بسم الله خالق الأكوان نبداو الصلاة على النبي العدنان ولي هو خير الأنام من غابر الأزمان إلى آخر الأيام
الرحلة التي نحن بصدد عرضها من هذا المنبر على هذه الوجوه الطيبة حقائق واقعية عبارة عن جملة من الطرائف منبثقة من الواقع المعاش في مسرح الحياة .
ايوا اسيادي في التسعينات من القرن الماضي كنت ماشي انهمسس بجنب المارشي درع اللوز فتازة و بالضبط حدا الجامع شفت واحد المرأة شيبانية حاطة حداها درعية فيها الرباطي دفليو - الزعتر - ازير - مريوة، و سير و سير من العشوب دبلادنا الحبيبة.
- سقصيتها هاد مريوة لاش صالحة ا الشريفة؟
ردت علي هذي اوليدي فيها الدوا دراري الصغار.
- عاودت سقصيتها شني اداوي هاذ مريوة الشريفة؟
قالتلتي حاشك اسيدي صالحة لدراري الصغار لي عندم الخنافر كيسيلو بالما انتم راكوم عارفين باش كيسيلو !
الحاصل ما فالدين انا كان عندي الدري عندو 4 سنين قلت مفيها بأس أرى نجرب هاد العشبة البلدية ما فيها غير الخير و كيما ايقولو دير النية و حاجتك مقضية و خرين كيقولو دير النية و بات مع الحية.
- قلتلها اشريفة اخترلي 03 دربطات على يديك ( فليو - زعتر و مريوة ). مشيت للدار ونا فرحان جايب معايا الدوا حطيتو فالنوالة منقولش الكوزينة لأن هاد السمية نصرانية و باش تجي تا الهدرة شواي تسولية محطوطة منطوطة.
فالدار اسيادي لقيت الوالد ديالي الحاج الحوسين الله يطول فعمرو و يخليهنا بركة جايب معاه واحد الضيف عزيز علينا هو إدريس د بن أحمد الله يطول فعمرو كان ( فكنصي ) داك ليامات عاد جا من فرنسا. كلست سلمت على الوالد و على سي أدريس و قلت لخاي عبد السلام كان معايا فالدار سير شحرنا شي براد دتاي و جيبنا منقمقمو .
حيت السيدة مراتي مشات تزور الوالدة كانت مريضة بالمناسبة الله يرحمها. من هنا أحيي أخي سي عبد السلام بحرارة و انقولو سير اوليدي الله يغطيك بالرضا خليتها متورخا و زادت كتر ملي دخلت للتراث دالقبيلة دالتسول .
خونا باش يعمر اتاي بالنعناع أو الشيبة مشا عمر بمريوة حيث الوراق دنعناع بحال مريوة. جابنا التعويفة مع البراد دتاي، زيدت الصينية لسي ادريس من باب المزاح قلتلو صوك اخاي هاد البراد . قلب و شقلب و را انشوفو اتاي دراري كيف لاقي داكشي لي كان السيد قلب و شقلب و قاص الحلاوة. بانلو داكشي ماشي هو هداك، غطا البراد بالفوطة قلت انا مع راسي باغي يخليه يختر شواي .الوالد قالو خوينا اتاي قبل مايبرد اسي إدريس . السيد بقا ايدور راسو مع جنابو وحشم يهدر .
المهم عمر الكيسان انا شميت الريحة دمريوة قلت صافي العربون بان .
هي هيثاك أخوتي مشيت انا عمرت واحد البريق د القهوة بالقرفة و الحليب باش صلحنا الجرة و قلبناها غي قولها و ضحك عليها .
ايلا بغيتو الطريقة و كيفية الوصفة الطبية دمريوة بغيتكم ديرو
جيم و زيدوها بالكومونطير هههه .
.
دمتم للفرحة و دامت لكم .
توقيع: محمد حسين تميم .
0 commentaires:
Enregistrer un commentaire