سوق الغفلة

مشيت نتسارى في سوق الغفلة
لقيت ناسو غير الخلاطة
ها لي يبيع و يشري في نووار الدفلة
ها لي جايب شواري عامر سقاطة
و ذاك لي ساخط جافل جفلة
داير فيها صحيح هاز فيدو زرواطة
لآخر من لكذوب و لبهوت داير حفلة
هاز نيفو لفوق ما باغي يتواطة
جبت دويرة في رحبت لبلا
لقيتها عامرة ب اللواطة
كاين لي تلف هبل هبلة
عزيز عليه الخاوي و الشياطة
كاين لي من قلت الشي ذبل ذبلة
باش يعيش دار الحلقة ولا من الغياطة
كاين لي يكذب و يحلف برب القبلة
وجهو عندو جوج لوان كيف لفرساطة
كاين لي على الناس كا يتفلا
يبيع ليهم الدوا نصو غير بطاطة
ميزانو مايل صروفو صروف الزلة
فاضح السوق و منوض ريگاطة
واخا كبر و شاب باقي يتفلا
ليوم ولا لامين ديال الخلاطة.

توقيع: عصام الدين الشعري.

اقرء المزيد

البقولة

البقولة او الخبيزة تحتوي على كمية جيدة من المعادن المفيدة للجسم خصوصا الكالسيوم والمنغنيسيوم .يحتوي هذا النبات ايضا على البوتاسيوم والحديد وفيتامين  أ  و  ج.

البقولة هي مجموعة من النباتات لها تسميات خاصة في منطقتنا ( التسول ) : تيبي او البقول الحرين ، مشيطة ، خبيزة، حميطة ، السلك او السلق gرنينة الزرنيج.

هذه بقولة شتوية ربيعية وهناك بقولة صيفية تسمى الرجلة، والرجلة تحتوي على نوعين من النبات : الرجلة وبلاتو. تنمو في المناطق السقوية (البحاير).

بعد الطهي الأول يترك جانبا ونضع حزمة من القسبر والمعدنوس مقطعة رقيقة في طنجرة ثم نضع العطرية ( كامون ، تحميرة وقليل من السودانية ، الملح) نضيف فصوص الثوم الموجودة مع البقولة فالكسكاس وقليل من عصير الحامض وزيت الزيتون .توضع الطنجرة فوق النار مع التحريك الجيد بعد غلي هذا الخليط نضيف البقولة الموجودة فالكسكاس وتحرك جيدا كي تمتزج كل العناصر . بعد الطهي تقدم ساخنة مع بعض الزيتون المرقد بالحامض.

لطهي البقولة يلزم : حزمات من نبات البقولة .يغسل جيدا ويقطر من الماء جيد . يقطع بشكل رقيق ثم يوضع في الكساس ويوضع فوق قدر فيه ماء مغلي ليطهى ، يوضع معه عدد من فصوص الثوم بقشرته. تغلق جوانب الكسكاس كي لا يتسرب الهواء من الجوانب ويغطى الكسكاس كذلك. يترك يطهى جيدا.

بالصحة والراحة.

توقيع: رقية البورقادي.

اقرء المزيد

هذه فلوسنا

هذه:: نقود+،فلوس،+ عملة،+أموال + بقشيش،سميها ما شئت !!
لقد جائت في القرآن الكريم بصيغة الدرهم في سورة يوسف ★ الاية(20) وشروه بثمن بخس دراهيم معدودة وكانوا فيه من الزاهدين ★
وبصيغة الدينار في سورة ٱل عمران ★الاية (75) ومن أهل الكتاب من تأمنه بقنطار يؤديه إليك .ومنهم من إن تأمنه بدينارلايؤده إليك الا ما دمت عليه قائما★
وكذلك جائت بصيغة ،الورق في سورةالكهف ★ الاية(19) فابعثواأحدكم بورقكم هذه الى المدينة فلينظر أيها أزكى طعاما فليأتكم به،
وما تداول عندنامن أسماء العملات وسمعته من السابقين "" الحسني"" العزيزي"" الگرش.""
وعندما تفقد قوتها الابرائية تسمى ( الصوالد) !!!
أما ما لحقناه وتداولناه(( الريال)) خمس فرنكات .في المناطق الشرقية يسمى ( بالدورو)
هذا الريال لازال عندنا محافظا على اسمه.وقوته.ورمزيته ومهيمنا حتى على الدرهم بالرغم من التغيرالذي طال العملة؛!!!!!!
وأروع ما أبدعته دارالسكةالمغربية هي هذه الورقة من فئة خمسة وعشرون درهم،!!
لقد إكتفيت بنشر هذه الفئات التي اختفت عن التداول!!!
اما الباقي،،جيوب الاخوان عامره ،،
هذه مرت بأجيال وأجيال**
ولمستها اصابع رجال ورجال**
واستقرت عند عمكم جمال***
بعد ____ الفاصل____ سنواصل__
تحياتي واحترامي للجميع !!!!!!!//

توقيع: ذ جمال لشخم

اقرء المزيد

قصيدة مهداة للمجموعة

لكل الأعضاء والعضوات
كثروا المشاركات
والتعليقات
وكلشي بكلمات تسوليات
قصة او طرفة او شدرات
منساوش عمي بوشتى يا الخيات 
ايفوج علينا وعندو لكل مقام مقالات
ايقونة التسول هو وحادة والوليدات
عبد السلام وحمو والصافيا زينة البنات
معاهم انشبعو مطحكات 
وحتى حد ما يتقلق راحنا خيات
مجموعين هنا نحييو التراث
ونحكيو للشباب والشابات 
كيف كانو جدودنا ايطبقو العادات
ابناء وبنات التسول رفعوا الرايات
وتشجعوا تعرفوا بالقبيلة لكل الجهات
لهجتنا جميلة خاصها غي الإشهارات
ومنكم السفراء والسفيرات 
تكلموا بها وعلموها للوليدات
بلا ما نستعرو منا ونقول عروبيات
شوفوا جبالة رجال وعيالات 
فاين ما مشاو محافظين على اللهجات
ولقاو بلهجتم مسلسل gوزوه فالتلفازات 
او سواسا والسوسيات كيف محافظين على العادات
فكل مجمع والحفلات 
الزي والفلكلور فالعراسات
نتمنى شي نهار نشوف مسلسلات
ادهدر على قبيلة التسول والعادات
وقصص عمي بوشتي والأزليات 
وبوحيول ورحلة التسولي والحكايات
هادي احلام تسولية من التسوليات 
ولهنا تسالاولي الكليمات .

وعلى المودة نلتقي.

توقيع: رقية البورقادي

اقرء المزيد

دلالة الأسماء عند بني تسول

السلام عليكم ورحمة الله وبركاته

امسية سعيدة للجميع

قاموسنا التولي ديما ربيع
نبحثو ونقلبو ونشاركو جميع

هادو يا اسيادي مجموعة اسماء
كل سمية عندا دعوة من الاف للياء
وهاد الموضوع سبق وهدر عليه سي احمد أحمد لزعر التسولي انقول لراسي وااااء
ولكن راسي ايبقى يعبي ويجيب فالهواء
حنا خوت فالسراء والضراء
ولكن الدعاوي عندنا اكثر من الوباء
وعلى حساب السميات كيف ما الحظ شاء

احمد : دحمل الفرارح
قدور : يقدرو عليك
خديجة : يخدجولك
الصافيا : دصفا منك
رقية : يرقاقولك المفاصل
ادريس : درس الشوك
علي : يعلويك للسما وينفطوك
سهام : ينقرط عليك السهم
فاطمة يفطيلك المخ.)( هدي لي مبغاتش تفهملي). شني هي معنييتها وشني يقصدو بها
قاموسنا التولي ديما ربيع
.....
اوا كملو من عندكم
وااله يخلينا ديما طاحكين

توقيع: محمد البورقادي

اقرء المزيد

طرائف عمي بوشتى

عمي بوشتى صبح تحت لمزبلة أيخنق على شي كوانن دلقرع، والبقرة مطولة قدامو أضحي، وأيدندن : أحادة ديري هاه وديري هاه آحادة وديري كيش ميلودة، طاطا حادة والصافية فوق منو أيطرطقو عليه بالطحك
الصافية: سعداثك أيما أيجيب عليك بابا.
بوشتى گعذ راسو سكث ، ودشد فيه الصافية : زيد زيد سمعنا أبابا الله يهديك عندك الصوت بحال محمد الحياني
حادة: كاداك الحياني ديقولولو الشحم دجابوه فالعرس دبومعاز
الصافية: ألا أيما هذا حالمغني كان شحال هذي عندو شي أغنياث غزالين باقين أيگوزوهم فالراديون
بوشتى :أبنتي يماك هدرلا عالربعي وشريط ،أو راضية التازية فاي مشي دعرف هي الحياني
حادة :أنا مأنعرفشاي داك الغنا دالراديون مأيعجبنيشاي، ألصافية ألصافية شوف شوف هاذيك التعلب هاذيك، هو بداث: حي حاي حاي أياحليمو حاي.
دار بوشتى عيا ما يبحصص ومشاف بوتعلب: فاي هالتعلب ونتينا فاضحانا.
حادة: راها راه ،كمأدشوفشاي
بوشتى: أنا ماشوفتشاي، بالصح التعلب أدشوف ختا
حادة : وحتى الكلاب أيشمولا الريحة ياك
حدهوم رگبث مأغارب : فاي هالكلاب سمعتكم أدزگيو
بوشتى : سمعت الهدرة فخوثك وجيث دشوف شني كاين هههههه
حدهوم : دنفخم ودصلي على هيدورثم
بوشتى : لاي مشا عياد مشوفتوشاي هاد الصباح
حدهوم : مشا للغابة يقلع شواي دالدبغ هادي سوقاين وهو يدور عليها وماصاباشي كل
حادة : كشريث المخاطة أصاحبثي وهني راسك
حدهوم : ألحبيبة أنا أيعجبني الحليب دالشكوة مأدرشقلشاي على داك القزديرة منهار عملناهم ما شبعنا لبن.
بوشتى :أياو يالحق حتى أنا والله ياخصني وحدة حتى نسوق للارباع كمانصيب شي جلد عند بوحيول
البقرة هاهي دافعة بحرا نصغبوها.
إوا دابا نخليو بوشتى حتى يسوق يشري الجلد قولولي كيف أنصغبوا الشكوة، وشني هي الدباغ وكيف أنصغبوها
وعلى المودة نتقاشعوا.

توقيع: أنوار زياد

اقرء المزيد

أتاي عند آل تسول

مسا الخير عليكم يا المجمعين كلكم
جيت نشرك معاكم حد الكاس داتاي تولي مشحر على المجمر

اتاي عندنا عندو قيمة كبيرة . مناين ادمشي مزروب عند شي حد ( زعما دقضي غراضك دغيا ) ايقولك gلس نلقيو غي حالكاس داتاي .او فلان ما لقانشي حتى كاس داتاي .
هذا حد التولي عندو ولدو عمو قاري شواي وفيه حدالبلعة دالفهامات وايهدر معاه ديما على اتاي .ايقولو : شتي اتاي شحال فيه دالفايدة لصحتنا ؟ راه مزيان لشحال من مرط .
الى حرقاتك كرشك قل ليماك دحرق اتاي حبوب ودقو وشربو . دقة ببطلة .
الى كانو طراسك ايحرقوك شلل فاك باتاي مسوس .
الناس اللي مراطين بالمرط القبيح خاصم يشربو اتاي راه مزيالم بزاف .
السيد طلعلو الزعاف ورجع ايكره يسمع هاد الخطبة دولد عمو .ومناين ايجي عندو الصينية ما ادحيدش من حداهم . ايشرب اتاي قبل الغدا ومور الغدا وفالعشية وقبل العشا .المهم ايرزيه مزيان فاتاي وهو ما ايجيبشي معاه حتى وقية . السيد مول الدار طلعلو الgاز .
حد النهار هو جا ومول الدار جاب الصينية وgلسو يتجمعو . خوالو الكاس الاول شربو .قالو : الله على كاس مبرع .
زادو الكاس الثاني عاود قالو : الله على كاس مبرع . 
مول الدار قالو : اولد عمي عرفت ماشي دجي وايعجبك اتاي وشحرتولك من ولبارح .
الضيف : بدا ايبزق ويتgرع زعما ماشي يتقيا . قالو : هاد اتاي واقيلا فيه شي( مسبوط او شي وريعة 
هاد جوج كلمات غياثيات) . 
مول الدار بقا ايشوف فيه وقالو اولد عمي المسبوط ووريعة ايقويو المناعة .
قالو : ايا خيي حتى انتينة طحيث ادفهم فالطب .

دمتم سالمين . وعلى المودة نلتقي.

توقيع: رقية البورقادي

اقرء المزيد

طرائف عمي بوشتى

عمي بوشتى رجع للدار معطل صاب كلشي رامخ، حشا يدو من فوق الباب وزول العراطة ودخل ساقر باش ميفيق حد، طلع للغرفة صاب الصافية ناعسة مع يماها، نخصا مكوارعا: الصافية ،أصافية ،الصافية.
فاقث طاطا حادة والصافية باقيا أدشخر.
حادة: أه أه أه شكووون أيما لحبيبة ، أه ،أه
بوشتى : مالك ياهاد الوعد عاونيث أدزهر، نوض بنتك دمشي لبلاصثا
حادة : الصافية ألصافية
فاثث الصافية صابث باها واقف عند رجلاها سلمث عليه حبثلو يدو وناضث مشاث للبيث ديالا، وعمي بوشتى زول الجلاب من عنقو وتكا قدام طاطا حادة
حادة: إوا على سلامثك (مبقاتشاي أدزهر) وشفتك جيث غي بوحدك فاي خليث المرا
بوشتى : شمن مرا عاونيث دماشي نجيب معايا
حادة: المرا دمشيث دخطب أو جراو عليك
بوشتى: هههههههه (حتى بانثلو الطرسة دلعقل) ، إوا غي عبسلام خطبنالو، وحمو باقي صغير ولمن ماشي نخطبو هاد المرا
حادة : ونتينا زعما كرهتا، ماشي تابع الحيبورة قد ولدك حتى لفاس
بوشتى : وشكون ألالة قالك أنا كنت ففاس
حادة: لقيها غي مزيانة لياه الخبر أيغيب
بوشتى:ايه كنت ففاس ومشيث لعند داك الطفلة دجاث لهنا داك المرة، ومشيث غي باش نسد الفيفان دعباد الله، وباش مدبقاشي مسكينة
قاطعاثو طاطا حادة: يسكنوها الجنون شمن مسكينة المسكينة هي أنا دفنيث شبابي معاك مني كانو القمل مع وذناك وصبرت معاك عالحلوة والحارة ودابا ترخف عليك الحال طنشو وذيناثك وبغيث دزوج علي يحسابك أنا ماشي نكرب عليك والله عليك لا نكربت، الحمد لله عندي وليداثي يخدمو علي ونعيش فوسطم مبرعة، ونتينا سير تبع داك المقايق دبلارج وشوف كدقبل عليك، الراجل مأينوض حتى......يسمعوه الجماعة وقالك ماشي يزوج الطفلة قد بنتو،
بوشتى: لله ياهاد المرا مقلي شني خدامة أدليط ودعجن غي بوحذك، شكون قالك مشي نزوج أو خاصني نزوج ونتينا أدبقل مجنابك ، أنا الطفلة داك النهار كنت أنتملغ معاه قلتلا كمدعبينيشاي حسابني أدعرف دتملغ سعا هي فهمث الغلط والناس دلمجموعة عباو عالهدرة دسي إدريس والملاغة ديالو وحسابلم بالصح وأنا معروف فالقبيلة منبغيشاي بحال هاد الهدرة تسمع علي ونوضت ألالة برجلي مشيث أندور على داك الطفلة حتى لفاس وتلاقيثا وبينتلا شني كاين باش ميبقاشاي طالع فيها الحال مني، وراها ألالة سلمث عليك وقاثلي راك عندا عزيزا بحال ميمتا، وراني عرضت عليها دجي لعندنا نفديولا داك النهار دمشاث غطبانة من عندنا، لياه ألبوهالية أنا نقد نبدلك ألموجحلال ديالي، أجي بعدا لهيثني بالهدرة وما سقصيثكشاي مالك كنت أدزهر
حادة : فقايصك أبوشتى فقايصك أنا قالولي مشا مع داك سي إدريس أيهدر غي عالزواج قلت راه عمرلك عقلك ومشي دلقيها بالنية، ما فيكم تيقة ألرجال
بوشتى : أدغير علي زعما، ولياه ألحولة نقد نبدلك أنا بعدا وشكون هذي دقد دصبر معايا كما صبرت نتي َدرفذلي همي وزعافي قدك نتي، نتي هي النوارة دقلبي والضو دعويناثي كاينشي دأيعمي عينو بيدو، راه ألحولة ميفرقني معاك غي الموت.
درعاثو طاطا حادة وباسثلو راسو : لهلا يخطيك علي ألعوينة ديالي
بوشتى : آي هاي عالروميسية
حادة : شني هي هالروميسية عاونيث
يوشتى : نوض عملي حالدكة دلقهوة وأجي نقلك شني هي الروميسية.
فالصباح صبحث طاطا حادة فايقة بكري ، خرجث البقرة والحمارة ونصبث الفراح طيبث حالحراشية قد الرويضة دالكار، ناضث الصافية صابث يماها دبايثة دزهر أدنقز فالمراح بحال البليق وراشقالا
الصافية : صباح الخير أيما كيف صبحت
حادة: الحمد لله أبنيتي نوض داك بوزنافر قدامك وأجيو دفطرو
الصافية: إوا شفت أيما أنا أنقولك خاصك غي بابا ودروح ونتي أدقلي كتبولي ، أنا عارفة الدوا ديالك، هههههه
حادة : سير الله يمسخك سير نوض خاك وباراكا مالتفلية
تجمعوا عالفطور وشبعوا طحك على طاطا حادة، نخليوهم الله يسع. أيامهم ونخليكم على خير
وعلى المودة نتقاشعوا.

توقيع: أنوار زياد

اقرء المزيد

طرائف عمي بوشتى

السلام عليكم ورحمة الله،
جيت يا سيادي نحكيلكم قصة عمي بوشتى منين هبط لفاس،،
بسم بها نبدا وعلى النبي نصلي بعدا،

عمي بوشتى، شد الكار وهود لفاس باش يشوف بنت المدينة،
نزل من الكار فباب فتوح ،وهو بقى ايبحلق ويفافي على طاكسي باش يركب ويمشي لموطاع لي نعتولو،،
وصل عمي بوشتى لوسط المدينه ،ومعرفشان فاين الطريق ديشد حسابو غماشي يوصل غيجبر بنت المدينة ادعاينو ههه مسكين غشيم،،،
عمي بوشتى لي gازت من حداه ايقول هي هادي ،مسكين مخلوع معرفت واش فرحة ولا شني ، وهو حتى سيفتثا نساها مبقاش تابث عليها،،
عمي بوشتى طحى ايهدر غامع راسو ،،
كايانا دابة بعقلي ولا شني؟
تابع الطفلة حتى لفاس باش نشوفا ، واش دقبل عليا ولا لا . يانا واقيلا تبوهلت حادة ديما صابرا معايا وعاد هاهي جمعت الكميمسة وعطاتالي شريتلا بها البقرة وشاطلي الخير والبركة وانا تابع الريح .الطفلة ما عرفتشي حتى شني فراسا وgالس انخرف
معندي حتى النيميرو ديالا باش ندورلا الطريفو ،اولادي لحبايب اولادي ،فبلاصة منبقى مع الشريف والسي إدريس فتازة ونترافgو انا والشريف للبلاد ،
ماجي تابع الطفلة بحال تابع الما دالواد،،
عمي بوشتى  ماشي هي هادي دماجيا حيثي ؟؟

فوزية شافت عمي بوشتى وخبعت وجاها بصاكا باش ما يعرفاش سعا هو وقفا وقالا : سمحلي ابنتي نسقسيك ؟

فوزية،،،اهلا عمي بوشتى أشخبارك لباس عليك وشخبار موالين الدار لباس عليهم،،
عمي بوشتى،، اهلا وسهلا بالالة فوزية ،ياودي فابن من دصبح الحال ويانا أندور عليك ،،
فوزية،, ،، ياك لباس عمي بوشتى وفين كدور عليا ، مدينة فاس كبيرة زعمة غتلقاني دغيا
عمي بوشتى،،، سمعني الطفلة انا ماشي نجيك نشيان ،
فوزية،، خير اعمي بوشتى يانا كنسمعك شني باغي تقول

عمي بوشتى:
انا ماشي نجيك الصراحة ، انا الهدرة دهرت معاك داك النهار فدار عمك غطحك بها وحادة غجننتا بك وبحالا مانصيباشي. هي لي عشت معاها على الحارة والحلوة وهي لي صابرة على هبالي ومربية لي ولادي
اما نتينا ، مدقبلشي برجل شيباني قدي ، انت مدفهمني ويانا منفهمك ،،و حادة هي العشرة الزينة هي الزمن الحلو ،،
ويانا ابنتي داك نهار ملي جيت للتول لعند عمك وطاطاك حليمة اطحكت معاك ونتينا يحسابك بالصح وغطبت وهزيت صاكك ورجعت لداركم وانا عمك قالي كنت ناوية دgلس شي سيمانة عندم . انا جيت غي باش نحيد سوء الظن .

صحابي وناس دلمجموعة لي ايكتبو عليا ور جعت كل عشية عايش بالنكيد مع داداك حادة ودقلي شوف شني كتبو راها الصافية قرات عليا.
انا فوزية: اعمي بوشتى وسمحلي مكنتشي عارفاك ويحسابلي هدشي بالنية وحتى يانا جاني بحال الى خرفت وبديت نقول انت راجل شيباني وطامع فبنت صغيرة من المدينة . سمحلي ارالي داك الراس نبوسو واجي نطحكو حد الشوية
وعاودلي كما عاودتي للناس د لمجموعة ش قصة على طفولتك باش دكمل لعشية.
عمي بوشتى: شوف ابنتي افوزية لبغيتني نعاودلك خصك درجع لعندي للتول و نضايفك وضايفك داداك حادة ودتهلا فيك الصافية.
انا فوزية: وليني اعمي بوشتى يانا حلفت لبقي رجعت للتول كبغيت دحنتني
عمي بوشتى: لاش مشي دحنت صوم تلتيام او صدق شي صدقة على ش مساكين وعبي الاجر وهنتينا مامحنتشاي. الحولة كاينشي شي واحيد ايحلف على بلادو ميرجعلاش التولي لي ناهو تولي ما اينكرشاي بلادو ويحلف ليلا لارجع.
دابا مشي نخليك بحرا نروح لداري ونشوف لفرحة د حادة مع لبقرة لي شريتلا وكمنلحق سي ادريس والشريف البورقادي قالك واقلا مشي يقصرو عند زكريا موسى.
فوزية : سمحلي اعمي بوشتى وسلملي على دادة حادة وقولا دسمحلي حتى هي وتهلا فيها .

ودبة نشوفو سي ادريس ابوالياس الاشهب ،شني يقولو وباش ينصحو هههه،

والعشرة الحلوة عندها ناسها
تحياتي لكم

توقيع: فوزية لمعلم

اقرء المزيد

طرائف عمي بوشتى

السلام عليكم ورحمة الله وبركاته.
طاطا حادة خرجث عالباب مكمسة راسا فحد ليزار أدعيط على حمو : حمو آحمو، أفاينك الضناية دالويل فاينك؟
حمو : أهانا أيما غي دقيث للحمارة فهاد تاورة مور الدار ، شني خاصك؟
حادة: گوز أَوليدي سير لعند لفقيه سببلي أنا آنموث أوليدي
حمو : أيما شني مشي يحلقلك هاد لفقيه ، يالاه نهوذك للطبيب يضرب لك اليبرة
حادة آوليدي أنا عارفة هادشي دفيا موشي دالطبيب، سير واسكث أو غيب غي كمارثك من قدامي وهنيني.
حدهوم شافث حادة گالسة عالرفدة دالباب مقيبسة بحال دفيها بوقيبش ودجي أدجري: أمالك ألزغيبية البارح عاد كنت صحا سلام شني سلط عليك عاونيث؟
حادة : إوا هانتي أدشوف أجارثي لحبيبة غي ما سلاط علي، الراس ديالي بحال البيضة الفاسدة ألحبيبة وعطامي رايبين علي.
حدهوم : هاذو ألحبيبة غي لرياح، كغي سردت حمو عند لفقيه يكتبلك، يدو مزيااانة داك النهار عاد كتبلي عندو عياد وروحت دقة ببطلة، ورفذلي الخط قال لعياد خلفث عليهم فشي مجرة، وبالصح أنا داك النهار قيالة نكنس فالمجرة حشاك دالروا دلبقر.
حادة : قلتاااالو أحدهوم والگنس داليوم ما بقاث فيهم نية، قالك شني مشي يعملك لفقيه، يالاه نعبيك للطبيب.
حدهوم : لدمشيشاي ألحبيبة لبوطبيب، هاذو فيك غي لرياح ويلا مشيث للطبيب ماشي يزيدو يتحارجو عليك، لياه كشخال هذي كنا أنمشيو للطبيب كنا أنعملوا النية فالساداث والفقها وكنا أنبراو وهالگنس داليوم يالاطيف ما بقاث فيهم لا نية لا حيا لا حشمة، الصباح مشيث نجيب حالنقلة دالما مالعين وأنا نصيب الدري ديامنة دموح ماجي يسقي هو والطفلة دعامر ولاقين اليد فاليد شوف نتي وعمك صباح
حادة: إوا شوفلك إوا داك المهراز دالكحول عاونيث خرج منا طبغيلان، هاذوك بعدا قدا وبابثا دابا الشارفين وهتروا ، ماكاينشي حتى من بوشتى دكنت أنقول عمرو يغدرني ، قلش وذيناثو حتى هو وقالك خاصو يزوج ، لله أجارثي كالراجل بقالو غا الفاس والقياس وخرج عقلو.
حدهوم : لياه ألحولة الرجال فيهمشي تقة نتي نية ومقلوبة عليك القفة، أييه وفكرتني فايناهو ماشفتوشاي هالصباح
حادة: مدشوفناه ولبارح مني كان مسوق يشري البقرة سرد البقرة مع حمو وقالك مشا مع الشريف وشي واحذ لتازة، وانا بنيثي تيقت سعا هو هوذ لفاس عند داك الطفلة دجاث عندنا المرة التالية، قالك باغي يعبيها
حدهوم : شوفلك إوا على بوشتى ما ساهلشي، وهي بعدا دقبل عليه
حادة : كما طمعاثوشي ميتبعاشي حتى لفاس، بالصح دوايثي أنا دخلتا لداري قالثا اللولة : ضربوني ياكسوري، دابانصيبو داخل علي بها والله أودي غي يلا ما قثلتا ونخليها متورخة
الصافية خارجة بالقفة دالغبار من المتحم : صباح الخير أطاطا حدهوم.
حدهوم: صباح الخير والربح أبنيتي، لياه نتي مدعرفشي دمشي دكتب ليماك شي حجيب مأدشوفشاي كيف طحاث أو أدعاينوها حتى طيح فالفرش
الصافية: مرط يما ما يداويه لا طبيب ولا فقيه هاذوك غي الفقايص دبابا غي يجي دابا دروح، الحووووب أطاطا حدهوم الحوب ومايعمل
حدهوم : خيااار إوا نتي دعارفة شني بها
حادة : أطحك علي أبنت ليهوذي لاخور ياك ، مبقيثو لا أدحشمو ما أدستحياو الگنس دبوربح، إوا وصل القفة للمزيلة وگوز نقل لداك البقرة، حتى نتي مزال زمانك قدامك ودجرب لا تقلقشي.
وحتى يرجع عمي بوشتى من فاس عاد نشوفو حريرثو كيف ماشي دكون ودابا نخليكم على خير.
وعلى المودة نتقاشعوا

Haut du formulaire

توقيع: أنوار زياد

اقرء المزيد

ذكريات الطفولة لعمي بوشتى 12

 
باسم الله هي الأولى وبالصلاة على نبينا كلامنا يحلى .

تحركت ياسيادي وانا كلي شوق للقاء احبابي اليوم نتلاقى عمي بوشتى لأول مرة.
اسمعت اعليه كثير وعلى اغرايبو لي عملها فصغرو واليوم نوبتي يحكيلي حتى انا كما احكى لخوتي ونتعرف اعليه رآه قالوا الناس لولين معرفت الرجال كنوز ومعرفت النساء گرگاع ولوز.
أوصلت للقهوة المعلومة أجبرت نبيل يسف كيف العادة شافني افرح من حيت علموا الشريف بلي رآه جاي باش يوجد لينا مسعود لغدا لحقاش عمي بوشتى من نهار لي شاف مسعود فالتصاور وهو حالف غيلا زلغلو بوحبل الى جابثا الطريق.
وصلوا الشريف وعمي بوشتى وقبطنا لعاقبة لدار نبيل .فالطريق اتصلت بخويا لفقير عبد المالك واعلمتو لعشا عندو الليلة ومعايا ضياف اعزاز عمي بوشتى وصاحبو .
تغدينا عند نبيل وخلينا حمو يقصر معاه من حيث عجبو يباث قصار فلقهوة مع الشباب.
شدينا طريق عند لفقير غير شافنا عنق عمي بوشتى وقلوا اشحال وانا باغي نتعرفك اعليك من حيث التول كاملة كتهدر اعليك .تهلا فينا مزيان وعمي بوشتى جاه لفقير على گانتو بقاوا هو وياه ينشدوا وانا والشريف نتفرجو ومرة مرة نگرو اعليهم .مرة نقلهم جيبونا ديسك دبلخياطي مرة نقلهم كلموني عنك د كلثوم .قصرنا مزيان واحكينا للاخ داك شي اعلاش جينا قلو شوف اعمي بوشتى لبقار فالروا الصبح اختار دبغيث انا الدراري دكانوا ايقابلو سمحوا في وانا اعييث وهاد البقراث بزاف اعلي .قلت ليه فاين مشاو الدراري قلي واحد رآه فكتامة والاخور رآه فوجدة . عمي بوشتى غير اسمع وجدة بدأ ايضحك قلنا ليه اش ضحكك.قالنا فكرتوني فوجدة عندي قصة معاها فالصغر قلنا ليه والو تحكي لينا آش طرأ ليك وبدأ يعاود.
كنا ياخوتي صغار وكانث لعنيقة دالصيف وطلعلي الزعاف كما اولاد خوك دبا ونسمح فبابا ونزيد فيه لوجدة مع شي دراري تلاقيثم فلحد قالولي نمشيوا نخدموا فوجدة أو نزيدوا لانجيري قلتم آخوثي انا زاوي قالو لي دبر آصاحبي غير باش دمشي ودبا نخدموا ورا ما تبرع
شدينا الطريق لوجدة وصلنا مع الظهور تغدنا وقبطناها رجل لبني درار اعينا وگلسنا نرتاحوا عباثني عيني ونعست تقاراوا اعليا بني كلبون وسمحوا في وزادوا فيه من حيث انا كنت اصغير يلاه شي سطاش لعام أو ما واصلاش وخافوا ميبغاوش يخدموهم وانا معاهم.المهم فقت لقيث راسي بوحدي زاوي مكنكساب حتى قطيب دلمسكة .بقيق انخمم ونقول شني لقيث انا لراسي وحتى باش وصلت لوجدةغير سارق واحد بيبية للواليدة وكانث محطناها بعتها وزيت فيه .المهم قلبتها بالرجعة لوجدة وصلت للساحة دسدي عبد الوهاب وحطيث واحد ليطرو دلما كان فيدي بين رجلاي وگلست نخمم لاين نقبط كرشي ادغرغر بالجوع والجيب خاوي انا على داك الحالة وانا نهز راسي لقيث الناس مجوقين اعلي وكايعاينوني نبدا عندبالم انا احلايقي اجديد وكانث الساحة عامرة احلايقية ها. لي عندو قرد ها لي عندو احناش هااشيوخ ولگصاصبية وزيد وزيد المهم طحث لي الفكرة فالراس وأوربا اعليهم وبقيث نقول قرب قرب قرب دجرب هنا لفراجة بلا احراجة زيد تمتع بلا ما ضيع المهم أغلقت اعليهم مزيان وخويث داك ليطرو دلما وحطيثو وبقيث نقلهم هاذي قرعة واشمن قرعة عينيك على لقرعة تشوف لعجب انا ياسيادي كما كاتشوفوني بطولي بعرضي وبشحمي ولحمي اليوم تشفوني فوسط هاذ اليطرو قولو تسليم عاودو التسليم قرقبو اعليها اسوارت الربح.المهم حسيت بالناس تخدروا ولكلامي يسمعوا ويطيعوا لي نقلوا گلس يگلس ولي قلت ليه ارجع لور يرجع والى قلتليهم سفقوا يسفقوا .قلت هاذي هي لوجيبة وبديت اعليهم هذا درهم هذا عشرة هاذا مائة وهوما كيتحلبوا وعينيهم مبرقين فليطرو .أجمعت لحصيصة اعملتها فالجيب ونتسلت بين الصفوف ونعيط هنا كانوا خليثم حالين فاهم فليطرو خاوي.اوا وارجعت للدار الواليد الله يرحمو كما اعوايدو مطلقنيش بلا اخلاص واخا الواليدة الله يرحمها اسمحثلي فبيبية لحقاش ملي مشيث وهي ادبكي ودقول مصاب يرجع لي غي اوليدي.
الشريف بقا كيتكور بالضحك هو لفقير ونعسنا واحد الساعة على ما ودن لفجر ونوضنا صلينا وافطرنا و جرينا لبقرة لي اختار عمي بوشتى وخلص داكشي لي بغا وعيطنا على مول 207 شارجيناهاوشدينا الطريق عند نبيل وحمو اركب حمو مع البقرة ف 207 وعبا لبقرة ليماه.
أما عمي بوشتى واشريف وانا دخلنا لتازة باش الشريف يشرب نورمال ديالو ويرجع لبلاد وعمي بوشتى ماشي يمشي لفاس عند فوزية لمعلم باش يحكي ليها الحلقة 13
والسلام عليكم ورحمة الله.

توقيع: أبو إلياس الأشهب

اقرء المزيد

طرائف عمي بوشتى

باسم الله نبدا الكلام والصلاة والسلام على خير الانام
تحية احترام وتقدير لمجمع الكرام

عمي بوشتى من بعد ما فقص دادة حادة وخلاها نادبة ومقلية
مشى للحد يفوج مع الدراري دالجمعية 
الجلابة بيضة والبلغة صفرة والرزة مقادة حتى هي 
وصل تلاقى مولاي محمد البوزرازي سلم عليه وسقساه علي البقية 
قالو راهم فدار الشباب لاقين حد الصبحية 
قالو شني عندكم فالمرنامج ؟ كاين شي مسرحية ؟ 
قالو : كاين مسرحية ادهدر على السلامة الطرقية .
عمي بوشتى : وماشي يجيو الجدارمية ؟ 
مولاي محمد : اييه وماشي ينشطو القضية .
عمي بوشتى : وعلامن عرضتو فهاد الصبحية ؟ 
البوزرازي : واعمي بوشتى هذا ماشي عرس باش نعرضو ، هادي حملة تحسيسية . 
عمي بوشتى : وشكو هي هاد حسيسية ؟ 
البوزرازي طحك وعامل الخاطر لعمي بوشتى وايشرحلو غي بشوية .
وصلو لدار الشباب وقدم عمي بوشتى للناس دالجمعية 
وعطاه كرسي فالصفوف اللولية وقالو : ها انت انا نمشي نصور غي شي شويا 
عمي بوشتى فرحان وايتفرج ويصفق شويا 
دار على ليمن ديالو جبر حد الشخصية تولية 
جا نايض يهدر معاه وهو سبقو ودرعو وقالو كيف جاتك المسرحية ؟ 
قالو : يا ودي االسي احمد راني تعلمت بالنية 
شلا حوايج هدرو عليهم هاد الوليدات وعطا الله الصحة لشباب الجمعية .
السي احمد : ياك فرحان وعرفت شني هي السلامة الطرقية ؟ 
عمي بوشتى : الله ياودي يا ولد لزعر التسولي انا انطيرا فاين ماكانت هي 
السي احمد : اوا دابا ماشي نخرجو مع الجدارمية 
عمي بوشتى فرحان خرج مع الناس اللي حضرو فالحملة التحسيسية 
وسمع الشروحات وشاف التمثيلية 
وعاد يرجع للدار يعاود لحادة والصافيا شني شاف واسمع على السلامة الطرقية

والى نشاط آخر من طرف شباب الجمعية لكم مني تحية عالية.
وعلى المودة نلتقي

توقيع: رقية البورقادي

اقرء المزيد