سلسلة علي بوحيول: الحلقة 10

                      بوحيول والديب: 1

بعد السلام بسم الله أحسن باش يتبدا الكلام ،والصلاة والسلام على نبينا خير الأنام.

عز الخيل مرابطا، ولخيرها مفروض وقارا، ركوبها شان وهمة ، والعيفة فالركوب ولد الحمارة.

عز المال التجارة، وراس مالا فلوس وشطارة، والأجر فالفلاحة ومال ليجارة.

عز الطيور وكارا، وعز المرا ولادا ودارا، والراجل عزو فالشكارة، يدورو بيه الطماعة والحزارة يلا عمارث شكارثو، والمزوزط ربي يشوف فحالثو، القراب يبعدو منو ،والحساد يتشفاو فيه، ويترجى الخير فالبعاد وما يصيبو ففاميلثو.

علي بوحيول أسيادي باين مافيه معقول،من سميثو ، بصح هو دغري، غي مأيطلقشاي ديتعدى عليه أو يشمثو. راجل قد حالو وبسيط، مغير المطيرة دالدويور  ما أيعلامشي حتى ميط، والدراري صغارين  غي الفرطيط، وحالحمار غزثلوا زغوذة السبيب دشوالو بقا gرطيط .

فالربيع الحليب عند الناس أيبقى غي أيتهرق، وهو غي من خير لجواد أيتعتق، واخا مأيخليوهشي بلاشي، الدواقة مأدشبعشي، وبقا بالو مع ولادو وحلف بلا حليب ما يبقاشي  بصح البقرة ميقدشي بها ما عندو ما يوكلا ولا ما يعطيها.

سوق لبرgم وشرا حالمعزة دالدمان من تم. ولدثلوا تبارك الله ثلاثة: جوج جذوعا وجذعة.

جذع فالخريف به سبع، وجذع تعاون به فراس المال دبحوا فلارباع،والجذيعة ،شبطلو فيها خالو يحيي بها الزريعة.

عام gازث وجا الربيع وصاب عندو غي المعزة بوذناها، بصح دافعة، وأيطولا مرة مرة فالقسيل دالدويور درعا.

حالنهار الشمش سخونة، طول علي بوحيول المعزة فالدويور قدام حالكركرة، درعا شي وردال وبوحمدونة، وطلع لحالصويف لحالبلاصة مسمرة،  يسمر مع الدراري ويتكيف.

إوا راكم عارفين الكوايفية، يماهم سيمانة وهي ميثة حداهم ،عاد دفنوها الزغيبية.

بقا علي بوحيول مهالشقيف لهالشقيف ، نسا المعزة ويخلط عليها الديب ويقولا يا جيف.

شافوه الناس مالدوامة وزg او عليه، وبوحيول بحا بشي مشعط نزلت فيه، مشى للمعزة أيجري صابا جايفة والديب طلع على gرنة الغابة مسري  وبقا مسكين أيغرذ بحا دماثلو البكري:

آيما لحبيبة أيما، أكغي دخلاوها بعيناهم مكلسة، يجي الديب يفرسا. أيما وما توخرت نهار ما تقدمت نهار خلقنا قد قد أنا وقلث الزهار أيما، ودار جيهث gرنة الغابة وبقا أيحلف فالديب: والله يابوكسالة هالليلة نشوف باباك من بابا، عمك علي ملقاوهاشي به حتى الرجالة..........

وبقى بوحيول أيبكي ويدمع والدشار كامل أيسمع، والمعزة قد البقرة قدامو مg طة، ووليداثو والمرا غي دأيجي عندو أيشبعو مخطا.

بوحيول ما ماشي يgوزاشي للديب اكل، نعاينو ونشوفو شني عندو مع الديب من معمول.

ترقبوا انتقام بوحيول

                          وعلى المودة نتقاشعوا

                         توقيع : أنوار زياد

تصنيف : الثقافة التسولية,طرائف تسولية