يوميات عمي بوشتى 13

قبل ما يوذن الفجر دنهار اللثناين سمع بوشتى شي عياط على برا، ناض وخسل وجاه وخرج وهو يصيب عياد واقف مور الغرفة أيعاينة باش يهودو مجموعين للموقف.

بوشتى: صباح الخير أعياد، صبحت مبكر أصاحبي.
عياد: صباح الخير، راه الوقت هو هذا أصاحبي، يا الله دغيا الدراري راهم أيعاينونا.
بوشتى: إيوا عاين ندخل نجيب الدوزان.
دخل بوشتى يجيب المنجل والصبابع والدغار وتبانتا وخرج، غي تلاقى مع الدراري صبح عليهم بالخير وقالم.
بوشتى: شوفو ألدراري راه خاصنا نختارو شي واحد فينا يكون مقدم باش ما نبقاوش غي أنخربقو ونقزو فالعريصة كاملين.
عياد: عندك الحق أولد عمي، وما نصيبوشي على ما حسن منك.
بوشتى: واخا ولايني دي قلتا أنا ما دعاودوهاش موراي.
عياد: أسيدي غي يا الله والله ما يكون غي خاطرك.
الدراري توكلو على الله وشدو الطريق للحد، وصلو وهوما يصيبو حد البلعا دالشوالة gالسين أيعاينو مول الرزق يسهل، حد الشويش وهو ماجي حد الفلاح باين عليه حياني غي من المشية والسحنة ديالو، قرب عند الدراري ووقف.
الفلاح: السلام عليكم أليشاشرا.
بوشتى: وعليكم السلام أعمي.
الفلاح: شحال بكم؟
بوشتى: بينا تسعود وأنا هو المقدم.
الفلاح: مزيان، دمشيو معي دخدمولي شي زريعا راها طابث.
بوشتى: ولاش جينا حنا لهنا؟ ولايني فاي بلاصة؟
الفلاح: غي حدا طابوعبان.
بوشتى: وشحال عندك دالزراع؟
الفلاح: غي شي بركة قليلة وصافين إلى كانث فيكم الفايدة حد اليوماين أو تلتيام كاااع ودجيبولا الحساب.
بوشتى: أسيدي الفايدة موجودة، أرى غاد كون فيك الفايدة نتينا.
الفلاح: بالنسبة للتهلية ما نهدروش عليها، وبشحال دخرجو.
بوشتى: حنا عاد جينا هذ النهار/ ونتا وجودك.
الفلاح: ماشي نعطيكم خمسميا دريال.
بوشتى: غي شوف شويش أعمي الله يهديك وصلا لستميا راك عارف الدراري محتاجين.
الفلاح: ماشي نزيدكم خمسين ريال، إيوا الله يجعل البركة.
بوشتى: أسيدي الله يسخر. يا الله نوضو الدراري وجمعو راسكم.
مشى الفلاح وجاب البيكوب وركب فيها الدراري وزدر للفدان، غي وصلو وهو باك الحياني ينزل مالبيكوب وشاورلم على الزراع.
الفلاح: البدية دالفدان من هنا لداك الكدية لهيه، المهم راه باين القماح لبيض ديالي من فارينا.
الدراري بقاو أيشوفو فداك الخيراث القمح تبارك الله قد الركابي دبيبي، وإيلا ما كانث فداك الفدان راها فيه شي عشرة الgطاراث.
عياد: تبارك الله عليكم ألدراري، جابكم الله، هنا دطيح عليكم الشثا دموت لرط ينشاعالله، قالك يوماين دلخدمة ههه، طك يا مالي وطك هذي راه خاصا مياث فلاح إلى بغيث دخدما فيوماين.
الفلاح: إيوا شنو أليشاشرا توكلو على الله، أنا ماشي نضرب للدار نجيبلكم الفطور ونجي. إيوا الله يعاون.
الدراري بقاو شي أيشوف فشي وبوشتى مصنكر ما عرف باش تبلا، بقا أيتفتف وجبد الصباعاث وبدا أيحشيهم فصبابعو وحزم بتبانتا ودار فالدراري.
بوشتى: إيوا شني ماشي نقلكم ألخوث، أنا يداي طاحو، ولايني زهر عندنا الله يبارك، النهار اللول نطيحو فبوركابي (التسول كانوا أيسميو القمح لبيط بوركابي)، دي عندو شي فتيلة يربطا على يداه هذ النهار طيحنا الفريخة كاملين هههه والله يا عمر الكلاب دحياينا عليك لا لهثو ههههه
الحاصول الدراري نزلو وبداو فالخدمة، ومع الزرع تبارك الله مفرش ومداحس أيعياو يغردو والو بحال دي واقف فبلاصثو، لقاث السبعة ونص دالصباح والفلاح خلط عليهم بالفطور.
الفلاح: الله يعاون ألفلاحة، أنا قلت راكم وصلتو للشعبة ونتوما باقيين هنا.
عياد: إيوا أجي نتينا حرفو ووصل للشعبة أسيدي.
بوشتى حمر فعياد حد التحميرة قبيحة زعما سكث، وقال للفلاح.
بوشتى: راك عارف الدراري عاد النهار اللول ديالم، والزرع تبارك الله مداحس وغي صبر عليهم حتى يفطرو ويعجبوك.
الفلاح حتى أنا غي كانضحك معكم وصافي، وراني جبت لكم حد المعgاااز دولدي فاق مالنعاس حتى هو فلاح جا باش يعاونكم ولايني حاولو عليه راه عاد أيتعلم.
الفلاحة فطرو بشاي قسم الله وناضو، داك الحياني الصغير بقا أيتلف ويربط فتبانتا حتى تسرحث الخدمة ويدخل فالوسط بين بوشتى وعياد، هو طرب الطربة اللولا والشعر دعياد وقف.

نخليو الفلاحة يتعرفو على عمك الحياني ونرجعو من بعد.

وعلى المودة نلتقي.
مع خالص الود ويانع الورد ورمضان كريم.

توقيع: أحمد لزعر التسولي.

تصنيف : الثقافة التسولية,طرائف عمي بوشتة