مشى عمي بوشتى ايسبك هو وعياد يشوفو عبسلام شني وقعلو ، قبطولو فيداه ونوضوه، ناض ايزحول ، والدماياث هوادا من حناكو ، وهو لاقي يدو على عينو ، حمو مشى ايطير قالا ليماه ، جات دادا حادة ادسبك وتبعاتا حدهوم والصافية موراهم .
حادة : اميمتي على وليدي و طاح طيحة زغبية ، كيف وقعلك المدعوي ؟
بوشتى : ما عرفناشي كيف وقعلو حتى صيبنا الراجل هواد اينكور ويجي منفوط فالحالة دالنادر ، هانتي ادشوف وجاه دقول خربشوه القطوط
حادة جبدت حاد الزيف كانت لاقياه فالحزام باش محزما ومسحتلو داك الدم وهو غي لاقي يدو على عينو
الصافية : مالك من عينك كا دخلتلك شي حسكة كا قاصتك شي برومية ؟
عبسلام : عيني ما انشوفشاي بيها واقيلا عواريت
حدهوم : نفخلو فيها الصافية او جيبلو حاد السطل دالما يغطس راسو فيه
حادة : شني غا دنفخلو فيها وهي حمرة بحا الجمر ، هادي خاصا العوادة هي دي دقلنا شني كاين
الصافية : ايوا حتى للصباح ويعبيه بابا لفاس عند راجل بنت خالتي الطبيب دالعيناين يgوزلو فابور
بوشتى : لواه نعبيه للشينوا ، حنا هاد فاس ما نطلقوشاي منو ، نخدمو غي على المركوب ؟
عياد : عبيه غي للسوق عند الهاشمي د عمار يبخلو
حادة : ولايني هادي ما دكو غي عوينة قاصتو . ايوا بالسيف ، حتى داك فاطنة مناين جات وهي دشوف فيه ودقلي اخيتي ولدك طحا غزال جات معاه هاد وجدة وزادو زينوه داك النضاضر دي لاقي على عيناه .
حدهوم : خلاص احادة ، ايوا موشاي شي زين ، حتى عبقادر ولدا طحا النيمير الوحيد من نهار gاجا طحى فيه مود دالزين ياك قالتنا نهار الخميس مشي يجي باش يمشيو يخطبولو يامنة دحميدة
عبسلام غي سمع هاد الهضرة ويسمح فيهم ويزيد خلفة ما ايشوفشي موراه .
طلع عياد كمل داك النادر بالتسقاف وحدهوم مشات فحالا و الصافية جرت يماها حتى وصلو للدار وقالتلا :
الصافية : ايما عبسلام خاي ايبغي يامنة دحميدة ومناين سمع عبقادر دعزيزي امحمد مشي يجي يخطبا ما بقاشي ايشوف قدامو مضو
حادة : ايوا شني مشي نقلك ، نقولوها لباباك ونمشيو نسبقو فاطنة ونخطبوهالو
بوشتى تم داخل و سمعم شني قالو وهو يواجبم :
بوشتى : ايوا لا جامع شي فلوس نمشيو نخطبوهالو ، داك الطفلة دحميدة ادعجبني حتى يانا مسرارة وادحشم بزاف
حادة : والله ما كرهت نلقي العرس ليلو و للصافية فنهار وحيد
الصافية حشمت و سمحت فيهم ومشات درgب على الحمارة
بوشتى : ايوا حتى يبان بعدا داك المزغوب دي فطنجة ، وحتى ولد لزعر بغيناه يحضر معانا فالعرس قالولي مشى للحج راه دابا ثم
حادة : كا ولد لزعر عاوث مشى للحج ، ياك عاد العام دي gاز كان ثما
بوشتى : هو عندو الحج بحا دي ماشي لواد امليل ، كل عام ايمشي ليلو حقاش هو محسوب مع الوزارة دالاوقات
حادة : ايوا سعداتو والله يلحقنا حتى حنا بداك المقام ونقبطو فشباك النبي
بوشتى : مناين ؟ كا مداك المطاير دي خلالك باباك ؟
حادة : ايوا انتي غي ضور ضور ودرجاع لبابا دقول انتي شني لقالك
هوما هايثاك والتيليفون دعمي بوشتى سرسر
مشى يواجب صابو خاوي وهو يلاغي على الصافية
بوشتى : الصافية أ الصافية جيب معاك ابنتي داك الشارجون واجي الله يرضي عليك
الصافية جابت الشارجور ولقات التيليفون يتشارجا ، حاد الشواي وهو يعاود يسرسر
بوشتى : ألو شكون معاي ؟
فوزي : انا الحاج فوزي من فاس أ عمي بوشتى ، شخباغك ، كي دايغين مع هاد الصهودات ؟
بوشتى : كا الحاج فوزي عم الطبيب راجل غزلان ؟
فوزي : هو هداك ما عندي ما يتسالك ، كي دايغ مع تماغة أ السي بوشتى ؟
بوشتى : ايوا ها حنا انعديو ، شخبار الحاج سلام وشخبار داك المفلس دبوجمعة كا جاب المرا الدجديدة كا باقي ؟
فوزي : ايوا الله يهديه وصافي راه واقيلا رجع للطغيء وداغ مناءص
بوشتى : ايوا يانا عاد كث مشي نجي عاوث لفاس و نشوف شني هاد البلان دي طاح عليه
فوزي : بلاش ما تجي دابا غي تسنانا تما راحنا غادي نجيو كاملين ونهجمو عليك تما فالعروبية انا والمدام و بوجمعة والسعدية والدغاغي كاملين
بوشتى : هداك النهار المبروك مارحبا بيكوم كاملين
فوزي : تغحب بيك الجنة أ السي بوشتى ، ايوا تسنانا نهاغ الحد ان شاء الله
بوشتى : نشاع الله الحاج
حادة : شكون دي ماجي ؟
بوشتى : ماجيا ختك وراجلا ونسابو ، نهار الحد مشي يكونو هنا
حادة : هايثاك قلي . ايوا خصك غدا دهود للسوق دجيبلي شني خاصني هادو راهم الضياف د المدينة وبرانيين
بوشتى : ايوا قلك اللي كلا دجاج الناس يسمن ديالو . شني خاصك من السوق ؟
حادة : خاصني بعدا العطور وخاصني الزيث وخاصني ...............
نخليو دادا حادة ادشوف شني خاصا ونرجعو لعبسلام .
عبسلام مشى ساخط ما ايشوفشي قدامو وطلع للغرفة وزول السباط وكرفطو حيت الباب و ترمى على السداري و طاح دودة
فالصباح ناض ، اول حاجة لقاها عيط ليامنة وهضر معاها فالتريفو وقلا واش بصاح هاد الخبار دي سمعت ؟ قالولي مشي يجي عبقادر دعزيزي امحمد يخطبك . قالتلو واه . قلا وانتينا شني ادقول ؟ قالتلو ما عندي ما نقول راك ادعرف با صعيب شواي ، ايلا بغيت دعبيني ايوا خصك دزرب واجي خطبني نتينا اللول قبل منو .
دغيا تسالاتلو خمسة الدراهم دالهضرة وناض لبس حوايجو وقبط الطريق وهود للحد .
هو داخل للقهوة وهو يبانلو ميلود ولد المختار دعلي . صاحبو كان قرا هو وياه فالتحضيري ، غي عبسلام سالا القراية بكري وميلود كمل قرايتو تبارك الله حتى للخامس و حرg لفرنسا وطحى فاكانصي لاباس عليه .
عبسلام : اهلا أهلا أهلا الصحبة القديمة . كا راك هنا ا المسخوط ؟
ميلود : أهلا الكارثة ، أفاين راك المصيبة عييت ما نضور عليك ولا جبرتك
عبسلام : راني فالدار ، غي من تمارة دالبني فوجدة لتمارة دالفلاحة مع عمك بوشتى . ونتينا فاين غابر أ بومليلس ؟
ميلود : هادي عشر سنين باش حرgت لفرانسا .
عبسلام : و وين راك دابا مستقر ؟
ميلود : فبوردو
عبسلام : باقيا الملاغة ديالك هي الملاغة ، انا انقلك فاين راك مستقر ونتينا ادقلي نتبوردو . كا باقي مبلي بالتبوريدة ؟
ميلود : وا بوردو أ المهيبط موشي نتبوردو ، عليها جراو عليك من التحضيري ساعة ما ضلموكشاي .
عبسلام : زعما نتينا كملت القراية وطحيت دكتور ، ياك كنتي ادنقل مني كلشي
ميلود : ايه بصاح ، كان ايقرا معايا اينشطاين وما كنتش راد البال . أمالك المصيبة مخربش كامل من وجاك ياك ما باقي ادشابك نتينا والصافية ؟
عبسلام : ايوا غي سكث واها . الحريرة ديالي حريرة . شعل بعدا حاد الماربورو وتصنت لصاحبك يعاودلك
هي هاديك كلس معاه ، تقهواو وعاودلو القصة كاملة على يامنة
ميلود : ايوا نوض توكل على الله اصاحبي وديرنا شي عرس فاعل تارك كما نحضرو فيه ونشبعو تبوريدا راني موحش لعراس دالبلاد و شحال هادي ما تبوردت
عبسلام : وفايناهي الفلوس ، الشغل صعاب دابا ا ميلود وانا يالاه جامع سبعميات الف فلوس الصداق
ميلود : ما تضرب حساب اصاحبي . انا مليون غادي نعطيهليك كاضو من عندي ويلا بغيتي شي حاجة اخرى نزيدك .
ميلود جبد الكارني دالشيك و سنالو على مليون وقلو :
ميلود : هاك نوض دابا سير للتيجاري وفا بنك و تيري فلوسك انا مشغول دابا وما يانا نمشي معاك حتى للبانكا .
عبسلام : وفين جا هاد التيجاني وفا بنك
ميلود : التجاري ماشي التيجاني يا الكارثة . سير لواد امليل وحضي راسك من الشفارا يتبعوك .
هي هاديك تفارق معاه وركب فالسريع لواد امليل ومشى للبانكا باش يتيري الفلوس .
عمي بوشتى نعس وفالصباح مع النبوري سمع الدقان فالباب ناض حل الباب وهو يصيب المقدم واقف قدامو .
بوشتى : صباح الخير أ المقدم . ياك لاباس ؟
المقدم : صباح الخير أ بوشتى . خاصك دتكلم دابا للقايد راه ايدور عليك .
بوشتى : أيدور عليا ؟ وما قالكش لاش بغاني ؟
المقدم : ما نعرف . حتى دمشي عندو ودابا دعرف . يالاه الله
يهنيك .
نخليو عمي بوشتى حال فاه ايفكر لاش عيطلو القايد وإلى اللقاء في الحلقة القادمة إن شاء الله.
توقيع: عزيز البورقادي
0 commentaires:
Enregistrer un commentaire