التوائل 27

عبسلام بقى مبهوط غي ايدور فداك العيناين وما عرف ما يلقي ، كا وهو يبانلو السريع ركب فيه حتى لواد أمليل ومن تما قبط الكار لوجدة .

حمو عندو غدا الرانديفو دالطبيب باش يزول الكبص والصافية عيطاتلا السعدية خالتا قالتلا أجي مع خاك تكلسي معانا واحد السيمانة تبدلي الجو .
حدهوم وعياد مشاو فالصباح بكري لبني لنت عند خاها باش دحضر للعرس دبهيجة بنتو ، عبات الحوايج دي عطاتا الصافية وحادة ومشات وهي أدوصيهم على الدار وعلى داك الفراخ دبيبي والدجاج .
حمو ناض وجد راسو والصافية حتى هي باش مشي يسافرو لفاس
حادة : ومناين مشي دمشي لفاس لاش عطيت صاكك باقي جديد لداك بونيابر دحدهوم ؟
الصافية : أيما ما كانشاي على بالي السفر وزايدون ما عليش ، مشي نعبي فيدي غي البزطام
حادة : وبعدا قلتا لعبد الحق أو لا ؟
الصافية : راني قلتالو قلي ما عليش غي سير
بوشتى : مشي دبقاو تما ادتفتفو حتى دحمى الشمش ويطلع النهار والمركوب عليه الدحاس ، إيوا هاني فاي قلتالكوم
حادة : كون ما هاد العرس دعبسلام والله حتى يانا كامشيت معاكوم
بوشتى : ياك عاد عبيتك بقيت أدسارا ثما حتى قطعت الصباط ، كا حنا مشي نخدمو غي على الكيران
عمي بوشتى ركب حمو على الحمارة وهود معاهم للحد ، ركبم فالسريع لواد امليل وقبطو الكار لفاس . المهم ملي وصلو لباب فتوح الصافية جبدت التيليفون و هضرت مع خالتا السعدية باش دلاقيهم جاوباتا قالتلا هاهو أشرف ماجي موراكوم بالطونوبيل غي عاينوه تما . هي سالات الهضرة وهوما gازو حاد الجوج مشرملين بالموطور وخطفولا داك التيليفون وخلاوها أدفنك ، مسكينة ما عرفت باش تبلات ، الشفارا هربو وخلاوهم ايطيرو وينزلو هي وحمو .
عمي بوشتى تم راجع ومشى للحانوت رفد شي صوالح وشرا لحادة حا القابسة دالمسكة وطلع فحالو .
حادة : كا مشاو
بوشتى : مشاو
فالعشية عمي بوشتى فرش فالدكانة وحادة وجدت القهوة وخرجاتا وكلسو كيف العادة
بوشتى : الله الله على راحة تهنيت هاد النهار من داك بوسربوب دحدهوم وداك بوخنافر دعياد
حادة شربت كاسا دالقهوة ولقات المسكة ففاها وبدات ادمشتق
بوشتى : شني لقاو حقا فداك المسلسل دفريدة يانا ما تفرجتشاي البارح
حادة : سالاو . البارح كان التالي ، كانت هنايا حدهوم والله يا شبعنا بكا يانا وياها
بوشتى : لياه شني طرا ؟
حادة : داك المسخوطة دكيف أيقولولا رمات راسا من السطح وماتت
بوشتى : شكون فيهم ؟
حادة : ما نعرف داك الزعرا تلفلي اللسم ديالا
بوشتى : المساخط ما قلنا بدينا نحفطو اللسوما ديالم وهوما يساليو
حادة : دابا يجيبو خور . خلينا دابا من شي فريدة ، كا ما عجباتكشاي هاد الكلسة فالدكانة غي يانا وياك فاصافاص
بوشتى : والله ايلا يا بصاح ، بعدا مشي نشرب القهوة ديالي فخاطري ونكمي حا الكارو و نرد المجاج
حادة ادشوف فبوشتى وهو أيكمي ، دار حيتا صابا أدشوف فيه
بوشتى : مالك ادبحصص كا ما عمرك شتني ؟
حادة : ولياه مانشوفشاي فيك ، فيمن بغيتني نشوف
بوشتى : هاهاهاها . شني باقي فيا ما دشوف ، شرفت وبديت نتهركم أحادة
حادة : أنا بعدا ادجيني ديما غزال ، باقي دعقل أبوشتى مناين كث باقية عزبة قبل ما دخطبني وجيث للعرس دعلي خاي وكث انتينا اتبورد فالوص دالمرح بداك الفريزي كحل والقميجة بيطا بالكمام ولاقي القابسة دالدخان فالدجيب والنضاضر كوحل على عيناك والصباط جديد أيبري ، باقي دعقل ؟
بوشتى : إيه يا ليام ، كث داك الساعة أنخدم فكثامة وكث عاطيها غي للشيكي ولالة ومالي وتقرقيب السطالي .
حادة : دعقل فاش ناضو يشطحو النسا ونوضت يانا نغني ونجيب عليك : يا و بوشتى هايا الغزال أيا أيا أيا ، يا ومول الفريزي الكحل أيا أيا أيا ، يا وكيفو كي بودنجال أيا أيا أيا ، يا وراني عليك أنهبال أيا أيا أيا ، يا وديما نجيب عليك من هادي شحال أيا أيا أيا أيا
بوشتى : كاخ كاخ كاخ والله ايلا يا باقية عاقلة وحافطة يا البالا
حادة : واللخرا فاش قلتلك : يا و بوشتى يا الزين البركي أيا أيا أيا ، يا حكيتك كيف البندير أيا أيا أيا ، يا ونقبطو بصبعي الكبير أيا أيا أيا ، يا وانا نجيب عليك وانتي كي المير أيا أيا أيا أيا
بوشتى : هاهاهاها . ما بانلك غي البندير ، كث ادعطي للغنى قثلا يا موجحالل ، كث ديما رافدا الطارا وادبحلط
حادة : ايوا مالك والله ما كانو يقدو عليا الطفلات دداك الوقت
بوشتى : فالحقيقة دالله حتى انتينا كث مسرارة وقلك ايلا مشى الزين ايبقاو حروفو
حادة : ولياه يانا دونية
بوشتى : واخا كث مجعلقة كث مسرارة أعوراجة غي شفتك قلت ليما وبابا يمشيو يخطبوك قبل لا يخطفك شي وحيد ويخليني مفنك
حادة عجباتا الرومانسية دعمي بوشتى وعباثا سهايثة وحميدة حتى خلط عليهم وقلم السلام وعليكوم .
نخليوهم مع حميدة ونرجعو لعبسلام
عبسلام قبط الكار ونزل فوجدة مشى نيشان عند صحابو دي كانو معاه فالعشرة ، صاب غي بوعلام وسلف من عندو عشرين ألف ريال ومشى عند مول الحانوت يخلص الكريدي اللي عليه باش يعطيه لاكارط ديالو صابو مبلع . صقصى عليه قالولو مشى للبلاد عندم شي موت ما يجي على خمسيام . عبسلام جاه بودهوار وبقى غي قابط فراسو ، بوعلام شافو هيثاك وهو يجرو خرجو هو وياه للمدينة يفوجو شواي .
هوما ايدورو فساحة سيدي عبد الوهاب وهي دبانلو يامنة هي وخالتا وبنت خالتا أيساراو
لاغا عليها ومشى سلم عليهم
عبسلام : أهلن أهلن كاراك هنا ؟
يامنة : واه راني هنا ، جيت البارح يانا والعزيز خاي عند خالتي وخرجنا نساراو شواي ، ونتينا ياك قلتلي مشيت للتسول ؟
عبسلام : أودي مشيت ورجعت ، حتاجت لاكارط نجبد شي فلوس ساعة نسيثا هنايا ورجعت ليلا ، وفايناهو العزيز خاك ؟
يامنة : شوف لاين قبط ، ما يكو غي خرج يشري الشمة ،
كنت مشي نعيطلك نقلك غدا خالتي وبنتا مشي يمشيو للسعيدية وقالولي نمشي حتى يانا معاهم ، كا نمشي كا لا ؟
عبسلام : غي سير . حتى يانا دابا نكون تما وقيلا ، ولايني ما دعومشاي
يامنة : أويلي كا يانا أنعرف نعوم
عبسلام : ايوا صافي غي سير معاهم
يامنة : حتى دعيطلي مناين دكون تم صافي
عبسلام : واخا صافي
عبسلام قرر باش يمشي للسعيدية ، فالصباح ناض بكري هو وبوعلام ووجدو راسم وشدو الطاكسي ديريكت للسعيدية .
عبسلام ما أيعرفشاي يعوم مزيان ، قيال غي يبرتشن فالما بحاد الشورط أصفر كبير عليه عطاهلو بوعلام ، كانو كل مرة أيمشي يعوم وحيد ولاخور أيكلس يحطي الحوايج ، واحد الساعة عبسلام غطس حا الغطسة ومناين خرج صاب راسو هو فجيه وداك الشورط فجيه ، بقاو شي حيابر حداه أيموتو بالطحك ، وجابولو داك الشورط لبسو وعقدو مزيان بالخيط وخرج فيه الهيمري دالدجوع ، كلاو داك الشي دي جابو معاهم وبقى متكي فالرملة وداك مول عسيلة ومول اتاي ومول الهندية ومول بولو غي ماشيين ماجيين حداه ما شراشي حتى على وحيد فيهم . حاد الساعة رفد التيليفون وعيط ليامنة
عبسلام : ألو فاي راك ؟
يامنة : ما راحناشاي فالسعيدية راحنا فحاد الموطع مزيان حدا السعيدية أيجيولو غي العائلات حتى لليل عاد نجيو للسعيدية نتفرجو فالستاتي
عبسلام : إيوا صافي مناين دوصلو لاغيلي
يامنة جات للسعيدية وعيطات لعبسلام تلاقاها هي وخالتا وبنت خالتا حدا لافوار وقف معاهم حاد الشواي حدا داك المصيبة دداك الفرفارة الكبيرة دي أدور la manège شوية وبنت خالتا قالتلا سيرو ركبو انتي وخطيبك
يامنة حشمات وقالتلا لا ، جات خالتا قالتلا ما فيها والو غير سيري . عبسلام حتى هو حشم ولايني شجعوه . مشى قطع جوج ورقات بألف ريال (واخا هو ألف ريال دوصلو حتى لواد امليل) المهم طلعو فداك السخط ، غي هي دارت بيهم حاد الربعة دورات وهي دخسر وبقاو معلقين فالسما هوما الفوقانيين ككل ومربوطين وعبسلام بداك الرجلاين طوالين ايفركل ويامنة حداه ادزكي بالعاداو ، ايوا نخليوهم تما على ما يجيو صحاب البومبية يعتقوهم ههههههههه وإلى اللقاء في الجزء المقبل بحول الله
دامت لكم البسمة.

توقيع: عزيز البورقادي

تصنيف : المنتديات الثقافية,طرائف تسولية