عمي بوشتى في فاس 13

حادة : والله ايلا الشغل مبدل بزاف على هادي شحال . انا مناين جا بوشتى يخطبني صيفط غي باباه ويماه وعمو و جابو قالب دالسكر وجابو معاهم العشا ديالم وجاو وزاد بابا ناض دبح حاد الدك حمر قداش ولقينالم العشا ويانا كث مشي نطير بالفرحة حقاش بوشتى كان غزال فالزين الطولة والتجريدة والهيبي هواذ مسبسب على كتافو و القميدجة والفيسطة والسباط هو اللول دي غطاهم فالدشر كانو الطفلات كاملين ايحماقو عليه و ايتمناو يعبيهم وكان .........

بوشتى : ما دسكتناشاي اهاد اللسان دالتاتا ألاطيف ألاطيف كلشي ساكث غي نتينا دي قالبا البيث 

نوال : غي خليها تكمل أعمي بوشتى . كملي كملي بغينا نسمعو التقاليد ديالكوم 

حادة : صافي ما مشي نهضرشاي . ديما ايلقفني دقول ماعاث مالو معايا

الحاجة مليكة : كان هاد الشي شحال هادي دابا ولاو كيتفاهمو غي فالفيسبوك والواتساب

حادة : وشنيهو عاوث هاد الواد فاط

بلال : هههههه الواتساب اخالتي ماشي الواد فاط . فين غادي يفيض هاد الواد . الواتساب بحالو بحال ميسانجر يمكن تصيفط فيه الفيديو ولا التصاور 

حادة : ايوا العجب هادشي دي طحا اليوم 

الحاج سلام : نتوما منين اسي بوشتى ؟

بوشتى : حنايا من التسول

الحاج سلام : ايوا الناس دالتسول الله يعمرا دار تنعرف بزاف دالناس من تماك 

نوال : كاينا واحد المجموعة فالفيسبوك سميتها تراث قبيلة التسول تيجيبو شي حويجات زويونين ديال التراث و تيهضرو على واحد السيد حتى هو سميتو بوشتى بحالك

حادة : هو براسو . قالتالي بنتي الصافية . دابا راه طحا مشهور ايهضرو عليه الاساسدة فالحيسبوك

بوجمعة :حيت هو راجل مزيان ودغري و معقول 

الحاج فوزي : باينة فيه . قلي اسي بوشتى عندك شي شوية دالبلاد تما فالتسول 

بوشتى : ايوا شي مطاير قلال واها 

فوزي : والما موجود

بوشتى : ايوا الخير ما يخطاش ولايني كوكان عندنا شواي دالمادة نلقيو العجب

فوزي : انا جاتني فكرة دابا . غادي ندير معاك شراكة . انا بفلوسي وانت بخدمتك وغادي نحفرو تما البير ونجيبو البومبا و نديرو الgوتاgوت ونديرو ليسير ونزرعو مطيشة والفلفلة والبطاطا والعنب ونبنيو واحد الكوري نديرو فيه شي بgيرات ودادا حادة تgابلهوم وغادي يولي عندكوم واحد المدخول شهري محترم ونقدرو نخدمو معانا حتى الدراري ديال الدوار وغادي تكون فيرمة كبيرة ان شاء الله

بوشتى : اسيدي الله يربح هاد المشروع كان على بالي من هادي شحال ولايني ما صيبتلوشاي الدجهد

السعدية : بحرا نبقاو نجيو عندك اختي للفيرمة نشربو غي الرايب بلدي واللبن 

حادة : مرحبا بيك اختي وبهاد الجواد كاملين 

عمي بوشتى رفذ الكاس داتاي ومشي يشرب وهو يصوني التيليفون وبدا يفيبري فجيبو وهو يتخلع وطلق الكاس من يدو وطاحلو فوق الزربية وفوق الدجلابة ديالو ما خلاشاي فيها . فافا على الدجيب وجبد التيليفون وجاوب 

بوشتى : ألو ......ألو ........ألو شكون معاي ........ألو.......وهو يتقطع الخط

بوشتى : الله يعطي لباباك الحبس شني ادسالني وسخت الدجلابة ديالي بيطا ما يبغيشي حتى يزول منا هاد اتاي

اشرف : بقات فيك غير الجلابة ما شتيش الزربية كي ولات

حادة : شكون دي لاغالك

بوشتى : ما نعرف . انا انقول ألو و ما أنسمع غي التخرخيش

حادة : هادي ما دكون غي الصافية خصاتا شي حاجة و ما عنداشاي التعبقة باش دهضر معاك

بوشتى : وشكو عطاها النمرة . لا لا لا هادا غي شي مسخوط ايتملغ او شي وحيد غلط فالنمرة 

حادة : حتى دلاغيلي أبنتي أغزلان على الصافية ما صقصيناشاي فيها هادي يوماين 

الحاج سلام : ايوا سيادنا الله يمسيكم بخير 

بوجمعة : قصرو معانا باقي الحال

الحاج سلام : الله يجعل البركة . مرة اخرى ان شاء الله

فوزي : بسلاما عليكوم . عمي بوشتى ما زال نتلاقاو

ناضو خرجو و مشاو فحالم وعمي بوشتى شاف الساعة فالحيط صاب التمنية وقالم :

بوشتى : ما تفرجناشاي فالترفزة هادي يوماين ماعاث فاين خرجت داك منار

حادة : راها التمنية . دابا ادبدا

السعدية : دابا راها التسعود هاديك الساعة مازالا مريgلة على القديمة

بوشتى : اودي هاداك كمال من نهار تجوج على منار حسبتو موشاي راجل . خرجلي من خاطري ما بقاشاي ايعجبني 

حادة : وما شفتشاي داك فريدة كانث .......

غزلان : هاكي اخالتي ها هي الصافية باغية تهضر معاك 

بوشتى : كا هي دي لاغاتلك كا نتي دي لاغيتلا

غزلان : أنا اللي عيطتليها أ عمي بوشتى

حادة : ألو الصافيا شخبارك أبنتي و شخبار حمو .

الصافية : لاباس أيما راحنا لاباس .

حادة : كاينا شي شتا أو لا

الصافية : طاحث ايما الخيرات . والريح مجهد طيح لعمي العباسي الخروبة كانت مروطة بالخروب وطاحو حتى شي محايف من السقف دالسطيحة

حادة : السلامة يا ربي ايوا شني نقلك شوف داك الفرنة غطيها بالميكا باش ما طيح والحمارة لا دخرجاشاي خليها فالمسحم وعطيها التبن ورد بالك لداك الفليلسات و داك الجوج بيبيات

الصافية : ما كايناشاي الميكا كلاثا الحمارة مشي نرمي فوق منا غي الgران دي ايلبس بابا مناين ادكون الشتا

حادة : وما جاشاي عندكوم الدري دالعباسي

الصافية : راه جا وركبنا داك الترفزة وجات غزالة ايما

حادة : ايوا بصحتكوم يالاه تصبحو على خير و عندك دخلي الباب بلا تعراط .

هي هاديك تعشاو ونعسو وفالصباح ناضو فطرو وعمي بوشتى قال لدادا حادة نوض أهيا باش نمشيو . ما خلاتمش السعدية وقالتلو ما غاديش تمشيو حتى تساراو بعدا ونشري لختي شي حويجات ونديرلا الحنا. هي هاديك ناضت عيطات لغزلان دارت امارش للطوموبيل وعباتم لبوجلود يتساراو هوما وصلو وهوما يتلاقاو مع القافلة ديال طواف المغرب وصلات لفاس

بوشتى : كا هادو صحاب البوكشليطات ايسابقو 

غزلان : هادا طواف المغرب أعمي بوشتى . السباق ديال البيشكليطات اليوم وصلو لفاس

بوشتى : أيساراو المغريب كامل غي على البوكشليط ؟ بناي البالاواث لخرين . وحنايا الكار كان قريب يعمل بينا سيمانا غي من الحد لفاس 

حادة : وشحال ايسبكو هاد المساخط هوما سابقين الطنوبيلات

بوشتى : هادوك الطنوبيلات موراهم رافذين البوكشليطات وتابعينم ايبيعو ويشريو معاهم فالبوكشليط

حادة : و شحال دالزوعر معاهم واقيلا نصارى هادوك

غزلان : آه نصارى أخالتي

السعدية : يالاه ندخلو لبوجلود و نهربو من هاد الزحام

زادو للساحة دبوجلود صابو شي حلايقية و عمي بوشتى قلم غي سيرو قدامي انا مشي نبقى انعاينكوم هنا ( وهو غي ما فيه ما يخسر فالفلوس ) . خلاواه ايتفرج فالحلقة وزادو هودو مع الطالعة . 

تساراو شوية و السعدية تهلات فحادة مزيان شراتلا جوج بيجامات وسباط و توب دالجلابة و غزلان عباتا للقيسارية شراتلا الحلاقات وشرات للصافية ثوب ديال التكشيطة و صاك وزادو دخلو لمولاي ادريس زاروه ورجعو صابو عمي بوشتى باقي مفنك فداك الحلايقي دي ايقولولو المسياح وايموت بالطحك . شوية تفكر الفلوس . رما يدو للتقاشر ما صاباشاي وبقى غي ايدور فموطعو . هوما خلطو عليه صابوه صفر دقول قابطاه الموت شوية وبوجمعة عيط لبنتو قالا هاهي شي فلوس واقيلا بوشتى طيحها هنا فالصالون قبل ما يخرج . قالتا لعمي بوشتى وهي عاد رجعات فيه الروح . هي هاديك ركبو ورجعو للدار .

بوجمعة : بالصحة المسارية . ولايني راك خليتي فلوسك هنا ومشيتي . راك مالقيتي باش تسارا

بوشتى : اغي سكث شحال من حاجة كث عوال نشريها ساعة صيبت راسي بلا فلوس

بوجمعة : ما تبقاش تهز معاك الفلوس سير حطها فالبانكا اصاحبي وبقى تهز معاك غي لاكارط gيشي

بوشتى : كا اطحك عليا ابوجمعة . كا يانا نعرف نخدم داك الوعد دلاكارط ونعرف نوقف بعدا حدا داك الطاقة دي ايخرجو منا الفلوس 

بوجمعة : كلشي ساهل . دابا را القهوة واجدة هز كاسك و يالاه نطلعو للسطح نكميو وغادي نشرحليك كلشي

بوشتى : ايوا عايني نتوضا ونصلي بعدا الضهور باقي ما صليتاشاي

هي هاديك توضا وصلى ولبس غي حاد البانطوفة دبوجمعة وطلع هو وياه للسطح شربو القهوة وبقاو ايتهاودو ويكميو ومناين تمو نازلين عمي بوشتى سحتت بيه داك البانطوفة و يتم هواذ اينكور فداك الدروج حتى وقف فالدرجة التالية كان مشي ينقرط وناض قبط فطهرو وبقى ايرعرع . سمعو الزgا ديالو وجاو ايسبكو .

نخليوهوم ايقدمو الاسعافات الأولية لعمي بوشتى والى اللقاء في الجزء الرابع عشر .

توقيع: عزيز البورقادي

تصنيف : الثقافة التسولية,طرائف عمي بوشتة