التوائل 30

عمي بوشتى وعياد والفقير الحوسين وعمي امحمد فالصف اللول والطيرموس دالقهوة والطبسيل دالمفروق حداهم فوق الطبلة وعياد عيناه مشاو يفلثو لداك الطيرموس ، الأستاذ بدا الدرس .

حمزة : بسم الله الرحمان الرحيم ، كنشكركوم بعدا على الحضور ديالكوم ومرحبا بيكوم كاملين

بوشتى : بيك اولى أسي نتينا دي مرحبا بيك عندنا فالدوار

حمزة : ترحب بيك الجنة أعمي بوشتى ، كيف كتعرفو العام اللي فات جيت باش نقريكوم ولكن حيت كان العدد قليل ما كملتش معاكوم ودابا تبارك الله كيبانلي القسم عامر و عندكوم الرغبة باش تقراو

الفقير الحوسين : ايوا غي ما صيبنا ما نلقيو واها وراحنا لاهيين الوقت

حمزة : لا إن شاء الله غادي نستمر معاكوم وغادي نبداو أول درس : حرف الألف ، شوفو فالسبورة كاملين ، كنديرو شرطة طويلة هاكا وفوق منا الهمزة

التهامي دعلي : ديما أنشوفا وأنقول شني هي هادي لاقية بحا المنجل ساعة هي الهمزة

عياد : الهمزة هي هاد البرياق دالقهوة دي جاب بوشتى مع هاد الطبسي دالمفروق

بوشتى : أ سكوث أ هاد العلة خلينا نقراو . حتى للاستراحة وارا ما دجغط

حمزة : شوية د السكات عافاكوم ، شوفو هنا فوق الهمزة غادي نزيدو شريطة صغيورة كنسميوها الفتحة

امحمد : بحا الفتحة دالدجلاب ياك أ السي

عامر : هايثاك كان لقالي يانا الطبيب فالبلدية حاد الفتحة على الرياصة دقلبي وخيطلي داك الفتق دي كان عندي

بوشتى : أسكتونا أليشاشرة خليونا نقراو

عياد : زعما أدقرا بنيتك كا عوال دطحا مدير كا كنينير

حمزة : ههههه ، ما عليش المهم الواحد يقرا ويعرف الحروف ونقطة بنقطة كيحمل الواد . نرجعو للدرس . الألف والهمزة والفتحة كنكتبوها هكدا وكنقراوها "أ"

بوشتى : حنا التول أنقولو القا موشاي الأا

عياد : نيشان ، السي حمزة وقيلا فاسي أينطق القا بالأا

حمزة : لا ماشي "ق" هادي ال"أ" أما القاف ها كيفاش كنكتبوها "ق"

الفقير الحوسين : ياك أيقولو القا وحدة ملفوق لاش لقيتلا نتي جوج كا عزابلك حنا ما انعرفوشاي كا شني

حمزة : هاديك القرايا دالجامع أما القاف دالمدرسة عندا جوج نقطات . يالاه كل واحد يعطيني كلمة فيها حرف الألف "أ"

عياد : أرى لاون داك القهوة

حمزة : أرى فيها الألف ولكن المعنى ديالا باللغة العربية : أرى هي زعما كنشوف

بوشتى : شني أدشوف نتينا أدشوف الضباب . ها عامر فاين خدام أينفح ونتينا لا خبر
حمزة : حيد من يدك داك الشي أعامر حشومة . ما كنكميوش وما كنفحوش فالقسم .
عامر : والله أ السي يا طابا دبوشتى هادي هو دي ماطاهالي
حميدة عاد ماجي أيسبك لاقي اللوحة فالقب دالجلاب ودق فالباب وتم داخل وكلس
حمزة : علاش تعطلتي أعمي حميدة
حميدة : أودي غي سكت كث ماجي ومناين نوضت ندور على الصباط ما نلبس ما صيبتوشاي ، ليهوذي دالمجحوم رفدو ومشى أيلعب بيه وطيحو فالبير وما صيبت ما نعمل فرجلي عملت غي المشاية دخالتك عيشة
امحمد : والله يا جات معاك نيمير الوحيد واخا الفركوح ديالك كبير جات قدك عبار
حمزة : نرجعو للدرس . شكون فيكوم ينوض للسبورة ويكتب لينا حرف الألف
كلشي سكت حتى وحيد ما بغى ينوض
عياد : نوض أبوشتى نتينا أدفهم علينا حا الشواي
التهامي دعلي : نوض أبوشتى نتينا هو المشتهيد
حمزة : يالاه نوض أعمي بوشتى سعف
بوشتى : أودي غي خليني كالس فموطعي أ السي ، الركابي ديالي أيحرقوني حتى لمور العطلة وعاد بدا دنوضني
حميدة : لياه فيواخ العطلة ؟
بوشتى : وقيلا هاد السيمانة
حمزة : ههههه فيناهي العطلة واش نتوما عاد قلتو بسم الله وكتسولو على العطلة . يالاه غير تعافر أعمي بوشتى ونوض .
ناض عمي بوشتى وكلشي بدا يصفق عليه هو قرب للسبورة وهو يبانلو حاد المحسيب (بوبريص) كايز فوق منا ، كا ويزول الفردة دالسباط ويغرول عليه على حر من جهدو فااااااااط ويقول لداك السبورة يا شلخ وداك المحسيب بقاو مصارنو تما لاصقين . المهم السبورة طاحت و تهرست وحمزة ما عجبوش الحال وكلشي بقى أيطحك وعمي بوشتى مشى ليلا يهزا وهو يقلو حمزة صافي صافي غير رجع لبلاصتك ما بقيناش قاريين
حميدة : لياه كا مشي نتعوشرو أ السي ؟
حمزة : انا اللي غادي نتعوشر ، ما بقالي ما نزيد معاكوم فهاد القسم ، غي نهار واحد كنتو غادي تهبلوني وتصطيوني
عياد : لواه لواه أ السي غي صبر معانا حا الشواي دابا نعجبوك .
حمزة : الله يهنيكوم انا والله معاكوم لا زيدت نهار . هي هاديك هز الكارطابا ديالو وزاد خلفة
الفقير الحوسين : الدعوة معاك لله أبوشتى خليتنا بلا قراية وكلنا عليك الله
بوشتى : زعما كنت مشي دتخرجلي ودطحالي طبيب . الله يمسخك كا نتي فهمتو بعدا حتى شني كان ايقول
هوما هايثاك والمقدم حتى وقف فالباب دالقسم وبدا أيلاغي على بوشتى
مشى عندو عمي بوشتى قلو شني كاين
المقدم : غي سكت أ بوشتى راني عملت حا الزبلة كحلة زحلة ما يلقيها حتى وحيد . أنا مزاوك لما وقف معايا
بوشتى : شني لقيت أ المدعوي
المقدم : جا عندي ولدك عبسلام باش يصغب شهادة العزوبة ، جيت يانا صغبتالو وفعيوط ما نكتب عبسلام بن بوشتى كتبت غي بوشتى وسنيت فيها والقايد حتى هو سناها وعطاهالو ودابا عاد فطنت شني لقيت . انا مزاوك قلو يقطعا وما يدفعاشاي للعدول ونعاودلو وحدة اخرى راه ايلا دفعا مع الضوسي راني نمشي فيها للحبس
بوشتى : كا دابا يانا فايث 65 عام رديتني عزري أ المقدم !! والله ايلا يا انتي هو دي عبرت
المقدم : أنا مزاوك لما لحق ولدك قبل لا يدفع الضوصي أنا مزاوك
بوشتى : ايوا يكو خير . يالاه معايا دابا للدار ونشوفو شني نلقيو
نخليوهوم غاديين للدار يشوفو عبسلام وإلى اللقاء في الجزء المقبل بحول الله .
دامت لكم البسمة.

توقيع: عزيز البورقادي

تصنيف : المنتديات الثقافية,طرائف تسولية