دادة حادة والعوادة

مرطت دادة حادة مرطة صعيبة عيطو لعبد السلام جا وعباها عند الطبيب . قلبا ولقالا التلفازة وقالا عندك الحجر فالمرارة وخاصك ضروري العملية . طربلا شوكة دهدن عليها الحريق وعطاها بريا باش دمشي لسبيطار دالبلدية وتما يشوفو معاها باش دلقي العملية . 

تسوق عمي بوشتى للحد ومناين رجع gلس حدا دادة حادة وسقساها كيف بقات وبدا يتهاود معاها باش دنسي الحريق .
عمى بوشتى : احادة قالولي كاينة حالعوادة فوادامليل ادحيد الحجر من المرارة .
دادة حادة : زول من حداي انت ماشي دطرطقالي دابا .اشمن عوادة الى كان الطبيب ايقول خاصني العملية .
عمي بوشتى : غا عمل النية والكمال على سيدي ربي .الناس ايشكرو فيها ويعاودو ها دحيدثلو الفلوس من الكرش دولدو ها دحيثلو العطام كان سارطم وحتى من البقرة دالدعينن زولثلا السلوكا كانت واكلاهم.
بقات دادة حادة ساكتة وهي مع راسا عارفا هاد العوادة ما ماشي دقضيلا والو وعمي بوشتى الى قال الكلمة خاصا هي ددكون .
نهار الثلاثا ناض عمي بوشتى بكري ونوض الصافيا لقاتلو الفطور وعاونت يماها فلبس الدجلاب . وحمو جاب البغل من عند عياد باش دركب عليه دادة حادة ومشى معاهم .وصلو للسوق دخلو نيشان عند العوادة .
عمي بوشتى : السلام عليكم . الله يحفظك الالة جيبتلك هاد المرا دعودلا .
العوادة : مالا شني عندا ؟
عمي بوشتى : عندا الحجر فالمرارة وجبتا لعندك كما دحيدملا .
العوادة : ينشاعلاه يكون خير . زيد الالة قرب حداية .مدخافش .
دادة حادة مترددة والعوادة ادشجع فيها .gلست على الكرسي وقالت مع راسا والله حتى نحطيها ونشوفا قالك ماشي دزولي الحجر من المرارة .الطبيب ايقرا نص عمرو باش يقد يعمل العملية وهي ما عمرا عرفت حتى المدرسة فاين جاث قالك ماشي دخدم خدمتو .جبدت العوادة حدالغراف وبانيو و 3 دالريشات دبيبي وشي ما حمر فحدالبيدو .
العوادة : هاك شلل فاك بهاد الما 3 دالمرات . ساعفاتا دادة حادة وبقات ادعاين شني ماشي يوقعلا .
العوادة : يلاه تقيا باش يخرج داك الحجر .
دادة حادة : كفاش ؟ ماشي نتقيا بالسيف ؟
العوادة : واه .لقي صبابعك ففاك وتقيا.
دادة حادة : لا والو منقدش وانا الى تقيت بالسيف ماشي نقيل النهار كامل نتقيا وماشي دزيدني مرط على مرط .
عمي بوشتى : اسمع الهدرة يا هاد المعكيسة ولقي داكشي دادقولك المرا .
العوادة : نصبر معاك ونمشيو بالشويا .يلاه فتح فاك نلقيلك هاد الريشة وداك السعة تقيا .
دادة حادة مبغاتش وبقات العوادة ادسايس معاها ووالو .
العوادة : اوا مناين ما بغيتش بالريشة فتح فاك نجربو حاجة اخرى .
دادة حادة فتحت فاها والعوادة دخلت صبابعا بجوج حتى للحنجرة ددادة حادة كودقبطا بحالعطة gايزا الكلام .جبدت يدا وبدات ادبرد الحريق دالعطة . دادة حادة بدات اتقيا ومعرفتش كفاش عملت داك العوادة لقتلا البانيو ووراتا حفن دالحجر رقيق بحا التيشة دالشعير .
العوادة : نوض اوا على سلامتك الالة ها الحجر دعندك فالمرارة زولتولك.
خلص عمي بوشتى العوادة وقالا الله يعطيك الصحة . وركب دادة حادة على البغل ورجعو للدار .gوزت دادة حادة النهار كحل .النهار ومن طال وهي التقيا .عيطت الصافيا على خالتا قالتلا يما ادموت . جات السعدية وبوجمعة وعباو دادة حادة لكلينيك قالولم كان خليتوها غاشويا كطرطقتلا المرارة .عندا عامرا بالحجر . عملت التحاليل اللازمة وعملولا العملية.
برات دادة حادة وشبعت طحك على عمي بوشتى دزعما طولانطي.
عمي بوشتى : اوا سترنا راه ربي ايبغي الستر . مرة مرة بنادم ايتحيمر وانا هاد المرة تحيمرت .
سمحولي الى طولت عليكم ولكن بغيت نشاركها معاكم .

على المودة نلتقي .

توقيع: رقية البورقادي

تصنيف : الثقافة التسولية,طرائف عمي بوشتة