عمي بوشتى وذكريات الطفولة 01

عمي بوشتى الله يطول فعمرو مناين كان باقي حيبور صغير كان مهلي فيه مزيان باباه الحاج حمو . كان خيطلو الدجلابة صغيورة بيطة بالقب على قدو عند الفقيه دالدجامع السي محند دعلي الغازي بالطعمة دي كانت وجدت يماه . و كان شاريلو البوط دالميكا سغيوتيتي كحل على قد رجلو والقاميدجة بيطة مزيونة كانو طارولا شي بوطونات و عاودات لصقلتو يماه وحدين خرين كلها فلون و رقعاتالو . وكان شاريلو باباه حاد الصروال دالكيطمة دالنيلو ازرق فيه جوج خطوطا حومر هواذين مع الجناب وكان باباه فالشتا ايخليه يربي الغوفة حتى ادطحى بحا العش دبلارج وفالصيف ايجيب الموس و يقرعلو . ومناين كبر شواي عباه باباه عند الفقيه دالدجامع السي موحند دعلي الغازي باش يقرا ويتعلم يلقط الحروف ويحفط القرآن . 

حاد الصباح مناين كان ماشي gاز على شي شجر دخالثو وشاف الكرموس الحبيبة غي الفاسي والبيطة مشرطة والعسل هواذ معاها وكوماصا ايجني ويلقي وحدة ففاه ووحدة فالقب دالدجلاب دالصوف بالحليب ديالا بكلشي حتى شبع ماكلة و عمر قبو ومشى للدجامع وهز اللوح ديالو وكوماصا ايقرا ويمشي ويجي ليهن ولاون و القدام واللور ويتكى على الحيط بطهرو . نسى بلي قبو عامر بالكرموس حتى تلينث داك الكرموس وطحات كوفيتير ومناين طلقم الفقيه يمشيو يتغداو ويجيبو التحريرة . ومع هو كان قرع مفرطس غطى قبو من الدبان ساعة تليطثلو داك الكرموس كاملة فوق القلقولة دراسو ولصقت . مناين حس بشي حاجة باردة فوق راسو زول القب و هو يصيب الزرازر دالكرموس هوادالو على صنطيحتو وودناه . مسح راسو بيداه ومشى هيثاك راسو ايشرق بالزريعة دالكرموس .
ومنين gازث ليام وgبسث الكرموس دي كانت باقية فقبو حاد النهار gلس وبدا ايخوخ القب ديالو بحاد العود والروايح دالحماط عاطية من داك القب حتى قطعو ومناين ما بغاشاي يتنقالو خلاه هيثاك مشروط والكرموس كابسة لاصقة فيه و مناين كان ايلعب مع الدراري كان اللي قاصو بداك القب ايهودو كومة فالبلاص بحال دي طربو البغل .

هذا جزء فقط من طفولة عمي بوشتى وسيتفضل باقي الإخوة بصياغة أجزاء أخرى وطرائف أخرى و سيتكلف بالحلقة الثانية الصديق عبد الحق كريط Abdel Kriat وهو بدوره سوف يحدد من سيتكلف بالحلقة الثالثة .

توقيع: عزيز البورقادي

تصنيف : الثقافة التسولية,طرائف عمي بوشتة