ناض حمو يخيط الطفر دلبردع، غي دخل مد يدو يجبد المخيط وسبايلو من كرن، وهي دبان لو حد الحية قد أمارالله ممكطة وأدخرج فلسانا. حمو حدا شافا وهو يبقى حال فاه وأيشر بصبعو حيت عندو عقدة مع لحيوي من ذاك النهار دي جاو عيساوة للدوار وجابو معهم شي لفاع قاد زاكلو، وبقاو أيوكلو الدراري دالدوار، غي وصل الدور لحمو وداك الحية كانث عياث وطلعلا الدم من قوة جبد من الصندوق رد ليلو، المهم هي موالفا غي أينزلا مولاها على الكتاف ددراري وصافي، داك الساعة هو نزلا على الكتاف دحمو وهي تلوا لو على عنقو كاث ماشي دجيفو، مولاها أيجر فيها وهي تلواث وحلفث ما دطلق حتى شدا من راسا وتكا عليه عاد طلقث، ولايني حمو كان قلبو ماشي يسكث، من تم وهو غي أيشوف الحية أيتسمر فبلاصثو، المهم الصافية تمث خارجة وهي دشوف خاها واقف وماد يدو وموقف صبعو بحال دا أيشهد، وهي دعرف السبب، دخلاث للروا أدجري وجابث حد البالا ودفعث حمو بعداثو، وضربث الحية للرقبة. وقبطاثا من شوالا وبقاث أدجري عليه بها وهو هارب وطالق الزكى. سمعم بوشتى وهو يبقى أيعيط.
بوشتى: الصافية الصافية أشني كاين؟ سمعت ذاك الحلوف دخاك طالق العداو ياك لاباس.
الصافية: غي صاب حد الحية فكرن وخاف منا حتى جيث وقثلتا بالبالا.
بوشتى: ما قدتشي داكلو بلحلاسة لاخر، أيما لحبيبة شني ولدت أنا، وعلاش خدام أنضيع خبزي. الدري قاد الحمار وهو أيخاف مالحية.
حادة: زعما نتينا ما أدخافشاي، مصاب كا كت غي دسكث، عاقل نهار دي كت أدنقل القمح وهزيث حد بومراياث فالدرع دالزرع؟ ياك ربعيام ونتينا فيك الرفجة، أدشوف الشريط أدبقى أدصفك.
بوشتى: زعما نتينا حرام كا دسكث، وودناك عل القرص، الله يخليها سلعة، كي ديما لاقفاني.
حادة: أنا غي أنفكرك حيث شفتك أدصغب فيها الراجل.
حمو: نوض بعدا دشوف قداش داك الحية، على رقبثي يا فيها شي جوج ميط، أنا مديلي نشوف كا شت بحال هذ الغضاب.
بوشتى: ينزل عليك داك الغضب، لاواه فيها كولوميط!!
أودي الله يعطيك الصحة أبنتي، أنا والد الصافي ماشي الصافية.
عرفت وما يجيك مليح أبو ركابي تعلم طيب الخبز ودحلب البقار، وجلس فالدار وخلي ختك دمشي دخدم فلخلا.
الصافية: لاواه أبا!!! الراجل ما أيتعيبشاي واخا يكون زحاف.
حادة: ألالة لعجب، هذي أول مرة أنسمعك أدافع على خاك، ما عرفت دمن هد الحمار دماث.
الصافية: لياه كا ماشي راه خاي زعما!! وأيعمر علينا الدار، خاصو غي يتعلم يقلب الدجاجة كا فيها البيضا، ويرجع هو هداك.
حمو ضاحكا: ترااااك دحزن، ما صبت ما نتعلم؟ غي نطلي صبعي بالزق؟؟.
الصافية: إوا دخل لكرن جبد المخيط راه مشى لحال.
حمو: والله ليلو لا دخلت، أجي أخيتي جبدا أنا مزاوك.
بوشتى أيسمعو ويبقى أيتغيدد عليه: أيما لحبيبة على بنشماثى لاخر! أيرغب ختو دجبدلو المخيط.
حمو للصافية: إيوا شتي ها نتي فضحتنا الله يفضحك.
الصافية ضاحكة: صافي ها هي، يا الله سير خيط الطفر دغيا.
حمو بدا أيخيط فالطفر وهو يسمع شي صوت غريب فالداموس. دخل أيجري وهو يصيب لحمارة ولدث حد الزحش.
حمو ضاحكا: آآآبا آآآبا، الحمارة ولدث حد الزحيش، مبروك عليك.
بوشتى: كاين شي زحش قدك، سير الله
ينزل عليك الغضب، أدباركلي فالزحش أبليهودي لاخر، سير رطع معاه اللبا راه بحالك بحالو مفروقين غي بلودناين.
حادة: صافي خلي الحمارة دروح وسير طلب البغلة دعمك عياد باش دلاقي خاك راه علاين يخلط.
بوشتى: موحالش يبغي عياد يعطيه البغلة، راك عارفاه ما أيقد يعطي يبرة بلا ما يشاور داك مو سرابط دحدهوم.
حادة: إيوا شتي، ها نتينا حتاجتا دابا، ونتينا خدام عليها البارح بالمعيار والخطا.
بوشتى: ولياه أنا لخاطري، هي دي ما أدعرفشاي دهدر.
حادة لحمو: شوف أوليدي أنا ماشا نطلب البغلة لعياد كما على الله دحشم مني داك المدعوية دحدهوم ودعطيها لي، ونتينا بدل حوايجك ومناين نجي نصيبك واجد.
شكون دي أيعرف معنى: "عيساوة أيوكلو الدراري دالدوار" هذي أيعرفوها غي جيل الستينات والسبعينات.
على المودة نلتقي.
توقيع أحمد لزعر التسولي
0 commentaires:
Enregistrer un commentaire