الرحى

الرحى يا الرحى 

زيتك حلوة ومليحة
وخبزك من الزرع مgمحة 
اما الشربة دالما
من القطارة طايحة

بلاشك عرفتو الرحى .ولكن واش عارفين انواعا؟
الرحى من الادوات اليدوية المستعملة قديما وحتى عصرنا الحالي .
انواع الرحي :
- الرحى دالزيتون
- الرحى دالزرع المنزلية
- الرحى دالما
الرحى دالزرع عبارة عن حجرين مستديرين يركب احدهما فوق الاخر يكون السفلي تابث بينما العلوي يتحرك . بلاصتا فالاغلبية دالديور كتكون فالمسحم فقونت مطرف على الرجلين ارضيتة محنكة مزيان ورطبة . اجزاءها : اليد هو خشبة صغيرة مركبة فالرحى ، الفم او الجرارة هي الفتحة اللي كيديرو فيها الزرع.القلب وهو مسمار لاسق فالجزء السفلي التابث وعليه كيدور الجزء العلوي المتحرك . من الادوات المستعملة مع الرحى : طرف دالشوال دالهدورة باش كيشطبو الرحى .كيقولو كنس الرحى زعما نقيها من الشواءب .
كانت رفيقة للمراة التسولية وكاتمة اسرارها . كانت الى مصابت على من تشكي كتشكي على الرحى عن طريق الامداح والمواويل .كنقول كتناني .وفي غالب الاحيان تتعاون امرأتان على تحريك الرحى نظرا لثقلها .
كنطحنو فيها جميع انواع الحبوب .
القمح - الشعير - الذرة وحتى الفول .كنقولو نبريو الفول باش نلقيو البيصار .
القمح كيخرجو منو السميدة والطحين الرطب لخرينgو والمفروق والسفنج والمطلوع والحمرة او التحامر للخبز .
الشعير كيخرجو منو البلبولة .التيشة الرقيقة للخبز والطحين الرطب باش يفتلو الطعام باللبن( صكوك) او وجبة للكلب الحارس المنزلي. اما النخالة فللعلف. .
اما الرحى دالزيتون ومكوناتها غاد نخلي خاي Krouni Hmed يهدرنا عليها لانه اكثر خبرة مني .
وعلى المودة نلتقي.

توقيع: رقية البورقادي

تصنيف : الثقافة التسولية,المنتديات الثقافية