سلطان القبيلة 01.

نبدا الكلام بالصلاة والسلام على خير الانام
سيدنا ومولانا الامام .المجموعة مأسسة بسواري
راسخة وبتاريخ مأرخة، جمعت البعيد والقريب
وحتى البراني ولا صاحب وحبيب، الابواب مفتوحة 
ترحب بالصغير والكبير، بالراجل والمرا واللي تعدا 
الحدود ياخذ الحمرا الما والشطابة يمشي يتيه فشي غابة.
مقدمة صغيرة على المجموعة شدتني الغيرة 
بغيتا تكون كبيرة نمديو السكة ونركبوها فالمحراث
ونبحثو فالتراث ، فالعادات والتقاليد شلا ما يتقال 
نوجدو الحبر والمداد نكنشو المقال. 
كان ياما كان حتى كان الله في كل مكان حتى كانت العرجة تطلع فالجبال والطرشة تجيب الخبار والعورة
تغزل الصوف ودخل الخيط فاليبرة هذا درس منو 
ناخذو التحدي والعبرة. 
كان ياسيادي الجواد سلطان فالقبيلة يحكم ويفاصل
ما يعرف تزوير ما يجامل وما ياخذ القرار حتى يتأكد
ويشاور قلبو مافيه ضغينة بالو كلو مع اهل القبيلة 
يعاون المسكين وعليه يأدي الدين .يحضر للفرح والعزو، 
راد الهيبة ويتصدى للعدو،المكحلة نحاسية ادلحلح والعود احجر الواد ما يركبوه عيال ولا فالسربة يخيل،عودو دايرو بلاصت ولدو حيت سيد السلطان ما عندو ولد ذكر رزقو
الله غي البنات وخا تزوج تلاثة دالعيالات وهو بغا العزري يخلفو من بعد الممات.
وكيف قالو سيادنا اللوالة اللي ولد العزري كأنو ما مات ....

وعلى المودة نلتقي.

توقيع عبد الحق كريط.

تصنيف : الثقافة التسولية,المنتديات الثقافية