دخل عمي بوشتى للدار وضربا بتجبيدة على اللحيفة وبقا أيحاول يلصق الشقايف دالتيليفون، ما عرفشي مناين يبداه، هاو يبقى بالدعاوي على داك الحيبور، سر الله يرزيك كيف رزيتني فالتيريفو ديالي، سر الله يلاقيك بالبلا، سر الله يعطيك غصاب الشباب. ... المهم ما خلا ما قال وهي دسمعو حادة ودجي ليلو.
حادة: علاش أودي خدام أدصدف للدري دالناس؟ ياك تتينا دي عطيثولو؟
بوشتى: سر الله يجعل هذ الدعاوي يتقسمو بيناثكم نتي وياه، لياه أنا أنعلم الغيب؟ أنا قلت زعما غي ماشي يشوف فيه ويردو لي، الساعة هو مشواق دقول عمرو شاف الخير الله يحفظ.
حادة: إيوا دابا طرب السنيطرة مع راسك. نوض دتوضا ودصلي الظهور راها ودنث.
بوشتى: ومالك نتينا قالبالي راسي نوض، دصلي نوض دصلي، الناس مزوجة بالنسا وأنا معبي فقيه، خزيث الله ينعلا تريكة.
الحاصول ناض عمي بوشتى ومشى يتوضا ومع بالو مع البورطابل خوا القرعة دجافيل دالعبار فالسطل ودخل للمطهرة، غي بدا يسنجا وهو يشم الريحة دجافيل وبقا أيحك فمصاصطو ويخطي.
عمي بوشتى : الله ينعلا تريكة منزلين القرعة دجابيل مع القراعي دالما! الله يعطيكم الطمس ماشي دهبطولي فخادي بهذ المصيبة.
حادة: ولياه نتينا خنافرك مسدودين ما شميتشاي الريحة؟
بوشتى : الله يسد عليك بيبان الرحمة، ولاش منزلين جابيل مع القراعي دالما؟
أرالي الصابون نخسل به الله يخسلوك على المحمل ونتهنى منك.
أرالي الصابون نخسل به الله يخسلوك على المحمل ونتهنى منك.
جابثلو حادة الصابون وتوضى ودخل للسطيحة يصلي، غي قال السلام عليكم وهو يسمع عياد أيعيط، خرج عندو بالسبg.
عمي بوشتى : خير أعياد كا جيث مالسوق.
عياد: لا باقي ما جيث هذا غي الضل ديالي أيهدر معك، طك عبيك نتي والسؤلاث ديالك.
عمي بوشتى : إيوا جابك الله، راه داك الحيبور دولدك هرسلي الكورطابل ودابا خاصك دخلصني فيه.
عياد: شكون فيهم.
عمي بوشتى : داك الحيبور الصغير دي عندو ستة الصبابع.
عياد: آه، أشرف.
عمي بوشتى: الله يشرف مطهرو، قالي عطيهلي مشوف وهرب لي به.
عياد: إيوا البركة فراسك، أنا قلتلك دعطي حاجثك للدراري؟
عمي بوشتى: أودي أنا عارفك جلاخة وما فيك خير، جيبتلي معك داك المرة بعدا أو لا؟
عياد: جيبتا ها هي غي حشي فيها صبعك وخليها حد اليوماين ودابا دروح. يا الله نخليك والله يتقبل والخليفة على ربي فالكورطابل هههههه
نخليو عمي بوشتى يكمل نهارو ونتلاقاو غدا بحول الله.
وعلى المودة نلتقي.
مع خالص الود ويانع الورد ورمضان كريم.
مع خالص الود ويانع الورد ورمضان كريم.
توقيع: أحمد لزعر التسولي
0 commentaires:
Enregistrer un commentaire