التسولي والغياتي والبقرة

السلام عليكم ورحمة الله وبركاته.في الحقيقة هذه أول مرة أنشر فيهاحادثةواقعية جرت ثمانينياتالقرن الماضي وأتمنى أن أوفق في سردها وقبلو عليا:كان واحد ولد عمتي كيبيع الزنك والحديد والمسامير في الأسواق الأسبوعية ديال المنطقة واحد نهار ثلاث دوادي امليل.واحد الغياثي شرى بقرة من السوق لونها اسود وجابها حدا ولد عمثي وقالو يحطيها معاه على ما يتقضى خضيرة ولحيمة وكل لوازم البيت الاسبوعية من المواد الغذائية المهم الغياثي تعطل شوية ولد عمثي قبط واحد السلك كحل وزم بيه فم البقرة مكيبانش. معاه واحد لفقيه تولي قالو هاد نهار غدي ندبر عليك فشي مصيريف انت غير سير لهيه وقف جا الغياثي لقا البقرة ديالو غدي طرطق قال لولد عمثي مال هاد البقرة منفوخة وانا شريتها مافيها والو قلو الله أعلم ولكن سير شوفلا شي فقيه يقرى عليها شي بركة قلو وفين هو هاد الفقيه قالو راه لهيه سير عندو ودوي معاه جا لفقيه بدا يقرى على البقرة ومنين سلا جر معاه مول البقرة حتى بعدو شوية على المكان.جا ولدعمثي زول داك السلك للي كان دايرو فم البقرة وهي ترجع كيف كانت المرة لولى مافيها حتى حاجة الغياثي رجع لقا البقرة ديالو برات ما فبها حتى حاجة قال لولد عمثي والله هاد لفقيه ماعندي ما يتسالو وخلاص قالو وشحال عطيتيه بعدا قالو عطيتو ربعمية ريال قالو حشوما عليك اصاحبي واش البقرة كانت مشي دموث وهو دواهالك سير تبعو كملو الف ريال بعدا مشا الغياثي ايجري حتى صاب لفقيه وعطاه للي قلو مول الزنك وطلب منو المسامحة ورجع لفقيه عند مول الزنك وبغا يقسم معاه داك البركة فرفض ولد عمثي وقلو غير بالصحة.

حتى نلتقي مع فعلة اخرىمن ولد عمثي. للإشارةفالحادثة وقعت صدفة مع الغياثي وليس انتقاصا من غياثة أو ماشابه ذلك إن اخوالي من غياثة أيضا.

توقيع: عبد الرحمان حويط

اقرء المزيد

انتقام تسولي

السلام عليكم ورحمة الله وبركاته. مرة أخرى اعود معكم إلى فعايل ولد عمثي:واحدالنهارولد عمثي سافر لفاس هو واحدالقروي نسبة لقراوة بقاو مجموعين شي يومين إلا أن القروي بغا يرجع فحالو لتول وخلا ولد عمثي في لمدينة وتلاقا مع ولد ولد عمثي سقساه على باه قلو القروي شوف اولدي ما عندي مانخبع عليك باك راه فالحبس شدوه مشفر شي حاجة ودبا راه عند البوليس مشا دري لدارهم وقال ليماه واعمامو العائلة تخلعت عليه فقررت مراتو واحد خوه يزوروه فاس لقاوه عند ختو ما وقع لو تا حاجة من داك شي للي قلم القروي ورجعو فحالهم للحد فرحانين.

 gازت شي شهرين حتى نسى لقروي لكذبة ديالو فجات واد لحيلة لولد عمثي ينتقم بها فطلب مشي عشرين دليشاشرة يمشيو معاه لواحد العرس وطلب من ختو تمثل دور لعروسة وكلشي على حسابو فتعاقد مع الغياطة والطبالة باش يدولو واحد لعروسة لقراوة حتى منين قربو لدار القروي طلب من الغياطة والطبالة يضربو مزيان حتى دخلو لوسط دار داك القروي. فاندهش القروي ومراتو ولادو وسولو باهم شني هاد شي فنطق ولد عمثي وقالهم واش مفخباركمش باكم تزوج وهاذى هي مراتو فبداو كيغوتو ويبكيو حتى كانو مشي يخنقوه ويزهقلو روحو وهو داك ساعة عاد فطن لراسو وعرف بأن هاذا الانتقام من ولد عمثي. حتى نلتقي مرة أخرى.

توقيع: عبد الرحيم حويط

اقرء المزيد

التوائل 26

عمي بوشتى صلى التراويح ورجع هو وعياد تلاقاو حدهوم فالباب

حدهوم : كاما جبت خبر لحمو أبوشتى شني وقعلو
بوشتى : مالو شني وقعلو ؟
حدهوم : مشى قلك يلعب الكورة وقرطوه الدراري وراه دابا فالحالة مسرد ورجلو مشلوخة
دخل عمي بوشتى أيسبك وتبعو عياد صابو حادة أدويلل غي باحدا فالمراح دخلو للسطيحة صابو حمو ايزgي والصافية ادمسدلو بشواي دالزيت غي شافو فداك الحالة وزاد كمل عليه بالمعيور ما خلالوشاي بقى غي الضرب ما ضربوش
حادة : كا أنعاينوك دجي درفد الدري دعبيه للطبيب ونتينا أدهد عليه كا عندك شي مخ كاما دكسابوشاي
بوشتى : خليتولي شي مخ نتوما يا الgنس دبورباح ، لقاها بلعاني بليهوذي لاخور باش ما يخدم معايا الصيف
عياد : نعل الشيطان أبوشتى كا الدري مقروط وايزgي بالعاداو ونتينا أدقلو لقاها بلعاني . نعل الشيطان ويالاه نوض نعبيواه عند مولاي ادريس الشريف الجبار يلقيلو الجبيرة أو نعيطولو يجي لعندنا لهنا
بوشتى : ومناين غا نجيبو النمرة ديالو ؟ كا عندك نتينا مقيدا ؟
الصافية : عاين أبا نعيط للشريفة روقية هي دعطيهالي راه خالها
عيطات الصافية للشريفة واجباتا قالتلا الشريف الجبار موحال واش يقد يجي عندكوم حقاش عاد لقى العملية وراه مريط ، المهم ناض عمي بوشتى يبردع الحمارة باش يعبيه للطبيب كا والصافية تفكرات خالتا السعدية ففاس وهي دعيطلا قالتلا حمو كان ايلعب الكورة وتهرس من رجلو ردات عليها قالتلا غي خليواه تما هاهو أشرف مشي يجي موراه دابا بالطونوبيل ويجيبو لهنايا للكلينيك يداوا .
جا أشرف وعبا حمو للكلينيك ولقاولو العملية و تكلف بوجمعة بكلشي .
تعاون عمي بوشتى هو وعياد على داك الصيف جمعوه بقالو غي التوقاف دالتبن أيعاين حتى يجي عبسلام حيت هو مول الاختصاص .
عمي بوشتى فرش فالدكانة وأيعاين البريق دالقهوة كا وعياد وحدهوم خالطين عليه
عياد : مسى الخير أبوشتى
بوشتى : غي قلي داك الخنافر ديالك كا دالسلوgي كا داش ، أنا أيصيرلي العجب ، واش أعباد الله فاين ما نلقي البريق دالقهوة فوق البوطة أنصيبك واقف حدايا بحال الخيال
عياد : قلي مرحبا بيك أولد عمي لحبيب ولهلا يخطيك عليا . موركلي مع راسك ومسرد فالدكانة ايطرب فيك البرد كا ما كنتشي يانا كاراك باقي أطرب المنجل على قلبك .
حدهوم سمحت فيهم ودخلت صابت حادة فالمطهرة أدسرم راسا (أدخسل) غي رgبت عليها ودخلت للسطيحة عند الصافية
حدهوم : شني أ الصافية ، ما نصيبشاي عندكوم شواي دالكحول و السواك وشي شويش دكريم ليبيا ؟
الصافية : نضبر عليك أخالتي حدهوم غي قلي لاين قابطة
حدهوم : أودي راني معروضة عند خاي فلارباع دبني لنت مشي يلقي العرس لبهيجة بنتو
الصافية : عايني نجبد الصاك ونشوف شني عندي فيه ، والسواك حتى دخرج يما من المطاهرة هي اللي دعطيهالك
حدهوم : وما دعطينيشي حتى داك الصاك نعبيه أنا ديالي تقطعولو ودناه وتبgطط من الفا ديالو والسنسلة ما بقاتشاي ادبغي تبلع
الصافية : عبيه أ خالتي غي حاولي عليه ، هدا عاد جابولي عبد الحق فالتفكيرة دالعيد الكبير باقية ما مشيت بيه حتى لموطع
حدهوم : وعوريطك لما قول ليماك دعيرلي حتى داك التكشيطة الصفرا دي جابت من فاس ، هي والحزامة ديالا أنا حشمت نقولالا
الصافية : دابا نقولالا صافي غي سير دابا دشرب القهوة معاهم
حدهوم : الله يعطيك الرضى أ بنت نوطتي والله يكمل عليك بالخير حتى نتينا مع داك ولد الناس
الصافية سمعت يماها ادعيط من المطاهرة ومشات عندا أدسبك
حادة : جيب معاك الصابون واجي حكلي طهري دغيا نخرج فحالي قلبتلي راسي بالتقرقير هاد المصيبة دهاد قرقارة بنت ليهوذية ما عرفتاشي مناين خرجت
الصافية : طحكتني أيما كا طحيت أدخاف من قرقارة ؟
هاني نجيب شواي دالملحة ندريهالا فوق طهرا ونهنيك منا .
الصافية : كا أدخسل شعرك بالتيد أيما ؟ كا الشانبان والو ؟
حادة : ايوا قولا لباك هو دي طحا ايجيب غي التيد قالك فيه التعبقة دالتيريفو
الصافية : ايه فيه التعبقة ولايني غي دأورونج موشاي اتصالات
حادة : حك حك وسكت شواي من الهدرة ، كانت يماك مقابلا شعرا مناين كانت صغيرة والسالف قداش ، كان باباك ديما ايجيبلي داك القرعة داليطرو دالشانبان كديم وكان الشعر ديالي ديما ايشرق
الصافية : ايما كا ما أيحرقكشاي الحكان بهاد الحجرة ياك شراتلك خالتي داك النهار الكيس
حادة : أنا ما انعرفشاي نحك بيه ، ولفت نحك بالحجرة راني باقية انحك بيها
دادا حادة كملات الدوش ديالا ولبست حوايجا وخرجت صابتم مجموعين فالدكانة أيتعوفو .
حادة : أ خير عليكوم ، لاين ماشيا أ حدهوم سمعتك أدقول للصافية العرس ما العرس
حدهوم : عرضلي خاي للعرس دبنتو وجيت طلبت للصافية الصاك
بوشتى : ولاش نتينا هاد الصاك ، ياك مولفة ديما أدعبي شراوطك مرزومين فاللحافة
الصافية : مشى داك الزمان أبا . دابا العيالات فالعروبية طحاو ايتعاندو مع صحاب المدينة والله ما كنتي مقومة لا مشيتي لشي موطع
عياد : وفايناهو الصاك ديالك ياك عاد فالسبوع دحمو شريتولك وباقي ما كملتو حتى بالخلاص
حدهوم : الصاك ديالي تبقطط كامل دقول كلاواه الفيران راني رقعتو وعوالا نلقي فيه الكتوب العام الماجية مناين دبدا القراية ، راني تسجلت فداك نحو الأمية عند السي حمزة
بوشتى : كاخ كاخ كاخ كا مشي دقرا أحدهوم حتى نتينا ودقبط الوضيف ؟
حدهوم : ما نقبط بو وضيف لا طحكشاي عليا أبوشتى ، عوالين غي نتعلمو نقلعو الحروف ونقراو شواي دالقرقان ونتعلمو لحساب نعرفو بعدا حتى النوامر دالطوبيس
بوشتى : دقلع النوامر دالطوبيس دقول ساكنالي فمولاي ادريس
حادة : إيوا سمع أبوشتى ، ها هي بو فراكح دحدهوم العام الماجية مشي دخل دقرا ويانا صغر منا ما خليتنيشي
حدهوم : لياه غي يانا بوفراكح انتينا زعما عندك الرجلاين دالحمامة
الصافية : ملي خالتي حدهوم مشي ددخل دقرا حتى نتي سيري معاها أ يما ما فيها باس وحتى با ما يقول والو وحتى يانا مشي نمشي معاكوم ايلا خلاني عبد الحق
حدهوم : راهم العيالات كاملين قالو يتسجلو مشي دبقا غي عيشة قلك عوالة دلقي العملية على عيناها فيهم الجلالة
بوشتى : إيوا ألالة نgوزو العرس دعبسلام ومن تم ليهن يحن الله .
هوما gالسين و موحند دالتوهامي مول السيكانز حتى خلط عليهم
طوط طوط طوط . أ رواحو
بوشتى : لاين ؟
محند : يالاهو معايا للحد دتفرجو فالكورة راه هاد النهار لاعب المغريب
عياد : دعبينا ودجيبنا ؟
محند : ولياه مشي نسمح فيكوم ، يالاهو معايا راكوم عزازين و فالمرتبة دالواليد
بوشتى : وقيلا نمشيو معاه بحرا نجيب معايا شي صوالح شحال هادي ما هودت للفيلاج ملي بدا الصيف .
ناضو مشاو معاه ، وصلو للقهوة صابو حمو حتى هو أيتفرج والعكاز ديالو حداه . قبطو موطعم وبداو يتفرجو .
بوشتى : معامن لاعب المغريب ؟
محند : مع الكوط ديفوار أ عمي بوشتى
بوشتى : ومناين هوم هاد القطوط دالدوار عاوث ؟
العزيز دحميدة : الكوت ديفوار أعمي هي ساحل العاج
بوشتى : الزاهي دالحاج ؟ أنا ما عمري سمعت ها اللسم ، ألاطيف وما قواو دالبلدان ، داك النهار لعبو مع النم دليبيا ودابا مع هادو دي قلت
حمو : وا ناميبيا أبا ناميبيا
عياد : وسمعت فالترفازة البارح مشي دلعب حتى داك غينيا بيصار هي وتانغدة
محند : ههههه زوينة هاد تانغدة والله يا انت يا علام أ عمي عياد ، هاديك سميتا أوغندا موشي تانغدة
بوشتى : سكت أعياد نتينا ما أدعرفشاي فالكورة سكت ، كيف لاقيا هاد غينيا بيصار عونيث
محند : هدا كاس افريقيا أ عمي بوشتى مشاركين شلا دول من إفريقيا . سكتو دابا ها هوما بداو
عمي بوشتى : شوف شوف شحال طوالين تبارك الله غي داك الحيبور دي ايقولولو بوصوفة هو دي فيهم قليول دقول ما ايكلشاي الخبز
عياد : وهاد زرق العيناين دهاد المدريب ديما بهاد القميدجة بيطة دقول عندو غي هي
المهم عمي بوشتى وعياد دارو فيها محللين ديال بين سبور
عمي بوشتى : والله يا شطحوهم هاد البالاواث اييييه يا ودي ايه
عياد : والله ما نويتم يغلبو هاد الgناطح هادو شوف شوف أهاه غي الحلوف لخاه
بوشتى : باقي عاد يدخل الدري دبنشرقي ودشوف اللعب كي لاقي
عياد : وفيواخ مشي يلعبو مع داك الفرقة دي ايقولولا البارصا ؟
القهوة كاملة سمعت الهضرة دعياد وبداو يطحكو
محند دالتهامي : وا العادااااو . ملي وصلنا حتى للبارصا صافي ههههه والله يا شبعتوني طحك ما عندي ما يسالكوم فاجيتو عليا هاد النهار
المهم بقاو هيثاك غي الفهايمي لخاه حتى سالا الماتش وتمو خارجين وهو يبانلم عبسلام يالاه اينزل من السريع هاز حاد الصاك على كتفو و لاقي حتى هو شي نضاضر كوحل على عيناه و جبد ألف ريال من البزطام خلص مول السريع وايعاين الصرف ولاقي التيليفون على ودناه وأيهضر ، مشاو عندو وسلمو عليه .
بوشتى : كا هادو رجلاك ؟
عبسلام : عاد أبا والله يا عاد نزلني الكار فواد امليل وقبطت السريع نيشان للحد
بوشتى : ومعامن كث أدهضر ؟
عبسلام : غي مع الطاشرون معامن خدام سالينالو الخدمة و ما كانوشاي عندو الفلوس باش يخلصنا ودابا عاد عيطلي قلي راني سبقتك انتينا اللول وصردتلك الفلوس فداك وينسطون يونيو
بوشتى : وشني هيا عاوث هاد خوي السطر ديونيو
عبسلام : حتى هي بحا البوسطا ايصردو فيها الفلوس
بوشتى : خيار ، إيوا عاينوني نمشي نجيب شي صوالح من الحانوث ونطلعو كاملين مع محند دالتهامي راه ايعاينا فالقهوة
المهم ركبو فالسيكانز ورجعو للدار ، دادا حادة شحال فرحت مناين جا عبسلام (الله يسمحلينا من الوالدين)
وفالصباح ناض عبسلام هود للحد باش يجيب الفلوس ، قالولو خصك لاكارط ، جبد البزطام ، دور على لاكارط ما صاباشاي ، دور فجيابو كاملين وهو عاد يتفكر بلي خلاها عند مول الحانوت فوجدة كان ايكريدي عليه وقابطلو لاكارط حتى يخلص الكريدي اللي عليه
نخليو عبسلام ايتفقص وأيفكر شني يلقي فهاد الحريرة وإلى اللقاء في الحلقة المقبلة بحول الله
دامت لكم البسمة.

توقيع: عزيز البورقادي.

اقرء المزيد

التوائل 27

عبسلام بقى مبهوط غي ايدور فداك العيناين وما عرف ما يلقي ، كا وهو يبانلو السريع ركب فيه حتى لواد أمليل ومن تما قبط الكار لوجدة .

حمو عندو غدا الرانديفو دالطبيب باش يزول الكبص والصافية عيطاتلا السعدية خالتا قالتلا أجي مع خاك تكلسي معانا واحد السيمانة تبدلي الجو .
حدهوم وعياد مشاو فالصباح بكري لبني لنت عند خاها باش دحضر للعرس دبهيجة بنتو ، عبات الحوايج دي عطاتا الصافية وحادة ومشات وهي أدوصيهم على الدار وعلى داك الفراخ دبيبي والدجاج .
حمو ناض وجد راسو والصافية حتى هي باش مشي يسافرو لفاس
حادة : ومناين مشي دمشي لفاس لاش عطيت صاكك باقي جديد لداك بونيابر دحدهوم ؟
الصافية : أيما ما كانشاي على بالي السفر وزايدون ما عليش ، مشي نعبي فيدي غي البزطام
حادة : وبعدا قلتا لعبد الحق أو لا ؟
الصافية : راني قلتالو قلي ما عليش غي سير
بوشتى : مشي دبقاو تما ادتفتفو حتى دحمى الشمش ويطلع النهار والمركوب عليه الدحاس ، إيوا هاني فاي قلتالكوم
حادة : كون ما هاد العرس دعبسلام والله حتى يانا كامشيت معاكوم
بوشتى : ياك عاد عبيتك بقيت أدسارا ثما حتى قطعت الصباط ، كا حنا مشي نخدمو غي على الكيران
عمي بوشتى ركب حمو على الحمارة وهود معاهم للحد ، ركبم فالسريع لواد امليل وقبطو الكار لفاس . المهم ملي وصلو لباب فتوح الصافية جبدت التيليفون و هضرت مع خالتا السعدية باش دلاقيهم جاوباتا قالتلا هاهو أشرف ماجي موراكوم بالطونوبيل غي عاينوه تما . هي سالات الهضرة وهوما gازو حاد الجوج مشرملين بالموطور وخطفولا داك التيليفون وخلاوها أدفنك ، مسكينة ما عرفت باش تبلات ، الشفارا هربو وخلاوهم ايطيرو وينزلو هي وحمو .
عمي بوشتى تم راجع ومشى للحانوت رفد شي صوالح وشرا لحادة حا القابسة دالمسكة وطلع فحالو .
حادة : كا مشاو
بوشتى : مشاو
فالعشية عمي بوشتى فرش فالدكانة وحادة وجدت القهوة وخرجاتا وكلسو كيف العادة
بوشتى : الله الله على راحة تهنيت هاد النهار من داك بوسربوب دحدهوم وداك بوخنافر دعياد
حادة شربت كاسا دالقهوة ولقات المسكة ففاها وبدات ادمشتق
بوشتى : شني لقاو حقا فداك المسلسل دفريدة يانا ما تفرجتشاي البارح
حادة : سالاو . البارح كان التالي ، كانت هنايا حدهوم والله يا شبعنا بكا يانا وياها
بوشتى : لياه شني طرا ؟
حادة : داك المسخوطة دكيف أيقولولا رمات راسا من السطح وماتت
بوشتى : شكون فيهم ؟
حادة : ما نعرف داك الزعرا تلفلي اللسم ديالا
بوشتى : المساخط ما قلنا بدينا نحفطو اللسوما ديالم وهوما يساليو
حادة : دابا يجيبو خور . خلينا دابا من شي فريدة ، كا ما عجباتكشاي هاد الكلسة فالدكانة غي يانا وياك فاصافاص
بوشتى : والله ايلا يا بصاح ، بعدا مشي نشرب القهوة ديالي فخاطري ونكمي حا الكارو و نرد المجاج
حادة ادشوف فبوشتى وهو أيكمي ، دار حيتا صابا أدشوف فيه
بوشتى : مالك ادبحصص كا ما عمرك شتني ؟
حادة : ولياه مانشوفشاي فيك ، فيمن بغيتني نشوف
بوشتى : هاهاهاها . شني باقي فيا ما دشوف ، شرفت وبديت نتهركم أحادة
حادة : أنا بعدا ادجيني ديما غزال ، باقي دعقل أبوشتى مناين كث باقية عزبة قبل ما دخطبني وجيث للعرس دعلي خاي وكث انتينا اتبورد فالوص دالمرح بداك الفريزي كحل والقميجة بيطا بالكمام ولاقي القابسة دالدخان فالدجيب والنضاضر كوحل على عيناك والصباط جديد أيبري ، باقي دعقل ؟
بوشتى : إيه يا ليام ، كث داك الساعة أنخدم فكثامة وكث عاطيها غي للشيكي ولالة ومالي وتقرقيب السطالي .
حادة : دعقل فاش ناضو يشطحو النسا ونوضت يانا نغني ونجيب عليك : يا و بوشتى هايا الغزال أيا أيا أيا ، يا ومول الفريزي الكحل أيا أيا أيا ، يا وكيفو كي بودنجال أيا أيا أيا ، يا وراني عليك أنهبال أيا أيا أيا ، يا وديما نجيب عليك من هادي شحال أيا أيا أيا أيا
بوشتى : كاخ كاخ كاخ والله ايلا يا باقية عاقلة وحافطة يا البالا
حادة : واللخرا فاش قلتلك : يا و بوشتى يا الزين البركي أيا أيا أيا ، يا حكيتك كيف البندير أيا أيا أيا ، يا ونقبطو بصبعي الكبير أيا أيا أيا ، يا وانا نجيب عليك وانتي كي المير أيا أيا أيا أيا
بوشتى : هاهاهاها . ما بانلك غي البندير ، كث ادعطي للغنى قثلا يا موجحالل ، كث ديما رافدا الطارا وادبحلط
حادة : ايوا مالك والله ما كانو يقدو عليا الطفلات دداك الوقت
بوشتى : فالحقيقة دالله حتى انتينا كث مسرارة وقلك ايلا مشى الزين ايبقاو حروفو
حادة : ولياه يانا دونية
بوشتى : واخا كث مجعلقة كث مسرارة أعوراجة غي شفتك قلت ليما وبابا يمشيو يخطبوك قبل لا يخطفك شي وحيد ويخليني مفنك
حادة عجباتا الرومانسية دعمي بوشتى وعباثا سهايثة وحميدة حتى خلط عليهم وقلم السلام وعليكوم .
نخليوهم مع حميدة ونرجعو لعبسلام
عبسلام قبط الكار ونزل فوجدة مشى نيشان عند صحابو دي كانو معاه فالعشرة ، صاب غي بوعلام وسلف من عندو عشرين ألف ريال ومشى عند مول الحانوت يخلص الكريدي اللي عليه باش يعطيه لاكارط ديالو صابو مبلع . صقصى عليه قالولو مشى للبلاد عندم شي موت ما يجي على خمسيام . عبسلام جاه بودهوار وبقى غي قابط فراسو ، بوعلام شافو هيثاك وهو يجرو خرجو هو وياه للمدينة يفوجو شواي .
هوما ايدورو فساحة سيدي عبد الوهاب وهي دبانلو يامنة هي وخالتا وبنت خالتا أيساراو
لاغا عليها ومشى سلم عليهم
عبسلام : أهلن أهلن كاراك هنا ؟
يامنة : واه راني هنا ، جيت البارح يانا والعزيز خاي عند خالتي وخرجنا نساراو شواي ، ونتينا ياك قلتلي مشيت للتسول ؟
عبسلام : أودي مشيت ورجعت ، حتاجت لاكارط نجبد شي فلوس ساعة نسيثا هنايا ورجعت ليلا ، وفايناهو العزيز خاك ؟
يامنة : شوف لاين قبط ، ما يكو غي خرج يشري الشمة ،
كنت مشي نعيطلك نقلك غدا خالتي وبنتا مشي يمشيو للسعيدية وقالولي نمشي حتى يانا معاهم ، كا نمشي كا لا ؟
عبسلام : غي سير . حتى يانا دابا نكون تما وقيلا ، ولايني ما دعومشاي
يامنة : أويلي كا يانا أنعرف نعوم
عبسلام : ايوا صافي غي سير معاهم
يامنة : حتى دعيطلي مناين دكون تم صافي
عبسلام : واخا صافي
عبسلام قرر باش يمشي للسعيدية ، فالصباح ناض بكري هو وبوعلام ووجدو راسم وشدو الطاكسي ديريكت للسعيدية .
عبسلام ما أيعرفشاي يعوم مزيان ، قيال غي يبرتشن فالما بحاد الشورط أصفر كبير عليه عطاهلو بوعلام ، كانو كل مرة أيمشي يعوم وحيد ولاخور أيكلس يحطي الحوايج ، واحد الساعة عبسلام غطس حا الغطسة ومناين خرج صاب راسو هو فجيه وداك الشورط فجيه ، بقاو شي حيابر حداه أيموتو بالطحك ، وجابولو داك الشورط لبسو وعقدو مزيان بالخيط وخرج فيه الهيمري دالدجوع ، كلاو داك الشي دي جابو معاهم وبقى متكي فالرملة وداك مول عسيلة ومول اتاي ومول الهندية ومول بولو غي ماشيين ماجيين حداه ما شراشي حتى على وحيد فيهم . حاد الساعة رفد التيليفون وعيط ليامنة
عبسلام : ألو فاي راك ؟
يامنة : ما راحناشاي فالسعيدية راحنا فحاد الموطع مزيان حدا السعيدية أيجيولو غي العائلات حتى لليل عاد نجيو للسعيدية نتفرجو فالستاتي
عبسلام : إيوا صافي مناين دوصلو لاغيلي
يامنة جات للسعيدية وعيطات لعبسلام تلاقاها هي وخالتا وبنت خالتا حدا لافوار وقف معاهم حاد الشواي حدا داك المصيبة دداك الفرفارة الكبيرة دي أدور la manège شوية وبنت خالتا قالتلا سيرو ركبو انتي وخطيبك
يامنة حشمات وقالتلا لا ، جات خالتا قالتلا ما فيها والو غير سيري . عبسلام حتى هو حشم ولايني شجعوه . مشى قطع جوج ورقات بألف ريال (واخا هو ألف ريال دوصلو حتى لواد امليل) المهم طلعو فداك السخط ، غي هي دارت بيهم حاد الربعة دورات وهي دخسر وبقاو معلقين فالسما هوما الفوقانيين ككل ومربوطين وعبسلام بداك الرجلاين طوالين ايفركل ويامنة حداه ادزكي بالعاداو ، ايوا نخليوهم تما على ما يجيو صحاب البومبية يعتقوهم ههههههههه وإلى اللقاء في الجزء المقبل بحول الله
دامت لكم البسمة.

توقيع: عزيز البورقادي

اقرء المزيد

التوائل 28

حميدة صاب القهوة منزلة فوق الطبلة سلم على عمي بوشتى ودادا حادة وربع رجلاه فوق الدكانة

بوشتى : فاي كث أحميدة ؟
حميدة : أودي كث فالبحيرة مشيت نركب على داك الحواط دالبصلة واها ، و gوزت للواد نشوف كا كاينشي كرموس فداك العطوشا ساعة كحطوها يبالس خلاو غي الكعامز ، كا غي باحدكوم مجمعين؟ لياه فاي مشاو الدراري ؟
حادة : كلها وفاي قبط ، الصافية وحمو ركبو لفاس عند ختي و عبسلام هود فالصباح للفيلاج باقي ما جا
حميدة : هايتاك قلي ، وشني لقى فشغلو كا مشي يلقي شي عرس كا مازال ايتفتف ويحك فجيابو ؟
بوشتى : إيوا الكلمة راحنا gوزناها ، أنعاينو غي يفوث العيد ونتوكلو على الله
حميدة : إيوا حتى يامنة راها فوجدة هي والعزيز عند خالثم غدا أو بوث غدا يرجعو .
بوشتى : أودي يانا اللي مطيرولي هو كيف مشي نلقي مع القبيلة ، دابا كلشي أيصقصي على هاد العرس دعبسلام وحتى داك التول دي فالحيسبوك مع السي احمد لزعر كاملين أيقولو يجيو عندي
حميدة : وفاي مشي دلقي نتينا هاد البهتان د العباد وشني مشي دوكلم ، كا نتينا مينيونير ؟ خاصك دبيع داك المطاير دي باقيين عندك حيت العين
بوشتى : إيوا نتمناو غي يرجع الحاج على خير وكلشي يسهل فيه مولانا
حادة : زيد القهوة أ حميدة ، هادي القهوة دفاس جابتالي ختي مناين جات عندي
حميدة : قول جابتلك طون ، من العام دي gاز مناين جات اختك ، غي عياد باحدو يكون شرب قنطار
حادة : لا غي هاد القابسة واها بقيت حايطاها حتى لدابا عاد جبدتا
بوشتى : هههههه أودي ما خساراشاي فيكوم كا مشي نصيبو ما خير منكوم
حميدة : إيوا ليلتكوم مبروكة نمشي يانا نشوف شني تابعني .
حميدة مشى ، حادة جمعت الطبلة والبال ديالا كامل مع عبسلام قيال غابر والصافية اللي ما عيطتشاي عليها مناين وصلت لفاس .
هي هيثاك وعبسلام عيطلم قلم راني طلعت لوجدة نجيب لاكارط نسيثا عند مول الحانوث .
نرجعو لعبسلام ، من بعد ما بقى معلق فداك الطيارة هو و يامنة ، راسم مقلوب التحت ورجلاهم فالسما ، عبسلام طاحتلو فردة دالصباط ، جا حاد المجحوم رفدا بفاه وعباها ، يامنة عندا حاد الفركوح كبير ما بغاشاي الصباط ينسرس منو ، بقات غي أدلغط بالعاداو وعبسلام أيسكث فيها والناس كاملا أدصور ولاقيا المباشر ، بقاو هيثاك شي نص ساعة حتى جاو صحاب البومبية نزلوهم ، ومول داك الألعاب جا طلب منم السماحة وعطى لعبسلام حاد الصندالة لقاها فرجلو و فرقو الجوقة .
تفارق هو ويامنة ورجع لوجدة هو وصاحبو بقى تما سيمانة أيعاين مبارك مول الحانوت حتى رجع من البلاد ، مشى عندو وخلص الكريدي اللي عليه وعطاه لاكارط ديالو وقبط الكار ورجع للتسول .
ركب حداه شي وحيد و جبدو الهضرة على البحر وقالو السعيدية عامرة بزاف و هادي واحد السيمانة شي واحد هو ومراتو ركبو فداك الطيارة وتكوانسات بيهم وبقاو معلقين فالسما ملي بغاو يعتقوهم صابو المرا ماتت سكتليها القلب والراجل فلت ليهوم وطاح وجا على راسو وبقى المخ ديالو تما مشتت قلو عبسلام واه حتى أنا سمعت هاد الهضرة ولايني واقيلا غي الخوروطي هاد الشي ، قلو لا نيشان قالا ما كاين لا خوروطي لا والو ، راهم دوزوها فالتيليفيزيون أصاحبي ، دوزوها فديك الإذاعة ديال أبو ظبي
المهم عبسلام بقى أيسايس معاه ، وبالو مشطون مع يامنة كا رجعت كا لا حيت عيا ما يعيطلا وتيليفونا مطفي . ناض عيط للصافية وهو يجاوبو الشفار وطيحلو الهضرة ، عبسلام ما عرف شني واقع حاد الشواي و الصافية عيطاتلو بنمرة جديدة
عبسلام : ألو شكون معاي
الصافية : أنا الصافية
عبسلام : شكون الصافية
الصافية : أويلي الصافية ختك مالك ديما مشقلب كا باقي دايخ بداك الفرفارة ؟
عبسلام : كا حتى نتينا سوقت الخبار . مناين جيبت هاد النمرة ؟ موشاي نمرتك هادي ؟
الصافية : هادي نمرتي الجديدة ، سمع ، راها يامنة والعزيز جاو من وجدة وراهم شابكو هوما وعلي دالقرع وراها فرشخاتو من راسو و راه طلعو باباه لتازة يقيلو سرفاتيكا
عبسلام : فيواخ هاد الشي
الصافية : البارح ، صابو العزيز فوق الشجر ديالم وشابك هو وياه وجات يامنة كملت عليه بحا الهراوة نفطاتو ما خلاتشي فيه حتى موطع صحيح
عبسلام سمع هاد الهضرة ، كان مشي ينزل فواد امليل صدق نازل فتازة ومشى نيشان للبلدية أيدور على علي دالقرع وباباه
الصافية من بعد ما عطاها أشرف ولد خالتا التيليفون جديد رجعت هي وحمو للتسول و شرات كارطة جديدة وبدلت النمرة ديالا و ما قدتش دعيط على عبد الحق باش دقلو ها ما طرالي حقاش أدهبط منو بالخوف . هو مسكين بقى أيعيط فالنمرة القديمة وكل مرة أيجاوبو غي الشفار أيقلو واش هادي الصافية أيجاوبو أيقلو لا هادي خالتك ميلودة . بقى حاير عيط لعمي بوشتى مشى يجاوبو وهو يقطع عليه ، عاود عيطلو مرة اخرى جاوباتو العلبة الصوتية و بقى مسكين بحا الحنش المقطع راسو غي أيبني ويريب وقال مع بالو هادو ميا فالميا رجعو فكلامم أينوض أيشور مع داك عزيز البورقادي صاحبو قلو لاقيني لتازة ويكون خير
هي هاديك ما عليه إلا جمع صاكو وقبط الكار من طنجة وجابو فتازة تلاقى مع البورقادي و ليشاشرة اخرين فحاد القهوة وشكى عليهم ، قالولو ما هنا إلا نمشيو نصالحوك مع عمي بوشتى والصافية ، مشى فحالو بايث فدارو وفالصباح تلاقاو كاملين فبني لنت فالسوق ومن تما مشاو عند السي جمال لشخم عباواه معاهم وكازو نيشان للدار دعمي بوشتى يفكو الجرة دعبد الحق . (أنظر الصورة)
نخليوهم فالدار دعمي بوشتى ونعاينو السي أنوار زياد يكملينا شني لقات يامنة من بعد ما قيدو بيها عند الجادارمية وإلى اللقاء في الجزء المقبل بحول الله
دامت لكم البسمة.

توقيع: عزيز البورقادي

اقرء المزيد

التوائل 30

عمي بوشتى وعياد والفقير الحوسين وعمي امحمد فالصف اللول والطيرموس دالقهوة والطبسيل دالمفروق حداهم فوق الطبلة وعياد عيناه مشاو يفلثو لداك الطيرموس ، الأستاذ بدا الدرس .

حمزة : بسم الله الرحمان الرحيم ، كنشكركوم بعدا على الحضور ديالكوم ومرحبا بيكوم كاملين

بوشتى : بيك اولى أسي نتينا دي مرحبا بيك عندنا فالدوار

حمزة : ترحب بيك الجنة أعمي بوشتى ، كيف كتعرفو العام اللي فات جيت باش نقريكوم ولكن حيت كان العدد قليل ما كملتش معاكوم ودابا تبارك الله كيبانلي القسم عامر و عندكوم الرغبة باش تقراو

الفقير الحوسين : ايوا غي ما صيبنا ما نلقيو واها وراحنا لاهيين الوقت

حمزة : لا إن شاء الله غادي نستمر معاكوم وغادي نبداو أول درس : حرف الألف ، شوفو فالسبورة كاملين ، كنديرو شرطة طويلة هاكا وفوق منا الهمزة

التهامي دعلي : ديما أنشوفا وأنقول شني هي هادي لاقية بحا المنجل ساعة هي الهمزة

عياد : الهمزة هي هاد البرياق دالقهوة دي جاب بوشتى مع هاد الطبسي دالمفروق

بوشتى : أ سكوث أ هاد العلة خلينا نقراو . حتى للاستراحة وارا ما دجغط

حمزة : شوية د السكات عافاكوم ، شوفو هنا فوق الهمزة غادي نزيدو شريطة صغيورة كنسميوها الفتحة

امحمد : بحا الفتحة دالدجلاب ياك أ السي

عامر : هايثاك كان لقالي يانا الطبيب فالبلدية حاد الفتحة على الرياصة دقلبي وخيطلي داك الفتق دي كان عندي

بوشتى : أسكتونا أليشاشرة خليونا نقراو

عياد : زعما أدقرا بنيتك كا عوال دطحا مدير كا كنينير

حمزة : ههههه ، ما عليش المهم الواحد يقرا ويعرف الحروف ونقطة بنقطة كيحمل الواد . نرجعو للدرس . الألف والهمزة والفتحة كنكتبوها هكدا وكنقراوها "أ"

بوشتى : حنا التول أنقولو القا موشاي الأا

عياد : نيشان ، السي حمزة وقيلا فاسي أينطق القا بالأا

حمزة : لا ماشي "ق" هادي ال"أ" أما القاف ها كيفاش كنكتبوها "ق"

الفقير الحوسين : ياك أيقولو القا وحدة ملفوق لاش لقيتلا نتي جوج كا عزابلك حنا ما انعرفوشاي كا شني

حمزة : هاديك القرايا دالجامع أما القاف دالمدرسة عندا جوج نقطات . يالاه كل واحد يعطيني كلمة فيها حرف الألف "أ"

عياد : أرى لاون داك القهوة

حمزة : أرى فيها الألف ولكن المعنى ديالا باللغة العربية : أرى هي زعما كنشوف

بوشتى : شني أدشوف نتينا أدشوف الضباب . ها عامر فاين خدام أينفح ونتينا لا خبر
حمزة : حيد من يدك داك الشي أعامر حشومة . ما كنكميوش وما كنفحوش فالقسم .
عامر : والله أ السي يا طابا دبوشتى هادي هو دي ماطاهالي
حميدة عاد ماجي أيسبك لاقي اللوحة فالقب دالجلاب ودق فالباب وتم داخل وكلس
حمزة : علاش تعطلتي أعمي حميدة
حميدة : أودي غي سكت كث ماجي ومناين نوضت ندور على الصباط ما نلبس ما صيبتوشاي ، ليهوذي دالمجحوم رفدو ومشى أيلعب بيه وطيحو فالبير وما صيبت ما نعمل فرجلي عملت غي المشاية دخالتك عيشة
امحمد : والله يا جات معاك نيمير الوحيد واخا الفركوح ديالك كبير جات قدك عبار
حمزة : نرجعو للدرس . شكون فيكوم ينوض للسبورة ويكتب لينا حرف الألف
كلشي سكت حتى وحيد ما بغى ينوض
عياد : نوض أبوشتى نتينا أدفهم علينا حا الشواي
التهامي دعلي : نوض أبوشتى نتينا هو المشتهيد
حمزة : يالاه نوض أعمي بوشتى سعف
بوشتى : أودي غي خليني كالس فموطعي أ السي ، الركابي ديالي أيحرقوني حتى لمور العطلة وعاد بدا دنوضني
حميدة : لياه فيواخ العطلة ؟
بوشتى : وقيلا هاد السيمانة
حمزة : ههههه فيناهي العطلة واش نتوما عاد قلتو بسم الله وكتسولو على العطلة . يالاه غير تعافر أعمي بوشتى ونوض .
ناض عمي بوشتى وكلشي بدا يصفق عليه هو قرب للسبورة وهو يبانلو حاد المحسيب (بوبريص) كايز فوق منا ، كا ويزول الفردة دالسباط ويغرول عليه على حر من جهدو فااااااااط ويقول لداك السبورة يا شلخ وداك المحسيب بقاو مصارنو تما لاصقين . المهم السبورة طاحت و تهرست وحمزة ما عجبوش الحال وكلشي بقى أيطحك وعمي بوشتى مشى ليلا يهزا وهو يقلو حمزة صافي صافي غير رجع لبلاصتك ما بقيناش قاريين
حميدة : لياه كا مشي نتعوشرو أ السي ؟
حمزة : انا اللي غادي نتعوشر ، ما بقالي ما نزيد معاكوم فهاد القسم ، غي نهار واحد كنتو غادي تهبلوني وتصطيوني
عياد : لواه لواه أ السي غي صبر معانا حا الشواي دابا نعجبوك .
حمزة : الله يهنيكوم انا والله معاكوم لا زيدت نهار . هي هاديك هز الكارطابا ديالو وزاد خلفة
الفقير الحوسين : الدعوة معاك لله أبوشتى خليتنا بلا قراية وكلنا عليك الله
بوشتى : زعما كنت مشي دتخرجلي ودطحالي طبيب . الله يمسخك كا نتي فهمتو بعدا حتى شني كان ايقول
هوما هايثاك والمقدم حتى وقف فالباب دالقسم وبدا أيلاغي على بوشتى
مشى عندو عمي بوشتى قلو شني كاين
المقدم : غي سكت أ بوشتى راني عملت حا الزبلة كحلة زحلة ما يلقيها حتى وحيد . أنا مزاوك لما وقف معايا
بوشتى : شني لقيت أ المدعوي
المقدم : جا عندي ولدك عبسلام باش يصغب شهادة العزوبة ، جيت يانا صغبتالو وفعيوط ما نكتب عبسلام بن بوشتى كتبت غي بوشتى وسنيت فيها والقايد حتى هو سناها وعطاهالو ودابا عاد فطنت شني لقيت . انا مزاوك قلو يقطعا وما يدفعاشاي للعدول ونعاودلو وحدة اخرى راه ايلا دفعا مع الضوسي راني نمشي فيها للحبس
بوشتى : كا دابا يانا فايث 65 عام رديتني عزري أ المقدم !! والله ايلا يا انتي هو دي عبرت
المقدم : أنا مزاوك لما لحق ولدك قبل لا يدفع الضوصي أنا مزاوك
بوشتى : ايوا يكو خير . يالاه معايا دابا للدار ونشوفو شني نلقيو
نخليوهوم غاديين للدار يشوفو عبسلام وإلى اللقاء في الجزء المقبل بحول الله .
دامت لكم البسمة.

توقيع: عزيز البورقادي

اقرء المزيد

الترتيب التنازلي حسب المساحات للجماعات القروية لإقليم تازة

السلام عليكم
نزولا عند رغبة بعض الأصدقاء أقدم لكم الترتيب التنازلي حسب المساحات للجماعات القروية لإقليم تازة

1 - جماعة مغراوة : 511.62 كلم2
2 - جماعة اكزناية الجنوبية : 380.68 كلم2
3 - جماعة كلدمان : 374.44 كلم2
4 - جماعة تيزي اوسلي : 349.82 كلم2
5 - جماعة اجبارنة : 223.88 كلم2
6 - جماعة سيدي علي بورقبة : 216.81 كلم2
7 - جماعة الصميعة : 208.11 كلم2
8 - جماعة غياتة الغربية : 203.91 كلم2
9 - جماعة بني فراسن : 200.22 كلم2
10 - جماعة آيت سغروشن : 192.70 كلم2
11 - جماعة باب مرزوقة : 188.36 كلم2
12 - جماعة مكناسة الشرقية : 180.89 كلم2
13 - جماعة بني فتح : 174.54 كلم2
14 - جماعة أجدير : 173.06 كلم2
15 - جماعة بويبلان : 165.48 كلم2
16 - جماعة تازارين : 161.07 كلم2
17 - جماعة الزراردة : 158.62 كلم2
18 - جماعة باب بودير : 156.36 كلم2
19 - جماعة مطماطة : 147.02 كلم2
20 - جماعة بوشفاعة : 144.90 كلم2
21 - جماعة كاف الغار : 144.11 كلم2
22 - جماعة الطايفة : 138.02 كلم2
23 - جماعة بورد : 134.65 كلم2
24 - جماعة تايناست : 124.70 كلم2
25 - جماعة الترايبة : 124.23 كلم2
26 - جماعة امسيلة : 117.67 كلم2
27 - جماعة أولاد ازباير : 105.77 كلم2
28 - جماعة الكوزات : 104.27 كلم2
29 - جماعة البرارحة : 98.39 كلم2
30 - جماعة بني لنت : 88.03 كلم2
31 - جماعة أولاد الشريف 71.53 كلم2
32 - جماعة بوحلو : 70.55 كلم2
33 - جماعة الربع الفوقي : 68.77 كلم2
34 - جماعة مكناسة الغربية : 46.53 كلم2.

توقيع: عزيز البورقادي

اقرء المزيد

أسماء الإشارة عند التسوليين

هناك رافا : إشارة للمكان البعيد مع وضع اليد اليسرى فوق كتف المخاطب والإشارة بالسبابة اتجاه الشيء مع إطالة كلمة (هنااااك)
رافا : إشارة للمكان القريب إما بالسبابة أو بحركة الحاجبين والعينين أو الذقن
هافا : إشارة للمكان القريب جدا مع وضع الكف فوق المكان المقصود ، وأحيانا الإشارة إليه عن طريق تحريك الحاجبين والعينين كذلك
هافاين : نفس معنى هافا مع الضرب مرتين أو أكثر بكف اليد فوق المكان المقصود
ليهن : إشارة للمكان البعيد وأحيانا يكون غير ظاهر مع تحريك أصابع اليد اليمنى الأربع وهي ملتصقة عدة مرات
لاون : إشارة للمكان القريب مع تحريك الأصابع الأربع لليد اليمنى نحو الوجه وهي ملتصقة مرتين أو أكثر
ثما - ثم : يعني هو المكان المقصود بالضبط
للإشارة فالتسولي تجده أيضا يستعمل العصا أو
"المعكاف" للإشارة إلى مكان ما .

هذا ما استطعت تذكره والمرجو المساهمة بكلمات في هذا المعنى أو تركيب جمل تحتوي على ما ذكر سابقا وعلى المودة نلتقي.

توقيع: عزيز البورقادي

اقرء المزيد

عيد الميلاد عند عمي بوشتى

السلام عليكم ورحمة الله تعالى وبركاته
هاد النهار الاحد عمي بوشتى ناض بكري كيف العادة وبردع الحمارة وهود عل القيطي للسوق ، دار دويرة فرحبة الخضرة تقضى خضيرة ودار حيت الكزارا وزع دي قسم الله ومشى عند صاحبو مول القيطون رفذ عليه الصوالح و قلب بالرجعة فحالو الشرقي ايطبش ما فيه ما يبقى ايدور تما بلا فايدة .
مناين رجع تلاقاتو دادا حادة بالفرحة والابتسامة ونزلت معاه الصوالح ودخل للدار صاب الصافية موجدالو حاد البراد كبير داتاي وشواي دالكاطو و لاطارط . مناين سقصاها شني هاد الشي قالتلو راحنا لقينالك عيد الميلاد أبابا .
قلا ياك عيد الميلود باقيلو عشرين يوم
قالتلو هادا عيد الميلاد أبابا موشاي عيد الميلود
ايوا هي هاديك لقالم خاطرم وساط مع داك البراد وداك لاطارط وداك الحبات دالكاطو وقالا انا هاد الشي ما ايعمرليشاي كرشي كا لقيتلي غي شي ...........
فنضركوم عمي بوشتى شني كان باغي ؟
يالاه كل واحد يعرض على عمي بوشتى ويوجدلو شي ماكلة من المطبخ التسولي العريق واللي عجباتو ماكلتو هو عندمن غادي يجي يقصر هاد الليلة
وعلى المودة والسعادة نلتقي.

توقيع: عزيز البورقادي

اقرء المزيد

سروال حمو

حمو سالا الجميع دالزيتون مع عمي بوشتى ومشى يخدم مع الناس ، وجمع شي بركة دالفلوس وتسوق لواد أمليل وكسى راسو ، شرى سروال دالدجين وسبرديلة وكبوط وجاكيطة وبلغة لباباه و درة ليماه ولقاهم فحاد الميكة وجا للدار ودخل للسطيحة وعلق داك الميكة فحاد المسمار فالمرفع وخرج .

هو خارج وهو يتلاقى مع دادة حادة فالباب داخلة هازا حاد القفة دمسلالة على طهرا .
حمو : مسا الخير أ يما ، سخنلي لا كاين شي غدا هاني ماجي .
حادة : وفاي ماشي ؟
حمو : ماشي غي للحانوت نصرف حا الربعالاف باش ندور معاكوم انتي والصافية ختي وفالليل ماشي يانا والعزيز دحميدة للعرس دعلي دموحمادين
حادة : الله يرضي عليك أوليدي انتينا دي أدفكر فيا وحاس بميمتك وختك وما داك بوركابي دخاك ايبقى فوجدة حتى ما انبقاوشي عاقلين على السيفة دوجاه كيف لاقية ومناين أيجي ما ايعطينيشي حتى ربعمية دريال نشري غي الدرة
حمو : الدرة راني شريتالك أيما وشريث لبابا حتى هو البلغة راهم فحاد الميكة فالسطيحة
هي هاديك حمو خرج وعمي بوشتى دخل
بوشتى : لاين مشى داك بوعبو عاود ؟
حادة : بوعبو هو انتينا أما هاداك زين الغزلان وسيد الرجال ، مسيكن خدم فالزيتون وشرالي الدرة وشرالك حتى انتينا البلغة الله يرضي عليه
بوشتى : حتى يانا راني راضي عليه غي انتملغ معاك اهاد بومقايق ، وفاين راها هاد البلغة دي شرا ؟
هي هاديك مشاو للسطيحة صابو داك الحوايج كاملين معلقين فالميكة ، عمي بوشتى قيس البلغة جاتو عبار وحادة عاوث عجباتا الدرة زريرقة وفيها الوريدات حميمرين
وبقات ادقلب فداك الميكة حتى جبدت السروال دحمو ، قلباتو صابتو كامل مبكطط
حادة : شوف شا الصروال كامل مزردع أويلي كا هدا الصروال كا شني ؟
بوشتى : ما قلتلكشاي هاداك غي عرة ، بلمطهون لاخور شمتوه
حادة : ما يشمتوهشاي ، هادا وقيلا بدلولو الصروال ديالو مناين كان أيقيص الحوايج لخرين
بوشتى : ألاطيف ألاطيف ألاطيف دقول هبجوه الكلاب ، على خراك كا مشى غي للخوردة كا جبر خير من هدا .
حادة : و شاريه بالفرحة وجايبو مسكين وعوال وقيلا يمشي بيه للعرس دعلي دموحمادين هو والعزيز دحميدة
وما عندوشي ما يلبس حوايجو كاملين راهم مودحين هادي شهر ما دار التيد فالدار
بوشتى : ياك الخيط واليبرة كاينين ، إيوا خيطيلو هاد الشي دي مشرك يمشي يحضر بيه هاد الليلة ومناين يجي من العرس يردو كيف كان ويعبيه لمولاه يبدلو . وسير لقيلي حا الغلاي دالما يسخن نتوضا العاصر علاين
نخليو دادة حادة مشي دخيط السروال الجديد ديال حمو . وانتوما عطيونا رأيكوم فهاد الموضة اللي ولات اليوم الله يلطف بينا وصافي .
وعلى المودة والمحبة نلتقي.

توقيع: عزيز البورقادي

اقرء المزيد

الألوان عند بني تسول

---- شني دشربو أ ليشاشرة كا الموناضة الكحلة كا البيطة (الحمرا)
---- داك القوقات دمطيشة باقيين زوراق (صوفر) خليهم يزيدو يحمارو حا الشطيطش
---- لاش أدمشي عن داك كحل السيفة (أسمر) بليهوذي لاخور أيغش فالميزان
---- الربيع بدا يزرق (يخضار) على داك الشتيوة دي طاحت
---- جيبلي معاك حا الكاس دالقهوة بالحليب ولا دكحلاشي بزاف أنبغيها دكون بيطا شواي
---- حدهوم ما صابت ما دلبس غي داك الجلابة مبخنسة (رمادية) ما جاتشاي كككل مع وجاها
---- عبرلي حاد الجوج كيلو دالكليمانطي ولا دلقيليشي داك الزورق (خوضر) أيكونو حامطين لقيلي داك الحميمرين (ليمونيين) هوما دي حلوين يما ما ايعجباشاي الحماط أيطرسا

كملو من عندكوم ا الخوت أنا تسالاولي.

توقيع: عزيز البورقادي

اقرء المزيد

يوميات طاطا حدهوم 10

السلام عليكم كيف حالكم مع البرد و الناس لي فالتول واش وجدو شي بقول ولا مزال
طاطا حدهوم مهاودا مع الطفيلات ديالا قولا و طحك عليها و لعياط يبدا
وا طاطا حدهوم وا ارقية ويودي لبهايم عندكوم في الزيتون
(طاطا حدهوم عندا واحد الطمسا دزيتون دلمشروع ما كاين منقوليك غا الشوفا فيها ادرد الروح)
ارقية غا سمعت لعياط وهي دخرج ادسبيگ و ادبرگم حزاما مغسوخ و راسا عريان حيث كانت عاد بدات دمشطو
ارقية :هدو مبغاوشاي يحشمو طلقين علينا بهايمم و الله غلا كنت معبياهم لمول لفلاحة و نشوف شني غيقولولو و شني غيلقيلو معاه
غير وصلت للحصيدة و بداي ادراري بلحجار
لحجرا ادنقز منطهر دلعودا و اجي فطهر دلبغل و عاد ادنزل فالارض
رقية جاريا عليهم وا ادعثار فجحلالا و الشعر ديالا غا نفخ فيه الريح وهو يطلع فوق راسا بحال شي عش دبلارج
في نص الطريق ثلاقاها مول لبهايم و طلب منا اسماحا و قلا يودي لعودا كانت مطولا حد النادر و لبغل مشكل و اجدوعا هما لي مطلوقين و ليني مايبعدوشاي على يماهم
ارقية بغات دسمح و ترجع بحالا وهي دبعث معاها دادا حادة

دادا حادة عندك اهاد لحيبورة دسمحلو لبهايم مخلولكمشاي في الزيتون و مشي المرة اللولى وانا موجودة نشهد معاك
ارقية هداك مدسمع و عيطت اجبيد عند مول الفلاحة و لبهايم حداها قيدت الشكاية و ارجعت ادلهث
مول لبهايم مسكين معبا بهايمو حتى خلص لخطيا و كانت خطيا كبيرة وهو راجع ثلاقا بصاحبو و شكا عليه
صاحبو قلو يودي را حد المرا گازت حدا النادر وراني حطيتا و شفتا احدابت وليني معرفتشاي شني لقات
الرجل بقى ايحفر ايحفر حتى عرف المرا لي احدابت هي دادا حادة و عرف هي لي خلعت لوتد دلعودة و منين صقصاها علاش لقات هد شي قالثلو مناين كنت صغيرة ملقتشاي هد الفعلة حيث ما كانشاي الزيتون دلمشروع
استودعكم الله و الى فرصة اخرى.

توقيع: مليكة الأطرش

اقرء المزيد

يوميات طاطا حدهوم 9

محفظة اخديجة

السلام عليكم اشخباركم كيف لقيين مع هدالبرد نتمنى تكونو بخير

كيف خبرتكم من قبل اخديجة عزيز عليها لقرايا دلكتوب و كانت منين ادكمل شي كتاب ادحوطو فحد شكارا قديمة

وحد نهار بغات دلقي فيها لكتاب لي گهزت جبراتا تعمرت مسداتا غا بسة و ستين كشيفة حجراتا فموطعا و مشات و ليني قبل متخرج من لبيت سمعت أنين وهي تخوشش و شعار دراسا وقف و قالت مع نفسها

اخديجة:اشكون اينين وانا ممعايا حتى حد في البيت

المحفظة انا لي معاك وانا لي كنين من كثرة الحريق

اخديجة لعجب شكارا كتهضر

المحفظة اييه مافقلبك لا رحمة ولا محنة مزگتلي جلدي باش تسدي قفلي

اخديجة كان عليك تفرحي حيت فيك اعز معندي و ديما فيك مهليا منلغبرة كنمسحك و في احسن مكان كنحطك

المحفظة اييه وليني انا قلبي تعمر و مبقالي فين نزيد

اخديجة و غا سمحيلي و متقلقيش حيت بهد لبليزا غا نبدلك

المحفظة واش انا منك انتقلق واش نسيتي نهار لي بيا منشتا درقتي خفتي على راسك باش ميتصرططش و ما خفتيش على الدفتر لي مكتوب بمداد يتخرمز

اخديجة مانسيتش راني منين شفتك كتقطري ظنيتك كتبكي مسحتك وغطيتك و طبطبت عليك و معك بكيت

المحفظة و نسيتي نهار لي گلستي علي حتى تطرطقو ضلوعي

اخديجة متزيديش فيه ياك غي لقلم لي تهرس

المحفظة اييه و ليني شلاخي ديالو فيا دخلو

اخديجة وانتي نسيتي نهار لي من جيبك طاحت ورقتي لي فيها مكتوب تمريني لو ماكونت حافظة كون اخديت على يديا سلخا

المحفظة ايوا الله يسمح علينا وليني بيني و بينك ماني فاهمة داك الجواب لي كنت كاتبا :الافعال هي:ق-ف-ب (بالكسرة)

اخديجة ايوا سقسي شي حد من المجموعة وبلاتي بعدا فايناهوا لغشا دلبرا ليفيه النقط الحسنة لي كانو يعطيوني لاساسيدا ديالي

في الوقت لي كانت اخديجة و الشكارا ايتهودو طاطا حدهوم كانت كتصنت و كتولول

طاطا حدهوم ايما يايما على بنتي تزاد عليها الحال و ادهضر بوحدا خصني نزورها خصني نعبيها لمولاي عبسلام

نخليو طاطا حدهوم تفكر كيف غدلقي لبنتا وانا استودعكم الله.

توقيع: مليكة الأطرش.

اقرء المزيد

اكلة البطاطس

السلام عليكم

كانت واحد لمرا عندها واحد لولد مكيبغيش ياكل الا اذا كان اللحم وحد نهار طيبات طاجين دلباطاطاو عيطاتلو
الام وليدي اجي اجي الحبيب ديالي تاكول باش تكبر مزيان...
الولد ايلا مكينش اللحيمة ماناكول
الام تنادي عى العصا فنيك اديك العصا اجي عندي بغيتك ضربي هد لود راه مبغاش ياكل
العصا لا منضربوش هو زوين و مخصناش نضربو لوليدات
الام (تغير الصوت مع كل شخصية)حتى انت مكتسمعيش الهضرة بلاتي عليك عندي دواك اجي اداك لعويفية حرقي هدلعصا
النار علاش اش درتلي انا منحرقهاش
الام هد النهار كلشي مكيسمعش لهضرة اجي اداك لقريعة دلما تكبي على هد العافيا و اطفيها
الماء علاش تضيعيني و تضيعي هد العافيا خليها تسخنك
الام لا لا هدشي مشي معقول كلامي مبقاش يتسمع اجي اداك لبگيرة اشربي هد الما
البقرة لا مفياش لعطش منشربش
الام مشكيلا هذي اش غدي اندير....اجي اداك الگزار ذبح هد البگرة
الجزار لللا الالة هذ البگرة مشي ديالي ميمكنش نذبحها
الام عندك الحق ولايني بلاتي اجي اداك لقنبا جيفي هد لگزار وهنينا منو
الحبل لا لجيفتو ربي يغذبني
الام حتى انت طواليك لسان و كترد لهضرة اجي اداك لفار غزز هد القنبا ومضي فيها سنناتك
الفار سنناتي ماضيين و ما فيا ما يغزز
الام واخا غدي نجيبليك لي كعرفليك اجي اداك لمشيش عندي ليك واحد الزردة
القط ياك ما شي فار فين هو جيبيه ليا واخا مفياش لجوع
الفار سمع القط كيهضر وبدا كيغوت
الفار فين داك لحبل لي بغيتي نغزز راني موجود
الحبل اش بيني و بينك انا غادي نجيف الگزار
الجزار علاش اسي لحبل باغي تجيفني راني عندي وليدات غدي تحرمهم مني انا ماشي نذبح البگرة
البقرة علاش بغيتو دبحوني و انا كنعطيكم لحليبا و زبيدا وانا راه فيا لعطش عطيوني نشرب
الماء بعدي مني الالة البگرة انا ماشي نطفي العافيا
النار علاش تطفيوني وانا باقي بيا الصالحا زيدوني داك لعصا باش تزيدني قوة
العصا ايوا لحرقتوني شكون لي غدي يضرب ليكوم لوليدات لي مكيبغاوش ياكلو البطاطا وخا مفيهاش اللحم
الولد ماما انا فيا لجوع عطيني ناكل
الام انا مطيبش اللحم معنديش باش نشريه
الولد عطيني البطاطا حتى الخضر فيها فوائد
وهكذا اكل الولد البطاطا و تعلم درسا في القناعة
ايوا اشنو عجبكوم كتابتي او كتابة احمد بوكماخ (في الحقيقة لا مجال للمقارنة).

توقيع: مليكة الأطرش

اقرء المزيد

يوميات طاطا حدهوم الحلقة8

السلام عليكم كيف كيف حالكم مع البرد
مفاجئة المطمورة
طاطا حدهوم ناضت تحفر المطمورا حيت تكملا الزرع لي لقيا فطنن جابت الفاس و لبالا وبدات كتحفر و ترمي التراب حتى وصلت لمحافا لي مغطيا بها لفا دلمطمور و هي تبدا دزول التراب غا بشواي مرا بيدا و مرا بحد شطابا دلعواد حتى زولت تراب كامل و بنقشا دلفاس تعفرات وهزت لمحافا و عرات لمطمور
گلست على اشنافا دلمطمور ودلات رجلتها و بحد اشطيطا بدات ادشلي باش تبرد لمطمور حتى عيولا يداها لتشيار ناضت لقات على لفا

دالمطمور شواري دلحجار باش مايطيح فيها حتى حاجا و باش يدخولا لهوا و مشات دخدم شغلا

بعد ما حسيت طاطا حدهوم بلمطمور بردت مزيان دلات فيها ارقية با طلعلا الزرع
ارقية غي وصلت لزرع زگات
وايما وزرع تحاااااامم
طاطا حدهوم اياسيدي ربي ازريعا ديالي مشات
ارقية وغاشواي غا منحد جيها
طاطا حدهوم يوا حاول غا بشواي باش ميتخلطشاي
ارقية ادعمر وطاطا حدهوم اطلاع حتى اخوات لمطمور
ربطت ارقية لحبل لي دلتلا يماها فكرشا و تشبطت فلحيط دلمطمور وقلتلا جر و بلخف خرجت
ارقية يوا دبا شني غدلقي بهاذ حموم
طاطا حدهوم ارا بعدا داك لگميلا نعبرو هذ طبيصي لفلانة و هذ لگميلا لفلانة و 2 دلگميلات لفلانة و هذ ربعي لطاطاك حادة را عمك بوشتى ايعجبو حموم بزاف
ارقية يوا مدنساش الناس دلمجموعة
طاطا حدهوم موحالش واش يعجبهم
طاطا حدهوم فرقت حموم على النسا د دوار كاملين و ناضت خسلت داك شي لي خلات مع حد لموداين دلگمح وقيالا مبقابلاه حتى گبس
لگمح خلاتو حتى تصيفطو يتطحن فلموطور و حموم طحناتو فرحا لي عندا على يدم دلبيت لفوقاني حيت مول لموطور مأيبغاشاي يطحن حموم قليك أسيدي ايخليلو الريحة غالطحين دناس
طاطا حدهوم غربلات طحين دحموم وعجنات وطبخات واحد 2 دلمطلوعات كل واحدا يا وحدا ما شهتكوم فيهم و الطفلات اينهطو
اشني أدسالنا ايما راه ماغنكلوشاي هذ لخبز راك غا أضرب عليها تمارا
طاطا حدهوم لهلا يطيحا فيكوم وماهي دوجاكوم راني لاقيا لكوم لخبز
في هذ لوقت كتخلط اخديجة و قبل ما تسلم عليهم
اخديجة اه يا ربي الريحة دلخبز دلفيحا وكان عرفتكوم لقينها وكان ماجيتشاي
اخديجة و خواتاتا بقيين ايتسالمو و لعياط بدا
الصافيا وا طاطا حدهوم
اخديجة وزيد االصافيا زيد مزيان لي جيتي راني توحشتيك
طاطا حدهوم ااشني خصيك أبنت بوشتى
الصافيا يوي قليك بابا زيدو حشواي دحموم لبقيليكشي واعطيه حشواي د طحين راه شم عند الريحة
طاطا حدهوم حموم مابقاشاي لي كان فرقتو وهو عطيتو كتر من الناس كاملين وطحين راني طحنت حد شواي دبا نقسمو معاه
الصافيا عوريطك ا طاطا حدهوم لدعطيهشاي بزاف را يما مغدبغشاي طبخولو و هو غينوض يهرويها
طاطا حدهوم و هاك هد لمطلوعة عبيهالو و قلو مناين نطبخ مرة اخرى دبا نصيفطلو ولا دعبيشاي طحين
الصافيا الله يرحملك لواليدين هنثنا منهيط ديالو
وانتم شكون فيكوم اكل لخبز دفيحا و حموم ?

اقرء المزيد