عمي بوشتى في فاس 14

بوشتى : آااااح ......الله اربي .....اطهري طهري طهري اربي طهري
حادة : أميمتي على الراجل نقرط من طهرو وشكون يكون بيا يلا تgزر ورزملي فالحالة . بوشتى أبوشتى ياك لاباس ؟
السعدية : الله معاك اختي ترزني وسكتي شوية نشوفو بعدا غير شنو وقعلو
بوجمعة : لاباس عليه لاباس ما وقعلو والو غير تقصح
بوشتى ناض وقف على رجلاه و ورك على الكتف دحادة بحا اليد واليد لخرى قبط بيها على gود خراربو وناض ايعرج . بوجمعة تعاون هو وحادة ودخلوه للصالون ولقاولو الخدية موراه ونعسوه على طهرو
بوشتى : أوفثيث . واقيلا العطم دالرياصة دمراودي نخلع من موطعو
بوجمعة : لا لا لا راك لاباس . كون تهرستي ما تقدرش تنوض وتتمشى
حادة : لا ابوجمعة . هاد التعرعيرة دي رعرع ما يكو غي نقرط من محكريش او تفكلو شي عطم سقصيني يانا شني gاز عليا مناين سحث من الدروج دالروف وجيت منفوطة فالوص دالحالة و تفكيت من الغمارة كما كان داك الشريف الجبار كا راني بريت عوجة
السعدية : خليواه يرتاح شوية ويلا تزاد عليه الحال نديواه للكلينيك
بوشتى : ما خصني كنينيك دابا . جيبو غي شواي دالزيت ودمسدلي حادة وخليوني مسرد هنايا حتى للصباح ونشوف شني نلقي .
غزلان : ياك ما نعيط على بلال يجي يشوفك اعمي بوشتى
بوشتى : ياك هو طبيب دالعيناين موشاي دالعطام
حادة : ايوا حتى انتينا كا كانو عندك العيناين ما دنكورشاي مع الدروج ودجي هواذ بحا دي ايكور الخنشة دكرسانة
بوشتى : لا ابنتي راني واقيلا غي مقصح و صافي
حادة : ايوا هادي وحدة ما كانتشي على البال كككل . جاب الله راحنا بعادين على الدار وما هي حدهوم وعياد كا راهم خلطو يرgبو عليك
بوشتى : ههههههههه اودي فكرتني فداك النهار مناين كث مريط وجاو يرgبو عليا داك المهيبط دعياد وداك موسنادر دحدهوم والله ايلا طيحو مني يا عشرة كيلو غي بالخلعة
حادة : وكثير مناين قالتلك حدهوم خاي الطاهر هايثا كان مرط وبقى غي خمسيام وماث
بوشتى : ويانا حسيث بالارض ادور بيا وقلت بصاح الموت على خلوط ونوضت انوصي حمو باش يفتح المطمورة و يجبد القماح و .........
السعدية : لاباس عليك ابوشتى مازال العمر طويل ان شاء الله . سيري أغزلان جيبي شي كاس دالعصير لعمك بوشتى
حادة : ايوا مشي دوسخ المونينكس غي على كاس وحيد . لقينا كاملين نشربو
وئام : دايرين عيد الميلاد لعمي بوشتى هههههه
السعدية : سكتي اهاد الجنية سيري تحفضي دروسك وباركا من البسالات
المهم شربو العصير و قصرو جميع مع عمي بوشتى و مناين بغى ينعس جابت حادة الزيت ومسداتلو وغطاتو وخلاتو ينعس ومشات عند السعدية كانت موجدالا الحنة وعيطات على نوال نقشات ليها يديها ورجليها و نعسات راشقالا
فالصباح ناضو جاو سولو فعمي بوشتى صابوه لاباس غي باقي شوية مقصح . ناض بوجمعة جابلو واحد المعgاف ديال العرعار كان شراه من الصويرة . قبط عمي بوشتى داك المعgاف وتم نايض وهو يسرسر التيليفون دالسعدية
السعدية : ألو
حمو : ألو . خالتي هادي
السعدية : شكون ؟ حمو ؟
حمو : ايه حمو . شخبارك أخالتي وشخبار عمي بوجمعة وأشرف و غزلان
السعدية : كلشي لاباس شخباركوم نتوما . كي دايرا الصافية
حمو : لاباس . حاد بابا راه حداك ؟
السعدية : كاين . هاهو ندوزوليك
بوشتى : ألو . حمو . شخبارك و شخبار ختك
حمو : لاباس ابابا . كا ما مشي دجيوشاي . الناس هنايا كاملين ايصقصيو عليك
بوشتى : لياه شني واقع
حمو : اودي راهم داك الناس دالجمعية قلك مشي يلقيو المهرجان دالتول
حادة : شني قال ؟
بوشتى : عاين أ المرا . ألو . فيواخ مشي يلقيو هاد الميهراجا ؟
حمو : ايقولو نهار حضاش وطناش وطلطاش فالشهر الماجي
بوشتى : وفاين مشي يلقيو هاد الشي ؟
حمو : قالو مشي يلقيواه فالحد . وخاصك دجي راهم عوالين عليك باش تهضرلم مع الناس داالجماعات والخيالا والرباعة دالغنايا والناس دي ادعرف باش يعاونو الجمعية بالفلوس والخزاين وشلا حوايج راهم مشي يلقيو مهرجان كبير و يهضرو فيه غي على التراث ألو ....... .ألووووو
تقطعع الخط
حادة : داش هاد الميهراجا ؟
بوشتى : نوض غطي جلابتك صافي ما بقانا ما نزيدو هنا
بوجمعة : ياك لاباس ؟
بوشتى : التسول كاملا ادصقصي عليا قالك مشي يلقيو الفيشطة فالحد وخصم يجمعو الفلوس ومعولين عليا نهضرلم مع الناس .
بوجمعة : ايوا زيدو معانا غي هاد النهار حتى تبرا مزيان
بوشتى : لا لا ما نزيدشي حتى مينوط
بوجمعة : والله ما سخينا بيكوم أصاحبي . ايوا منين عوال تمشي ومازال مقصح شوية غادي نسيفط معاكوم أشرف ولدي يوصلكوم بالطوموبيل . وحتى انا غادي نعاون هاد الناس دالجمعية بشي بركة . هاك هاد الشيك ديه معاك وعطيهلم راها خمسالاف درهم تماك . ومنين يبدا المهرجان مشي نجيب السعدية ونجي نحضر معاكوم وحتى البيكوب والشيفور نسيفطولكم ربما تحتاجوه . والله يعاونكم .
بوشتى : أسيدي الله يخلف عليكوم . أفاينك أهيا يالاه غطي جلابتك ونوض دمشي عند ولادك .
السعدية : هاكي أختي دي معاك هاد الشوية دالgاطو للدراري وفالعرس ان شاء الله جيبي معاك الصافية واجي .
هي هديك ودعوهم وخرجو . ركبو مع أشرف و قبطو لوطوروت و زادو .
بوشتى : هايثاك اولدي عملثا مخيرا مناين قبطت روطوروت
أشرف : تستاهل أعمي بوشتى . انت شخصية كبيرة وانا كنت غالط فيك .
بوشتى : اودي اولدي انا راجل دغري ومعقول وحاطي جنابي داك الشي علاش ايبغيوني الناس
وصلو للحد صابو السوق عامر . نزل عمي بوشتى وأشرف وخلاو دادا حادة فالطونوبيل وبدا عمي بوشتى ساعة دالماgانة وهو غي أيسلم على صحابو وحتى على الدراري دالجمعية وعرفم على أشرف . وباش كملا مزيان مشى عند ولد المنصورية وقلو برحلي بهاد الفيشطة دي مشي يلقيو فالحد باش كلشي يسوق الخبار وقول لعباد الله راكوم معروضين كاملين وخاص كلشي يلقي اليد فاليد ونتعاونو باش ينجح هاد المهرجان .
للقصة بقية والى اللقاء

توقيع: عزيز البورقادي.

تصنيف : الثقافة التسولية,طرائف عمي بوشتة