سلطان القبيلة 12.

السلام على من اتبع الهدى 

وتمسك بحبل الله واهتدى
صار على النهج وبالسيرة اقتدى 
فاحت منه رائحة الطيب والندى
التزم بالعهد وبكل ما توعدا
الحمد لله فهاذ المجموعة تجمعنا نتذكرو ثقافتنا وتراثنا وبالاحترام تواعدنا ومع الحباب من كل ارض تعارفنا.الرجال خوتنا والعيالات خواتاتنا وحتى لي عاد جا نقولولو مرحبا بك معنا

امر سيد السلطان على شيخ القبيلة يحضر وامرو يرافق الخدام للدشر يجيبو المسكينة قبل ما يغيب القمر، ويأذن الفجر، باش حتى واحد ما يسوق الخبر، وينعتوه بكلام العار، ديكشي لي كان غير ظلام الحال زاد الشيخ فاللول، وتبعوه الخديم والسلطان عليهم معول، وصلو لدار المسكين دقو فالباب بالزربة، وهو جاوبم بكلام المحبة
_ الحبيب غي بشويش على الباب ونتي ادلقي الدقان دالمخزن
جاوبو الشيخ بكلام رزين
_ فتح عليك الامان انا الشيخ ومعاي شي رجال من دار السلطان
فتح الباب والمكتوب ما منو هروب
_ مرحبا بكم سمحولي نفيق يماين ولادي توجد لي كتاب لولاد سيادي وقبلو على ما وجد
_ مرة اخرى الشريف احنا جينا مأمورين من عند سيد السلطان وراحنا مزروبين خرج لينا البنت علاش احنا ماجين
دخل فيق مراتو وخبرا بلي رجال السلطان عند الباب، جاو يعبيو البنت، غي سمعت هاذ الهضرة وهي عبست وفوجاها قباحت...اانننوضي عملي معاها الصواب،وارضاي بالمكتاب، رطب قلبك وحيد القباحة منك، راها ماشي دكون مرات سيدي وسيدك بخاطرك ولا بزز منك. نعلت الشيطان وناضت ولعندا مشات ومعاها تكلمت، وحتى من الحوايج اعطاثا ما لبست،تحزمت وترزمت ولتمت وعلى باها ومراتو سلمت، ولعند الرجال خرجت. فوق العود لدهم ركبوها ودارو بيها يحميوها وبالزربة لدار السلطان يوصلوها
وصلو لقصر استقبلوها بالحليب والتمر، دار بيها الخدم حيدو ليها اللتام، وعباوها تحمم،ولبسو ليها لباس الحريم، طلع النهار وعيالات السلطان ساقو الخبار بلي الزايد كاين فالدار، وتافقو يعملو شي فعلة من فعايل الاشرار.يطردو بيها الغريب وما يبقالو من السلطان حتى نصيب...

توقيع: عبد الحق كريط

تصنيف : الثقافة التسولية,المنتديات الثقافية