سلسلة عمي بوشتى وحادة 03

نزلث حادة تيريفو فالسرجم باش يشد الريزو مزيان ومشاث للنوالة دمسل الخبز، أما عمي بوشتى فبقى مكمش فالركنة وناض يعيط على ولدو: حمو آحمو فاينك أبلمصربط لاخر؟
حمو: ها يانا أبا غي كنت أنورد البقرة مالعين.
 بوشتى: زيد علي شي بطانية الله يغطيك بالرضا راها قبطتني شي رفجة أنحس بالبرودة فالعطام ديالي لداخل.
حمو: يا كما فيك السخانة الباردة؟ (غريبة هذ السخانة الباردة عندنا فالتسول دي سمعا يطحك).
بوشتى: سكث سكث أنسمع شي عياط.
المنادي: أالصافية... أحادة... أمالين الدار.
حمو: فاينها هي الصافية؟.
حادة: راها مشاث دعشي التبن، خرج شوف شكون أيعيط ونتي قاثلك العكز، كلشي فاين هي الصافية.
حمو: ها نا خارج، آشكون؟ ها نا ماجي.
المنادي: ضهار عندي. (ضهار هي اخرج في لغة بني تسول).
خرج حمو وهو يصيب حدهوم فالباب.
بوشتى: أشكون أيعيط.
حمو: غي حدهوم مراث عمي.
 بوشتى فنفسو: أعوذ بالله مالشيطان الرجيم عاوث جاث هذ غرانقة ماشي دكمل علي، مصاب ما دجيشاي عندي.
 حدهوم: شوف راه عبسلام خاك هدر مع عياد دابا وقالكم تلاقيوه غدا بالحمارة للمنجورة مع العشرة دالصباح.
حمو: واخا أمراث عمي.
حدهوم: وشني لقى باك؟ لاباس دابا؟
 حمو: لاباس!! راه جاثو السخانة الباردة إلى بغيث تشوفو راه ناعس فالصطيحة.

غي سمع بوشتى حمو قال هذ الهدرة وهو يصفار ويبقى أيصدف لو فنفسو، سير الله يلاقيك بالبلا كاماصيبث ما دقول؟
حدهوم: سلام ماعليكم أبوشتى، قالي حمو جاثك السخانة الباردة ياك لاباس.
بوشتى: هاذاك راه غي أيحرك بلا سروال!! غي بردت حاد الشويش وصافي.
 حدهوم: نتينا ملوي فستة دلبطانياث بحال البصلة وأدقلي غي بردت!! ووجاك صفار ما فيهشي قطرة دالدم. واقيلا حادة مكوزاها فيك ببوهيوف؟ رجعت بحال الحيقون دي واحل فالزلزلة.
 بوشتى: شوف أنا مزاوك فيك لما غبر علي زلافثك ووريني الصفايح دقفاك، ها العار شني أدسالني؟ حتى أنكون مزيان هاو أدجي أدساليها معايا. شكون مسلطك علي شكون، قاسما بالله كا كنت مراثي يا كا راني طلقتك بالثلاث.
غي سمعث حادة هاذ زوار وهي دجي أدجري ويداها عامرين بالسميدة دالشعير.
حادة: مالك أبوشتى فاضح الدنيا؟
وهي دجاوبا حدهوم والدموع فعيناها: ها نتي أدشوف أبنت لجواد جينا نرggبو عليه وهو خدام علي بالمعيار، راني ماشي بنت الراجل إلى جيث عندك مرة خرى.
 حادة: أويلي نعل الشيطان الله يهديك أحدهوم هاذاك راه تبوهل وخرجلو العقل بالسخانة وراه غي أيهدرف، ما دعبيشي عليه أنا مزاوكا فيك.
 حدهوم: إيوا فوجاك الله يسامح، وحتى أنا ما نعبيشاي عليه راه هايثا كان الطاهر خاي قبل ما يموث بيوماين. 
 بوشتى: صافي دغيا نقصت يوماين؟ سير الله يلاقيك بالبلا.

حادة جرث حدهوم لبرا وعطاثا واحد المطلوعة سخونة. وصرداثا فحالا، وهي درجع عند بوشتى أدتكور بالطحك.
حادة: والله يا أدعبر عليك، وأدبرد لي قلبي فيك ألمهيبط.
 بوشتى: ياك أمو جحالل!! دابا نروح ونبرد فيك هذ الغدايد، أما داك موكة والله يا حتى نبقى لاصق فعياد حتى يطلقا.
طفو الله يخليها تريكة.

على المودة نلتقي.

توقيع أحمد لزعر التسولي

تصنيف : طرائف عمي بوشتة