خطوبة في السوق

حياكم الله جميعا جيبتلكم وحد قصة واقعية وقعت عندي في القيطون عمنول وسمحلو الا صدعتلكم راسكم بالخرايف ديالي..
وحد النهار مسوق لسبت بني افراسن. المهم كنسترزق الله وهي ماجيا عندي وحد المرءة كبيرة شوية نكشتية كليان ديالي ودك المرءة من ديك نكشت المأصلين وبنت عائلة ومن الناس الطيبين معقولة في المصارفة ديالها؛ وجيبا معها بنتها شي 17 عام بش غتشريلها وحد صباط دجلد عني . المهم سلمت علي قالتلي خصني صباط لبنتي قلتها مرحبا دخلو للقيطون الشريفة واختارو صباط لي بغيتو. دخلو بقاو كيعزلو انا ملهي مع بيع والشرا المهم وانا نشوف وحد الشاب واقف على برا. وعيناه مشي طيرو لدك بنت لي عندي فالقيطون. المهم حمرت فيه حد تحميرة بش يفهم راسو ويتحرك اضربو الغربي . وهو بقا ايزورز ملي شافني محمر وعيقت به عمل بنسو ايعزل وحد صندلة دميكة. قلت شنو المرضي شحال نمرة خصك بقا غي ايتفتف.. لكن عيناه مشي يطيرو لدك بنت المهم فالتالي سرطحتا معه المرضي زعما راك راجل حشومة عليك اصاحبي كون تحشم! حيث معجبنيش دك تبرهيش وزايدون دك الناس ناس عائلة. صافي عرفني عيقت بيه. قالي ليه اصاحبي ميتزوج حد؟؟ قلتلو الزواج سترة لكن وأتوا البيوت من ابوابها. قالي هاهي على يدك اصاحبي والله بغات تتزوج بي حتا نتزوج بيها. قلت وش كتهضر بالصح؟ قالي والله يبصح. قلتلو جيب لي ضمنك وانا دبا نفضي لك معهم. مشا وحد خمسة دقايق وهو ماجي بوحد عمو رجل كبير وكنعرف دك عمو مزيان. قالي السلام سلام قالي وش كتعرف هد لمرءة لي عندك قلتلو اه كنعرفها ونعرف راجلها ونعرف باها. قالي شنو بالك فيهم قلتلو ناس الله اعمرها سلعة. قالي هد دري ره تكالا فهد بنت ههههه قلتلو وش نخطبولو على حسابك عندك اكون كيتفلا ونتحاشمو. قالي لا ره بصح باغي يتزوج. وشحال هذي وهو ايضور . قلتلو عاين نشوف. المهم دك المرة وبنتها لا خبر على هدشي كلو .ملهيين كيقيصو الصباط. المهم قلت لدك المرءة الشريفة خلي بنتك تقيص دك صباط واجي عندي نهضر معك . قالتلي هني اوليدي خالد. قلتها وش هدي بنتك قالتلي اييه. قلتلا ره وحد سيد قالي شوفها الى تعطيهالي. قالتلي الا عطاهالو الله علاش لا وش معرفة ديالك؟ قلتلا لا كنعرفو غير فسوق. المهم عيطت على صاحبنا وعمو دخلو لعندنا منين نتا اولدي قالها من اولاد عزيز المهم عندي عندك عيطنا على البنت قلناهلها شافتو ورتهم الدوار والداروعطاتهم سمية دراجلها. قالها صافي غنجيب بابا ويما ودبا نجيو للدار. ومشا بحالو المرءة شرات مني صباط ومشات بحالها . شي جوج سيمانات عاد جات عندي قالتلي اولدي دك الناس رهم جاو خطبو وعطيناهم البنت. قلتها الله اسخر . الله يرزق التيسير. المهم فالصيف وهو ماجيين عندي العريس والعروسة ويماها ضربو الكاغيط وكيكسيو. بقيت غي كنضحك وهم اضحكو. وعرضو علي للعرس العريس والعروسة. ودارو العرس في الصيف لي داز. الله اسخر ليهم وابارك بينهما ويجمع بينهما بخير.
المهم الدراري والبنات هالخبر فراسكم لي بغات تتزوج تدير النية و تجي تشري صباط عندي ههههههههه.

توقيع: خالد جمال

تصنيف : الثقافة التسولية,طرائف تسولية