طرائف عمي بوشتى

كي لعادة gازت لعصر الصافية رشت الدكانة وشطباتا وطلقت لحصيرة ولقات فوق منا شي هيادر وحد جوج مخادات ودادا حادا مع لكفوس ونوالة ادشعل لكانون ودسخن لفراح مشي دوجد حد لحرشة حد شواي وها هو عمي بوشتى خالط قالك كان فجامع صلى لعصر مع لفقيه حيت عمي بوشتى فصيف ايولي دياني وايصلي مع نهار طويل والصهد مكيصيب ميلقي ايولي مومن وهو يلاه ايتلف لوقت و ايتسابق مع عياد ولحاج امحمد
عمي بوشتى :الصافية وا صافية جيب لي معاك ابنتي حا لغراف د لما
جابتلو صافية حد لبيدو بارد من لمطهرة ومجلد بداك لخنشا د سكر او هو قبطو منا ويقول يا gرط معايناشي دمدلو لغراف.
عمي بوشتى :الله يرضي عليك ابنتي الله يشربك من حوط د جنة كنت مشي نموت بلعطش اه اه اه وشحال د صهط لغضاب هدا جاب الله حصدنا ودرسنا وتمنادر وقفناها 
صافية مناين سمعات النادر او هي دلقي بشاخ بالضحك تفكرت خاها عبسلام ملي طاح وجا ملتوخ فوق سدرة 
عمي بوشتى:كشدوك جنون اطحك باحدك كاطحك عليا
الصافية: لياه نطحك عليك كيانا تبوهلت اتفكرت خاي عبسلام ملي طاح مفوق نادر وجا فوق سدرا ووجاه طحا كي د خربشوه لقطوط
عمي بوشتى غلبو الطحك تهوا ويقولا لادفكرنيشي فداك لحول ديما مفافي سير الله يرضيعليك صغبلي شي بريق دلقهوة لميجي داك لمسخوط دعياد ويجغطو كامل
عمي بوشتى مشا يورك فدكانة ودخلت معاه لبرودة وعباه نعاس حادة وجدات لحرشة واتاي وشي بيض مسلوق وحد شطيطش دسمن وصافية صغبت لقهوة وخرجو للدكانة وجمعو وتهاودو هما هيتاك وتليفون د الصافية سرسر او هيا تم نايضة ويقبطا عمي بوشتى من جحلالة
عمي بوشتى: ارا لاون داك التريفو وانت غا لاقياه على ودناك او مبحصا فيه واطحك بواحدك .ارا نشوف شكون الى كان داك المدعوي دعبد الحق هاد النهار نفاريها معاه .الهدرة هدرا ومشى زعما حنايا ماشي نبقاو نعاينوه .راه واحد الراجل معقول وحتى هو خدام بدراعو هدر معايا وقلتلو راه هادر فيها شي واحيد .دابا يا يجي يكمل يا نشوف السيد نقولو واخا .
الصافيا حشمت وعطاتو التلفون .
عمي بوشتى : آلو شكو دمعايا ؟
اشرف : هذا يانا اعمي بوشتى ، اشرف . شخباركم
عمي بوشتى: اهلا ، اهلا حنا كلشي لاباس وانتم؟
اشرف : لاباس الحمد والشكر لله غي هاد الواليد الله يهديه راه محمقنا .
عمي بوشتى: مالو ياك لاباس ؟ ياك ما مريط ؟ دابا نجي نرgب عليه.
: اشرف : الا لا اعمي كان مريض وجبنالو واحد الطبيبة تشوفو وكانت كل نهار كتجي تشوفو واش زلى لاباس ودابا منين برا قالك بغى يتزوجا .وراه لاصق الوالدة باش تعطيه الموافقة .
عمي : ههههههههه . على المدعوي دبوجمعة ما مشى حتى طاح على وجاه . اوا قلي اوليدي اشرف هاد الطبيبة شحال فعمرا ؟ الى كانت شي شgروفة غا يصبر على السعدية .
اشرف : فعمرا شي 30عام وزوينة اعمي اوا قول نخطبا يانا بعدا جات معايا .
عمي بوشتى : بشاخ امالي بشاخ حتى انت عود . اسمع اوليدي نهار السوق نبيع حاالموداين دلاسايا ونجي نشوفكم ونهدر معاه .
اشرف : الله يرحم الوالدين اعمي هذا هو المضنون فيك . وهو راه كيحشم منك. اما يانا غي كنت كنضحك معاك . اجي وان شاء الله اعمي نتهلا فيك
عمي بوشتى : عارف اللي كاين اوليدي وعارفك كريم .دابا نجي ويكون الله خير.
دادا حادة : ها نتينا زربت عاونيث فالهدرة . اوا خاصني نجمع حوايجنا باش نسافرو .
عمي بوشتى: ولاين ماشي دسافر اموجحالل؟ اشرف قالي انا نجي وانت لاش ؟
دادا حادة : مكاينة تقة لا فالرجال ولا فالزمان .رجلي على رجلك قالاك .
عمي بوشتى: الفايدة والحاصول نوض نتوضا باش نمشي للجامع المغرب قربت .ومن بعد يحن الله .
نخليو عميي بوشتى يمشي لجامع يصلي لمغرب ودادا حادة مشي دجمع قالك لحوايج وفصباح مشي يمشيو لفاس يفكو جرة د بوجمعة 
نعاينو الاخبار تاتجي ونكملو الجزئ التاني ان شاء الله
وعلى المودة نلتقي.

توقيع محمد البورقادي

تصنيف : الثقافة التسولية,طرائف عمي بوشتة