طرائف تسولية 08

        واحد التسولي من عندنا كان عندو واحد الدري قالبلو راسو، كل ساعة أيقلو أنا باغي نمشي نخدم فوجدة، المهم عيا معه باباه (بترقيق الباء) وفالتالي عطاه ألفاين ريال وقالو يا الله سي لهذ وجدة نشوفوك شني ماشي دلقي، الدري هاذاك ما سمع وناض فالصباح بكري وجمع صاكو وطلع لوجدة، كوز فيها يوماين لا خدمة لا ردمة، والنهار الثالث دبرلو حد الدري من البلاد الخدمة مع حد الطاشرون أيحفر المطامر دلواد الحار، خينا فالله قيال النهار كامل وهو أيحفر بالفاس رجع للبراكة مهلووووك ومصهوووط وطاح على جنبو دودة، غي صبح الحال مشى عند الطاشرون وقالو عطيني فلوس الخدمة دلبارح با مريط وخاصني نسافر، عطاه المعلم فلوسو وهو يشد الكار ووصل للدوار فالعشية، وبقا مخبع حتى طلام الحال عاد دخل للدار ومشى يتخبع فالمتحم، يا الله فتح الباب وحد الدجاجة بقاث أدغيق، سمعاثا يماه وهي دقل لراجلا نوض شوف شكون هول الدجاج فالمتحم، ناض الراجل وهز لامبة ومشى وهو يصيب صاحبنا جالس فوق المدود، ما هدر معه ما كلمو، رجع عند مراثو وقالا: هاداك غي عبسلام ولدك ماصابشاي السكنى فوجدة، وأيخدم ويجـي يباث فالمتحم ويرجع فالصباح.  

توقيع: أحمد لزعر التسولي    

تصنيف : الثقافة التسولية,طرائف تسولية