عمي بوشتى في فاس الحلقة (8)

عمي بوشتى في فاس (8)

عمي بوشتى عيا ما يبحصص كما يبانلو شي حانوت حال ساعة والو ما حداه غي مرجان فداك الخلا المهم توكل على الله وتم داخل وتبعاتو دادا حادة زادو لداخل شواي . دادا حادة رافدة الصاك على كتفا وادمضغ فالمسكة وقابطة لعمي بوشتى فدراعو وهو عاجبو الحال وكثير مناين شاف اك خيربي طفلات دي ايتخلصو مصافين وحدة مور وحدة و هو يدور عند حادة وقالا : 

بوشتى : شني دسبليون هنايا غي الزعرة لختا دقول نتينا توام .
حادة : سبحا الله أ الراجل . الرجوع لله وشوف قدامك حا الشواي ونتينا غي ادفنك ليهن ولاون كا ماعمرك شت لعباد ؟
شوية وواحد البنت عيطات لدادا حادة قالتلا خلي الصاك ديالك هنا الالا عاد دخلي . قالتلا :
حادة : لياه الالا نعطيك الصاك ديالي شني دكون نتينا باش نعطيك صاكي
المستخدمة : راه ممنوع الشريفة . حطي الصاك ديالك هنا و ملي تكوني خارجة دوزي هزيه .
بوشتى : عطيها ايوا الصاك وهنينا ونتينا زاركا عليه دقول عندك تما الذهب ياك غي جوج شرويطات شني مشي دلقي هيا بيهم .
عطاتا الصاك ودخلو . بداو ايشوفو فالاليكتروميناجر ودادا حادة حالا فاها فداك الثلاجات والماكينات دالصابون و الترفازات شاعلين وايبريو . ودارت عند بوشتى :
حادة : شوف قداش الترفازة تبارك الله قاد الباب دالغرفة ديانا التحتية وما هاد التلاجات قداش ايا بابا دخبع فيهم التاور ويشيط الخير . وما هاد الناموسيات غزلان ابوشتى والله ما كرهت شي مطربة حتى يانا جنابي طابو بالنعاس على داك الحصير .
بوشتى : هاداك ماخاصنا زعما ساكنالي فدار دبيبغ . واخا نبيع المطاير دي عندي كاملين ما نقورشي التمان دهاد السخط .
زادو شويش جيهة الماعن بقات حادة ادشوف فحاد المولينكس وقالت لعمي بوشتى :
حادة : حتى حنا خاصنا شي مونينيكس أبوشتى بحال هادي باش نلقيو العصير
بوشتى : دلقي لحلالق ينشاع الله . لمن مشي دلقي هاد العصير كا لحدهوم كا لعياد . زيد قدامي اهاد موجحالل زيد .
شوية مشاو جيهت المواد الغذائية بوشتى درز ديريكت لحاد القالب دالسكر رفدو وتم ايجبد لفلوس باش يخلص السيدة اللي واقفة تما .
المستخدمة : ماشي هنا اعمي . هاك الشاريو دير فيها داك الشي اللي شريتي حتى تبغي تخرج عاد دوز خلص عند هادوك البنات .
بوشتى : خياار .كا داك الطفلات دي مزوقين ولابسين كيف كيف هوما دي ايتخلصو . اسيدي ما خليتولي ما نقول بهاد النظام دي لاقيين .
المستخدمة : شكرا اعمي . ضروري من النظام والبروطوكول
بوشتى : النضام كاين ولايني هاد خلط وكول ما شفتشاي
المستخدمة : البروطوكول اعمي ماشي خلط وكول .
بوشتى : هايثاك قلي . ولايني شتكم ما ادبيعوشاي هنايا المناجل والفيسان ولانgري والدوا دالبرغوت و البق . عاملين البوق غي للموسيقى واها ما ادبرحوشاي ؟
المستخدمة : والله ايلا ضحكتيني اعمي هههههههه
بوشتى : ايوا الله يعاونك ابنتي ويخرج سربيسك على خير .
لقى عمي بوشتى داك القالب دالسكر فالشاريو و بغى يدفع درزت حادة زولاتولو وبقات ماشيا دافعا حتى وصلو حدا مواد التجميل وفافات على حاد القرعة دالريحة ديال ربعمية دريال ولقاتا فالشاريو .
بوشتى : لاش لقيت هاديك تما شني مشي دلقي بيها عاوث ؟
حادة : مشي نخلصا بفلوسي غي هنيني حا الشويش من النgير . السلامة يا ربي ما ايسكتشي كككول .
مشاو جيهت الفواكه وقالتلو :
حادة : ما دزيد مع داك القالب دالسكر حتى كيلو دالتفاح
بوشتى : ما بانلي بو ديسير هنايا منزلينو ايبيعوه كامل باقي خطر (الكيوي ولافوكا)
شوية ومشاو باش يخلصو بقاو قابطين التور حتى وصلاتم النوبة . رفذ عمي بوشتى داك القالب دالسكر وداك القرعة دالريحة البنت جمعتلو الحساب قالتلو ستميا وسبعين قالا :
بوشتى : لياه بشحال حسبتلي السكار ؟
المستخدمة : طناش لدرهم ونص والريحة بعشرين درهم . ودرهم ديال الصاك .
بوشتى : لا دعطيني بوصاك مشي نلقيه فقبي .
حادة : اويلي أ الراجل مشي دشواه بينا رفد الصاك وسكث
المستخدمة : راكوم غادي تشاركو معانا فالطومبولا ديال هاد الشهر . هاك هاد الوريقات وحدة لوحها فالصندوق و وحدة خليها عندك وتسنى شوية راه غادي نديرو القرعة دابا .
خلص عمي بوشتى ومشى رمى الورقة فالصندوق وكلسو يرتاحو . شوية بدات القرعة . جا المدير التجاري حل الصندوق وهز ورقة . ما أدطلعلو غي الورقة دعمي بوشتى فيدو . عيط لعمي بوشتى و قلو مبروك ربحتي معانا تلفزة سمارت تيفي وقسيمة شراء ديال الف درهم .
بوشتى :الله يبارك فيك اولدي . ايوا الترفازة عرفناها ولايني هاد قسيمة ما عرفتاشاي . ما دكونشي وحدة من هاد الطفلات سميتا قسيمة ؟
حادة : كيفاش عاوث هاد قسيمة ؟ داك النهار ماجي ادهضرلي على بسيمة . دابا قسيمة . ايوا غدا مشي دقلي نسيمة ولا سليمة . انا ادبانلي ابوشتى بداو يخرجو رجلاك مالشواري .
المدير : هههههه لا اعمي . قسيمة شراء زعما عندك الحق تشري ألف درهم ديال الحوايج من عندنا .
بوشتى : اوليدي ولايني يانا غي ماجي ضيف وانسكن بعيد واش ما يمكنشاي تعطيوهالي فلوس ؟
المدير : التلفزة لا . ولكن قسيمة شراء واخا ما كاين مشكل
بوشتى : الله يعطيكوم الخير . والله وكا عزابلي هايثا يا حتى نبقى نجي نسوق ديما منهنا . انا هادي خمسين عام وانا نرفد الصوالح منعند ولد السي محند دعلي عمرو ما عطاني حتى قابسة دبشكيطو .
عيط المدير للخداما جابولو كرطونة فيها سمارت تيفي طوشيبا 45 وعطاه الف درهم وسلم عليه وقالو مبروك .
دادا حادة مشات جابت الصاك ديالا لقات فيه القرعة دالريحة و لقاتو على كتفا ورفدات الصاك دي فيه القالب دالسكار و عمي بوشتى لقى العشرين الف ريال فجيبو و رفد الترفازة وخرجو بجوج .
وقفو برا من مرجان جنب الطريق الوطنية . شوية و عبد الغني العباسي ماجي كان فتمارة وماشي للقليعة عند والديه وهو حتى يوقف حداهم ونزل يسلم عليهم .
عبد الغني : كا هدا عمي بوشتى . اهلا اهلا اهلا
بوشتى : كا هدا عبد الغني . اهلل اهلل كيف وقعلك اولد عمي . ياك نتينا ادبان غي بالليل كيف طرالك دابا ادور هنايا بالنهار ؟
عبد الغني : ايواالضروف وصافي . كل نهار وكي لاقي البرنامج ديالو .
بوشتى : و دابا كا ماشي للقليعة كا شني ؟
عبد الغني : مشي نgوز بعدا نشوف السي لزعر التسولي أحمد قالولي راه هنايا نلقي معاه شي قهيوة عاد نكمل الطريق
بوشتى : كا السي احمد د الحاج عبقادر د لزعر الاستاذ ديانا ؟
عبد الغني : ايه اعمي بوشتى . دمشي معايا يالاه
بوشتى : اودي ماشي عند شي نسابي هنايا وما يانا كامشيث معاك . ولايني واقيلا مشي نعطيك هاد الترفازة عبيهالي معاك للدار انا مزاوك وحاولي عليها سير غي بالشويش لا دسبgشي .
عبد الغني : كا شريث التلفزة LCD اعمي بوشتى
بوشتى :اودي غي ربحناها فهاد مرجان . ولايني هادي ما ايقولولاشاي LCD قالك ايقولولا الزمر تيفي
عبد الغني : اسيدي راك مزهار . ايوا بصحتك اعمي بوشتى هاد الزمر . يالاه لقيها فالطونبيل
عطاه عمي بوشتى التلفزة وخلاه بخير و مشا
حادة : ماعات فايناهو التيريبوتيك نعيطو لختي دجي دلاقينا
بوشتى : باقيشي تيريبوتيك فهاد الزمان ا الحولة . ما جبرناشي حتى الحانوت هنايا عاد نجبرو التيريبوتيك
شوية و عمي بوشتى يتفكر التيريفون دي عطاه السي تميم و لايني مازال خاصو عاد يشري لاكارط باش يمكنلو يعيط . دار موراه بانتلو الوكالة ديال اتصالات المغرب مشى ليلا وشرى لاكارط جديدة لقاها فالتيريفون وجبد حاد الكارني من الدجيب مقيد فيه النوامر دالعائلة وبانلو حاد الشاب ماجي لابس الكومبلي والكرافاطا وقلو هاك اولدي الله يرحم الوالدين لاغيلي على السعدية راها النمرة ديالا مقيدة فهاد الكناش .
الشاب : ما كايناش السعدية فهاد الكارني كاينة غي يامنة
بوشتى : يامنة دي مقيدة تما هاديك ختي
الشاب : وكاينا السليفة
بوشتى : إيوا السليفة هي السعدية .طك يا مالي وطك ادعجبونا غي فالكوستيمات والكرافاطات والسعدية سليفتي قداش مقيدا تما ما عرفتاشي هههههههه
نخليو عمي بوشتى كيعيط على سليفتو والى اللقاء في الجزء التاسع إن شاء الله .

دامت لكم البسمة

توقيع الاستاذ عزيز البورقادي

تصنيف : الثقافة التسولية,الرئيسية,طرائف عمي بوشتة