بوحيول ولفقيه دالجامع

بسم الله والصلاة والسلام على الحبيب المختار ما تظلم ليل وشرقت شمس النهار.
طرع الحلابة ما يتعصر، والمفضوح بغربال ما يتستر، طغى الباطل علا شانو وطلعلو القدر والحق غيب وجاه ما بقى ظهر، الشبعان ما انتبه لجوع العديم، القوي ما رحم الضعيف ولا حن عاليتيم، غابت الرحمة من قلوب الإنسان، ما كاين غا راسي أراسي، دعطاه الله عايش والمسكين محروم يقاسي.

زمان هذا لحقناه، الدري ما يحشم من باه، الكسوة على طهرو فاضحاه وراسو مطراسي، والبنت دخرج بوجاها صابغاه كالتعريجة خاصو غي اللطاسي، والسروال عالركابي تاقباه وخنافرا كالعجلة بالخراسي، والراجل مسكين تمارة قاثلاه، والمرا حايرة غي فاللباسي، هالقصيرة ،هاالطويلة، هاالطرز الرباطي هاالشربيل الفاسي، والراجل مالعام للعام عاد يشري شطيطة يعملا على قفاه، ما يهمو لباس غير مع الزمان مقاسي. زمان هذا يخلع، الفار على كتاف القط ربع، القطعان سارحاها دياب جياع، التعلب صاحب السلوgي وفالزريبة ترع، وفالركنة gلس ضبع موطن مgنع لا حس منو يتسمع ولا غواثو يخلع.
بوحيول واخا الفقر وشحال من دري، معقول ودغري بصح دبرثو مقيحة يلا ما طلاثك دوصلك منا الريحة،
سي محند سي الهاشمي فقيه َمالقشاقشية ومن داك الناس الفهايمية، أيحشي خنافرو فكلشي،. مأيفلث لا دماجي على الطريق ولا دماشي، مكراش والزردة واخا فبغداد ما يفلثاشي.
علم النوبة فبوحيول نهار لارباع، والجماعة كلشي مسَوق مكاينشي مع من دجمع، من غير لمقدم كان عامل لغدا لشيخ الفلاحة خرج يقوم شي زرع، وعرض حتى على لفقيه يتغدا فالمجمع.
وصل وقت لغدا والمرا دبوحيول دبحث فرخ دلقنية وموجدة، غرفث للفقيه الفخيذاث وحاليديدة، وخلاث لولادا الطهيورة والرويسة لديدة، ومشاث مع ولدا وعباث النوبة فيدا.
مع الوصول ديالا لباب الجامع، صابث لفقيه أيقول لولدو لمرتب وهي أدسمع: يالاه أبلحول لاخور لعند لمقدم دغسل كرشك وداكل الخبز مصبنة ودتبرع، يلا عولت على بوحيول والله فكرشك ما دشبع، يلا تهلا فيك يجيبلك شي شنتوفة دشي شgروفة شاطثلوا السوق دكاز ملارباع، أو يجيبلك شي طبسيل دالمنgوب الكزوط فيع أيرتع.
مراث بوحيول سمعث داك الهدرة، وردث داك الغدا لحيابرا، ومني جا بوحيول عاودثلوا شني طرا، وفالعشا عرض للفقيه وما جبدلو لا حس ولا جرة.
بوحيول كما عادثو ما يزرب فدقثو خاصو يقبط صاحب دعوثو غافل ويعطيه دقة دالمقاثل.
نعاينوا بوحيول نشوفوه كيف ماشي ينتقم مالفقيه، وحتى لداك النهار نقولكم:
وعلى المودة نتقاشعوا.

توقيع: أنوار زياد

تصنيف : الثقافة التسولية,طرائف تسولية