سلسلة بوشتى وحادة (الحلقة الأخيرة).

بوشتى: ماشي البغل دي مجهد، راه هو دي كان أيزرب عليه باش يوصل دغيا، حيت ماجي بوجاه حمر. وعارف شني جايب. وبنادم مناين أيكون معورلا عينا أيبغي يتعطل باش ما يوصلشاي دغيا.
عبسلام: واش لبغل ديالم شارييناه بمنيول، بحال داك فنيشة دعمي علال؟ ما دجيبشي حتى عشرين ألف.
بوشتى: كاين شي فنيش قدك، هذي تمن شهور ونتينا غايب وماجي بيداك طوالين. دخلت عليك بسعدي المحيح كادابا نتينا راجل كاشماثا، الناس راهم أيقولو شحال جاب ماشي شحال غاب.
عبسلام: ودابا نتينا أبا شكون قالك أنا ماجي بيداي طوالين؟
بوشتى: الكويرعاث دلعجل باينين، وقالو فلان طاح: قلو: من الخيمة خرج مايل. ونتينا ماشي غي خرجت مايل! نتينا خرجت أدحبو.
كايحسابك أنا حول أو ما أنعرفشاي، راني غي راخي وذناي وأنشوف والخبر فاين ما كان أيوصلني، مصاب دلقيها غي مزيانة.
عبسلام: لياه أنا شني لقيث؟ هادوك راهم غي الشياطن؟.
بوشتى: واخا أسيدي. تيقناك وكذبناهم، مصاب غي دكدبم نتينا.
عبسلام: باش ماشي نكدبم؟
بوشتى: ياك قلت هادوك غي شياطن ونتينا ماجي بجيبوبك عامرين.
عبسلام: أنا قلتلك هذوك غي شياطن أييه. ولايني ما قلتلكشاي بلي ماجي بجيبي عامر.
بوشتى: ها حنا رجعنا دراري دابا.
ياك عاد قلتلي؛ وشكون قالك أنا ماجي بيداي طوالين.
عبسلام: أييه قلتا وباقي أنقولا، ولايني ماجايبشاي شي فلوووس.
بوشتى: وشني جايب أحنيني؟
حادة: أسيدي ما بغينا فلوس، الحمدوالله غي مناين جيث بالسلامة أوليدي. هداك هو الربح وهداك هو راس المال.
بوشتى: صافي أمو فراقش الربح عبيه نتي. وراس المال يقسمو حمو مع الصافية.
حادة: ألطيف الدري عاد جا وهو لاقفو! خليه بعدا غي يروح من الطريق. أجي أجي أوليدي خسل يداك را لغدا واجد. ختك الصافية دبحت لك حاد الفلوسة وخضراثا بالخرشف.
بوشتى: سير أوليدا سير راها فايثة فيك ببوهبوف، أنا جيبلي غي حد الشويش دكاوكاو دكرب سمعت يماك أدوكتث وهي أدنزل معك الصيكان. باينا جيث متقل.
الصافية: أجي أخيي تتغدا أجي.
عبسلام: أودي مناين ماشي دهود راه با الله يهديه سدلي الشهية.
بوشتى: مسكين!! الله يكون فعوانك. لياه أبلمهيبط لاخر مناين مشيث لطنجة وكنت أدباث فالكوزيناث معرفتشاي راسك ماشي دوصل لهذ المواصل؟
حادة: أويلي شني كان أيلقي فالكوزيناث؟ ياكما رجعت طياب؟
عبسلام: أيما راه سميثم الكازينوياث ماشي الكوزيناث.
حادة: وشني هوما هذ الكازيواث؟
بوشتى: أنا راه قالي يوسف دعلي كلشي. وعاودلي التباريع دي كان فيها ولدك.
قالك ألالة راه كاين دايخسر منيول فدقيقة وحدة.
حادة: منيول فدقيقة! أويلي ليه شني فيه هذ الحرام؟
بوشتى: سقسي ولدك أموسرابط، دي خدامة أدافع عليه.
حادة: قلي أوليدي كا هذ الشي دي أيقول باك بالصح أو راه غي أيهترف.
عبسلام: شوف أيما راه دي طرا طرا وهذ الشي دي عطا الله. أنا تبعت المسخوط ديوسف دعلي وبغيث زعما نربح دغيا باش نبرعكم، ولايني ما سهلش الله.
بوشتى: لياه ربي أيسهل فالقمر أبلمسخوط لاخر؟ نتينا ماشي دقمر وعرفت ربي ماشي يسهل عليك!
عبسلام: ولياه زعما غي أنا دي كنت تما؟ راه داك البلايص عامرين ببنادم وكاين دي أيربح مياث منيول فالليلة.
بوشتى: هادوك دي أيربحو مياث منيول راهم خسرو قبل داك الشي مياث منيار. وزايدون شكون قالك بلي راهم أيربحو بالصح.
الصافية: كيفاش كازعما غي أيكدبو؟
بوشتى: لياه أبلحول لاخر كانتينا بهيمة؟ عقلت داك العام دي صبثك فالسوق أدقمر بمية دريال عند مول الكارطة، وطربثك بالصريمة لعين قفاك؟ ياك قلتلك هذوك دي أيربحو راهم صحابو، وهو دي أيخليهم يربحو بلعاني باش يجرو الحيول بحالك.
إيوا هذ الشي دلكوزينواث راه بحال مول الكارطة دصيب هذوك دي أيربحو متفاهمين مع مول الشي باش يشمثو الحوالا بحالك.
حادة: أسيدي راك واعر... ومناين عرفت نتينا هذ الشي كامل؟
بوشتى: هذا راه بوشتى ومن لا يعرفه.
قال هذ الهدرة وتماطا حد الزيف كان منزلو تحت الخدية.
حادة: شني مخبع تما؟ رجعت بحال العجوزة غي أدخبع فالكمامس.
بوشتى: هذي راه تمانين ألف ريال جابا يوسف دعلي، عطاهالو مول الشي حيث جابك وخسرت منيول عالقمر فسعثاين. باش دعرف راسك غي خراك محطوط منطوط. يوسف دعلي قد الحمصة ولقاها بك. وراه غي حشم مني حيث لقيث فيه الخير حد النهار.
عبسلام: الله يكتر خيرو، وعوو كانعاود مرة اخرى، صافي هدي والتوبة.
غي قال هد الكلام ودرز حداب على باه أيبوسلو فراسو ويداه ويطلب منو السماحة.
ناض بوشتى من بلاصثو وتغرغرو عيناه بالدموع وقبطو من ودنو غي بالشويش وقالو: شوف أشماثا أنا باغيك دكون راجل وقاري سوارك باش حتى لا غيبت أنا نعول عليك. وما بغيتش يطحكو عليك الشمايث، أما أنا ما عرفت شحال باقيلي معكم.
الجميع: الله يطول فعمرك أبا ويخليكنا بركة.
حادة ضاحكة: هي كنت غي أتبوحط ألبوحاطي. ولايني راك بخبيزثك.
بوشتى: ولياه إلى ما تبوحطشاي على مراثي لعزيزة وولادي علامن ماشي نتبوحط.
حادة: زعما زعما!!! اسيدي حتى نتينا راك عزيز علينا واخا فيك النكير بزاف وأدزاور على أقل حاجة، ولايني راك نتينا هو الشمعة دي مضوية علينا فهذ الدار.
الصافية: يا الله أجيو تتغداو راه الغدا برد.

وخرافثنا مشاث مع الواد وأنا بقيث مع الجواد وإلى اللقاء في الجزء الثاني.
وعلى المودة نلتقي.

وإلى اللقاء في الجزء الثاني.

توقيع أحمد لزعر التسولي

تصنيف : الثقافة التسولية,طرائف عمي بوشتة