عمي بوشتى وذكريات الطفولة : 04

الصافية مازالا يالله ادرحب بيا وأدهدرلي على الأمانة دحيطالي وهو عمي بوشتى ماجي أيتهدا ولابس فرجليه حالبلغة مفرقشة من العام دونوضو ترgدو قمومتا طالعة فالسما دقول سباط قريش ولاقي المعكاف فيديه تيشير به ليهن ولاون فكرني فالشريف منين ايكون ماجي للمجموعة وايبدى غي ايغرول .

بوشتى : اخير عليكم الطفلات .
انا : خير اعمي بوشتى لغزال كخصكشي ضياف كا لا .
بوشتى: مرحبا والف مرحبا ابنتي.
انا : ترحب بك الجنة اعمي بوشتى واقيلا معرفتنيشاي انا هي siham tazi اللي فمجموعة ترات قبائل التسول اللي تيقيلو نهار وما طال يهدرو غي عليك فالفيسبوك .
بوشتى: كانتي هي ديك الطفلة دي كل نهار يسميوها سمية جديدة هالفلوسة هاسليعفانة ها زغودة ها مزروفة الجحالل وايقيلو يطحكو عليك مادعرفشاي اللهجة التولية .
انا : ايه اعمي بوشتى حاgرني ولاد اللذين امنو وهادشي علاش انا جيت عندك للتول غي باش نتعلم بحالهم ونولي قشاقشية راني تgهمت بالسفنج حتى مبقالي غبن .
بوشتى: اوا مرحبا بك ابنتي عندنا وانا اعزيزك فيهم وغي بقاي تجي كل عام ويلا مرجعتيش بحال السي احمد لزعر اللي تيقولو عليه تولي قشاقشي وايجبدا من تحت الخابية مناشي بوشتى دالحاج حمو يالله زيد ابنتي ندخلو للدار نرتاحو و ناكلو اللي كتب الله .

حنا هكداك ماشين للغرفة وهي خارجة دادا حادة من النوالة وجها كللو كحل بالكفوس كي كانت ادسوط على العافية مطفسة والرماد طاير عليها و مقملة حالحراشية دقول عندا الشوالة ايا بابا لحبيب وقداش قد رويضة دالحميير Md Yf اللي غيرلا فالعيد عند لمعلم بيصارة ، متيتخرج معاها غي عمي بوشتى كان على شطيطش ماشي يرزينا فالحرشة وبدا ايتملغ معاها ويضحك
بوشتى : كمادشوفشاي قدامك امو جحالل كنت ماشي دخوطرني بهاد لوجه مكفس كي الجن فكرتيني به بحالفعلة دالجنون كنت لقيتها كحلة سحلة فاش كنت باقي حيبور كاوقلبها طحك مبغشاي يسكت، وهي دنهط فيه دادا حادة
حادة: امالك أ لحول دالرجال اطحك غا بوحدك كاتخوطرت كاشني كبغي طحاك علينا هد الطفلة دلمدينة.
بوشتى: ياودي غي أنتفكر ديك الفعلة أيشدني الموت دالطحك.
غي انا سمعت القاضية فيها الضحك والنشاط ونا نقز فالوسط انا مزاوgة فيك اعمي بوشتى يلا متعودها لينا عوريطك .

بوشتى : اوا نديرو حالشدق فكرشنا بعدا ويحن الله ( حيت عمي بوشتى ضروري ميدير المازوط عاد يهدر) اوا هي هاديك كلينا وبردت قلبي فديك خيرات الله اللي كانو حاطين.
إوا و بدا يعاود عمي بوشتى : فاش كنت طفل باقي حيبور صغير كانو أيجيو عندنا حالناس ديال لمدينة كل صيف مأيمشيو بحالهم حتى كانت أدفلت ريتي بتنقال دلما وهما غي محشيين فلمطاهرة كي جراين وكان عندهم حاطفلة كان أيبقا يتملغ معايا بابا وايقولي ماشي نجوجك بها ونا كنت حول انتيق وديك الطفلة كان شعرا حرش وطالع فالسما وفاش كان أيسوط مولاي الشرقي كانت ادهز شعكوكتا قفة دالتبن ادرجع دبانلي هي و النادر خوت و كان الجن اللي طاربني طاربني عليها هي دجي دلعب معايا ونا يشدني النشاط عليها ونبقى نغني عليها :
" شنكوك فوق النكوط هاز الفوقاني والشفة قد القفة تعشي التيران والسندور قد الهندور يهرس العيدان"
وادبقى دبكي وادمشي فحالها غطبانة .

الحاصول حاد الصيف عاوتاني تمو ماجيين وهو يقوللي بابا الطفلة دماشي نجوجوك بها هاهي ماجية غدا وهد السيمانة ماشي نلقيولكم العرس. غي انا سمعت هد الهدرة ونا يركبني السعر بايت ليل كللو انخمم ونبني وريب شني ماشي نلقي وفالصباح نوضت على النبوري غي بابا خرج للسوق يلاقيهم ونا خرجت لحا لواد كان قريبنا للدار ايقولك ايخرجو فيه الجنون وزولت الشطيطة دكنت لابس وبقيت غي بالشورط ودخلت لواد طليت راسي بمالوس من فنازي حتى لقشقوشة دراسي بقاو غا عيني دايبانو وتخبعت مور خليج جنب الواد بقيت حابط انعاينهم وهما جايين على لبهايم ايتهاودو غي هما دخلو لنص الواد ونا نقزت من خليج وجيت حداهم كي جن وطلقتا غوتة ونا انشير بديك الشطيطة بيطة كو لبهايم جفلو وتعلاو فالسما ويجيبهم مخبوطين فديك الواد وعاطين فلحجر ويشدوها بالموكعيب هاربين وايغوتو يحسابتم الجن بصاح وبابا وشي سواقة ايجريو موراهم وايعيطولم واجيو هدا راه غي لمدعوي دبوشتى وحرام مبغاو يرجعو مشاو لخلاوات من تم لتم من ديك العام معاودو قلبو وجهم جيهتنا ولكن الحبايب لغرد دكليت ديك الليلة مكلاهشي حتى الشفار دايشدوه فالسوق قيال بابا يضرب ويرواح ونا انموت بالطحك انتفكر غي المنظر دالناس هاربين واحد ايزطم فلاخور .
حنا مزالين انطحكو هكداك ودادة حادة ادقولو كهاد طبغيلان كللو خرج منك البلا المسلط .

وهو ماجي حالحيبور ايلاغي ابابا ابابا هاااااو دقول غي لمهيبط دنبيل يسف محطوط منسوط ساعة صدق لمدعوي دحمو ايهرز فالارض بديك الخبازات بوفراكح لاخور ضيع ليا الجو دالضحك .
بوشتى: امالك اداك لمسيطط لاخور شنو كاين
حمو: ابابا راه عيط السي محمد البورقادي قالك راه ماجي من الرباط ماشي يجي يقصر عندنا .

هداك ماسمعت انا الحبايب كو نقز غي تنقيزة ونجيبها بالوقفة فالباب وبديت انخليهم بخير عيا عمي بوشتى يحسر فيا والو ديرت السبة بعندي شي خدمة مزروبة خاصني نقضيها ففاس ونا خاصني غي نسلت قبل ميوصل الشريف ويحوفلي على الدك أعطاتني الصافية الله يكثر خيرها ديوكة ديالي و واصاتني نسلم ليها على عبد الحق ونعطيه حالقريعة دعلوانة كانت محجراها ليه هي هديك قلبت الطريق بالرجعة انا وصلت للحد وهو حتى يفج فيا السي محمد إدريس البورقادي احصلتي الزغودة لاين هاربة بقيت غي تنفرنس محسبتوشاي هو اللي حصل وغادي يعاود لينا الحلقة 05 من ذكريات عمي بوشتى يلا بغا نعطيه الدك.
نخليكم مع الشريف الس محمد ادريس البورقادي اللي شداتو الشبكة و نمشي نطيب التريد بالدجاج البلدي اللي جبت معايا حيت راني عارضة هد الليلة على الشريفة رقية البورقادي وام زياد ومروة التازي وباقي نساء المجموعة اما بالنسبة للرجال حقكم فالجنة هههههه .

دمتم في رعاية الرحمان والى اللقاء في فرصة قادمة ان شاء الله وعلى المودة نلتقي .

للاشارة تنطلب منكم السماحة على اللهجة التولية اللي تكرفست عليها لكن هذا جهدي الله غالب .وشكرا لخيي لعزيز انوار زياد على الثقة اللي دار فيا .

توقيع: سهام التازي

تصنيف : الثقافة التسولية,طرائف عمي بوشتة