قالوا زمان

قالو زمان

كيف تبدا قول بسم الله
وكيف تكمل قول الحمد لله

ما تعراش ونتا عرقان وما تشربش ونتا عرقان
وما تكسلش رجليك فوسك جماعة وما توكلش ولادك وسط جماعة وما تشربش بالواقفية
وجهك نقيه وما تدري واش تلاقي بيه

لي فاتك بالزين فوتو بالتبسيمة
ولي فاتك باللبسة فوتو بالنظافة
ولي فاتك بالعلم فوتو بالضرافة
ولي فاتك بالمال فوتو بالقناعة
ولي فاتك بالصنعة فوتو بالسياسة

ولد السبع مايجي مشحاح
والدفلة ما تجيب التفاح

قالو ناس زمان

صليو على النبي وزيدو فالكلام
الطرازة ماتندار فالظلام 
والخادم ما دير اللتام 
والحمارة ما دير اللجام
الطالب ما يشمتوه العوام
رد البال من زمان العيالات فالسوق والرجال فالخيام

ليلة احسن من ليلة وراجل جيد احسن من قبيلة والمعقول يعيش احسن من الحيلة 
قالو سيادنا واحسنو الكلام
ثلاثة عدياني: عيني ووذني ولساني كون ما جاوش هوما نروح لقبري هاني
ثلاثة يطولو العمر: الدار الواسعة والفرس السريعة والمرأة المطيعة 
ثلاثة يعمرو الدار: الحرث بالغبار والفحول الصغار والزواج ببنت الكبار 
ثلاثة خسارة:البني فالدار الصغيرة والحرث فارض حجيرة والغلض فالمرأة القصيرة 
ثلاثة يقللو الصحة: الزواج بالمرأة المعفونة ومشيان الحفا وهزان الدري على القفا 
ثلاثة يربحو: النعجة والعويجة والنحل الى جا 
لي نافسك فالاخرة تنافس معاه ولي نافسك فالدنيا خليها ليه 
الوقت تول(تسكين جميع الحروف) والمعقول تحول والغنم ولات تطول 
دير النية والحاجة مقضية ولي بغا يخدم على راسو يزول جلابية

ملحوظة: لي ما افهمش شي عبارة ولا شي مصطلح نشرحو ليه

قالو زمان
الرجال يبانو فالشدة وجه البارود اذا اخرج مافيه ردة والراجل ماش فالزندة والعظم عمرو يكون فالكبدة والجايح يخلع بالهضرة والدنيا فانيا كيفا كيف الرقدة
شمس الصمايم نقايم
شتنبر كتحلى فيه بلبولة الشعير ويطلع الما فالبير ويبان للفلاح ما يدير
منين اخرج الو مابقا فالحصيدة والو ولات الهضرة فالخيط والما فالحيط
اييييه قالك تهلا فالكليمة راها تعيش ديما
ولي فاتك بالحرث فوتو بالطوع ولي فاتك بالغنم فوتو بالحولي ولي فاتك بالمرأة هذا ما فيك تبقى فيك الدقة مسمرا كاين لي مزوج وكاين لي مفوج وكاين لي جا غير احدى المفوجين وفوج
الزواج بالنية والحرث بالنية والحاجة مقضية
راه لي رابح من نيتو ولا من وليتو
لا تحكر المرأة الكحلة والبلاد الفحلة
الله ينجيك من المرأة النواحة والبقرة الطرواحة
رد بالك من زمان العافية بلا دخان والسكنة فالبلان ولي قال الحق ما بقى بان
عز اتاي الفاخر وعز الكسيبة البهايم الصغار وعز الحرث الغبار وعز الرفاقة الديور الكبار

ملحوظة:لي ما افهمش في عبارة ولا شي مصطلح نشرو ليه

قالو زمان
يجي نهار الخاوا يتعاركو كي الحناش والمطر يصب والارض ماترواش .والطبة تعالج والناس ما تبراش .الحكم للرعيان والرأي للنسوان يكترو فيه الحجاج وتجارة الدجاج والنساء بلا زواج .ياكلو بالارطال ويشربو فالاحطال .ينامو الليل وما طال .شوف هاذ الزمان المكشوف الحمير ترعى والخيل تشوف .
النساء مشمرا والرجال مدمرا ..والحديث قياس 
طيح وشوف شكون يوقف معاك .غيب وشوف شكون يسول فيك .من بعد غربل وصفي .الرجال بالرجال وضحكت الحباب بمال الدنيا ماتبدلهاش 
لا ديت من الجبال عبرة 
ولا ديت من ليام والو
ولا مشيت لا تصد على الجرة 
لا تبع الفحل على مالو
ولا تربح راحتك من اهبالو
صاحب الراجل ولد الفحل والحرة
يجي نهار وتسال على حوالو 
الكلام كثير والمعاني بحر
حد الخوف من الله ولي يطوع يطوع والديه 
القيطون يشدوه الوتاد والخيمة يكبروها الولاد 
لا تخمم يا بنادم باش تعيش الفلوس فالبيضة ومنين جاه الريش
لي لحم يلحم من السمين لي كلا يقدو ولي رافق يرافق راجل متين يلا وحل يجبدو
الوجه تصوبو الحسانة والراس تصوبو العمامة والقلب يصوبو جيب
الى بغيت الوضوء الدائم توضى بالما سخون فالسمايم
الى شفت جوج موالمين اعرف بلي الصبر على واحد
الفلاحة بنت السحاب ماشي بنت الحساب 
القمح المنقي من اغبارو والقلب الى ضر الوجه يعطي اخبارو
فلوس الفلاح يديوهم الدعاوي
وفلوس الخضار يديهم الخاوي
وفلوس الشيفور يديوهم القهاوي
تتسنى الدري يكبر وهو يتسناك تغبر
الراجل متكي على عين قفاه والولد يحسب فالورث شحال جاه
الحاصول لي ما تجلس معاه فمائدة وما تدي منو فائدة معرفتو زايدا

توقيع: عبد الحق كريط

تصنيف : التراث الشفهي,الثقافة التسولية