يوميات رمضانية مع عمي بوشتى 02

غير لقاث الجوج دالليل بقا عمي بوشتى ايعيط.

عمي بوشتى: حادة أحادة نوض أمزروفث الجحلال راه بدا يعلم لفجر.

حادة: هاني نايضة أححي علي، عاد راها الجوج دالليل كماشي نسحرو مع الجوج؟

عمي بوشتى: إيوا مناين باقي الحال نوض نكمي شي Gارو على تسخنو السحور.

حادة: نتينا هاداك فاش فالح، سيادك الرجال راهم فالجامع أيصليو التراويح ونتينا مجبد حدايا هنا قد السهام، دقول ما عندكش الرجلاين.

عمي بوشتى: الله يصليو عليك عما قريب، شكون دي أيصلي عندنا فالدوار؟ كا عياد؟ كا علال، كا عمار دموح؟ ياك المخير فيهم ما أيعرفشي حتى يتوضى.

حادة: زعما نتينا طابG باباها بالصلا. ياك شحال من مرة أدجمع النهار كامل حتى لليل.

عمي بوشتى: ألالة أنا بركة علي الصلا دباباك راها دكفينا كاملين.

حادة: ما عرفتش علاش ديما واكل بابا معك بالشقف؟ وشكون جابو للهدرة؟ ياك هو فدارو ونتينا فدارك؟ مصاب دشبا فيه.

عمي بوشتى: ما صيبت فيمن نشبا غي فداك الشيبة العاصية دباباك، أيقيل يحلف على الحرام فالسوق، والسبايبية ما أيحملوشي فيه الشعرة.

حادة: زعما نتينا الناس أدموث عليك؟ ها لعار لما خليني ساكثة.

عمي بوشتى: أنا بعدا مقبول عند الناس ياك عاد مناين كنت ففاس راك شفت شني لقاو لي نساب بوجمعة.

حادة: راهم غي كانوا أيطحكو عليك ألعرة دالرجال.

عمي بوشتى: دطحك بيهم رايبين، نوض درق علي زلافثك ووجدنا ما نحنجرو الفجر قرب يوذن، ونتي بهذ الدرة بحال الراس دالبصلة، خزيت عليها سلعة، الناس تزوجو النسا وأنا بلاوني بهذ فنيشة.

حادة: كاين شي فنيش قدك، حرق صدرك بالدخان حرق، تراك دحلق.

وإلى حلقة قادمة بحول الله.

وعلى المودة نلتقي.
مع خالص الود ويانع الورد.

توقيع: أحمد لزعر التسولي.

تصنيف : التراث الشفهي,طرائف عمي بوشتة