عمي بوشتى في فاس 11

عمي بوشتى كمى الكارو ديالو ورجع قبط موطعو حدا دادا حادة و بقات القصارة حتى للنص دالليل وعمي بوشتى غلبو النعاس ورخى هيسوستو ومرة مرة ايبدا يشخر وحادة حتى هي . شوية فيقاتم السعدية باش يتصورو مع العروسة ناضو يتصورو كلس عمي بوشتى جيهت العروسة وهي دنهط فيه دادا حادة قالتلو gوز ليهن حدا العريس . عمي بوشتى قادد الكرافاطا ديالو ولقى رجل على رجل وابتسم حتى بانولو داك الجوج نيابر دي باقيين وحادة لقات يداها بجوج على ركابيها وتبلجت والناس كاملين ايشوفو و يطحكو و أشرف هز البورطابل ديالو وصورم وهو ايموت بالطحك . رجعو لموطعم والناس بقات على الشطيح والرديح حتى قرب الفجر والجوق لقاو الطرب الاندلسي وداك الديسك ديال "يا شمس العشية" وعمي بوشتى قلم : كا هادا الفجر كا العشية شني ايطفسو هادو . زادو حاد الشويش و تسالا العرس والعروسة والعريس خرجو وركبو فالليموزين وعمي بوشتى ودادا حادة بقاو غي حالين فاهم فداك العجب و هو يصقصي بوجمعة :
بوشتى : دابا كا هادي الطونوبيلة كا الماشينة ؟
بوجمعة : هادي طونوبيل خاصة ديال العرسان سميتا الليموزين . هادي كراوها بمليون غي باش دجيب العرسان وتديهوم ودير بيهوم دويرة فالمدينة .
حادة : كا منيول كاملة . حنايا منيول بيه انلقيو العرس عندنا فالتسول . انا بعدا فالعرس ديالي جاو عباوني غي على البغلة . دعقل ابوشتى فالعرس ديانا مناين ......
بوشتى : سكتنا خلينا نشوفو هاد العجب ونتينا هاد العرس ديالك ما خليت بيه حتى ودن . الاطيف وما دهضر ما ادسكتشاي .
المهم تسالا العرس ورجعو فحالم للفيلا ونعسو حا الشواي . عمي بوشتى نعس بتقاشرو (الخبار فراسكوم) حتى للحضاش عاد نوضاتم السعدية يفطرو .
نرجعو لعبد الغني العباسي مناين هز التلفزة سمارت تيفي وودع عمي بوشتى وزاد . مشى تلاقى هو والسي لزعر التسولي أحمد فحاد القهوة . وعاودلو على عمي بوشتى كيفاش حتى تلاقاهم خارجين من مرجان . المهم تقهواو ومن بعد قبط الطريق للقليعة .
وصل بالليل ونعس وفالصباح قال للوالد ديالو انا مشي نمشي للدار دعمي بوشتى نعبيلو حاد الترفازة .
عمي العباسي : كيف طرا دعبيلو الترفازة ؟ ياك ما ناوي تناسب معاه ؟ كا طامع فالصافية بنتو ؟ هاديك راها مخطوبة أعبد الغني . رد بالك .
عبد الغني : لا الواليد عمي بوشتى تلاقاني ففاس وعطاني هاد الترفازة وقلي نوصلالو للدار .
عمي العباسي : ايوا عبيني معاك . الطفلة راها غي باحدا فالدار . ما جاتشي دمشي باحدك .
عبد الغني : ألا الواليد راني تلاقيت مع حمو البارح فالحانوت وقلتلو يلاقيني للدار هاد الصباح دابا غا نمشي غي نركبالم ونرجع .
هي هاديك عبد الغني تلاقى حمو ومشى معاه للدار وجبدو النلفزة من الكرطونة وشعلوها ووراهم كيف يخدموها و وخلا حمو والصافية مبرعين مع راسم كيتفرجو ورجع فحالو .
عمي بوشتى سالا الفطور مع الطناش وهو يقلو أشرف : عرفتي أعمي بوشتى اليوم لاعبا المغرب الفاسي مع اتحاد سيدي قاسم واحد الماتش واعر . ديربي . جابتا الفرصة تمشي معانا للمركب تتفرج وتشوف المركب كي داير .
بوشتى : حتى هادا كلام . فاش مشي نمشيو كا فالطوبيس ؟
أشرف : نديو الطنوبيلة دعز الدين ونمشيو انا وياك وشي صحابي . الماتش مع التلاتة .
بوشتى : ايوا عايني نغطي جلابتي ونلقي صباطي ونمشيو
أشرف : بلا ما تلبس الجلابة غير سير هاكاك راك لابس التحزيمة دالمغرب الفاسي اعمي بوشتى . التقاشر صوفر والفيستة كحلا . ديما ماص .
هي هاديك ركبو ومشاو . وصلو للمركب . قطع أشرف جوج ورقات فالمنصة الشرفية ب 600 درهم وشرى لعمي بوشتى باكية دمارلبورو ودخلو .
دخل عمي بوشتى بقى غي حال فاه فداك الملعب .
بوشتى : شوف تبارك الله الشتا دي طاحت هانتينا شني ناض دالربيع غي فهاد السيمانا .
أشرف : هههههه هادا الgازو أعمي بوشتى فين غادي يلعبو .
بوشتى : شاتنا بيها الله يا هادا هو الملعب وخلاص . انا عمري شفت هاد العجب وهاد القوام وهاد الخلق كامل ماجي يتفرج حنا عندنا الملعب فالحد موشاي هايثا لاقي . مدورينو غي بالسلك و ايلعبو غي فالتراب . غي دي تلتخ ادنوض الغبايرا دالتراب معاه حتى ما ادبقاشي دشوف كككول . داك النهار لعبو التسول مع البرانس ..........
أشرف : صافي أعمي بوشتى هاهوما دخلو . تفرج تفرج دابا وسكت .
عمي بوشتى : فاينهوم دابا فاسا ؟
أشرف : هوما الصوفر .
بوشتى : و سيدي قاسم ؟
أشرف : هوما البويض . واش كادوخ عليا ولا مالك
بوشتى : وهادوك الربعة دي لابسين الاحمر
هادوك ليزاربيط اعمي بوشتى . صافي خلينا نتفرجو دابا عافاك .
دخلو اللعابا والحكام ولقاو النشيد الوطني والجمهور هز التيفو وعمي بوشتى غي حال فاه .
بوشتى : هاء . شني لقاو هاد المساخط ؟
أشرف : هادو الايلترا ديال الماص هزو التيفو .
بوشتى : الطيفور ؟ كا مشي يجيبونا نتغداو ؟
أشرف : وا التيفو اعمي بوشتى ماشي الطيفور . هاديك اللافتة الكبيرة اللي كاتبين فيها "شوف واسمع الماص كتخلع" .
عمي بوشتى ما فهم والو . بقى كالس فالمنصة الشرفية وقدامو السي محمد لخريرز Mohamed Tazi من المكتب المسير لفريق اتحاد سيدي قاسم ومع جنبو الصحافية Rokia Elbouraqadiالمكلفة بتغطية المقابلة .
رقية : بسم الله اعطيت صافرة البداية .. فريق المغرب الفاسي باللونين الاصفر والاسود وفريق اتحاد سيدي قاسم باللونين الابيض والأحمر . هجوم للمغرب الفاسي الكرة عند الجعواني كتمشي عند التكناوتي كيردا للوراء عند المهدي كريويطة كايدخل الصحراوي كياخدلو الكرة . هجوم مضاد لاتحاد سيدي قاسم الكرة عند عزيم كيقدااااف وا الحارس المهدي مفتاح كيصد الكرة كا ترجع عند بريكل بريكل لعبد النبي الحراري عند دجيجي gيزا كيراوغ . كيراوغ . قداااف وااااا إصابااااا
ناض الجمهور كيغوت ويفرح وعمي بوشتى حتى هو هز الطربوش ديالو وكيشير بيه والكاميرا قبطاتو وفديك اللحظة كان حمو كايتفرج وهو يبانلو عمي بوشتى فالترفازة وبدا ايلاغي على الصافية .
حمو : وا الصافية وا الصافية اجي سبك سبك سبك
الصافية : شني واقع ؟
حمو : شوف بابا فاين راه قبطاثو الكاميرا ايتفرج فالملعب مع اشرف ولد خالتي .
الصافية : نوض نوض سير قولا لعياد ولحدهوم وقلم يجيو يتفرجو معانا دابا بحرا يشوفو الترفزة الدجديدة دي جاب بابا من فاس ويشربو معانا القهوة .
مشى حمو ايسبك مور عياد وقالالم وجاو بثلاثة وgلسو يتفرجو فالسطيحة .
عياد : كا هادي الترفزة كا السوليما ؟
الصافية : هادي ترفزة إيل سيدي . ايقولولا سمارتيفي . كلشي فيها بلا ما دشريلا لا بارابور لا والو وفيها حتى لانتيرنيت .
حدهوم : ومناين جاب بوشتى الفلوس باش شرا هاد الوعد وهو غي سلف باش مشى لفاس .
حمو : هادي غي ربحا فمرجان . بابا ديما عندو الزهر .
عياد : كيف لاقي ربحا !! انا شحال لعبت د السويرتي فالسوق عمري ما ربحت حتى رطل دالقهوة .
الصافية : تفرج دابا أعمي عياد راه بحينا بينو بابا كالس حدا داك الصوحافية روقية البورقادي دي راها خداما ادهضر دابا
حدهوم : كا بوشتى ايتفرج غي باحذو ما عباشاي معاه يماك ؟
حمو : مشى غي هو وولد خالتي. بابا ما يعبيشاي معاه يما للملعب كا هو حمق
عياد : ولياه هو ما صاب فاين يكلس غي فالموطع دالصوحافا . ايوا هادو الكدوب الزورق .
الصافية : أ والله يا هو . كايانا ما انعرفشاي بابا
حدهوم : ايوا دابا نتوما شني مشي دعملو بجوج ترفازات كا غي عطيتونا هاديك الترفزة الصغيرة .
الصافية : مشي نخليوها لعبسلام يعملا فبيتو مناين يتزوج
عياد : أجي دابا احدهوم . ما يكونشاي هاد بوشتى غي شفرا ؟
حمو : والله ودعاود بحال هاد الهضرة لدارنا لا عاوت دخلت . بزاف عليك قالا بابا يشفر الترفزة . نتينا دلقيها وهو مايلقيهاش .
عياد : ايوا سمحلي اولدي يانا غي انتملغ مع خالتك حدهوم وكان .
نخليوهوم كايتفرجو ونرجعو للتيران .
بوشتى : دابا هاد الفراقي بجوج علاش لاعبين ؟
أشرف : هادا ماتش ديال البطولة وصافي كايتسمى ديربي .
بوشتى : ودابا التسول ديانا لعبو مع هادو ولا باقي؟
اشرف : ههههه التسول عندم ماتش واعر مع جيفونتيس نهار السبت .
بوشتى : و منايناهوما عاوث هاد جيبو التيش ؟
أشرف : من خميس الزمامرة . وااااا شحال فيك دالتسوال اعمي بوشتى .
السي محمد الخريرز سمع عمي بوشتى ايصقصي بزاف وما خلاهمش يتفرجو وهو يدور عندو .
السي محمد : واش هدا بوشتى دالخمار ؟ وا نهار كبير هدا
بوشتى : كا هذا السي محمد الضريف الاستاذ ديانا دالدياب اهلل اهلل اهلل . شني ادلقي هنا ياك نتينا فسيدي قاسم قالولي .
السي محمد : ايوا يانا زعما النائب دالرئيس دالفرقة دسيدي قاسم .
بوشتى : خيااار . ولايني عندكوم هاد الفرقة ميتة خاصكوم شي لعابا يكونو مزيانين ومجهدين بحال داك ولد بنشرقي دي عندنا فالحد .
السي محمد : ومناين غادي نجيبو حنا جوج دالمليار باش نشريو أشرف بنشرقي ؟
بوشتى : كا غي قلتوهالي كا هضرتلكوم مع باباه انعرفو تلاقيتو غي داك النهار فالسوق .
السي محمد : ايوا ما طاحتشاي عليا اودي أبوشتى .
بوشتى : ولا دير قضية . بغيتو غي أشرف نبيعلكوم هاد الgنطوح هادا دي حداي حتى هو سميتو أشرف . نخليهلكوم غي بمنيول .
أشرف : ياك اعمي بوشتى . نستاهل انا اللي جايبك معايا ومخلص عليك 300 درهم وباكية دالgارو رديتيني gنطوح .
بوشتى : أغي انردلك الصرف اوليدي . لا تقلقشاي راني غي أنطحك مع الاستاذ ديانا .
السي محمد : راه عندنا حاد اللعاب ايقولولو Hassan Lachkham رااااه فاين لابس الكيطمة عاد ايسخن باش يدخل وداك الساعة تفرجلي مع راسك وشوفلك مارادونا فياماتو ههههههههه
بوشتى : داك الدري دالربع ؟ ايوا هاداك حتى هو كان ايلعب مع الفرقة دالتسول . داك النهار هو دي سجل على الفرقة دالبرانس الله يعطيه الرضا .
السي محمد : هو هداك . حاد اللعاب بالا وصافي عطينا فيه شي عشرة دالمليون وجبناه من الفرقة دالتسول .
نخليو السي حسن يستعد للدخول والى اللقاء في الجزء الثاني عشر إن شاء الله .

توقيع: عزيز البورقادي.

تصنيف : الثقافة التسولية,طرائف عمي بوشتة