علي بوحيول وأحمد.النقير: 1

بسم الله لازمة فكل مقام وعلى نبينا أفضل الصلاة والسلام.
الليالي والغيوساث قاطعة الطروق، وبوحيول ماعندو لاين عالسوق منو أيسترزق الله ويخدم على الوليداث ويماه.
سوق للارباع وشرا حولية وحالچدع، دبح وقاضا وطلع يكيل حالموداين دالgمح مرحبا دالزرع ويشري حالبوط ديالو من ورزو تقطع.
قضا شغلو ورجع للgزارين توكل عالله يبيع ويشري وهو ماجي عندو حالراجل معاه حالدري، سميثو احمذ ، هو دباعلو النعچة وصابا دافعة دولذ، مافطن بها حتى دبحا، جوج دلمغمطين منا جبذ، عطاهم لحالراجل كان موصيه عليهم دوا للمرا باش دولذ، لهلاي يحرم شي مسلم مالاولاد ،كان ديما أينزل صوالحو موراه، وجا يكملو الفلوس دالحولية كان غي العربون دعطاه، جا رافذ حالسلة دالخضرة فيدو ، وحالشاكوش فيه صويلحاث أدبان منو غي الملح على برا، فيد ولدو.
احمذ فلانطيرنة أيقرا وعندم العطلة دراس العام خرج يgوزا عند باه فالعروبية برا، gلس احمذ مع باه مور بوحيول وبداو أيطلعوا لحساب ويشوف شني نسا وشني جاب، واحمذ يتفكر البوط، عاد شراه وماصابوشاي فالشاكوش، طيحوا أو طيرولو شي مسخوط، وبقا غي أيبرقق فعيناه وخلاها فخاطرو ماقالاشاي لباه، حشويش وهو يبرق البوط دبوحيول فالقفة موراه، عمل هاه عمل هاه ، ويطير على داك البوط طلعوا فرجلاه وزول حالبوgة عملا فالشواري حداه.
هالهزيزة وبوحيول يضرب الفgذ فالبوط صاب غي خبش، واحمذ موراه ما عامل فراسو حي، خدام على حالرابعة دكاوكاو أيهرمش، بوحيول فطن به، على حقاش شافو جا بالبوgة فالرجل والشاكوش ماجابشاي فيه قدامو منزل، دار عندو وقالو:
بوحيول: كاعجبك داك البوط آحمذ، شفتك لابسو
احمذ: والله يلا نيمرواحد، سخنلي رجلاي كانو باللماز gبسو.
بوحيول :إوا قول لباك يشريلك بحالو، ونزل لعمك علي ديالو
احمذ: لا أعمي علي هذا بوطي والله فرجلك لا طلع ، كاحزابك الشركة صغبث غي بوطك صرذاثولك للارباع
بوحيول : إوا عاين يجي باك ودشوف كدزولو أو لا أبو قرانع
جا باين احمذ وما فراسو ما يتعاوذ ، وقالو بوحيول: شوف ألشريف هاد ولدك راه عريف، عبالي البوط وزايدا علي بالبحوط.
السيد شاف النمرة صابا ربعين، واحمذ قدامو أينمس فعيناه دقول مظلوم مسكين، وهو ولدو وعارفو موشي مداك الدراري دأيشفروا أو يخطفوا، ودار فبوحيول: نعل عنك الشيطان أبوحيول البوط دولدي عاذ شريثولو معند احميدة دجلول، شوف فاي مشى بوطك لا دنزل علينا بقول.
احمذ: أودي أعمي علي البواط مشابهين، والموارة ماعندكش مريgلين.
علي بوحيول شاف البوط مشى ماعمرو يرجع، وهو ماعندوشاي مع الشباك والصداع، قالم: أودي غي البوط دميكة الله يهنيه، وسي احمذ ديانا ماخصاراشاي فيه.
عبا احمذ البوط وجا طالع فالعقبة دالشريف ويسحثولو ويجي على عين قفاه منفوط، وناض غي الغيوساث وقال مع نفسو هاذي الدعوة دبوحيول فيا جاث، ماطلقنيشي مالسمارين للحمارين، هاذو غي دنوبو ودنوب فعايلي لقباحين.
إوا أسيادي Gازث حالسيمانة، الحال سمر والشميشة للتطحان مزيانة، ناض احمذ مع باه يطحن حاللهوة دالزيتون، باش يعطيه الزيث يعبيها معاه فاش يسسن. حيث أيتاوا فلانطيرنة ويلا عول غي على ماكلث المخزن قول قثلوا الچوع والغبن.
قيال احمذ يدور عالبغل فالرحى ودقول كطرح النفس أو شاف الراحة، عصروا باه وعموا شحال من عصرة، وهو أيمشي يداحس معاهم مرة مرة،
فالعصرة التالية مشا يجبذ بالچهد سحثوا يداه مالدراع دالپريص ويجي فالنقير ضاربة بغطيس ، جبذوه عمو وباه ناض أيقطر بالزيث من راسو حتى لرجلاه، والبوط عامر حتى لفاه.
وقفوا باه فوق النقير يقطروا وكاماكانشي عمو باه بالفقايص كعملوا تحت الپريصة يعصرو.
ومن داك النهار والدراري دالدوار أيعيطولو احمذ النقير، ومشاث عليه كنية أيقولالو الصغير والكبير.
أما بوحيول gاز على بوط خور شراه ، وعلمو بالحامي من فاه، ومن داك النهار معمرو شرا البوط وما كواهشي مفاه.
بوحيول معمرو أينسا دعملا بيه، ومني دجيبلو السويفة احمذ مشي يفديها فيه.
إوا عاينو انتقام بوحيول.
ودعمل علينا شي ترgيبة لا يقرا ويزيد مع الدريبة ، يعمل جيم أو كومنطير.
وعلى المودة نتقاشعوا.

توقيع أنوار زياد

تصنيف : الثقافة التسولية,طرائف تسولية