طرائف تسولية 05

السلام وعليكم أحبائي نعاودلكم إحدى الطرائف لي وقعت لي سنة 2000 فوجدة كنت خدام فواحد الشركة وكان واحد البوهالي خدام معانا صاب شي وراق ديال الدعوة لحضور حفل هو ما كانش عارف المحتوى ديالهم ،ملي تلاقينا فالخدمة وراهم لي انا الاول بمجرد ما شفتهم جاتمي فكرة نضحكو على الخدامة لي معنا عيطنا للشاف جمال الله يذكرو بالخير وشي أصدقاء ودرسنا الخطة باش يتقمصو الادوار بلي حتى هما معروضين . الوراق خباعتم وكان داك النهار الجمعة كنا انتجمعو فالطابق الاول كنتغداو كاملين تغدينا ونوضت وقولتلهم الإخوان راه عدنا واحد العرس ديال واحد العائلة فدار السبتي نهار السبت والدار السبتي تابعة للعمالة كيديرو فيها مؤتمرات وافراح الإخوان كاملين رحبو بالفكرة وشكروني بزاف قلت ليهم هادي شي سيمانة وانا انرغب مول العرس باش يعطيني اوراق الدعوة وراه قالي جيب معاك صحابك وراه قالي غادي يعطيني 15 دعوة وانا كان عندي اكثر من 200 ورقة ولكن باش لا يكشف امري خاصني يكون داكشي بالتدقيق الصراحة كاملين فرحو . مشيت لدار وبديت انزيد التوقيت والمكان محيت كان مكتوبة بخط مطبعي (يدعونكم لمأدبة عشاء وما خليين الفراغ وانا زيدت فيه بدار السبتي على التاسعة ليلا . نهار السبت فالصباح صبحو علي على النبوري أمدرى احمد جيبت الوراق قلتلهم كاينين ولاكن حتى نكونو انتغداو عاد نفرقهم عليكم . المصداقية حاضرة ههههه .وصلت 12 هودنا نتغداو وبداو علي إوا ارى داك الوراق قلتلهم خلينا ناكلو وعاد نفرقهم تما ناض الشاف قالهم احمد صاحبكم راه كبر بيكم وانتم خاصكم تحمرولو وجهو وجيبو معاكم الكادو وانا نهدر قولتلهم حتى واحد ما يجيب شي حاجة واش مول العرس خانز فلوس ويطمع فيكم اجيو كولو وشربو وتفرجو والله يهانيكم قالولي الله يجازيك بخير عطيتهم الوراق وفرحوا وانا شفت القضية ماشي تحماض وبغيت نصارحهم ولكن الشاف جمال وشي الاصدقاء قالولي كمل وحنا معاك تشجعت وقلت لهلا يصبحا فالمرا دالفقيه تفارقنا وكول واحد ماشي ناشط ويأيكدو علي نصيبوك فالباب قلتلهم قبل 9 راني تما ومشيت فحالي وبايت انخمم فيهم هما جاو وبقاو ايعاينو ومشاو ايدقو فالباب خرجو العساسة قالولهم حنا معروضين للعرس وعطاوهم داك الوراق قالولهم هاد النهار ما كاين حتى عرس ولكن كاينة واحد القاعة فالجهة لخرة سيرو ليها مشاو ما صابو حتى واحد وهما يرجعو لدار السبتي قالولهم راحنا عارضنا واحد صاحبنا وما يمكنش يكذب علينا محيت انا كنت ضرييف معاهم فالخدمة وكانو كاملين ايبغيوني على الروح المرحة زادو فالهدرة مع العساسة قالولهم راه هاد الوراق صحاحين يمكن السبت الجاي وهما الدراري يقولولهم راه معروضين لهاد النهار والموصيبة جاو 11 بيهم قالولهم ادعرفو صاحبكم فين ساكن قالو لا واكن خدام معانا قالولهم هدا راه كدب عليكم وككان شي عرس هاد النهار يمكن نتيقوكم ولكن خاصنا نعيطو على البوليس محيت ما بغاوش يتحركو من تما تعرسولهم .قالولهم نهار الاثنين رجعو عدنا نمشيو معاكم عند البوليس يمشيو يجيبوه. صباح الاثنين مشيت لشركة لقيت الشاف ومول الشي واقفين فالباب غير شافوني والشاف يقول للباطرون هاهو لي شمت الخدامة ديالك وبقاو ايموتو بالضحك غير دخلت وبداو كل واحد ايقولي هدرة وشي ايهد علي وانا غير انضحك ولكن الاصدقاء والشاف لي مضامنين معايا قالولهم والله وهدر معاه شي واحد ما نكونو مزيانين وزاد الشاف قالهم نتوما طماعة ولقاها بيكم وخاصكم تقبلوها اوا ومن بعد عاد صلحت معاهم وقدمتلهم الإعتذاروقلتلهم والله ما حسابلي غادي تكبر القضية ولكن بقيت حاضي راسي منهم لا يلقيوها بيا .

 والسلام وعليكم

توقيع: أحمد كروني

تصنيف : الثقافة التسولية,طرائف تسولية