يوميات عمي بوشتى 03

ساعة في الجحيم.

غي صبح الحال ناضت دادة حادة وبداث أدشطب فالمراح ودعيط على عمي بوشتى.

حادة: بوشتى آبوشتى نوض عبي البقرة طولا راها مالصباح وهي أدزوك بالجوع.

عمي بوشتى: صباح لله يا هذ موحلاسة، لياه لاين مشى داك بوفراكح دولدك؟

حادة: باقي ناعس.

عمي بوشتى: إيوا الله يغطيه بالرضا وخلاص، هذي هي الضنايا دالربح؟ زعما مخلياه ناعس وخدامة أدنوض فيا.

حادة: نوض إيوا نوض وبركة من الفهاماث الخاوية، نوض بعدا غي صلي الفجر راك باقي ما صليتوشاي.

عمي بوشتى: نتي خليتنا نصليو بعدا؟ ساعة ونتي فالمطهرة حتى عباني النعاس، الله دنعس ما دنوض.

ناض عمي بوشتى ودخل توضى وصلى داك جوج ركعاث بالزربة وورك على حد الخدية وجبد كازا وبدا أيكمي. شمث دادة حادة الريحة وجاث أدجري.

حادة: أويلي ساغفير الله شني أدلقي أالراجل؟ زعما راه رمضان أو ما عندك غراض.

رمى عمي بوشتى الGارو من فاه وبقا أيسب ويخيخ.

عمي بوشتى: تفو يا لطيف على من صبحت هذ الصباح، شتي، بقيث أدفهم علي حتى نسيث راسي.

حادة: نتينا غي لصق في كلشي، نوض نوض الله يعفو عليك.

ناض عمي بوشتى ومشى للروا وحداب يفسخ الرباط من اليد دالبقرة ودشعط معه بالشوال ديالا لعيناه (ما أيعرف الحريق دهذ الشعطة غي دي مجربا)، بقا عمي بوشتى غي أيفافي وعيناه أيدمعو وناض بداك الفقصة ويهز حد القنبة ويبقى أيطرب فالبقرة وهي مسكينة أدزورز من هنا لهنا. جاث حادة وفسخث الرباط وعملث لا القنبة فراسا وخرجاثا لبرا.

حادة: بوشتى آبوشتى أجي راني خرجت البقرة لبرا.

بوشتى: أجي بعدا نفخلي فعيناي أنحس بحال إيلا فيهم الزعيرطة.

حادة: سر خسلهم بالما أو فتح عيانك وحشي راسك فشي سطل، هذاك غي الزبل Gابس بقا لاصق فعيناك.

مشى عمي بوشتى ولقا داك الشي دي قالث لو حادة ورجع gود البقرة وعباها للمرجع، نزل الوتد فالأرض وجاب حد الحجرة هو دق الدقة اللولا والبقرة دزرططلو على يدو ومع داك الزبل جاري وخضر دقول لقاتلو الحنة، ناض عمي بوشتى وبقا أيسب ويخطي ويمسح يداه فالربيع ومع الغضب ما شافشاي حد حرايق وهو يمسح فيها يداه، غي حس بالحريق ويبقا أيحك فيداه وصبابعو ويخطي، رجع للوتد وصبابعو غي الزبل قبط الوتد باليد دالشمال وتم هواد عليه بالحجرة، البقرة زادث شويش ويخطي الوتد ويقل للgمز ديالو يا غرد، بداك البهطة ما حسشاي براسو حتى صاب صبعو ففاه وما فطن حتى حس بالمذاق دالزبل فلسانو، هاو يبقى أيبزق ويسعل ومع قوة السعلة ما فطنشاي براسو حتى خرج منو حد الصوت سمعوه شي ناس كانوا هوادين مع الطريق وبقاو أيطحكو عليه.

نخليو عمي بوشتى يبرد الحريق والفقصة ونرجعو من بعد.

وعلى المودة نلتقي.
مع خالص الود ويانع الورد ورمضان كريم.

توقيع: أحمد لزعر التسولي

تصنيف : الثقافة التسولية,طرائف عمي بوشتة