غيبة عمي بوشتى

حادة: حمو احمو نوض من النعاس نهار طلع ونتينا باقي مغط نوض خسل وجاك وسير عند عمك علال سقصيه كماشافشي باباك راه مدي خرج لبارح مع لعصر وباقي مرجع.
حمو: خلاص ايما كعزاز عليك بابا زعما مخلوعة عليه؟ كباقي صغيور.
حادة: كمشي دنوض كنجيب حد سطل دلما نخويه عليك الله يخلبها ضنايا باباه مبايتشي فالدار وهو ماراهشي هنايا؟ بالو هاني نوض ينوض فيك الشوك.
ناض حمو مشا خسل وجاه، الصافية أدشطب لمراح وأتكرشخ بالطحك وهو يقولا حمو أطحك امو فرانس عجبك الحال؟ 

الصافية: اجي هجرولي كمنهجرولك بهد الشطابة كبغيتني نبكي نتينا عامل لخسالة د القط وبغيتني منضحكشاي ولايني منديهاشاي فيك راك باقي مكميتشاي.
حادة: قولي اصافية باباك فاين يكون مشا كمقلك والو لبارح.
صافية: ما قالي والو أيما نتينا كنت فالصرة دزهور بنت خالتي رحمة وبابا مع العصر دوش ولبس حوايجو مصبنين ولبس داك جلاب جديدة دي شرا من تازة وقالي أنا ماشي للحد دولاد ازباير.
حادة: وشني عندو فهد الحد ياك معندو لا صحاب لا حباب.
صافية: أيما والله ينتي باقيا بوهاليا وعلى نيتك.
حادة: شوف إيوا بنت ليهودي أدعايرني كانا يماك كقرينتك.
صافية: لاواه أيما نتينا دغيا ادنعقر بابا كلشي طحا أيعرفو التول كاملا مكاين غي عمي بوشتى عمي بوشتى.
هما هايتاك فالهدرة وحمو مربع رجلاه على لحصير وأيفطر إيوا وعمي بوشتى تادخل مع الباب.
السلام عليكم، قالا وهو فرحان وناشط.
حادة: أفاين كنت وفاين بايت.
الصافية: سلام أبابا على سلامتك. وباستلو يدو على جوج وعمي بوشتى درعا لعندو وعنقا وقالا الله يرضي عليك أبنتي نتينا هى لغزالا ددار شوف هد يماك سلام مرضاثوشاي لقرطاس على فاها الله يلطف.
حادة: كفاش لقرطاس على فاي شني قلتلك أفاين كنت وفاين بايث.
بوشتى: باينا تصقصيا ديالك إيوا راني بايث فداري التانية مع لمرا التانية.

الصافية: خلاص أبابا، باراكا مدنكد فيما على الصباح شني عندك فداك الصاك وعندم كنت فلحد د ولاد ازباير.
حادة: وشكون دعرف فاين كان كباقيا ش تيقا قالك لمرا تانية اجي ولقي لمرا تانية والله ومسنيتلك عند لمخزن لعملتا.
بوشتى: اطك أويلي وطك على سينياتور وكدعرف دسني أبنت ليهودي فين عمرك كعرفت تشد سطيلو تحلو عيناك مع طرفازا شني مشي نقولك غا دبعد منحداي ولا مشي نقسم لباباك طهر ديالك بهد لمعgاف قالك دسني لي.
لبغيت نتزوج مشي نشاوك؟ دابا الناس رجعو أيتزوجو غي بلفاتيحا إلى ما مافراسك ميتعاود.
الصافية: كمبقاوشاي أبابا يعملو لكاغيط عند لعدول وداك لبلعا دلوراق هي رجعنا كيما شحال هدي؟ بحرا ميبقا لواحد يخسر لفلوس وطلع وهبط ياك.
بوشتى: اوا هادا مكاين دابا.
حادة: لدمعلوشي اصافية باباك رجع غي أيخرف ابنتي.
بوشتى: هي دابا انا أنخرف مخرفوشي تاهدوك دي كبر مني ياك انا عندي اتسعود وستين عام وباقي صحيح ونضرب فتمارا كمفخبركشاي داك لفقيه دطنجة مشاتلي سميا ديالو على بالي ياك عندو ش ثمانيين عام وعندو تلاثة دعيالاث وعبا الرابعة قد لحفيدة ديالو وخطبها منراسو لراسا امنداك لعجب دي يقولولو لنطرنيط وتزوجو بلفاتحة وجوج دشهود، وخليني ساكث مفياشي دي يهدر فهد شي قالك دسنيلي سني يودي سني؟ إيوا سيرو صغبو ش صينية دتاي وش حرشة واجيو نعودلكوم فاين كنت
على مطيب لحرشة ويتشحر اتاي نكملكوم ان شاء الله تا يانا مكرهت نمشي نفطر مع عمي بوشتى ونعرف فاين كان بايث وشني جاب.

توقيع: محمد البورقادي

تصنيف : الثقافة التسولية,طرائف عمي بوشتة