أعضاء الحب عند التسولي

التسولي عندو ربعة دالأعضاء فالجسم ديالو أيعبر بيهم على الحب.

الأول هو الكبدة وهذ العضو خاص بالناس دي عزازين عليه بزااااف بحال ولادو حيت الدراري هوما فلذات الأكباد كيف أيقولو بالفصحى، وفلذة أي طريف من الكبدة، ويمكن يستعمل الكبيدة بالتصغير أيضا لشي وحدة أيحماق عليها ومهبلاه.

الثاني هو القلب وهذا العضو مخصص للزوجة أو لمولاث الدار كيف أنقولو، ويمكن يعبر به حتى على حبو لشي وليد صغيور: أعباد الله هذ الدريرو أيغلي لي فقلبي.

العضو الثالث هو الرية وأيعبر بيها على الحب ديالو لشي صاحبو أو لشي واحد من العائلة وأدصيبو أيقول مثلا: والله أسي علي يا راك مقطرلي من الشوية، والشوية عندنا هي الرئة.

أما العضو الرابع فهو العين وهذا مخليه التسولي لواليديه بوحدهم أيقول: يا ربي دحفظلي واليديا ودخليهم لي حيت هوما نور عيني دي أنشوف بيهم.

وعلى المودة نلتقي.
طبتم وطابت أوقاتكم بكل خير.

توقيع: أحمد لزعر التسولي

تصنيف : الثقافة التسولية,المنتديات الثقافية