يوميات عمي بوشتى 14

غي دخل با حيون للوسط وطرب الطربة اللولا والشعر دعياد وقف من الخلعة، اللهم صلي على النبي الطربة ديالو يتمرغ فيها الزحش، الحاصول بقا بوشتى غي أيبحصص ويشوف مع جنبو وقال فنفسو: ولايني مشطبة هذي مع هد المسخوط، يا ربي أسيدي ومناين سلط علينا هذ الغضب؟ الحاصول السيد طاح على ركبة ونص ودار فيهم.

شوفو أالفلاحة: ما كاين لا خرجة لا والو، وممنوع الدخول فالزرع، عندي عندك وسير واجي وما كاين غي عيد وعيد (عيد اللولا بفتح العين وسكون النون وعيد الثانية بفتح العين وسكون النون المشددة).

بوشتى ما رضاشاي وقلو: والله يا ختارت البلاصة نيشان! أسيدي أرى ما عندك لياه يحسابك حنا جينا باش نلعبو.

قال هذ الهدرة ودار فصاحبو دي حداه وقلو غي زرب يداك ولا دكبرشي الطربة وسير غي دقة دقة وقلو يقول هذ الهدرة لهذاك دي حداه، ووقف شاف فعياد وقلو هذ الهدرة عاوث، المهم تفاهمو عليه كاملين وخلاواه أيقثل راسو غي بوحدو، مناين أيميل لجيهث ليمن وأيسوgم قدامو أيبقاو يطربو غي شي طريباث خفافين وماشيين قدامو بالزربة والآخرين عي تابعيناه مرة أيطربو ومرة لا، ومناين أيرجع للشمال أيلقيولو نفس المشكل، المهم السيد لقاث الحداش شاف راسو أيموث غي بوحدو ويا الله خدمو شي بركة قليلة، وهو يوقف.

الحياني: دابا واش كاتفلاو علي أو شنو؟ أنا خدام بوحدي ونتوما غير تابعيني؟

بوشتى: ياك نتينا قلتنا ماشي نلقيو عيد وعيد وسير وأجي؟ إيوا ها حنا أنمشيو ونجيو معك شني باغي عاوث.

الحياني: أسيدي مناقص من المشي والمجي! نرجعو لخدمتنا وكل واحد يطرب على gداه.

بوشتى شاف فالدراري ولاقى يداه زعما قربو من بعضياتكم ولا دخليوشي التيساع بيناتكم. وشاف فعياد زعما بعد على الحياني شواي وحتى هو بعد عليه وخلاواه مطلع النص فالخرجة بوحدو وهوما مقربين من بعضم وأيخدمو شي حدا شي.
الحاصول لقاث الطناش صاحبنا طلق الخيط، وعيا يغرد، والو الزرع غي مورك حداه، هوما هايثاك والحياني الكبير وصل عندم بالغدا وشاف ولدو أيقاسيها غي بوحدو. وهو يعيطلم.

الفلاح: وا ليشاشرا أجيو تغداو أجيو.

الفلاحة وقفو ولقاو المناجل على كتافم ومشاو عندو.

الحياني الكبير لبوشتى: الله يا ودي ألمقدم خدامين أدقتلو فهد الدري كا موشي حشومة عليكم؟

بوشتى: إيوا أعمي راه هو دي بغا هد الشي، وزايدون السيد غي خلط ودخل بيناتنا وما عطاشاي التسليم كككل، وباش بدا بدا بالقباحة، هذو راهم الشرفا دالتسول أعمي، كا يحسابو خدام مع خرارg؟

الحياني الكبير: إيواغي رخفو عليه ألفلاحة وخدمو معه الله يجازيكم بيخير.

الدراري تغداو ورجعو يخدمو عادي وصاحبنا رطاب وكتف يداه مور طهرو وطلب التسليم. وكملو النهار بالموطحيكاث والغنا والمعير وبا حيون واخا هايثاك بقا فيه الحال وما رضاشاي كيفاش يلقيوها به الدراري دالتسول.
اللاغدا رجعو للفدان ورجع عاوث للقباحة ديالو ودار فيهم.

الحياني: شوفو ألخوت لبارح راه فات باش عطا الله وراه ما خدمنا والو، هد النهار راه نهار خور ودابا دي بدراعو راه ماشي يبقى معنا ودي غي مسلك ليام موحالش يوصل للطناش.

بوشتى وقف وشاف عاوث فالدراري وحمر فيهم زعما كونو رجال.

هاو بداو فالغريد دالزرع وما لقاث العاصر حتى كانو فراو نيشان ولايني ما عطاوهش الروط ككككل. غي قربث المغرب ورفدو معروف غمز بوشتى للدراري باش يبقاو معه.
الحياني لقا المنجل على قفاه وسرح مع الطريق نااااشط مع راسو.

بوشتى دور به الدراري وقالم.

بوشتى: شوفو فيا وسمعوني مزيان، هذ خينا ما عطاشاي التسليم للفلاحة ودخل علينا مجهد والله لا طلقو سيدي بلعباس على خير، يا الله غرسو المناجل فالأرض وأنا ماشي ندعي ونتوما قولو آمين.
الدراري غرسو المناجل فالأرض وزولو الطرازاث من فوق راسم وبقا بوشتى أيدعي فداك الحياني ويصدف لو شي خمسة دقايق.

اللاغدا فالصباح صاحبنا صبح نااااشط عاوث، غي نزلو فالفدان هاو بقا أيهبش، الدراري شافو فبوشتى مسغربين زعما هذ الدعاوي ديالك ما قضاو واااالو، شاف فيهم بوشتى زعما غي صبرو ودابا تشوفو. يا الله خدمو حد الساعة ويصيبو خينا وقف والدم خارجلو على خنافرو بحال العنبوب الله يحفظ.

الفلاحة تبهطو فيه وبقاو أيسدو لو فخنافرو والدم أيهودلو لفاه غي سخر الله باباه خلط عليهم بالبيكوب وهزو وزدر به لتيسة.

الغدا جابولم غي حد الدري صغير، ومناين وصلث العشية جا الحياني الكبير وكتف يداه بين يداين الدراري وطلب منهم السماحة ويدعيو مع ولدو.

الحياني الكبير: ألفلاحة لحبايب أنا ليهودي وسلمت بين يداكم، سامحو ولدي ودعيو معه أنا مزاوك فيكم راه مشا منو بزاااف دالدم ودابا راه فالإنعاش غي الله يحفظ وخلاص.

الدراري عز عليهم المسخوط ودارو ببوشتى وبقاو أيدعيو.

الفايدة والحاصول السيد دخلث عليه الراحة وهوما gوزو عند داك الحياني 20 يوم غي النشاط والطحك. والنهار التالي جمعم باش يخلصم وجا معه داك ولدو.

الحياني الصغير: سمحولي ألحبايب أنا مزاوك، عمرني نحقر الرجال.

بوشتى: الله يسامح، واش ما عارفشاي بلي التسول كاملين شرفا؟ راه غي ربي معك أوليدي.

المهم الحياني خلصم مزيان وزادم تلتالاف ريال للواحد، أما بوشتى فزادو ستالاف حيث دعالو مع ولدو، ومسكين ما كانشاي عارف بلي راه هو دي غرسا فيه هههههه

ملحوظة: هذ قضية الدعاوي والرعيف قصة واقعية وقعث للوالد ديالي هو وشي ولاد عمو مع حد الحياني.

وعلى المودة نلتقي.
مع خالص الود ويانع الورد، ورمضان كريم.

توقيع: أحمد لزعر التسولي

تصنيف : الثقافة التسولية,طرائف عمي بوشتة