عمي بوشتى في فاس 09

عمي بوشتى قبط التيريفو من عند هداك الشاب بعد ما دخلو النمرة دالسعدية ومدو لدادا حادة . وهي كفطات الكمام دالدجلابة اللتشينية ورفذت التيريفو ولقاتو على ودنا .
طنن طننن طنننن طنننننن
حادة : الو الووو ايالووووو
المخاطب الآلي : فوطغ كوغيسبوندون نو بوطيطغ .........
حادة : أهضر معايا أ السعدية بالعربية كا أتخراق عليا كا شني .
بوشتى : شني كاين ؟
حادة : السعدية ختي تبجدعت طحات حتى هيا أدهضر بالفرانساوية .
بوشتى : أرى نشوف .
المخاطب الالي : فوطغ كوغيسبوندون .......
بوشتى : أويلي أ الحولة هادي راها غي اللعبة الصوتية
حادة : ايوا حنا انهضرو نيشان ما انلعبوشاي .
بوشتى : نعاينو حا الشويش ونعاودو نلاغيو . انا واقيلا ايقلي عقلي نرجع نلقي شي ضويرة فهاد مرجان كما يجيب الله عاوث شي ثلاجة .
حادة : نتينا ما بيكشاي الثلاجة . انا عارفة شني بيك يا العيناين دالنمس . والله لاتما لا رجعتا .
بوشتى : ايوا عرفتشي بعدا اجي نلقيو غي شي تصويرة (سيلفي) حنايا بجوج حدا هاد مرجان نوريها غي لعياد نجننو
حادة : ايوا هادي مزيانة حتى يانا نجنن بيها حدهوم
هي هديك عيطو على العساس دالباركينغ وقالولو صورنا بجوج بينا وقبط حتى هاد السخط دهاد مرجان كامل . ايوا تبندو بجوج بيهم وحادة لقات يدا على الكتف دبوشتى وصاكا على كتفا و هو عاوث لقالك الوقفة بحال مناين كانو ايتصورو فالسبعينات . تصورو ورجعو عاوث يلاغيو على السعدية عاد واجباتم .
حادة : ألو السعدية شخبارك لاباس عليك شخبار الدراري شخبار .......
بوشتى : باراكا حتى دوصل عندا وارا ما دصقصي مشي درزيني فداك جوج دقايق دالهضرة ونبقاو هنا موضرين
حادة : انعتلي الدار راني يانا وبوشتى حدا مرجان
السعدية : شوفي غادي طلعي نيشان مع الطريق حتى لشارع يوسف بن تاشفين وشوفي جيهت الفيلات على ليسر ها الفيلا ديانا شوكة .
حادة : ايوا الله يهنيك ها حنا خالطين .
بوشتى : شني قالتلك داك فنيشة دختك .
حادة : قالتلي نزيدو نيشان حتى لشارع يونس ولد تافشين ونصيبو الفيلا ديالا فالشوكة
بوشتى : أها . الناس طحاو لباس عليهم ما بقاوشاي ساكنين فالباطيمة . طحاو حتى هوما ساكنين فالفيلا .
حادة : ايوا لياه بوجمعة راجلا موشاي طاشرون قداشناهو كا بحالك نتينا غي حابط حداي ومقابلني بالنgير وزايدون حتى الدراري ديالا قراو وقبطو الوضيف موشي بحال الضنايا ديالك عوجة .
بوشتى : ياك أ اللفعة الكرطيطة .كا الضنايا غي ديالي ؟ شفتك أتزيالي بهاد ختك . ايوا دابا نشوفوها كا مشي دنفعك . زيد قدامي اهاد بوجحالل الله يعطيك اللقوة ودسكتك كككل .
مشاو تابعين النعت حتى وصلو للدار وصابو لانطيرفون فالباب عمي بوشتى حسابو السرسار . تكا عليه وهي دواجبم الخدامة وعمي بوشتى تخلع ونقز فموطعو .
بوشتى : بسم الله الرحمان الرحيم شني هاد الشي . كا هدا السرسار كا التيريفو .
الخدامة : واش عمي بوشتى هادا . زيد زيد دفع الباب وزيد دخل .
هي هاديك حادة جبدات القرعة دالريحة من الصاك ورشات على عنقا وتحت يباطا و على وجاها ورشات لبوشتى على سدرو ووجاه ودفعو الباب ودخلو .
دخل عمي بوشتى هاز داك القالب دالسكار فيدو تبعاتو دادا حادة واستقبلاتم السعدية وبنتا غزلان والحيبورة الصغيرة وئام والعزري أشرف وعروستا نوال مرات عز الدين ودخلاتم للصالون . عمي بوشتى عارف الصباط ديالو شني فيه ما قدشاي يزولو طلع بيه هايثاك ايعفس فوق الزرابي و دادا حادة مع شاريا صباط جديد زولاتو ونزلاتو حدا الزربية باش يشوفوه كاملين . ايوا غي كلسو وعمي بوشتى جبد داك القالب دالسكار من الصاك ونزلو فوق الطبلة وقالم : ايوا سمحونا جينا غي بوجانا وصافي . هاد المطموسة دختك خلات حا الخنشة يكون فيها هايثاك شي نص قنطار غي دالحمص والعدس والفول وشي ميا وخمسين او كثر غي دالبيض كل بيضة قد الدبزة . نساثا فالكار ونزلت ادفنك . ماعث فاين كان عقلا .
السعدية : اسيدي غي وجاكوم قد الدنيا وما فيها . مارحبا مارحبا شخبارك اختي . كي دايرة الصافية وحمو وعبسلام
حادة : ايوا الحمدو لله اختي . مزيان بعدا غي مناين وصلنا نهار كامل وحنايا نغليو .
وئام فالودن ديماها : واش حمو ولد خالتي هههههه على سمية عندو كي دايرا ههههههه
السعدية قرصاتا و حمرات فيها ودارت عند عمي بوشتى
السعدية : كي داير أبوشتى . مووودة هادي ما تشاوفنا
بوشتى : ايوا راحنا انعديو أ السليفة وخلاص . ضربنا تمارة هاد النهار مع هاد المساخط دالكيران من الفجر وحنايا نركطو عاد وصلنا . فايناهو بوجمعة .
السعدية : خرج غي لهنا شوية ويجي .
حادة : ايوا تعطلنا بزاف مع الطريق ولايني زدنا حتى حنايا دخلنا لداك مرجان وتسارينا حا الشواي وجاب الله حاد الترفا.........
بوشتى : اح اح اح اح واقيلا العصر هادي أدودن . نمشي يانا بعدا نصلي عاد نرجع . (هو ما بيهشاي الصلاة بيه غي يمشي يخسل رجلاه من داك الريحة ادقلب)
السعدية : راهيا الجامع غي فالزنقة الرابعة على ليمن . ايوا صلي ورجع دغيا عنداك تودر .
هي هاديك بوشتى خرج من الدار و علم الزنقة بحاد الطونوبيلة حمرا كانت واقفة تما . مشى للجامع نضف حالتو وتوضى وصلى العصر . مناين رجع ما صابشاي الطونوبيلة الحمرا وبقى أيخيط فالزناقي شي ساعة دالماكانة فالتالي عاد بدا ايصقصي على شارع يونس ولد تافشين ايوا عاد جبر الدار ودخل . صاب بوجمعة كاين والسعدية وجداتلم ما ياكلو . ايوا كلاو وشبعو و بوجمعة جر عمي بوشتى وخرجو بجوج للجردة دالفيلا حدا لابيسين باش يكميو ويشربو قهيوة .
عمي بوشتى جبد الباكية دكازا وبوجمعة جبد السيكار وشعلو وعمي بوشتى قالو : اشني داك السخط دي ادكمي أبوجمعة ؟
بوجمعة : هادا السيكار . ايجي من كوبا . هاك دير شي نتيرات
عمي بوشتى قبط السيكار ولقاه ففاه ونتر حا النترة وقلو :
بوشتى : ايييييه كااااااينا النغمة . ايبانلي واقيلا هو خير من كازا .
بوجمعة : شنو كتقول . هادا راه غير سيكار واحد كيسوى ربعة دالباكيات دكازا ديالك .
بوشتى : أربي السلامة . قول أدكمي الدك وصافي .
و هو يشوفو المسخوط دأشرف وقالو : أتبارك الله على عمي كاسطرو . كومو ايسطاس . والله حتى جا معاك السيكار أعمي بوشتى .
عمي بوشتى ما ردش عليه وبقى ايشوف فداك الجردة وصقصى بوجمعة : دابا كا هادي بحيرة كا شني ؟
بوجمعة : هادي جريدة وصافي .
بوشتى : ايوا عندك هاد العنصر كامل هنايا (لابيسين) وما لاقي لا مطيشة لا فلفل لا باطاطا و خا كا لقيت غي شي حويط دالنعناع أصاحبي أو قلي الكتاف والو هههههههههه
نخليو عمي بوشتى يكمي هو وبوجمعة فالجردة دالفيلا والى اللقاء في الجزء العاشر إن شاء الله .

توقيع: عزيز البورقادي

تصنيف : الثقافة التسولية,طرائف عمي بوشتة