عمي بوشتى في فاس 07

عمي بوشتى لقى الدجلابة على قفاه ونزل ودادا حادة لقات الصاك على كتفا وتبعاتو . زادو حاد الشواي عمي بوشتى بالفيستة كحلة والقاميجة خضرا والسروال قندريسة ازرق والتقاشر صوفر طوالين والصباط قهوي والطربوش بالنواشة احمر ودادا حادة بالدجلابة لتشينية والدرة زرقا والصباط دالصافية صغير ما خلاشاي فيها . دادا حادة ما قداتش دزيد وقالتا لعمي بوشتى وهو يقلا ما عندي ما نلقيلك دابا غي عطفو وزطم عليه لقيلو بحا البلغة . هوما هايثاك وهو يبانلو السي خالد جمال رافذ السلعة وماشي قابط الطريق وهو يلاغيلو جا عندو

بوشتى : كا هدا السي خالد التولي ديانا

خالد : اهلا عمي بوشتى شني ادلقي هنا كا تسوقت لفاس

بوشتى : ايوا غي جابثني القودرة واها . شني رافذ ثما كا شريث السلعة ؟

خالد : انجي نتقضى ديما مهنايا كا خصك شي صباط لخالتي حادة

حادة : ايه اوليدي والله ما كرهت

خالد تماطا حا الكرطونة ومدالا وقالا هاك ها السباط ونزيدك حتى هاد الشربيل كادو منعندي

عمي بوشتى : ايوا الله يخلف عليك ويرزقك التيسير ولايني الخلاص حتى نتلاقاو فالسوق .

خالد : ما عليش اعمي بوشتى راك عزيز وغالي والله وما دسالني حلوف يا راك مقطرلي من عيناي .

تفارقو ودادا حادة لبست السباط الدجديد وجاها عبار و هي دقول لعمي بوشتى :ايوا الصباط هاهو جابو الله ودابا كا غي شفتنا فاين نعملو حا الشدق راني فريث ببوهيوف المصارن ديالي ايجغجغو .

بوشتى : ازيد اهاد المسروبة ها حنا مشي نوصلو وارا ما دنحجر .

مشاو سقصاو على الطوبيس دي ايعبي لواد فاس قالولم ما كاينش خاصم يقبطو طاكسي حتى للافياط ومن تما عاد يقبطو الطوبيس النمرة ربعة .

مشاو ركبو فالطاكسي حمرا . هوما طلعو والشيفور خدم الكونتور .

بوشتى : ايا خيي كبر خيربي هاد فاس انا مناين انجي ليلو انتودر كككول ما انعرفشي لاين نقبط

الشيفور : ايوا ضغوغي . هاكداك فاس صغيغ على كازا . كازا هي اللي أداش كبغات .ما تأدغش تساغا فيها . انت وإيلا ماصاوي أعمي

بوشتى : شني هي هاد ماصاوي عونيث

الشيفور : كتبغي المغريب الفاسي . شفتك لابس الفيستة كحلة والأندغيسة زرأا والتآشغ صوفغ داكشي علاش

بوشتى : انا اوليدي خبزاوي وهركاوي .

حادة : اوليدي و شني خدام أدأغأغ علينا . يانا والله ما عرفتك شني ادقول .

وصلو للافياط عمي بوشتى قالو شحال الشيفور شاف فالكونتور وقالو : عشغة ديال الدغاهم أعمي .

بوشتى : ايوا الشفارة هادي . تازة انخرطا كاملا من لاكار حتى لاحراش بستة الدراهم ونتينا زطمة دالطريق بعشرة دالدراهم والله فوق مياوعشرين لا زدتك ريال .

رمالو داك الفلوس ونزل هو ودادا حادة ولتخ عليه الباب .

بقاو ماشيين فالشارع عمي بوشتى تفكر الجلابة موسخة مشى للبومبا عند موالين اللافاج و زلى داك الموطع الموسخ بالما وفركك رجلاه وبقى ايفرك فيها حتى طحات ادشعل ولبسا ومشاو يعاينو الطوبيس النمرة ربعة .

عمي بوشتى : حطي الصاك ديالك راهم هنايا غي البانضية

حادة : أ والله بيا لا لقاوها .

عمي بوشتى : ايه بيك ما يلقيوهاشاي ولايني نتينا دلقيها براسك . فايناهو الكموس دالحمص والعدس دي جيبت معاك

حادة ضربت فراسا غي ضربة وقالتلو : أيما يا يما واقيلا نسيثو فالكار . فاين كان عقلي .

بوشتى : طك يا مالي وطك . كانتي المرا كا البهلة . وشا دالخلاواث باش بلاني ربي .

الطوبيس جا عامر . عمي بوشتى ودادا حادة طلعو وبقاو واقفين . دادا حادة لاقيا الصاك تحت يبطا وزاركا عليه مزيان وقابطا غي بيد وادمشي ودجي ليهن ولاون برزطات عباد الله . عمي بوشتى واقف موراها وشاد فالحديدة . شوية وحاد الشفار خشى يدو فالجيب دالجلابة دعمي بوشتى وبقى ايفافي على الدجيب دالسروال قندريسة . عمي بوشتى حس بيه وهو يخشي يدو من الدجيب لاخور دالجلابة ويقبطلو يدو مزيان ويزرك عليه . الشفار بقى اينتر ليهن ولاون والو ما بغى يطلقلو يدو من تحت الجلابة و هو يعقد حاد البونية باليد لاخور وعطا لعمي بوشتى للسدر عمي بوشتى ماحسشي حتى بيها و يعقدا حتى يعقدا ويعطيه للخنافر ويجيبو كاو . بقى ايدهشر وعمي بوشتى باقي قابط فيه وحلف حتى يوصلو هايثاك للبوليس . شوية والطوبيس فرانا حا الفران مجهد وهوما يجيو ملتوخين بجوج داك الساعة طلق منو وهربليه و عمي بوشتى نزل موراه . تبعاتم دادا حادة . عيا ما يسبك عمي بوشتى و فلتلو بالليهودي لاخور شوية وهو يصفر عليهم حاد البوليسي كان فالرومبوان .

البوليسي : عندكوم مخالفة انتوما بجوج

بوشتى : داش هاد المخالفة عاوث حتى انتينا

البوليسي : ما قطعتيش فممر الراجلين انت وهاد المرا غادي تخلص 50 درهم

بوشتى : كا اتبوهل علي كا شني كيف لاقيا هاد المخالفة ؟

حادة : اوليدي حنا ما انعرفوشاي غي عمك بوشتى مشى ايسبك على الشفار باش يقبطو وما عرفناه لاين قبط

بوشتى : انتينا هو اللي خصك دخلص مخالفة خليتني انلقي خدمتك ونتينا واقف هنايا شني حاطيلي ؟

البوليسي : هههههه والله ايلا ضحكتيني اعمي . شوف غادي نسمحليك هاد المرة ولايني حضي راسك المرة الجايا راه واحد اخور ما يعقلش عليك .

تفارقو مع البوليسي وبقاو واقفين فالشارع . السي Mohamed Houcine Tamim كان فالgيشي اوطوماتيك واقف . جبد حاد العشرين الف ريال ونسى البورطابل ديالو كالاكسي ايدج كان يالاه شراه . خلاه فوق الgيشي وركب فالطونوبيل وزاد .

عمي بوشتى شاف البورطابل ومشى ليلو رفدو ورجع عند حادة .

بوشتى : شوف قداش هاد الكورطاب صيبثو فداك الطاقة دالبانكا .

حادة : ايا بابا هادي الترفازة موشاي الكورطاب

بوشتى : ألا قالا هادو التيريفونات الدجدادين ايكونو كبارين هايثا لاقيين .

شوية والسي تميم تفكر البورطابل ديالو ما صابوش . صونا على نمرتو . عمي بوشتى بدا التيريفون ايفيبري فيدو وهو يتفافا وكان مشي يرميه .

بوشتى : مناين ايواجبو فهاد المصيبة

حادة : عطيلو الصبع فهاداك الضو دي ايشعل زرق شت بنت ختي داك النهار هايثاك ادعملو

عمي بوشتى بقى ايصبع للتيليفون حتى عيا عاد باش شدلو الخط وواجب . والسي تميم شرحليه شني طرالو وقلو غي عايني تما هاني ماجي عندك .

جا عندو وتعرف عليه وبقى يشكرو حتى عيا وعمي بوشتى حتى هو تعرف عليه وقال لحادة .

بوشتى : هادا هو التولي دي اينده الماشينة ياك قلتالك بحينا مناين كنا فالخميس

حادة : تبارك الله عليه . واقيلا تلفاتك داك الصخط حتى نسيث الكورطاب ديالك

تميم : الله يحفظلينا عمي بوشتى نصاب راجل وتولي حر ما يعبيش دالناس . ايوا شوف على مكتاب . ودابا غادي نعطيه هاد التيليفون ديالي الصغير كادو

بوشتى : الله يعطيك الخير اوليدي حتى يانا عاد انقول نشريه .

تميم : يالاهو ركبو نوصلكوم . فين غاديين ؟

حادة : عند السعدية ختي ادسكن ليهن جيهت واد فاس حدا مرجان

تميم دار امارش ووصلم لمرجان ودور مع عمي بوشتى ب. 200 درهم وودعم وزاد .

حادة : ايوا البيضات هرستملي . الكموس نسيثو فالكار . ايوا ندخلو عند السعدية طوالين؟

بوشتى : شفتني قبطت هاد الفرنكات من عند الراجل بانثلك فيهم عاوث .

حادة : لا قالا ما ندخلوشاي بيدانا خاويين

بوشتى : وفايناهوما هاد الحوانت هنايا فهاد الخلا

حادة : ها هو مرجان حدانا منو نشريو شني خاصنا . هنايا الحوانث بعادين حتى ختي ايشريو الصوالح دي خاصم غي منو .

بوشتى : ايوا زيد قدامي اهاد بوجحالل نشوفو هاد المرجا ديالك كي لاقي وكلنا عليك الله هههههه

والى اللقاء في الجزء الثامن .

               

توقيع: عزيز البورقادي. 

تصنيف : الثقافة التسولية,طرائف عمي بوشتة