عمي بوشتى في فاس 12.

روقية : الدقيقة خمسة وسبعين النتيجة دائما واحد لصفر لصالح المغرب الفاسي تغيير في صفوف فريق اتحاد سيدي قاسم خروج بلال الدنكير ودخول اللاعب التسولي حسن لشخم Hassan Lachkham
بوشتى : هاهو دخل هاه . ايه يا العفريث
السي محمد الخريرز : ايوا تفرج دابا ابوشتى وشوف الفن دالكورة
بوشتى : ليه كايانا ما انعرفشاي داك ولد لشخم تفرجت فيه داك النهايراث والله ما دقول يا الدجن ايطير بحا البرق
أشرف : أش عندو ما يدير لا هو ولا غيرو . شوف شوف أناري على اورجو gداااااااش
عمي بوشتى : هاء . ولياه وقف داك بوركابي ؟ كا حول كا شني ؟
اشرف : راه سيفلا لاربيط اورجو واش ما بانليكش ؟
عمي بوشتى ما فهم والو وبقى مقابل غي شكون دي ايعلي الكورة فالسما بزاف وشكون ما علاها كثر أينوض يصفق عليه .
روقية : الكرة عند الحارس بنمبارك عند الرواني كيمرر لعزيم عزيم عند حسن لشخم كيدخل لمربع العمليات كيراوغ المدافع كيراوغ الحارس اوووووو كيسجااااال gوووووول gوووووول
عمي بوشتى : الله يرضي عليك أوليدي الله يعز التسول فاين ما كانو ها بوجور هاه
أشرف : ما صدقتيش أعمي بوشتى كان يحسابتليا انت معانا ساعة انت مع غانا
بوشتى : انا مع التسول اولدي وزايدون بحينا عاد فرحت معاكوم وخصني عاوث نفرح مع السي محمد لخريرز الأستاذ ديانا باش ما يغطب و يطلع فيه الحال .
روقية : الكرة فوسط الميدان عند بريكل كيمرر للصنهاجي بدورو كيعطيها للسكيتيوي كيراوغ و كيدخل المدافع الرواني بقوة و الحكم يعلن عن ضربة جزاء . ضربة جزاء لا غبار عليها لصالح المغرب الفاسي .
بوشتى : اكاينا الغبايرا عليها قالا شني ادقول حتى انتينا وااااء . بالمصخوط لاخور لوالو عكيلة وجابو منفوط على خنافرو كان مشي يقرطو من الوص دالطهر .
السي محمد الخريرز : ما فيها والو أبوشتى لا دزيدشي فيه حتى انتينا راه غي قاصو وهو يتلاح . هاديك الطيحة غي تمتيل واها .
بوشتى : لياه قالا غي تمثيل هو دحمرو وكان مشي يونزرو من خنافرو و جابو فاط كان مشي يهرسو من محكريش وادقولي تمتيل .
روقية : كيستعد السكيتيوي .. قداف وااااا اصابا . الهدف الثاني للماص وفي هذه الأثناء الحكم يعلن عن نهاية اللقاء بانتصار المغرب الفاسي بهدفين لواحد .
تسالا الماتش وناضو الجمهور د سيدي قاسم لقاو الفوضى شي ايزول الكراسا وشي ايشير بالقراعي على اللعابا وشي مشابك مع البوليس . ناضت الروينة وعمي بوشتى ناض سلت هو وأشرف كا وهوما يتعرطولم الجمهور د سيدي قاسم ومشاو ديريكت عند أشرف سولوه قالولو معامن انت . خاف وهو يقلم مع سيدي آسم قالولو عمرك شفتي شي غرباوي كيقول سيدي آسم ؟ وهوما يبداو عليه بالخبيط للراس حتى قوبعوه .جا عمي بوشتى ايسبك قبط جوج من يداهم وشير بيهم وجابم مكرفطين ليهن من الباركينغ وهز حاد الباريير دالحديد وتم ماشي سابك على داك الشماكرية حتى هربو كاملين وفديك اللحظة قاص سروالو لشي حديدة وتشرgليه من الركابي وهو ما عاقش بيه . مشاو هو وأشرف ركبو فالطونوبيل ورجعو فحالم للدار .
دخلو صابوهم ايتعوفو وهوما يgلسو معاهم .
بوجمعة : على السلامة . كي دوزتو العشية ؟
بوشتى : ايوا غي سكث واها كنا ناشطين ومخيرين مع راسنا ومناين سالاو باللعب ناض الزgا وجينا فحانا ولايني السي أشرف شبعو فيه تقرنيع داك المساخط د غرباوة .
السعدية : أناري على وليدي ياك ما وقعلك والو ؟
بوشتى : راه لاباس دابا ولايني كا ماكنتشي معاه كا شروطوه داك المساخط .
حادة : ايوا على سلامتكوم . ولايني تزهزيتو بزاف هاد الشي كامل غي اتفرجو فالكورة ؟
وئام : عمي بوشتى جات معاك التقطيعة ديال السروال . واو جيتي غزال ما حسابتليش حتى انت متبع لاموض
السعدية : سكتي أهاد المصيبة حشمي شوية .
نخليوهم ايتعوفو ونرجعو للتسول .
حدهوم ساقت الخبار لحمو والصافية ايجمعو الدجاج والبيض هزت حاد البروgة وتمت ماجية عند الصافية
الصافية : ايوا غي صبري معانا اخالتي حدهوم حنا عاد باديين فهاد البيعة وشرية . مشي نعطيك غي خمسين درهم
حدهوم : والله بقل من عشرميا لا بيعثا .
الصافية : صافي هاك ها عشرميا ديالك الاطيف وشحال قاصحة . ايوا لا دوريهاشي عونيث لعمي عياد راه يزولالك خليها حتى دزيد عليها باش دشريو الترفزة حتى انتوما . راه ما بقى حد دابا بلا ترفزة .
شوية و دادا عيشة ماجية هازا حاد الكاميلة عامرة بالنخالة وفيها حاد العشرة دالبيضات .
الصافية : مشي نعطيك الف فرنك أخالتي عيشة فهاد الشي
عيشة : والله بقل من مياتاين ريال لا عبيثم .
الصافية : مشكيلة مع هاد العيالات دهاد الدوار . ولايني هادي الأمية وما لاقيا فعباد الله .
عيشة : انا غي مشي نشري بيها السعة دي اسرسر حقاش عمك امحمد هرسلي السويعة دي انعلام كا ما كانشي غي رمضان على خلوط . وحتى الفقيه والو فالدجامع وما عندناشي حتى علاش نفيقو فالصحور وما يانا ما نبيعشاي البيضات ديالي راهم ماجييني الضياف من المدينة فهاد العطلة دالربيع .
نخليو الصافية مضورة الحركة و نرجعو لفاس .
السعدية : ايوا سربيو دغيا أ البنات ونوضو توجدو راسكوم راهوم الخطاب قرابين يوصلو .
ناضو خملو الدار ووجدو الماكلة . و لبسو التكاشط و حادة حتى هي لبست ديك التكشيطة الصفرا اللي لبساتا فالعرس ورشات حاد الرشيشة من داك القرعة دالريحة د ربعمية وبوشتى ناض لبس الدجلاب دالسوسدي ديالو والصباط والتقاشر الصوفر شوية وهوما جاو الخطاب :
بلال الطبيب دالعينين خطيب غزلان وختو حنان مصممة ازياء و باه الحاج سلام ويماه الحاجة مليكة وعمو رجل الاعمال الحاج فوزي .
دخلوهم للصالون ورحبو بيهم مزيان وحطو الصينية والحلويات على الاشكال .
السعدية : مرحبا مرحبا بهاد الناس ونهار كبير هادا
مليكة : ترحب بيك الجنة ألالا السعدية
حادة : حنا مناين أيقولونا مرحبا أنقولو بيكولا
السعدية نخصاتا وهي دسكت .
مليكة : وشكون هاد السيدة ؟
السعدية : هادي ختي حادة ساكنة فالتسول
بوشتى : كا هدا هو العريس جا مع باباه ويماه ؟
بوجمعة : ايه أبوشتى . فالمدينة كيجي العريس مع مو وباه وعائلتو ماشي بحال العروبية كيجي غي باه ويماه
بوشتى : خيار . وشني ادلقي اولدي فحرفتك ؟
بلال : انا أ عمي طبيب اختصاصي فالعينين . ياك ما عندك الجلالة فالعين ولا عندك الحساسية ؟
بوشتى : أودي عيناي طحاو ايحرقوني بزاف هاد الايامات
بلال : من وقتاش بداك الحريق ؟
بوشتى : غي مناين بديت انبحصص فهاد المشقوف دهاد التيريفو من تما وعيناي اها اه
أشرف : حتى انت اعمي بوشتى ديما مكونيكطي داك الشي علاش .
بوشتى : سكت اهاد الحيبور وما فيك دالفهاماث . كو ما كنتشي يانا هاد النهار كاراك مكونيكطي فالصبيطار دطهر المهراز .
مليكة : ايوا فيناهيا هاد العروسة بغينا نشوفوها
عيطات السعدية على غزلان وجات عندم وهي حشمانة وحنيكاتها حومر وكلسات
مليكة : ما شاء الله تبارك الله تبارك الله غي نويويرة محطوطة ختاريتي وعرفتي ما تختار أولدي أ بلال .
فوزي : ايوا كيبانلي العريس والعروسة متفاهمين بيناتهوم حنايا ما علينا الا نباركوليهوم .
بوشتى : و شني مشي دلقيو فالصداق ؟
بوجمعة : دابا ولا العريس والعروسة كيتفاهمو على كلشي و فالخطوبة كيكون غير تعارف ديال العائلات وصافي
بوشتى : خيار . هوما دي ايتفاهمو على كلش نتوما غي ادهززو راسكوم . ايوا الله يكمل بالخير .
وئام : وما فراسكومش راهوم غادي يشاركو فلالا العروسة ديال هاد العام
حادة : كا بنيا ؟ ايوا بحرا نبقا نتفرج فيهم ونجنن حدهوم .
نوال : خوي خوي اتاي اعمي بوشتى خوي
بوشتى : بسم الله . والله يا نهار كبير هادا مناين تلاقينا مع هاد العباد .
فوزي : حتى حنا حصلينا الشرف تعرفنا عليكوم . انا هاد عمي بوشتى عجبني بزاف ودخلي فخاطري والله .
حادة : والله ايلا يا الشغل مبدل بزاف على شحال هادي . انا مناين جا بوشتى يخطبني كث ........... هههههههه
نخليو دادا حادة ادعاودلم عل الخطابة والعرس ديالا والى اللقاء في الجزء الثالث عشر .

توقيع: عزيز البورقادي.

اقرء المزيد

عيشة مو روادع

بسم الله والصلاة والسلام على رسول الله
سبق للشريفة روقية كتبات على عيشة والسعد لكحل ديالا فاين ماكنت ش سمية لصقوهالا ويانا جبت ليكم عيشة موروادع
على لسان الحاجة نسيبتي ربي يشافيها ويخليها لنا بركة
كان ياما كان حتى كانت العرجة ادنقز الحيطان والعورة ادخيط الكتان والطرشة ادجيب الخبار فاين ما كان .
كانت يا سيادي حادالمرا سميتا عيشة وايعيطولا عيشة مو روادع. هاد عيشة مشات درgب على حبابا وهي كانت موحولة كتاب عليها المكتاب فالطريق وضاعتلا التريبية بدات ادندب ودقول شني ماشي دقول للراجل ، هي هايثاك ماشية وادخمم وصلوها رجلاها حدا السيد وجبرت شي ناس ايدفنو حا التريبية خلاتم حتى مشاو وحفرت عليها وجبداثا ومشات .فالطريق تلاقت مع حالgافلة .قالتلم شكون يلقي في سبيل الله فهاد المرا مسكينة ويركبا على شي بهيمة . الناس حنو فيها وركبوها على حالحمار ، وصلو لبلاصتم قالولا اوا نزل ارانا البهيمة ديانا كاوهي دعمل يداها فودناها وبدات ادزgي : هاد الناس بغاو يزولولي البهيمة حيث شافوني وليا.الرجال شافوها هايثاك حشمو وسمحولا فداك الحمار . هي كملت الطريق حتى وصلت لحالدوار ، طلبت ضيف الله ، ضايفوها حالمرا وراجلا عندم حالدريرو فالدوح ، بايتا معاهم فالصباح ناضت وبدات ادزg ي هاد الناس قثلولي بنتي .مول الدار ومراثو خافو قالولا غاسكوث نعطيوك ولدنا .سكثثت وعبات الدري ومشات لدارا.مشات ايام وجات ايام خرج الراجل هو ويماه للخلا باش يجمعو الصابا ديالم وبقاث عيشة فالدار مع شيخا وهو راجل كبير ( قارم) gالس فالركنة .شواي كوبدات ادزهد على ولدا فالدوح وادقولو: يانا عيشة مو روادع يا وليدي يانا هي.يانا دجبدت الطفلة من الحفرة وزولت الحمار للgافلة يانا هي . يانا عيشة مو روادع يا وليدي يانا هي ، يانا دبلت الطفل بالطفلة يا وليدي يانا هي .سمعا شيخا قالا هادو هما عمايلك اوا واخا .هي عرفاتو غا يجي ولدو ماشي يعاودلو كلشي مشات عملت حالحرشة ورفساتا فالسمن وجابت الصينية وقالتلو هاك اسيدي .عطاتو ياكل هو سما الله وبدا وهي قاثلو ايا سيدي قداش الشعرة حل فاك نزولالك . هو حل فاه وهي قالثلو خرج لسناك راها ملويا . هو خرج لسانو كوهي دحرفولو بحالموس ماضي كانت موجداه.شواي وناضت مسحتلو دمو وبدلتلو حوايج خرين وخلاتو .رجع الراجل ويماه من الخلا دخلو عند العgوز يهدرو معاه كاو هو بدا ايشير لعيشة وايعمل يدو على عنقو ، هما ما فهموهش وهي قالتلم سيدي يانا عزيزة عليه قالكم شريولي المديجة . بقى هو ايدور فراسو ويشير لعيشة ويعملم اشارات باش يقطعولا يداها .ما فهموهش عاونيث قالتلم سيدي يانا عزيزة عليه قالكم شريولي الدمالج. شراولا المديجة والدمالج والراجل مسكين بقا ايتحسر حتى مات
وخليتكم على خير والله يكون فعوان عيشة

توقيع: محمد البورقادي.

    

اقرء المزيد

الخيل في تراث قبيلة التسول 01

للخيل مكانة جد خاصة في الموروث الثقافي لقبيلة التسول . الفرس مصدر البركة و الخير و اليمن ، و لذلك كانت العناية به تشمل المربط ، الذي كان دائما على مقربة من النظر و الشم و السمع ، من الحواس ، و العلف و التنظيف ... علاقة جد حسية منذ القديم تربط هنا الإنسان بالفرس تراكمت من خلالها معرفة ،ملاحظات، استنتاجات و خبرات كلها تجمعت في حوض ، كله دروس و عبر و حكم و بيئة ملائمة مشكلة من الكثير من التراب .
السيرة : اللفظ المتداول بكثرة في التراث الشفهي للقبيلة . و هو جامع لكل معاني السلوك الفاضل الحسن . و سيرة حصان هي خلاصة و نتيجة مجموعة مقدرات إذا ما اجتمعت اغلبها او جلها كان الشموخ و الرفعة . السيرة ان تختال الخيل في مشيتها و هذا ما يبرز الاعتزاز بالنفس و الشعور بالكرامة . اذن السيرة هي خلاصة تكامل عناصر جسمية و معنوية . ظاهرة و باطنة .
و لما كانت شخصية الفرس جذابة و مثيرة حاول الإنسان من خلال علاقات مادية و حسية ان يراكم تصنيفات و تعاريف غنية تفسر سلوك هذا الحيوان ، و التعرف على أبجدية خاصة تمكنه من معرفة و قراءة طبائع الخيل . كذلك مجموع الصفاة المطلوبة في المثال الجيد .
دابا اسيدي انا ما هنا لي خاطر حتى بديت نكتب بالتسولية ها لموضوع خاص يتقدم فالقاموس ديالو . جبرت راسي غي الليييط .
ما شكمانا الفائدة و الحاصول الخوث .. التولي عندو الخيل بحا ولدو و ما خلا ما قال فيه . مي ادزيد العودة ايلقي لا السبوع و إلا مرطت أي سبب لا . و يكتب لا . و يعلق لا لحجاب . و يلقي لا الحنا المهم المعاملة و المكانة دالخيل خلاتو يقول عليها بلعا متول .
ريي و ري العودة مختلف ، انا نبغيها دسير و هي دبغي داعلف
الحمار و هو ماشي اينgف مور العود قالو:
ما بقاتشي فالسيرة بقات فتعواج القمومة.
الخيل لعبت فالgعدا . الا وصلت مأخر لشي فرح او مأدبة.
ها الgعدا ها لمجبد. . من أجل التحدي .
الطريق الطويلة و العودة سباgة. الإصرار على الإنجاز و بلوغ الأهداف .... و الكثير الكثير في هذا الموضوع .
أما تصنيفات الخيل عند التول هي كثيرة أهمها : لدهم ، لحمر البرgي , لزرg , اشقر... اهم ما قال فيهم التولي سنتركه لمنشور لاحق و على المودة عهدنا .

توقيع: محمد اجليبن.

اقرء المزيد

عمي بوشتى وعبد الحق وجها لوجه

السلام عليكم مجمع الاحباب . اوا سمعو شني وقع فهاد النهار . 
من بعد ما الصافيا قالت لباها يتكلم للناس اللي فالباب تفافا وما عرف ما يلقي .
عمي بوشتى : حادة، آحادة ، فاينك؟
دادة حادة : هاني حداك ، كعوارت؟ ايهاي على الراجل ، قالك ماشي يترشح هو غا سمع السمية د عبد الحق وهو يتفافا. امالك . سير شوف الناس وطلعم للغرفة راها نفطاتا الصافيا هاد الصباح . الله يرضي عليها.
عمي بوشتى : ياودي سكوث ماشي يسمعونا الناس برانيين نوض عطيني جلابتي البيطة والطربوش اللي جابلي الحاج ولد لزعر التسولي أحمد من الحج والبلغة الصفرا. اطلقني الناس ايعاينو .
دادة حادة عطاتو حوايجو بالزربة وهي ادبرgم دقول ماشي للفيشطة ( شوفلك الراجل حتى فهادي ايتعتند مع عبد الحق ) . لبس عمي بوشتى وخرج عند الناس وبدا يرحب بهم : مرحبا، مرحبا ، زيدو دجانا يجيه الخير. دخل الناس للغرفة وهو ايرحب بهم لان اهل التسول اهل الكرم واكرام الضيف واجب وخا يكون عدوك .هو ايرحب وعينو ما ادنزلشي على عبد الحق بحال دقول واكلو الورث . دادة حادة والصافية المقادة وجدو واحد الزردة . عيطو على حمو يعبي الشلال للناس ويطلعلم الماكلة . من بعد ما شركو الطعام وسلاو تقدم عياد فالكلام . قالو : ابوشتى هاد الناس جاو طالبين منك جوج حوايج . اللولي ما دخلشاي للانتخابات لحقاش هما عاطيين الكلمة لعبد الحق. والثانية جاو طالبين راغبين فيد بنتك الصافية . عمي بوشتى حشم حدا الناس يقول لعياد شي هدرة مدعجبوشاي بقا غا ايشوف فيه ويدهلس على لحيتو وهو ايتفقص غا معا راسو و عياد زايد فيه : اوى شني قولث؟
عبدو عياد : اعمي بوشتى حنا قصدناك والمقصود الله وانت مول الخير والقلب الكبير وما انسمعو عليك غا المزيان ودابا هاد عبد الحق راه بحا خاي الصغير وهو بدراعو منشكورلكشاي وعلى بنتك ما دخافشاي . وحنا على المعقول ديالو عطيناه سلطان القبيلة .
عمي بوشتى : اودي مانصيبشاي بحالو والهدرا دالانتخابات انا لقيتا غا هدا باش دبانو .لحقاش الناس بداو ايهدرو وما بغيتشاي فيا يتشمتو . ( عياد بدا ايدور فراسو راكم عارفين شني ايقول) وعبد الحق حاني راسو مادقول هو هداك للي ديما موجد قرطاسو.وهنا هدر السي عبدو بن علي : اعمي بوشتى صلي على النبي ولدردناشي خايبين(ومعا راسو ايقول راحنا فداك القنيات طامعين) وبدا ايشكر فالعريس ويقول اللي حداه شكرو معايا. وهنا هدر السي محمد البورقادي قالو : اعمي بوشتى انا مسميني بو معgاف وعلى بنتك منو مدخاف الى فلط نغرول عليه لبين الكتاف.
عمي بوشتى : اللهم صل وسلم على سيدنا محمد . انا هاد المجية ديالكم على راسي والصواب عند ناسي . انتما كلكم ادشكرو فهاد عبد الحق ولايني المثل ايقول : المحبة دايمة والصواب يكون . خاصنا هاد السيد يجيب والديه ويلقي اللازم ونتوما عارفين عادات وتقاليد التسول . السي البورقادي : اعمي بوشتى اللي قلتا سمن وعسل وهيب على عبد الحق وقالو : نوض بوس الراس دعمك.
دامت لنا البتسامة ودمتم سالمين.

توقيع: رقية البورقادي.

اقرء المزيد

التلميذة والكلاب

فلعروبية عندنا ايربيو لكلاب ومشي اي كلاب جهنما لحمرا؛خصك نتينا ماشي ونتينا ادشهد'تلناس فليل ايباتو يحفضو درويهم ويانا انبات انخمم كي نسلك من لكلاب فالصباح وتلحفضت شي حاجة ادمشلي باللهيت ديالم.
واحد النهار جراو عليا وقطعولي الصايا ورجعوها لي بحال هد لموضة د سراول لمقطعين د دابا' يعني هد لموضة خرجوها لكلاب من سنين هدي.
ولمصيبة هي واحد دار كانو فيها تلاثة د لبواهل واحد ضرييف وجوج ايطربو يعني لكلاب من وراءك ولبواهل امامك او العكس
لنجيت من لكلاب يقبطوك لبواهل
ايا بابا وشني gاز عليا

توقيع: مونية جبيلو.

اقرء المزيد

مأكولات تسولية

بسم الله مدبر الأحوال، خالق النسا والرجال، نسج بيناتهم المحبة حبال، وجعل فبعضهم للبعض كمال،ما فضل ربي الراجل عالمرا ولا النسا عالرجال، والصلاة والسلام على نبينا صلاة ما تتعد ما تتحد بآجال.
دبغاه الله عطاه مرا صالحة ،دحشم ودوقر ما درضالو بالطايحة، دستر ودكتم السر وما دكونلو فاضحة، الكبير عندا محتارم، وحنينة على الصغير وحد ما يسمع منا كلمة جارحة، دعذر ودقدر وما دكذب واخا مازحة، كلامو دعمل بيه ودعاونو عالصالحة.
ودكتبلوا الله شي دريويشة، نية والكبيدة هشيشة، لا ينكدا ويحرر عليها العيشة، ولا يمقث عليها ويعملا كالزجشة ، ما دروح ما دعقل على دكلاثو فكرشا ، الغشيمة خذ بيدا وعلما كيف تمشى ، الgواد أيسرح الطريق للعمشة.
ودطلعلو شي وقيعة مغروفو، عمر الربح معاه يشوفو، وخا الريح يحطبلا دتلفو، دعرف غي طهرا وكرشا والباقي جنافو، عايشة بحالبقرة غي دجا دعلفو، ويلا طاحث فشي قليل الرزق، عمر جنابو مالعرق لا نشفو، دنوض حتى لنص نهار ودفلكوزينة دحشلفو، ودبقا مالنهار قدام التلفزة أو فالزنقة دتلفو، كوزينثا يزفط فيها الريح حتى مالزعفران أدسلفو، دصيب ولدا غارق وما دنظفو، واللاخر الخناين مجلطين على شنايفو، الدار مرونة هي والكرش دلغولة ما يختالفو، وديقبل هلى بحال هذي كموشي دقبطو دجيفو.
سيادي التسول سمحولي ونبداو فالمعقول، بعدما هدرنا على بشلالو وحلحول أجي نشوفو هاد أبو كرش السراط شني باقي عندو عالطعام ما يقول.
قال الإمام أبو كرش السراط في مؤلفه " الكامل في أنواع المأكولات وقوام الgوامل": يصنع بنو تسول من دقيق القمح ألذ كسكس مفتول، فبعد غربلة الدقيق ، منه نأخذ الصافي اللين الرقيق.
لفتل الكسكس ضع في الميدونة قليله، وبقليل من الماء رشه، وبالأكف في دوائر متعاكسة وجب دلكه، أضف الدقيق كلما أحسست بالحبيبات رطبة لصيقة ، وإذا أحسست الدقيق جافا تحت كفك، فرشة ماء تكفيك، وحينما تتشكل الحبيبات الرقيقة ،غربلها فقد نجحت في الطريقة.
يحضر هذا الكسكس بالخضر أو التفاية بحمص وزبيب، وكم هو شهي أيضا بالحليب، واللحم للنوعين ألأولين مفروض ، وللطعام بالحليب مرفوض.
فوق قدر ماء شروب، بخر الكسكس ثلاثا قي كسكاس بقفالة معصوب، لتحضير الطعام بالحليب، بعدما يعمه البخار ، رشه بالماء مرتين ، وادلكه لليمين واليسار ،دلكا خفيفا بالكفين، والمرة الثالثة لا ترشه ، قد نضج ، فبالحليب المغلى وجب عند التقديم سقيه.
ولتحضير النوعين الآخرين ،بخر الطعام ثلاثا ،كتبخير طعام الحليب ، فوق بخار مرق اللحم والخضر أو التفاية بالحمص والزبيب.
تحضر الأنواع الثلاثة للغذاء أو العشاء وكذلك في الولائم والعزاء.
كذلك بركوكس ومردود، للفطور عند بني تسول موصوفا، وللعشاء لمن أراد أن يبيت خفيفا ، فتلهما كالكسكس، وحباتهما أغلظ في القياس، غير أن بركوكس يطهى فور فتله ، في ماء غلي لأجله، وبعد النضج يضاف فوق النار الحليب باردا إليه، ويحرك تحريكا رفيقا، كي لا يتعجن أو يصبح لصيقا.
أما المردود في الظل واجب تجفيفه ، وفي المرق المتبل يستحسن طهيه.
يقدم هذين النوعين للنفساء كما جرت العادة ولمن زارتها من النساء بعد الولادة."
هذا ما عند أبو كرش السراط عالطعام مايقول ، المرة الماجية نشوفو شني عندو عالبقول، وإلى ذلكم الحين دمتم سالمين ودامت لكم المسرات والأفراح أجمعين.
وعلى المودة نتقاشعوا

توقيع: أنوار زياد.

اقرء المزيد

قصة زطوط

السلام عليكم .
تحية لكل أعضاء المجموعة .
أردت أن أحكي لكم قصة مرت عليها خمسة عشر سنة أو أكثر، أتمنى أن تنال إعجابكم.
كان واحد 2 ولاد زطوط وصاحبو فين ما كانت شي عرصة راهم ليلا مكيخليو لا مطيشة لا فقوص لمهم الي لقاوه كياكلوه .واحد النهار مشاو لواحد العرصة وبقاو يحيدو فمطيشة ويعمر فلميكة وداك مول العرصة كان صعيب اوا عمرو الميكة زطوط قال لصاحبو هاد مول العرصة معنيش معاه .قالو صاحبو يا لاه نمشيو بحالنا صافي قالو والله منمشي حتا نضيع لباباه هاد العرصة . قالو شني باغي دعمل .قالو قبط الميكة . شد هداك الميكة .اوا وشكون يشد زطوط دكساع.بقا كيضرب مطيشة بالركلة حتا مخلاش فداك العرصة وهو مااجي مول العرصة راكب على الحمار ديالو غير شافو زطوط وهو يعيط كانو هنا وتبعو صاحبو بقا مول العرصة يسب تما ولكن عندو الزهر معرفوش .بصح ماطولش وخرجت فيه الدعوة طاح من الدردارة شي 8 مترو ولا كتر .فاش طاح بقا كيفركل بحال شي ديك. شواي وهو يحبس امبقاش كيتحرك حنا قلنا مات جا الواليد واحد الراجل وداوه لطبيب شواي لقيناه ماجي على رجلاه بحال موقعلو حتى حاجة تقول معمرو طاح .وخا هكاك مبغاش ينعل الشيطان عليه وبقا ايشفر لعرص دناس. حتى رحل عاد تهناو منو الناس .او نهار قبل مايرحل جا عند صاحبو قالو أنا خاصني نخالي الناس بخير وخاصك تمشي معاي .قالو واخة .قالو اوا سير لبس السبرديلا وزيرا مزيان. قالو اولاش .قالو غير لبس و اجي نقولك مشا صاحبو لبس سبرديلا وجا . اوا وزطوط بدا كيهز الحجر .قالو صاحبو راه معندمش لكلاب هدو لي هنا .قالو راني عارف . قالو والحجر لاش .قالو اصحبي باش نخليهم بخير . قالو ياك انا صاحبك .قالو اييه .قالو هز اوا الحجر . اوا مكيناش الدار الي مضربوش عليها بالحجر غير كيوصل حدا شي دار وكيقول اوا خليتكوم على خير والله يفرقنا بلا دنوب ويدرب ويشدا بجريا حتى ضارو على الديور كاملين اوا وgلس .وقال لصاحبو الله على راحة اوا دبا منين خاليتم بخير عاد تهانيت اصاحبي.
أتمنى ان تنال القصة إعجابكم .

توقيع: عبد الرزاق الرياني.

Haut du formulaire

اقرء المزيد

من حكايات جدي 1

السلام عليكم مجمع الكرام والصلاة والسلام على خير الانام.

كان رحمه الله رجلا شهما نبيلا رحيما باهل بيته .كان ظاهره يعطي انطباع القساوة وباطنه قمة الحنان والعطف.لم اره يوما ينهر زوجته التي هي جدتي بل كان داءما يوصينا بها خيرا . انه رمز الرجل التسولي الشهم النبيل.
كان ياتي متعبا من العمل وفي انتظار وجبة الغداء يجمعنا حوله ويبدا في سرد قصص وحكايات لنا كلها تحمل عبر ومواعظ.لم نفهمها في صغرنا ولكن مع مرور الوقت اصبحنا نعي كل كلمة كان يقولها . ومن بين ما اتذكر:
-----------------------------------------------
هذا واحد الراجل كانو عندو 3 دالكلمات وكان ايgلس فالباب دالسوق ويقول امن شاري كلمة ؟
واحد النهار واحد السيد gايز قال : انا ماشي نشري من هاد الراجل هاد الكلام دايبيع. سقساه شني هي هاد الكلمة. قالو : الى غلبت اعفو .
السوق الثاني جا السيد اللي شرا الكلمة اللولية وشرا الكلمة الثانية .قالو شني هي هاد الكلمة ؟ قالو : لا دآمن لا دقرا آمان فبلاد الامان بات عساس.
السوق الثالث رجع شرى الكلمة الثالثة. سقساه شني هي . قالو : ساعة الزهو لا دفلثا وخا دقطعا من الراس .
هذة من حكايات جدي .المطلوب منكم مجمع الكرام شرح معاني وعبر الكلمات الثلاث في تعاليقكم .
دمتم سالمين.

توقيع: رقية البورقادي.

Haut du formulaire

اقرء المزيد