يوميات عمي بوشتى 06

هذ النهار gاز مخير على عمي بوشتى صبح البرد وتسحر مزيااان وصبحث فيه حد البلعة دالحركة، ناض على النبوري وخرج البقرة دضحي فالربيع وطول الحمارة حتى هي، وتكى حداهم ولقى رجل على رجل وبقى أيتفكر ليام وكيف كانث وكي رجعث. تفكر نهار دشاف فيه مع حادة فالعرس دولد عما وغي شافا بقا حال فاه فيها وحتى هي كانث مرة مرة أدخرج راسا مالسرجم دالبيث دالنسا ودسرق شي ترgيبة وهو عاجبو الحال ومنفوخ وخدام على بيست (بيست نوع من أنواع السجائر كان معروفا في السبعينات والثمانينات) gارو أيشعل خاه (التدخين كان موضة خلال تلك الأعوام أما الآن فأصبح كارثة الله يعفو) ومرة مرة يطلب من مول الموناضا يعطيه شي جيدور أو لاسيgون أو سيم... المهم السيد ما صاب فراسو ما يشد راه خسر شي 600 دريال داك النهار (30 درهم كان لها شأن في تلك الأيام) وواخا عمرو تبورض أو دار فشي مراح، داك النهار خرج منو طبغيلان ناض حتى هو وغطا حد الجلاب ودخل فالسطر وكان عندو الزهر حيث السطر أيغطي على القبان بحال عمي بوشتى المهم حيح مزيااان فداك العرس وباش دكمل الفرحة ديالو قبل ما يتفرقو الناس للطواجن شافث فيه حادة وتبسمث بالطحكة (أن تظفر بضحكة في تلك الأيام من فتاة فهذا يعتبر إنجازا كبيرا، سقسيوني أنا هههه) السيد ترفع وبدا أيحس براسو وصل للقمر، مشى يتعشى فالطاجين وهو فيه غي الهيدورة مسيكين، غي رجع للدار وهو يهود للعين يسقي وما بيهشاي الما، بيه غي يتلاقى مراث عمو باش يسقسيها على داك الطفلة بنت من هي.

بوشتى: خير آمراث عمي.

دادة فاطنة: خير أوليدي، لاباس عليك؟.

بوشتى: لاباس أدادة فاطنة ونتينا شخبارك وبالصحة للزردة.

دادة فاطنة: الله يعطيك الصحة أوليدي، ياك حتى نتينا مشيث معنا فالهدية.

بوشتى : أييه إيوا غي بغيث نسقسيك على حد الطفلة كانث فالعرس وصافي.

دادة فاطنة: هاي هاي على بو فراكح، ياكما ناوي دجيب ليماك شي عروسة هذ العام؟

بوشتى : أودي غي أنسقسي وخلاص.

دادة فاطنة: شني كانث لابسة؟ وكيف لاقيا فوجاها؟

بوشتى : راها حمرانية ومgدرة وخنافرا منgادين وحواجبا مgرونين، وكانث لابسة حد المنصورية وجدية زرقا وفيها حد البلعة دالموزون.

دادة فاطنة: هههه هاي هاي على بوسنادر لاخر، مشيث لراس العين ما عندي ما يسالك راك عشاق مع راسك أسيدي ولايني نتينا ما ساهلشاي.

بوشتى: ولياه يحسابك أنا ماشي نجي ونطيح على فاي بحال شي ناس.

دادة فاطنة: أسيدي هذيك راها حادة بنت موحند عبدالله هي الصغيرة فخواثاثا وسماوها حادة حيث يماها كانث أدولد غي الطفلاث وناضث عgوزثا سماثا حادة باش دحد هد الشي.

بوشتى: وزعما هذ الشي صحيح؟

دادة فاطنة: أوليدي العالم الله ولايني راها صدقث معهم حيث كانث هي الطفلة التالية وجاو موراها شي ربعة دالذكورة.

بوشتى: سبحالله داك الناس كانث فيهم النية.

دادة فاطنة: إيوا شني أدقول؟ نمشي غدا عند يماك نقلا راه بوشعكاكة دولدك باغي يتزوج.

بوشتى حشم وغنس راسو فالأرض ودادة فاطنة فهمث القضية.

نخليكم توجدو السحور ونرجعو غدا نكمل هذ النوستالجيا.

وعلى المودة نلتقي.
مع خالص الود ويانع الورد ورمضان كريم.

توقيع أحمد لزعر التسولي.

تصنيف : الثقافة التسولية,طرائف عمي بوشتة