عمي بوشتى في فاس 10

عمي بوشتى عطى السيكار لبوجمعة و شعل كازا ديالو وهز الكاس دالقهوة وزاد حدا لابيسين و بوجمعة بدا ايشرحلو
بوجمعة : هاداك ماشي عنصر ابوشتى هاداك راه لابيسين فين كنعومو . كون جيتي عندي فالصيف كون ضربنا شي عومة انا واياك هنايا.
بوشتى : قولي gلتة كبيرة ولقيتولا الزليج وصافي . ولايني ادبانلي نقية ما فيها لا جراين لا قراقر لا فكارن واقيلا ادخسلوها كل نهار .
بوجمعة : هههههه والله ايلا ضحكتيني اصاحبي . يالله شرب قهوتك دغيا راحنا معروضين هاد الليلة للعرس د محسن نسيبي خاين نوال مرات عز الدين ولدي .
بوشتى : كا هاد الليلة عندو العرس ؟
بوجمعة : ايه ودابا جابكوم الله دمشيو معانا تحضرو فالعرس ودشوفو العرس دفاسا كي داير
بوشتى : اودي يانا عيان وما كرهتشاي غي نلقي راسي على الخدية ونطارح حا الشواي ( هو بيه غي منار ما باغيشاي يفلتا).

وجمعة : لا ضروري تمشي معانا انت ودادا حادة تفوجو شوية .
هي هاديك دخلو صابو السعدية وحادة ايهضرو على الصافية .
السعدية : ودابا داك الطنجاوي وقتاش ناوي يدير العرس
حادة : موشاي طنجاوي تولي غي ايخدم ثما فطنجة . مازال عاد هاضر فيها وقالك حتى للصيف عاد لايكونشي .
السعدية : والله ايلا فرحتلا داك الصافية مسكينة شحال عندي عزيزة . انا بعدا مشي نتهلا فيها مزيان بحال بنتي . و عبسلام شنو دار ؟
حادة : اودي عبسلام باقي شابط فداك يامنة منا ما بغى يطلق . حتى هو ايقول هاد الصيف واقيلا .
بوشتى : ايوا نطلبو دجي الصابا هاد العام ونفرحو بيهم بجوج أ السعدية وداك الساعة مارحبا بيك نتينا وبوجمعة والدراري كاملين .
غزلان : الله يكمل عليهوم بالخير أ عمي بوشى . بحرا نمشيو نحضرو معاكوم و نشوفو العرس فالعروبية كي داير .
نوال : يالاه نوضو ايلا غادي تمشيو عند الكوافورة راه ما بقاش الوقت بحرا نوجدو راسنا . دايرين معانا التمنية فقاعة الحفلات جوهرة .
بوشتى : اودي كون غي خليتوني يانا هنايا وسيرو نتوما
حادة : ايوا لا قالا . لياه نخليواك نتينا فالدار باحدك . مشي دمشي معانا قالا .
هي هاديك ناضو العيالات مشاو عند الكوافورة مشطو وقادو حالتم وعباو معاهم حادة . مشطات حتى هي وصغبات الماكياج و ورجعو للدار عطاتا السعدية حاد التكشيطة دالموبرا إيفازي فالكرونة لبساتا ولبست معاها داك الشربيل الكحل دي عطاها خالد جمال وجات غزالة . وعمي بوشتى حتى هو عطاه بوجمعة حاد الكوستيم ديالو قديم شوية فالكحل وحاد القميجة زرقة و الكرافاطة كحلة ولبس الصباط ديالو والتقاشر صوفر خبع فيهم داك العشرين الف ريال و زول داك الطربوش مول النواشة حيت قالولو ماجاكش مع الكوستيم و شافو أشرف و بقى يطحك و قالو :
والله حتى جيتي واعر أعمي بوشتى . غادي تزيد غير شوية ديال الجيل وغادي تولي طرافولطا فيامو .
بوشتى : كا داك الخنونة دي اطليو على شعركوم هي دي ادقولولا الجيل ؟
أشرف : وييه أعمي بوشتى . والله حتى جيتي واعر . هاد الليلة مشي تلف ليهوم مع العريس ههههههه
عز الدين : بعد من الراجل أهاد المسخوط خلي عليك عمي بوشتى فالتيقار .
هي هاديك ناضو خرجو كاملين ومشاو للقاعة . دادا حادة ماشيا و كتعوج عاجبا راسا بداك التكشيطة ايفازي . استقبلوهم بالدقايقية والتمر والحليب . عمي بوشتى كان عطشان نزل على تلاتة د الكيسان دالحليب فدقة وهز كمشة دالتمر لقاها ففاه والكاميرا قابطاهم . دادا حادة مناين شافت الكاميرا قبطتلو فيدو ودخلت . قبطو كاملين حاد الطبلة فالقنت . شوية وجاو الناس . تعمرات القاعة جاو صحاب الجوق .اوركسترا عبد العالي والشيخات . وجات النكافة وصحاباتها دخلت العروسة والعريس و دادا حادة طلقت حاد الزغراثا فيها قسماين . بدات الموسيقى و دادا حادة عاجبا الحال وكتير مناين دارت جيهت التلفزة لقات راسا كاتبان هي وبوشتى . وقالتلو :
حادة : شوف ابوشتى انا وياك فاين انبانو فالترفزة . دابا الصافية لا كانت سالاث الشغل ديالا وشاعلة الترفازة وادتفرج مشي دشوفنا فالدوزيام ياك ؟ وحتى حدهوم مشي دكون شافتنا يانا وياك وراها ادموث بالفقصة .
عز الدين : لا أخالتي . هادا غي فيديو
بوشتى : انا هاد الشي جاني مبدل . كا هيثا لاقيين لعراسات دفاس ؟
بوجمعة : اودي الشغل مبدل بزاف ابوشتى .دابا هاد الشي اللي ولا . الزمان تبدل .
حادة : ولياه ايخلطو النسا مع الرجال . كا لقاو فحاد الدجيه الرجال وفالدجيها لخرا العيال .
السعدية : سكتي شوية وتفرجي . راه كلشي ولى مخلط ما بقاش داك الشي ديال شحال هادي .
وئام : نوضي تشطحي اخالتي نتيا وماما ياك كيعجبكوم الشعبي
بوشتى : والله ودنوض من موطعك يا غيلا لقيت معاك اللازم . مزيان تبارك الله
نوال : ما فيها والو أعمي خليها تفوج
بوشتى : والله وناضت يا حتى نهدملا هاد النيابر دي باقيين عندا . مزيان تبارك الله هاداك ما بقى خاصا
شوية وجاو السربايا فرقو اتاي والكاطو . عمي بوشتى قبط حا الكاس فيه جوج جغمات وبقى ايطحك . وقالم ايه يا العرس يا ودي غي قابسة داتاي أدقضي الغراض . فاين العراسات عندنا فالتول ايبقاو يدورو ويعاودو عشرة الخطرات العيان فينا أيشرب غلاي .
أشرف : غلاي كاع . كول كتفرقو سيتيرنا غير ديال أتاي .
حادة : سيتيرنا داتاي وسيتيرنا دالقهوة . داك السي عزيز مول اتاي والله ما ايروح ايبقى ايدور بالغلالي حتى للصباح .
بوشتى : ومال هاد العروسة غي داخلين خارجين بيها وكل مرة لبسة فشكل كا ايوريونا الشراوط دي شرالا راجلا كا شني ؟ وها العيالات دايرين بيها غي حالين فاهم ما عرفناهم حتى شني ايقولو .
السعدية : هادوك النكافات . وهادو هوما التقاليد ابوشتى . وهادوك الحوايج ديال النكافة ماشي كلهوم ديالا .
حادة : حتى الصافية بنتي مشي نشرط على داك عبد الحق راجلا العرس بالنكافة والعمارية مع هي منكادة مشي دجي بحا شي وريدة . غزالا .
السعدية : ألالا النكافة على حسابي و الجوق حتى هو .
شوية و الجوق لقى داك الدياسك دالركادة وعمي بوشتى عيى ما يصبر وفالتالي لقى راسو فالوسط ايتبورد . ناضو كاع اللي فالقاعة دارو بيه وايصفقو عليه و هو قابطينو الهوايش والجوق قلبوها تبوريدا ماكاين غي النهاري والمنكوشي وسخن الطرح مزيان وعمي بوشتى ايعطي الرشيم لداك البنادري دي ايقولولو AhMed DaiNan  ثلاثة سبايسة وجوج خاويين وخميسة و ثلاثة عرايشة وسير عليها و القضية شخدات وعمي بوشتى ناضو ايعلقولو ما كاين غي الزرقات والقرفيات . جمع شي ربعين الف ريال غي فداك البرطية زولو الدعينن ثلاثين بالسيف وناض يبرح
الدعينن : يا سيادي جاب وجبجاب ومرحبا بمجي لحباب وهادي ثلاثين الف ملكية من عند زين السمية اللي باه سبع ومو لبية عمي بوشتى بالعربية . راه كيقلك في خاطر اللي حاضر واللي غايب ما نفضلو شي على شي كي صحاب الرزز كي صحاب الشواشي كيف اللي راسو عريان بلاشي . وكيقلك في خاطر ناس التسول القراب والبعاد والناس لعزاز من بلاد لبلاد وفي خاطر الطا والنقطة والناس اللي مخلطة شي من الجبل وشي من لوطا وما عنديشي الزهر يانا حتى فالكيرطة انعيط على الكابال ادخرجلي السوطة واللي ما زغرتات على عمي بوشتى تفركع فيها البوطا
ناضو العيالات كاملين يزغرتو إلا حادة ما زغرتاتشاي حقاش خواتلا البوطة هادي ربعيام أطيب غي فالكانون . وعمي بوشتى بقاثلو عشرالاف ريال لقاها فالتقاشر مع داك العشرين ورجع لموطعو.
بوجمعة : تبارك الله عليك ابوشتى والله ايلا فرعتي الطرح ما عندي ما نسالك .
بوشتى : وعاد ما بردليشاي قلبي داك البنادري باقي ايخطا فالرشمة وحتى الغيطة ما كايناشاي جاني الشغل ناقص .
شوية جابولم العشا . اللي حطوها ايصقصيو عليها بجوج . شافتم دادا حادة اياكلو بالفورشيطة ناضت حتى هي دلقي بحالم ما عرفتشاي . نزلت داك الفورشيطة وكفضت على كماما وبدات غي ادكورا ودصيفطا لفاها و دبلع وعمي بوشتى ايهز البسطيلة باللقمة ويلحس فصبابعو . كملو العشا و جابولم الديسير . داك الشي منوع . عمي بوشتى يالاه عرف الليمون والتفاح والبنان الشي لاخور ما عمرو شافو ما قربوش . سالاو وناض خرج هو وبوجمعة جبد الباكية دكازا ديالو وشعل حاد الgارو و قال لبوجمعة : شاتنا بيها لله يا عرس مخير وكث مشي نمنعو . والله يا نتوما دي مبرعين وصافي . حنايا غي تمان داك البسطيرة انgوزو بيه العرس كامل ههههههه
نخليو عمي بوشتى يرتاح ويكمي الكارو ديالو والى اللقاء في الجزء الحادي عشر إن شاء الله .

توقيع: عزيز البورقادي

تصنيف : الثقافة التسولية,طرائف عمي بوشتة