقيرة والله يدخلا عليكم بزايد الرزق.
خرجوا فوزية وأم زياد والصافية
فوزية للباتول: السلام أخالتي لباس. زادو سلموا على الباتول
الصافية : عيدك مبروك أخالتي الباتول
الباتول :الله يبارك فيك شمن عيد أبنيتي،
نگزث حدهوم مقدام الفرنة: قالك عيد المرا هالنهار ألحبيبة، سلمث عالباتول ، بنات اليوم أيعيشو حياتم هاعيد الحب هاعيد المرا، حنا كنا أنعرفوا غي العيد الصغير والكبير وعاشورا
الباتول : إوا ألحبيبة وقتم هذا، وشكون هالطفلاث معرفتمشي
حادة: هادو صحاباث الصافية جاو البارح وباقين خرين عاد فالطريق الله يجيبم على خير
كنا گالسين أنا وحمو فالعرقوب فوق الدار وحنا نشوفو الطوموبيلاث طالعين فالطريق سمح فيا ودرز للدار يعلمم، تبعتو أنا صبت كلشي برا مالدار وعيناهم عالطريق، عمي بوشتى جا أيجري للدار
بوشتى: كماجيين هاد الناس، والطوموبيلاث رگبوا : هاهما هاه، ودار لحمو : سير أولدي هوذلم داك لحمارة.
جاو الضياف، ألشريف وسي أحمد لزعر وسي إدريس وسي عزيز وسي محمد البوعلايي وخالي أحمد لكروني والشريفاث لالة رقية ولالة سهام وأختي سهام وندى ومروى وشي نسا وشي رجال دالجمعية دلحد الحاصول خيربي عباذ رافذين حالقتة دلورد وشي صيكان مع يداهم والباقي رفذوه فالشواري دلحمار ، استقبلوهم عمي بوشتى والنسا بالزغارث والتصلية عالنبي تعارفوا ودخلوا النسا للبيث والرجال للغرفة، وعطاوهم الفطور خيراث ربي دخرينgو والبيض والسمن جابثو حدهوم لجارثا، والدوارة دلخروف ددبحنا أنا وعمي بوشتى البارح المهم خير ربي موجود.
الرجال فالغرفة فطرنا وكملنا والنسا فالبيث مgابلينهم طاطا حادة والصافية أيرحبوا بهم وأجي دشوف أم زياد وختي سهام معندمشاي مع الماكلة دلعبار دخلوا فحالطبسيل دالدوارة دخلة دالصحاح، أما مروى وللالة سهام دخلوا فحد سيدي طبسيل دخرينgو ويقولولو يامسح وفوزية وندى عطاوها غي للسريط دالبيض والكرون دلقمح وشي سمينة كانث عملولا باح، وحالبريق جا ييناثم دقول تكفح، ولالة رقية بحرا لحقث معاهم حالبويضة بالملح.
يلا عمارث الكرش أدقول للراس غني هايثاك كان الصافية موجذة لبنادر ولاشين، حنا الرجال خرجنا نطلقوا رجلانا ونخضروا عينانا بالطبيعة والنسا عيطوا على مولاي محمد البوزرازي صغبلم لاشين ووراهم كيف يخدموها وخرج، ويعطيوها للشطيح والرديح والنشاط حتى لوقت الغذا، تغدينا وكرمنا عمي بوشتى الله يكرمو، وحدهوم جابثنا حجوج رياباث كانث جامعاهم منهار ساقث الخبر مشي نمشيو عند عمي بوشتى.
من مور الغذا كاين دبغا يمشي وهو يوقف عمي بوشتى قالم : والله من هنا ماهو ماشي واحذ بالله أنا عشية عاد مشي نلقيلكم أطغاس ونقصروا.
دخل عمي بوشتى عند النسا:إوا نهار كبير هذا مرحبا بالشريفاث ومرحبا بكم كاملين وعيدكم مبروك، واخا نتوما فالصراحة ديما معيذين مقضية فينا غي حنا الرجال هههههه، وقلبا معاهم تقشاب. طاطة حادة جمعث مع النسا حالشويش وقاثلم: إوا جمعوا ألحبايب ونشطوا مع راسكم أنا مشي نوض نشوف شغلي
سهام :خالتي غدي تطيبي أدغاس
حادة: أطغاس أبنيتي، وينطلقوا عليها بالطحك
سهام :خالتي بغيت نشوف كي كديرولو
لالة رقية: گفظي على دراعك أخيتي ونوضي للنوالة يلا بغيتي تعرفي
فوزية :خدمي حقك أنا وأم زياد زرقنا الحالات
مروى :كدابا هدا التزراق ديالكم، والله يلا حادگاث
لالة رقية : أييه ليوم دور سهام وسهام نوضو للنوالة
سهام2: هي اللي ما تعاودش
طاطة حادة غي خليكم گالسين مني نبغي نطيب أطغاس نعيطلكم كاملين.
طاطة حادة ناضث لشغلا وهما جبذواالبنادر وبداو أيشطحوا ويغنيوا وسي أحمد لزعر كنكن فلودن دعمي بوشتى: الله يهديك يلا ما قول للشريفة أو الصافية دسجلنا هالغنا.
وصل عمي بوشتى الرسالة ورجع: قالك دابا دسجلوا فوزية ودنشروا فالمجموعة.
هدا غي نص نهار عند عمي بوشتى بمناسبة عيد المرأة الذي تزامن وأطغاس دلبقرة، حتى نحكيلكم النص الثاني، نخليكم في أمان الله
وعلى المودة نتقاشعوا.

توقيع: أنوار زياد

اقرء المزيد

قصيدة عن يوم المرأة العالمي

النسا يا النسا
بانو فهاذ العرسة
واجيو نديرو شي كلسة
تحضر العكوزة والعروسة
السليفة واللوسة

نديرو كلسة مع الحباب 
نتجمعو ونقرقبو الناب
ياك غير الخوت والحباب 
الكلام المتول بالادب
ننساو تمارة والعذاب

اليوم راه عيدنا 
القانون فيدنا
نديرو لي بغينا 
ياك الرئيسة منا 
وهكا الخاطر غيتهنا

انا ما تشرطو عليا 
غير نتكلف بالصينية
ودكون هاذيك هيا
ما تخفاكم خافية
التسول هما مالين المزية

نضويو هاذ المكان 
وفي بعضاتنا نقراو الامان
نتفكرو لي كان وكان
طرائف واحداث ايام زمان

عمي بوشتى بدادة حادة محتافل
وحتى هي موجدا السفنج والقراشل
اما حمو على ختو الصافيا ما غافل
موجد ليها الكادو وفيها ايجامل
وهي غي الجثة حاضرة والعقل هامل

تفكرت اليوم العيد 
وهي كتخمم بعيد 
ما بيها لا كادو ولا فانيد 
كتقلب فعلبة البريد 
واش فيها شي جديد

بدا يقصار ليها العمر 
وهي فداك اطفل كتفكر
وهو دقول صرطو البحر
غاب وما بقى بان ولا ظهر
ونسى حتى القبيلة والدوار

اش هاذ المكتاب عليها سلط
ما بقات قادا دعجن ولا دمخط
لي شافو يقولو بان اداك المهيبط
عمي بوشتى راه عليك ماشي يخلط
وديك الساعة بقا ادور فعيناك وادتحبط

توقيع: ندى بيلا

اقرء المزيد

عمي بوشتى وعيد المرأة

السلام عليكم مجمع الكرام والصلاة والسلام على خير الانام .

رجع عمي بوشتى للدار حامل حالقتة دبلعمان.

دادة حادة: كحشيت الربيع للبقرة ابوشتى.؟
عمي بوشتى: ايما الحبيبة على حولا معبي يانا . آلالة حادة هذا ماشي ربيع هذا ورد احمر جيبتو ليلك لحقاش عزيزة عليا.
دادة حادة : سير طحك على راسك زعما يانا غشمية وما انعرفشاي بلعمان.كما صيبت ما دجيبلي.قالو لك انا خصني شي ورد.
عمي بوشتى : ياك البارح قالو فالاخبار بلي هذا النهار عيد المراة وشوفتم مستفين حالبلعا دالورد بحا هداك دشوفنا فالعرس دخاين نوال وسقسيت بنتي الصافيا الله يرضي عليها وقالتلي غدا عيد المرا وكل راجل ايعبي الورد لمرا دي عزيزا عليه. وانا انت هي المرا دي عزيزا عليا وانبغيك وجبتلك هاد الوريدات .عوريطك لما قبطم مني .
دادة حادة : يا هاد الراجل انا انعرفك بعقلك سعا دابا ظهرلي ماشي دحماق .انت عارف عندنا غا جوج عياد : العيد الصغير والعيد الكبير لاش ادقلي عيد المرا .فوقاش هاد المرا طحا عند باباها العيد ؟ ادطحك عليا.
عمي بوشتى : يا ودي راني عارف غا بغيتك دفرح بحا النسا دالمدينة .عاقلا داك النهار فالعرس دخاين نوال مناين مشيث للكوفورة طحيث حسن منم .ودابا انا جبتلك هاد الوريدات وقولت نgوزو النهار بلا نgير .
دادة حادة : الحمد لله انا ديما فرحانة الى كنث بصحيحتي وراجلي ولادي لاباس . والى بغيث دتهلا فيا جيبلي الحلاقات .ياك ايقولو: يام الربيع جات ايا ايا وانا بلا حلاقات ايا ايا. عمي بوشتى : ولايني راك ما ساهلاشاي يا هاد البلا خاصكك غادخرج مني الفلوس وصافي . هاد الوريدات ما عجبوكشاي وانا طربت فيهم تمارة وحشيتم ليلك.
دادة حادة : وشني ماشي دلقي بالفلوس الى ما دكسيشي بهم مراتك وراسك وولادك.ياك باقية عندك الفلوس دجيبت من فاس. وهاد الربيع الربيع سير نزلو فالمدود للبقرة دعبي منا الاجر وحتى حمو راك هنيتو من حشان الربيع.
عمي بوشتى: ياك يام الربيع باقية ما دخلت حتى 21 مارس وداك الساعة دشوفني شني ماشي نلقي ودابا قبط مني غا هاد الوريدة باش دعرف شحال عزيزة عليا.
دادة حادة: والله عليا لا طحكت انا نقبطا وانت دتقبط فيا بالمعيار . راني معاشراك وعارفاك خاصك غا السبة .سير دغيا رميه فالمدود للبقرة راها فيها بهيوف.
عمي بوشتى : اوا مكدبوشاي مناين قالو المرا خرجت من ضلعة عوجة .داكشي علاش انت ديما عوجا .
دادة حادة : اوا ياهاد الراجل نعل عليك الشيطان اش هاد الهدرة ادقول راها الى عواجت الضلعة غا باش ددرق دواخلك الرطبة. لو كان ما الضلعة العوجة وكان راها الكبدة والرية والقلب ديالك مشاو شناتف.
عمي بوشتى : ايهاي على حادة طحاتنا بوعروف . والحاصول نمشي نرمي هاد بلعمان للبقرة نعبي منا الاجر.
دامت لنا الابتسامة ودمتم سالمين.

توقيع: رقية البورقادي

اقرء المزيد

طرائف عمي بوشتى

طاطا حادة gالسة فالدكانة أدقصص حالقفة دلبقول عاد غسلاثم فالسهب تحت الدار ،حالعتوقة مشغباها عياث دشيشا وهي أدرجعلا للميدونة دشتثلا البقول مقصين ، مأدرفذ غي السباط ديالا رافذ قفة دالتراب كيف غسلث به البقول فالسهب تحت الدار ودجبذ عليها جابثا أدفركل ، جاث دنوض ليلا ما قدث وبقاث أدعيط على الصافية :الصافية ألصافية جري جري جري لهالفلوسة أدموث ، الصافية رادا البرمة عالكانون جاث أطير : شني شني أيما ، أويلي مال هاد لحليق عاونيث.
حادة : تكالا على فاها وعلى تحت شوالا باش درجع فيها الروح بنت ليهوذية لخرى أنا أنقولا شوش وهي أدغانني.
الصاغية رافذا العتوقة عتاكيالا على فاها كيف قاثلا يماها : نعملا الإسعافات الأولية زعما أنا الوقاية المدنية.
حادة : شني هي هالسعافاث أو كيف قلتلا مناي أدجيب هاد الهدور ألمخرورة.
الصافية :الإسعافاث أيما الإسعافات الأولية لياه موريثكشاي داك الفيديو دلقاو الناس داك الجمعية داك النهار مني كان داك الفرملي دقلتلي غي أيشوفك فالطبيب أيدرز يحبلك راسك ويدخلك نتي اللولة ، داك الشي دكان أيلقي لداك الدري مني كان أيورينا كيف نعملوا لشي واحذ يلا عمل شي كسيدة أو تجرح طاح مشي زيتونة هذيك هي الإسعافاث، والوقاية المدنية هما هادوك دعندم داك لابلانص حمرة وهاذوك دأيطفيو العافية.
حادة: شوفتم أبنيتي عندم الكسوة بحالبوليس صبناهم داك المرة مني هوذنا لفاس أيرفذو حد مول الطونوبيل عمل كسيدة فالطريق.
حدهوم حتى رgبث مأغارب دالغرفة: أخير أحادة شكون أخيتي هذا دعمل كسيدة عاونيث.
الصافية: خير أخااثي حدهوم نتينا ديما أدسمع الهدرة غي مالتالي وأدهدر ، حنا كنا أنهدرو على لابيلانص دأدرفذ الناس دأيعملوا الكسايد فالطريق. حدهوم :خيااار ، وgلسث قدام حادة: الخيراث دربي هالبقول أيشهيو أحادة، والله أبنت لجواذ ما قديث نمشي نلقط حاللهوة، صبحت مgزرة مطهري ، البارح مشيث نربط داك العجل كان أيسرس يماه وبليهوذ لاخور مجهذ نتر مني ويجيبني منفوطة على طهري كان ماشي يفصصني.
حادة: أجارثي لحبيبة هالبقول هنايا غي يفورو نسردلك حاللهوة وخلي حتى لغدا نهودو أنا وياك لجيث الواد تما الخير دلبقول خاصني نسرد حالشويش لسي أحمد دالحاج الهادي بحينا شافثو الصافية فالتريفو قالك مشي يخرجو فيه.
حدهوم إوا دعمل مزية حتى أنا نوجذلوا حالريابة ونسردالو مع البقول. وما حتى داك البقول دلمذينة بحال أياكل التراب.
حادة : أخيتي حنا لبقول ديالنا مخلطين ونقيين ، هالgرنينة هامشيطة ،خبز غراب ، السلك البسباس ها حمايط.......
حدهوم : اخيتي طراف داك السوطة ديالنا دالواد كاين شي خير دالgرنينة كغي سردت حمو يجيب حالشواي زيدو مع هالبقول. حادة: gرنينة جبت قفة مداك لموارذ دالسهب ، أبحال لخرشيف غي شافا بوشتى قالي هاذي خليهانا حتى نجيبوا اللحم وعملنا بها شي طاجين راني فاي غسلتا وسرمتا وحيذتا.
حدهوم أدغزز فحمايطة: أييه حقا لاي مشى بوشتى شفت الدهير ديالو مقطوع.
بوشتى: السلااام عليكم، هانا أحدهوم هانا قلت زعما نغبر حالشواي نتهنا مالتولهيص ديالك سعا أيهاه، دما أنصيبك قدامي بحا كرشي.
حادة: إوا جارثك أخيي والمرا دولد عمك ماعندك برو منا مدبرا منك.
بوشتى:أيييه جارثي والله يدوما جورا الحمد لله، شاف حدهوم أدمضغ ودار عند الصافية واقفة فباب الدار: أجي أبنتي هوذ طاطاك حدهوم دقلا فداك تاورة مشي دكملنا هاللهوة دلبقول، ههههه، وتماطا قبو جبذ حالميكة فيها اللحم طرحا قدام حادة: هاللحيمة خضرانا بgرنينة للعشا الله يهديك ألمرا.
حادة : مناي جبت هاللحم.
بوشتى: أودي هاذيك الوزيعة محالبقرة دمحند الحاج أحمذ نفخا النفل كانث ماشي دطرطق ودبحا. حدهوم : أربي مسكين الله يكون فعوان حليمة دعامر مسكينة ترزاث فالبقيرة ديالا.
بوشتى: حليمة دعامر هي دفركث فيها الزرقة، والله أودي يلا بقا فيا الزغيبي واخا مامخصوصشاي، بقرة مراهاشي رخيوصة الله يخلفلو ما ضاع وصافي. حدهوم : وعياذ كان تما.
بوشتى : كان تما وما وزعشاي قالك أسيدي حدهوم مأدكلوشاي اللحم دالرزية.
حدهوم بقاث أدبحصص فعيناها وطيحوها لارياح وبقاث أدزgي : اللحم اللحم اللحم اللحم ، ناضث طاطا حادة أدجري دجيب البصلة دشمالا والصافية مشاث دجيب الريحة وعمي بوشتى درز للميكة دلحم وجبذ حالجلدة وحشاها لحدهوم ففاها سرطاثا بحا بيبي وزادا وحدة أخرى. حادة : أشني أدلقي المدعوي ماشي دجيف لمرا أو يقثلا داك اللحم فكرشا.
: بوشتى : هاذي عندا المعدة دالزرقان ما يقر فيها حتى حاجة. شمو لحدهوم البصلة ورشوها بالريحة فاقث وعياذ سمع الزgا ديالا جا أيجري. وقلبوها قشابة على حدهوم.
عياذ : نوض سير للدار مشي يدخلوا القطوط يهربوا بداك اللحيمة ويخليونا مفنكين.
الصافية : أبابا كيف وقع لهالبقرة وكيف أدعملوا دوزعوها.
بوشتى : أبنيتي ديعول عالدراري دليوم، هاذاك داك الغزال دولد محند الحاج أحمذ، مشا طولا فالعرصة دالواذ وفيها غي النفل كلاث بزاف ونفخا كانث مشي دموث وذبحا.
حادة: أويلي وكشربولا غي التراب مسوس.
حدهوم مزالة واقفة راخيا وذناها: لا أجارثي كلامك هو الكبير مأيشربولمشاي التراب من طرف خاص بياطة البيطة، أو كشربولا غي الزيث الرومية.
حادة: أنا داك العام مني تشترث داك النعجة العربية دكانث عندنا بالفوراج شربلا عبسلام غي حالبطة دلموناضة الكحلا وهزلث فالبلاصة.
الصافية : إواهاذيك وهي الإسعافات أيما، (دارث جيث باباها) كان وكيف أدوزعوها.
بوشتى : منى أيطيح شي قضا على شي واحذ فالكسب ديالو ويحلل شي بقرة أو عجل أو.. أيعلم الجماعة وأنرفذوا داك الزرية للجامع أو فالدار دمولاها، أنسلخوها ونخليو الربجة بوحدا. قاطعاثو الصافية: شني هي الربجة
: بوشتى: الربجة أبنيتي هي الدوارة والراس، هاذوك أيزايدو عليهم الجماعة وأيعبيهم دعطا فيهم التمن بزاف، واللحم أيقطعوه شي جوج معلمين طروفة مقادين، وأنقيدوا شحال من راس عندنا فالجماعة وأنقسموا داك اللحم بالgراعي على قد الريوس، ولفقيه دالجامع ويلا كان شي واحذ غايب مسافر أو شي واخذ محتث ماعندو باش يخلص الgرعة ديالو، أنعملولم الgراعي ديالم ومأنحسبوهمشاي فالخلاص، إوا أنعملوا التمن لداك الرزية، غي أنعاونوا واها مكاين بو تمن، ونحسبوا شحال جاث للgرعة، سعا كاين شي وحدين أياكلوا الحلوف مخنافروا غي أيعبيو والخلاص بحتى.
عياد: وهذاك تمن بعدا دلقاو لداك البقرة، أنا بعدا كانوا أيمعكوني على البشير البقرة دجيب منيول ونص وهو قالك لقيولا ستين ألف ريال60000، ومني قلتلم نتينا عملولا ميا وربعين140000 بقا أيحمط ودار لعند الطاهير قالوا كسالشي دم خيربي مني ذبحوها بغا يلقينا اللولة سعا عجبتني فيه بداك الهدرة ردمتوا. الصافية: وشحال لقاولا.
بوشتى : غي ميا أبنتي ومصاب يشد حالتمانين80، والربجة عباها عبداللطيف دبومعاز بالله وباطل، شني هي عشرين ألف ريال.
عياذ :إوا هو gزار عندو فاي يسلكا هاذاك بعدا عاون مزيان زاد ربعالاف لمحند الحاج، وحتى نتينا شفتك كمستلوا شي باراكة شحال زدتو.
بوشتى : ياك أنقولك أعياذ دلله لادبقاشي دسقصي عليها مسمعتشاي لفقيه شني كان أيحدث داك الليلة فأطغاس دمحند علي دإدريس.
نخليو عمي بوشتى وعياذ يتهاودو ونخليكم في أمان الله.
وعلى المودة نتقاشعوا.

توقيع: أنوار زياد

اقرء المزيد